Taimi ʻOku Lea Ai ʻi ha Lea ʻe Taha ʻa e Tokotaha-ʻApí
1. Ko e hā ʻoku ʻi ai ai ha fiemaʻu fakautuutu ki he ngāue fāitaha ʻi hono ngāueʻi ʻo e feituʻu ngāué?
1 ʻOku faʻa toutou maʻu ʻe he kau malanga ʻo e Puleʻangá takatakai ʻi he māmaní ʻa e kakai mahuʻingaʻia ʻa ia ʻoku nau lea ʻi ha lea kehe mei he lea ko ia ʻa e fakatahaʻangá. Ke tokoniʻi fakalaumālie ʻa e faʻahinga peheé, ʻoku ʻiloʻi ʻe he ngaahi vaʻa lahi ʻa e fiemaʻu ko ia ke fokotuʻu ha ngaahi kulupu mo e fakatahaʻanga ʻi he lea ko iá. Koeʻuhi ʻoku leaʻaki nai ʻa e ngaahi lea lahi ʻi ha feituʻu ʻe taha, ʻe malanga nai ai ʻa e ngaahi fakatahaʻanga ʻo e lea kehekehe ʻi he feituʻu ngāue tatau. ʻE ngāue fāitaha fēfē nai ʻa e ngaahi fakatahaʻangá koeʻuhi ke fakapapauʻi ʻoku fakahoko ʻa e ngāue fakamalangá ʻi ha founga maau?—1 Kol. 14:33.
2. ʻI he malanga he matapā ki he matapaá, te tau ngāue fāitaha fēfē nai mo ha kulupu pe fakatahaʻanga lea kehe ʻi hotau feituʻú?
2 Ngāue Fāitaha Lelei: ʻI hono fai ʻo e ngāue ʻi he halá pe faifakamoʻoni ʻikai ʻi he founga anga-mahení, ʻoku totonu ke ongoʻi tauʻatāina ʻa e tokotaha malangá ke fakalea ki ha taha pē, ʻo kau ai ʻa e faʻahinga ʻoku nau lea nai ʻi ha lea ʻe taha, ʻo tuʻuaki ʻa e ʻū tohí ʻi he lea ʻoku fie lautohi ai ʻa e tokotahá. Kae kehe, ʻi he ʻalu fale ki he fale ʻi he feituʻu kaungāʻapi ʻa ia ʻoku toe ngāueʻi ʻe ha kulupu pe fakatahaʻanga ʻi he lea ʻe tahá, ʻoku totonu ki he tokotaha malangá ke tokangataha pē ki he ngaahi ʻapi ʻo e faʻahinga ʻoku lea ʻi he lea ʻa e fakatahaʻanga ʻoku kau ki ai ʻa e tokotaha malangá. ʻI he taimi ʻoku malanga ai ʻa e ngaahi fakatahaʻanga kehekehe ʻi he feituʻu kaungāʻapi tataú, ʻoku mahuʻinga ʻaupito ke ʻi ai ha lēkooti lelei. ʻOku totonu ke fetuʻutaki ʻa e kau ʻovasia ngāué fakaekinautolu ʻo fokotuʻutuʻu ʻa e ngaahi meʻá ʻi he founga te nau felotoi lelei ki aí. (Pal. 11:14) Kae kehe, kapau ʻoku fai ha fetaulaki mo ha tokotaha ʻoku lea ʻi ha lea ʻe taha ʻi he ʻalu he matapā ki he matapaá pea ʻoku ʻikai ha ngaahi fakatahaʻanga ʻi he lea ko iá ʻe ofi mai, ʻoku totonu ke feinga ʻa e tokotaha malangá ke fai ha fakamoʻoni pea ke ne tokangaʻi ʻa e tokotaha mahuʻingaʻiá.
3. ʻOku totonu ke fēfē ʻetau fakafeangaí ʻi he taimi ʻoku tau fetaulaki ai mo e kau malanga mei ha kulupu pe fakatahaʻanga lea kehe ʻoku nau ngāue ʻi he feituʻu ngāue tatau mo kitautolu?
3 Ko e Ngāue Tatau: ʻOku totonu ke fēfē hono fakahoko ʻo e ngaahi meʻá ʻi he taimi ʻoku malanga ai ʻa e kau malanga mei he ngaahi fakatahaʻanga kehekehe ʻi he feituʻu kaungāʻapi tatau ʻi he ʻaho tatau? Ko e moʻoni, ko e ʻofa faka-Kalisitiané ʻe mahulu hake ia ʻi ha ʻā vahevahe fakaelea pē, pea ʻe tokanga tefito ʻa e tokotaha kotoa pē fekauʻaki mo e ngaahi fiemaʻu ʻa e kakai ʻi he feituʻu ngāué. (Sione 13:34, 35) Ko ia ai, ko e faʻahinga ʻoku takimuʻá te nau fakahāhā ʻa e fakaʻatuʻi mo e ʻofa ʻi hono fai ʻo e fili pe ʻe hiki fakataimi ha kulupu ʻe taha ki ha feituʻu ngāue kehe.—Sem. 3:17, 18.
4. Ko e hā ʻa e kikite ʻoku fakahoko he ʻaho ní?
4 Naʻe kikiteʻi ʻe he Tohi Tapú ʻe fanongo ʻa e kakai ʻo e lea kehekehe ki he ongoongo leleí. (Fkh. 14:6, 7) ʻI he ngāue fāitaha vāofi ʻa e faʻahinga kotoa ʻoku kau ki aí, ʻe lava ke kalofi ai ʻa e ʻaʻahi ki he ʻapi tatau ʻa ha kau malanga ʻi he lea mo e fakatahaʻanga kehekehe pea ʻe aʻu ai mo e ongoongo leleí ki he faʻahinga foʻou tokolahi, ʻo kau ai ʻa e faʻahinga ʻoku nau lea ʻi ha lea ʻe tahá.—Ef. 4:16.