MOʻUI KO HA KALISITIANE
Fakaleleiʻi ʻEtau Pōtoʻi ʻi he Ngāue Fakafaifekaú—Aʻu ki he Tokotaha Kotoa ʻi Hotau Feituʻu Ngāué
ʻUHINGA ʻOKU MAHUʻINGA AÍ: Naʻe kikiteʻi ʻe Sākalaia ko e kakai mei he ngaahi lea kotoa pē ʻo e ngaahi puleʻangá te nau tali lelei ʻa e ongoongo leleí. (Sāk. 8:23) Ka ko hai te ne akoʻi kinautolú? (Loma 10:13-15) ʻOku tau maʻu ʻa e monū mo e fatongia ke vahevahe atu ʻa e ongoongo leleí ki he tokotaha kotoa ʻi hotau feituʻu ngāué.—od 84 ¶10-11.
FOUNGA HONO FAI IÁ:
Teuteu. ʻOkú ke fetaulaki mo ha kakai ʻoku nau lea ʻi ha toe lea ʻe taha? ʻE lava ke ke ngāueʻaki ʻa e JW Language app ke ke ako ai ha sīpinga tuʻuaki faingofua. Pe ʻi hono ngāueʻaki hoʻo telefoni toʻotoʻó, ʻe lava ke ke fakahaaʻi ki ha taha ʻa e founga ʻe lava ke ne maʻu ai ha fakamatala lahi ange ʻi heʻene leá ʻi he jw.org
Hoko ʻo fakatokanga meʻa. Kapau ʻokú ke ngāue fale ki he fale, ʻoua ʻe tukunoaʻi ʻa e faingamālie ke faifakamoʻoni ai ki he faʻahinga ʻoku fakalaka haké pe faʻahinga ʻoku tatali ʻi he meʻalelé. Kapau ʻokú ke kau ʻi he faifakamoʻoni ʻi he feituʻu kakaí, tokangataha ki hoʻo taumuʻa ke fai ha fakamoʻoní
Hoko ʻo faivelenga. Hanganaki feinga ke aʻu ki he faʻahinga ʻoku ʻikai ke ʻi ʻapi ʻi he ʻuluaki ʻaʻahí. Feinga ke fetuʻutaki ki he tokotaha ʻi he ʻapi kotoa pē, ʻi ha taimi kehe nai ʻo e ʻahó pe ʻi ha ʻaho kehe ʻo e uiké. ʻOku fiemaʻu nai ki he faʻahinga ʻe niʻihi ʻi he ʻapí ke fetuʻutaki tohi ki ai, telefoni, pe faifakamoʻoni ki ai ʻi he halá
Muimuiʻi. Toe foki vave ke muimuiʻi ha mahuʻingaʻia pē naʻe fakahaaʻi. Kapau ʻoku lea ʻa e tokotahá ʻi ha lea kehe, feinga ke maʻu ha taha ʻoku taau ke ne tokoniʻi ia ʻi heʻene leá. ʻOku totonu ke ke toutou ʻaʻahi ki he tokotahá kae ʻoua kuo fetuʻutaki ki ai ʻa e kau malanga ʻoku nau lea ʻi heʻene leá.—od 94 ¶39-40
SIO ʻI HE VITIŌ MALANGA KI HE “FEITUʻU TAUPOTU TAHA ʻO E MĀMANÍ,” PEA LĀULEA KI HE NGAAHI FEHUʻÍ NI:
Ko e hā ʻa e ngaahi teuteu naʻe fai ʻe he fanga tokouá mo e fanga tuofāfiné ke fetuʻutaki ai ki he kakai ʻi he feituʻu ʻoku tuʻu mavahé? (1 Kol. 9:22, 23)
Ko e hā ʻa e ngaahi fakafaingataʻaʻiaʻanga naʻe pau ke nau ikuʻí?
Ko e hā ʻa e ngaahi tāpuaki naʻa nau maʻú?
Ko e hā ʻa e ngaahi feinga ʻe lava ke ke fai ke ke fetuʻutaki ai mo ha kakai tokolahi ange ʻi ho feituʻu ngāué?