Fakatupulaki ʻa e Malaʻe Lea Mulí

1. Ko e hā ʻa e faingamālie kuo malanga hake ʻi heʻetau kau ki he ngāue fakamalanga ʻi hotau feituʻu ngāue kuo vaheʻi maí?

¹ Naʻe tomuʻa tala ʻe Sīsū Kalaisi ʻe malangaʻi ʻa e ongoongo leleí ʻi he māmaní kotoa “koe mea fakamooni ki he buleaga kotoabe.” Ko e mahuʻinga ʻo e ngaahi lea ko iá ʻoku ʻiloʻi ia ʻe he kau faifekau kotoa ʻoku kau ʻi he ngāue fakamalanga mo fakafaiakó. (Mt. 24:14, PM; 28:19, 20) ʻI heʻetau ʻalu he malangá mo e ngaohi ākongá, ʻoku tau maʻu nai ai ʻa e kakai mei he ngaahi fonua kehekehe ʻoku nau leaʻaki ʻa e lea ʻoku kehe mei heʻetau leá. ʻOku taau foki ʻa e faʻahinga ko ʻení mo ha faingamālie ke fanongo ai ki he pōpoaki ʻo e Puleʻangá pea tuʻu mālohi maʻá e moʻoní ki muʻa ke hoko mai ʻa e ʻaho fakalilifu ʻo Sihová. (Mal. 3:18) ʻE lava fēfē ke tau fakatupulaki ʻa e malaʻe lea muli ʻi hotau feituʻu ngāue kuo vaheʻi maí?

2. ʻI he founga fē ʻoku tau faʻifaʻitaki ai kia Sihova ʻi heʻetau lea ki he niʻihi ʻoku kehe ʻenau leá?

² Tapua Atu ʻa e Vakai ʻa Sihova ki he Faʻahinga ʻOku Lea ʻi ha Lea Kehé: Ke tapua taʻefilifilimānako atu ʻa e ʻofa ʻa Sihova ki he tokotaha kotoa ʻi hotau feituʻu ngāué, kuo pau ke tau maʻu ha holi lahi ke tokoniʻi ʻa e kakaí ke nau ʻilo totonu ki he ʻOtua moʻoní, ʻa Sihova, ʻo tatau ai pē pe ko e lea fē nai ʻoku nau leaʻakí. (Sāme 83:18; Ng. 10:34, 35) Neongo ʻoku tau tokanga tefito ki he faʻahinga ʻoku nau leaʻaki ʻa e lea ʻo e fakatahaʻanga ʻoku tau kau ki aí, kuo pau ke tau tokanga ki he ngaahi fiemaʻu ʻa e faʻahinga ʻoku nau lea ʻi ha lea kehé pea kumi ki ha ngaahi founga ke vahevahe atu ai kia kinautolu ʻa e pōpoaki ʻo e Puleʻanga ʻo e ʻOtuá. Ke fakaliʻeliʻaki ʻa e faʻahinga ʻoku lea ʻi ha lea kehé ʻe ʻikai ke fehoanaki ia mo e taumuʻa ʻa Sihova ke faifakamoʻoni ki he kakai ʻo e ngaahi puleʻanga kotoa pē. ʻE anga-fēfē leva haʻatau tokoniʻi nai ʻa e kakai ʻoku ʻikai te tau lea tatau?

3. Ko e hā ʻa e meʻangāue ʻaonga kuo tokonaki mai maʻatautolú, pea ʻe lava fēfē ke tau mateuteu ke ngāueʻaki ia?

³ Ngāueʻaki ʻa e Good News for People of All Nations: Kuo faʻu ʻa e kiʻi tohi ko ení ke ngāueʻaki ʻi he taimi ʻoku tau fetaulaki ai mo e faʻahinga ʻoku ʻikai te tau lea tataú. Faʻo holo maʻu pē ʻa e kiʻi tohi ko ení, ʻai ke alāanga mo e ngaahi konga kehekehe ʻi lotó, pea mateuteu ke ngāueʻaki ia. Ke vave hono ngāueʻakí, fakaʻilongaʻi ʻa e ngaahi lea kehekehe ʻokú ke fetaulaki mo ia ʻi ho feituʻu ngāué. Kapau ʻoku ala maʻu ʻa e ʻū tohí ʻi he ngaahi lea ko ʻení, ʻoku ʻaonga nai ke maʻu ha ʻū tohi ʻe niʻihi ke tuku ʻi he tokotahá hili hono ngāueʻaki ʻa e pōpoaki ʻi he kiʻi tohí.

4. ʻE lava fēfē ke ngāueʻaki ʻi heʻetau ngāue fakafaifekaú ʻa e kiʻi tohi Nations?

⁴ Kapau te ke fetaulaki mo ha taha ʻi he ngāue fakafaifekaú ʻoku lea ʻi ha lea kehe pea ʻoku ʻikai te ke fakapapauʻi pe ko e hā ʻa e lea ʻokú ne leaʻakí, kamataʻaki hono fakaʻaliʻali ʻa e takafi ʻo e kiʻi tohí. Huke ki he mape ʻi he loto takafí, tuhu kia koe pea mo e fonua ʻokú ke nofo aí, peá ke fakahaaʻi ange te ke saiʻia ke ʻilo ʻa e feituʻu ʻoku haʻu mei ai ʻa e tokotaha-ʻapí pea mo e lea ʻokú ne leaʻakí. Hili hoʻo fakapapauʻi pē ʻa ʻene leá, sio ki he ngaahi meʻa ʻi lotó, kumi ʻa e peesi feʻungamālié, fakahanga ʻa e tokanga ʻa e tokotaha-ʻapí ki he sētesi ʻoku lanu ʻuliʻuli matolu ʻi ʻolunga he pēsí, pea fakahaaʻi ange leva ʻokú ke loto ke lau mai ʻe he tokotaha-ʻapí ʻa e pōpoakí. ʻI he ʻosi ʻene laú, tuʻuaki ha tuleki ʻi heʻene leá pe tuhu ki he sētesi ʻoku fakaʻilongaʻi lanu kuleí, ʻa ia ʻoku hā ai ʻokú ke loto-lelei ke toe foki atu mo ha tohi ʻi he lea tonu ʻa e tokotaha-ʻapí. Pea tuhu leva ki he kupuʻi lea lanu ʻuliʻuli matolu ko “hoku hingoá,” pea fakahaaʻi mahino ange ho hingoá. Tuhu ki he konga lanu ʻuliʻuli matolu ko “ho hingoá,” pea tatali ke tala mai ʻe he tokotaha-ʻapí. Fai ha fokotuʻutuʻu pau ki ha toe ʻaʻahi.

5. Ko e hā ʻa e meʻa hoko ʻoku totonu ke tau fai ke tokangaʻi lelei ai ʻa e faʻahinga mei ha lea kehe ʻoku nau fakahaaʻi ha mahuʻingaʻiá?

⁵ Fokotuʻutuʻu ʻo e Meʻa ke Fai: Kuo pau ke fai ha feinga ke ʻaʻahi ai ki he faʻahinga ʻoku hā mei ai ʻa e mahuʻingaʻia ʻi he pōpoaki ʻo e Puleʻangá, ʻo tatau ai pē pe ko e lea fē ʻoku nau leaʻakí. ʻI heʻetau fakapapauʻi pē ʻoku ʻi ai ha mahuʻingaʻia ʻi he ʻOtuá mo ʻene Folofolá, ko e Tohi Tapú, ʻoku totonu ke tau fakafonu ʻa e foomu Please Follow Up (S-43) pea ʻave leva ia ki he sekelitali ʻa e fakatahaʻangá ke ʻoatu ki he kulupu pe fakatahaʻanga lea feʻungamālie ʻi homou feituʻú koeʻuhi ke lava ke fai ha ʻaʻahi ki he tokotaha mahuʻingaʻiá ʻe ha taha ʻokú ne lava ʻo lea ʻi heʻene leá. ʻI he taimi ʻoku ʻi ai ai ha ngaahi kulupu pe fakatahaʻanga lea muli ʻi homou feituʻú, ʻoku totonu ke fakahoko ʻa e meʻá ni ʻi he taimi pē ʻoku maʻu ai ʻa e faʻahinga ʻoku nau lea ʻi he lea ko iá.

6. Kapau te tau fetaulaki mo ha taha mahuʻingaʻia ʻokú ne lea ʻi ha lea kehe, ko e hā ʻa e fatongia ʻoku tau maʻú?

⁶ Mei he taimi kuo ʻoatu ai ʻa e foomu S-43 kae ʻoua leva kuo fai ha ʻaʻahi ki he tokotaha mahuʻingaʻiá ʻe ha tokotaha malanga ʻa ia ʻokú ne lea ʻi heʻene leá, ʻe mahili atu nai ha kiʻi taimi. Ko ia ai, ʻi ha feinga ke fakatupulekina ʻa e mahuʻingaʻia kuo haá, ko e tokotaha malanga naʻá ne ʻave ʻa e foomu S-43 te ne hokohoko atu nai ke fakatupulekina ʻa e mahuʻingaʻiá kae ʻoua leva kuo fetuʻutaki ki ai ha taha ʻokú ne lea ʻi heʻene leá. ʻI he ngaahi tuʻunga ʻe niʻihi, ʻe fakahoko nai ha ako Tohi Tapu mo e tokotaha mahuʻingaʻiá. Kae kehe, lolotonga ʻa e tatali ke fai atu ha ʻaʻahí, ʻe anga-fēfē nai hano maʻu ʻe ha tokotaha malanga ha ʻū tohi ʻi he lea ʻa e tokotaha ʻokú ne fakahaaʻi ʻa e mahuʻingaʻiá?

7. Ko e hā ʻa e founga ki hono maʻu ʻa e ʻū tohí ʻi he lea ʻa e faʻahinga ʻoku tau fetaulaki nai mo iá?

⁷ ʻŪ Tohi Maʻá e Lea Kehe: ʻOku ʻikai totonu ke tauhi ʻe he ngaahi fakatahaʻangá ha ʻū tohi lahi ʻi ha ngaahi lea kehe. Kae kehe, kapau ʻoku fakapapauʻi ʻe he ʻovasia ngāué ʻoku tupulaki ha mahuʻingaʻia ʻi ha kulupu lea pau, te ne ʻiloʻi nai ʻoku feʻungamālie ke tauhi ha ʻū tohi feʻunga ʻi he lea ko iá ke ngāueʻaki ʻe he kau malangá. Kapau ʻoku ʻikai ke ala maʻu ha ʻū tohi ʻi he fakatahaʻangá, ʻe ʻota nai ia. ʻE kiʻi fuoloa nai kae toki aʻutaki mai ha ʻū tohi ʻi ha lea pau. Ko ia ai, ʻoku ala maʻu ha founga ke pulusi mai ʻa e ʻū tohí mei he www.watchtower.org. ʻOku lahi ʻa e ʻū tohi ʻi he ngaahi lea ʻe laui ngeau ʻe lava ke maʻu vave ia ʻe he tokotaha malangá pe ko ha tokotaha mahuʻingaʻia. ʻOku ʻikai ha veiveiua ko e tokonaki ko ení ʻe fakamoʻoniʻi ʻene ʻaongá ʻi hono fakatupulekina ʻa e mahuʻingaʻia ʻoku fakahaaʻi ʻe he faʻahinga ʻoku lea ʻi ha lea kehé.

8. Ko e hā ʻa e ngafa ʻoku fakahoko ʻe he fakatahaʻangá ʻi hono fakatupulekina ʻa e mahuʻingaʻia ʻo e faʻahinga ʻoku lea ʻi ha lea kehé?

⁸ Ngafa ʻo e Fakatahaʻangá: ʻI he ngaahi tuʻunga ʻe niʻihi ʻa ia ʻoku tupu ai ʻa e tokolahi ʻo e kakai muli nofo hilí, ʻoku ʻikai nai ke ʻi ai ha fakatahaʻanga ofi ʻokú ne fakahoko ʻa e ngaahi fakatahá ʻi he lea ko iá. Ko ia ai, ko e faʻahinga mahuʻingaʻia ʻoku lea ʻi ha lea kehé ʻoku totonu ke fakaafeʻi ke nau maʻu hoʻo ngaahi fakatahá. Ko e talitali māfana mo e mahuʻingaʻia fakafoʻituitui ʻoku fakahāhā kia kinautolú ʻe fakaʻaiʻai nai ai kinautolu ke feohi maʻu pē. ʻI he ʻuluaki taimí, ʻe ʻi ai nai ha ʻā vahevahe fakaelea mo fakafonua; kae kehe, ʻoku ʻikai ha ʻā vahevahe ia ki he ʻofa faka-Kalisitiane moʻoní ʻi he feohiʻanga ʻi māmani lahi ʻo e Kau Fakamoʻoni ʻa Sihová. (Sef. 3:9; Sione 13:35) ʻOkú ke poto ʻi hano leaʻaki ha lea kehe? Kapau ʻoku pehē pea ʻokú ke loto-lelei ke fai ha ngaahi toe ʻaʻahi ʻi he lea ko iá, kātaki ʻo fakahā ki he sekelitali ʻa hoʻo fakatahaʻangá. ʻE tokoni ʻeni ki he taimi ʻoku kumi ai ʻe he ʻōfisi vaʻá ha kau malanga ʻoku nau malava ʻo lea ʻi ha lea kehe ʻa ia ʻe toki tataki kinautolu ki he ngaahi feituʻu ʻoku ʻi ai e fiemaʻú.

9. Ko fē ʻa e taimi nai ʻe ʻaonga ai ki he kau malangá ʻa e fakahinohino ki he leá, pea ʻoku anga-fēfē hono fakahoko ení?

⁹ Fakahinohino ki he Leá: ʻI hoʻo tokoniʻi ha faʻahinga ʻoku lea ʻi ha lea kehe, ʻoku lelei tahá ke ke fakalototoʻaʻi kinautolu ke nau kamata ʻalu ki ha fakatahaʻanga ʻi heʻenau leá tonu kapau te nau malava ʻo fai pehē. Kae kehe, kapau ʻoku ʻikai ke malava ia, ʻe fakapapauʻi nai ʻe ha kau malanga ʻe niʻihi ke ako ha lea kehe pea nau malava ʻo fai ha tokoni lelei ange ki he faʻahinga mahuʻingaʻiá. Kapau ʻoku ʻikai ke ʻi ai ha fakatahaʻanga ofi, ʻe fakapapauʻi nai ʻe he ʻōfisi vaʻá makatuʻunga ʻi he lahilahi ʻo ha kakai muli nofo hili mai pe kakai tonu he feituʻú, ʻe ʻaonga hano fokotuʻu ha kalasi ako lea. Kapau ko e tuʻungá leva eni, ʻe fakahā ʻe he ʻōfisi vaʻá ki he ngaahi fakatahaʻanga ofi maí ʻoku ʻi ai ʻa e fiemaʻu pea fokotuʻutuʻu ke fai ha fanongonongo fekauʻaki mo ha kalasi ako lea. Ko e faʻahinga ʻoku kole ke kau ki he ako leá ʻoku totonu ke nau fokotuʻu ʻa e taumuʻa ko e hiki ki he kulupú pe fakatahaʻangá ke tokoni ki hono fakatupulaki ʻa e malaʻe lea ko iá.

10. Ko fē nai ʻa e taimi ʻe fokotuʻu ai ha kulupu lea muli, pea ʻoku anga-fēfē hono fakapapauʻi ení?

¹⁰ Fokotuʻu ha Kulupu: Ke malava ʻo fokotuʻu ha kulupu ʻi ha lea pau, kuo pau ke aʻusia ʻa e fiemaʻu tefito ʻe fā. (1) ʻOku totonu ke ʻi ai ha mahuʻingaʻia lahi feʻunga pea malava ke ʻi ai ha tupu ʻi ha malaʻe lea pau. (2) Ko ha kiʻi kulupu tefito ʻo ha kau malanga ʻoku totonu ke nau ʻilo ʻa e leá pe ako ʻa e leá. (3) ʻOku totonu ke ʻi ai ha mātuʻa pe sevāniti fakafaifekau taau ke ne tataki mo fakahoko ʻo ʻikai toe siʻi hifo ʻi he fakataha fakauike ʻe taha ʻi he lea ko iá. (4) ʻOku totonu ke loto-lelei ha kulupu ʻo e kau mātuʻá ke poupouʻi ʻa e kulupú. ʻI hono aʻusia ʻa e ngaahi fiemaʻu ko ení ʻo aʻu ki ha tuʻunga feʻunga, ʻe tohi leva ʻa e kulupu ʻo e kau mātuʻá ki he ʻōfisi vaʻá ʻo fekauʻaki mo e fakaikiiki ʻo e kulupú pea te nau kole hano tali fakaʻofisiale ke hoko ko ha fakatahaʻanga ʻoku nau poupouʻi ha kulupu lea muli. (Sio ki he Fokotuʻutuʻu Maau, p. 106-107.) Ko e mātuʻa pe sevāniti fakafaifekau ʻokú ne tatakí ʻe lau ia ko e “ʻovasia kulupu” pe “sevāniti kulupu” ʻoku fakafatongiaʻaki ke ne tokangaʻi ʻa e kulupú.

11. Ko e hā ko ha monū ai ke fakatupulaki ʻa e malaʻe lea muli ʻi hotau feituʻu ngāue kuo vaheʻi maí?

¹¹ Ko hono fakatupulaki ha malaʻe lea muli ʻi hotau feituʻu ngāue kuo vaheʻí ko ha konga mātuʻaki mahuʻinga ia ʻo e feingangāue fakamalanga ʻi māmani lahí, ʻa ia naʻe fakahoko ʻe hotau Faʻifaʻitakiʻangá ko Sīsū Kalaisi. ʻOfa ke tau faivelenga ʻi hono fakahoko ʻetau tafaʻakí pea sio ki he founga ʻo e hokohoko atu ke luluʻi ʻe Sihova ʻa e ngaahi puleʻangá pea ʻomai ʻa e ngaahi meʻa manakoa kiate iá. (Hak. 2:7) He fakafiemālie ē kia kitautolu ke tau fengāueʻaki kakato ʻi he feinga ko ení! ʻOfa ke tāpuakiʻi ʻe Sihova ʻetau ngaahi feinga fāʻūtaha ke fakatupulaki ʻa e malaʻe lea muli ʻi hotau ngaahi feituʻu ngāué taki taha ʻi heʻetau manatuʻi maʻu pē tatau ai pē pe ko e hā ʻa e ngaahi ʻā vahevahe ʻo e lea ʻa e tangatá, ʻe lava ke ʻai ia ʻe he ʻOtuá ke tupu!—1 Kol. 3:6-9.