Fakaleleiʻi ʻEtau Pōtoʻi ʻi he Ngāue Fakafaifekaú—Faifakamoʻoni ki ha Taha ʻOku Lea ʻi ha Lea Kehe

ʻUhinga ʻOku Mahuʻinga Aí: ʻOku mahuʻingaʻia ʻa Sihova ʻi he tuʻunga lelei fakalaumālie ʻo e kakai “ʻi he puleʻanga kotoa pē.” (Ngā. 10:34, 35) Ko ia ai, naʻe fakahaaʻi ʻe Sīsū ko e ongoongo leleí ʻe malangaʻi “ʻi he kotoa ʻo e māmani kuo nofoʻí” pea “ki he ngaahi puleʻanga kotoa pē.” (Māt. 24:14) Naʻe kikiteʻi ʻe Sākalaia ko e kakai “mei he ngaahi lea kehekehe ʻo e ngaahi puleʻanga,” te nau tali ia. (Sāk. 8:23) Fakatatau ki he vīsone ʻa e ʻapositolo ko Sioné, ko e faʻahinga ʻe hao ʻi he fuʻu mamahi lahí ʻe kau ai ʻa e faʻahinga tāutaha “mei he kotoa ʻo e ngaahi puleʻanga mo e ngaahi matakali mo e ngaahi kakai mo e ngaahi lea.” (Fkh. 7:9, 13, 14) ʻI he vakai ki he meʻa ko iá, ʻi he taimi ʻoku tau fetaulaki ai mo ha taha ʻi hotau feituʻu ngāué ʻoku lea ʻi ha lea kehe, ʻoku totonu ke tau feinga ke faifakamoʻoni kiate ia.