MOʻUI KO HA KALISITIANE
Ngāue Fakataha ke Malanga ʻi ha Feituʻu Ngāue ʻOku Lea ʻi ha Lea Kehe
ʻOku faʻa tali lelei ange ʻe he kakaí ʻa e pōpoaki ʻo e Puleʻangá ʻi he taimi ʻoku nau fanongo ʻi hono fakahoko ia ʻi heʻenau lea tuʻufonuá. Ko e ʻuhinga nai ia ʻi he Penitekosi 33 T.S., naʻe fokotuʻutuʻu ai ʻe Sihova ki he “kau Siu mamahiʻi-lotu mei he puleʻanga kotoa pē ʻi he lalo langí” ke nau fanongo ki he ongoongo leleí ʻi heʻenau “taki taha lea tuʻufonuá,” neongo naʻa nau lea nai ʻi ha lea anga-maheni, ʻo hangē ko e lea faka-Hepeluú pe faka-Kalisí. (Ngā. 2:5, 8) ʻI he ʻahó ni, ko e feituʻu ʻoku lea ʻi he ngaahi lea kehé, ʻoku fai ai ʻe he ngaahi fakatahaʻangá ʻa e fakatahá ʻi ha ngaahi lea kehe ka ʻoku nau ʻi he feituʻu ngāue tatau pē. ʻE lava fēfē ke faifakamoʻoni fakataha ʻa e kau malangá ʻi he tuʻunga ko ha fakatahaʻanga pea ʻi he taimi tatau ke nau fakaʻehiʻehi mei hano toutou ngāueʻi ʻa e feituʻu ngāué ʻo fakaʻitaʻi ai ʻa e kakai ʻi he ngaahi ʻapí?
Fai ha Alēlea (Pal. 15:22): ʻOku totonu ki he kau ʻovasia ngāué ke nau alēlea fakataha ʻi ha founga te nau fāitaha ai ki hono fakamafola ʻa e ongoongo leleí. Kapau ʻoku fakangatangata ʻenau feituʻu ngāué, ko e ngaahi fakatahaʻanga ʻi he ngaahi lea kehé te nau loto nai ke tuku pē ʻa e ngaahi ʻapi ʻoku ʻi heʻenau feituʻu ngāué. Kae kehe, kapau ʻoku ʻikai malava ke nau ʻosiki maʻu pē ʻenau feituʻu ngāué koeʻuhi ʻoku nau movetevete ʻi ha ngaahi ʻēlia lahi, ʻe lelei nai kiate kinautolu ke ngāueʻi ʻa e ngaahi ʻapi ko iá kae fetuʻutaki ange ʻi he taimi ʻoku fakahāhā ai ʻe ha taha ha mahuʻingaʻia. (od 93 ¶37) Pe te nau kole nai ki hoʻo fakatahaʻangá ki ha tokoni ke ʻilo ki he faʻahinga ʻoku nau lea ʻi he lea ʻo ʻenau fakatahaʻangá pea ʻoange leva honau tuʻasilá ki heʻenau feituʻu ngāué. (km 7/12 puha ʻi he peesi 7) Fakatokangaʻi angé, ʻi he tuʻunga ʻe niʻihi, ʻoku lava ke leaʻaki ha lea laka hake ʻi he taha ʻi ha ʻapi. Ko e fokotuʻutuʻu ki hono ʻosiki ʻa e feituʻu ngāué ʻoku totonu ke fehoanaki ia mo e lao ki he totonu ʻo e tangatá.
Fengāueʻaki Fakataha (ʻEf. 4:16): Muimui tokanga ki ha faʻahinga tataki pē ʻokú ke maʻu mei hoʻo ʻovasia ngāué. ʻOkú ke fakahoko ha ako Tohi Tapu mo ha tokotaha ʻoku mahino ange kiate ia ʻa e lea ʻi he fakatahaʻanga ʻe tahá? ʻE fakalakalaka vave nai ʻa e tokotaha akó kapau te ke ʻave ʻa e akó ki ha fakatahaʻanga ofi mai pe kulupu ʻoku nau lea ʻi heʻene leá.
Teuteu (Pal. 15:28; 16:1): Kapau ko e tokotaha ʻoku haʻu ki he matapaá ʻi ho feituʻu ngāué ʻoku ne lea ʻi ha lea kehe, fai hoʻo lelei tahá ke vahevahe ʻa e ongoongo leleí. Te ke teuteu ʻaki hoʻo tomuʻa vakaiʻi ʻa e ngaahi lea ʻokú ke ʻiloʻi ʻoku nau lea aí pea hiki tokamuʻa ʻa e liliu Tohi Tapu ʻo e lea ko iá mo e ngaahi vitioó ki hoʻo meʻangāue toʻotoʻó. ʻE lava foki ke ke toe ngāueʻaki ʻa e JW Language app ke ako ai ki he fakafeʻiloaki ʻi ha lea ʻe niʻihi.