Fāʻūtaha ʻi he Founga Lelei Taha ʻo e Moʻuí
Kapau ʻoku hokohoko atu ʻa e kaka ki ʻolunga ʻa e tokolahi ʻo e māmaní, ʻe vavé ni pē ʻa e toko ono piliona ʻa e kakaí ʻi he māmaní. Neongo ko e tupu kotoa pē mei ha tupuʻanga tatau, ko e tokolahi tahá ʻoku ʻikai hā ʻoku nau lāuʻilo ko e kau mēmipa kinautolu ʻo ha fāmili fakalūkufua pea te nau faifakamatala ki ha Tokotaha-Fakatupu poto mo ʻofa. Ko e taʻefāʻūtaha mo e vākovi ʻi he vahaʻa ʻo e ngaahi puleʻangá, ngaahi matakalí, mo e ngaahi talatukufakaholó ʻoku ʻomai ai ʻa e fakamoʻoni fakapōpōʻuli ki he tuʻunga fakamamahi ʻo e meʻa ko ení.
ʻI HE vakai ki he ngaahi tuʻunga lolotonga ʻo e māmaní, ʻoku hā ngali ko ha taumuʻa ʻe taʻealamaʻu ʻa e fāʻūtaha fakalūkufuá. ʻOku pehē ʻe he The Columbia History of the World: “ʻI he fehuʻi mātuʻaki mahuʻinga ko ia ʻo e founga ke nofo fakataha aí, ko e māmani fakaeonopōní ʻoku ʻikai haʻane fakakaukau foʻou ʻe taha ke ʻomai, halaʻatā.”
Kae kehe, ko hono fakahoko ʻo e fāʻūtaha ʻi he lotolotonga ʻo e kau nofo kotoa ʻi he māmaní ʻoku ʻikai fiemaʻu ki ai ha fakakaukau foʻou. Ko e hala ki he fāʻūtahá ʻoku fokotuʻu mai ia ʻi he ngaahi Konga Tohitapu Māʻoniʻoní. ʻOku fakatefito ia ʻi he lotu ki he Tokotaha ko ia naʻá ne fakatupu ʻa e māmaní mo e moʻui kotoa ʻi aí. Ko e fāʻūtaha moʻoni ʻo e fakakaukaú, taumuʻá, mo e founga moʻuí kuo ʻosi ʻi ai ia ʻi he lotolotonga ʻo e kakai ʻa e ʻOtuá. ʻI honau tokolahi laka hake he toko nima mo e konga milioná ʻi he ngaahi fonua ʻe 233, ʻoku nau fāʻūtaha ʻi heʻenau tuipau ko e founga ʻa e ʻOtuá ki he moʻuí ʻa e founga lelei tahá. ʻI he hangē ko e tokotaha-tohi-sāmé, ʻoku nau lotu: “Huluhulu au ʻi ho hala, ʻEiki; kau haʻele ʻi hoʻo moʻoni. Ko hoku loto e ke ke fāʻūtaha ke ʻapasia ki ho huafa.”—Sāme 86:11.
Ko hono fakafāʻūtahaʻi ko eni ʻo e kakaí ʻi he lotu maʻá naʻe tomuʻa tala fuoloa ia ʻe he palōfita ko ʻAiseá. Naʻá ne tohi: “ʻE hoko ʻo pehe ʻi he kuonga ʻamui, ʻe fokotuʻu ʻa e moʻunga ʻo e fale ʻo Sihova ko e ʻulu ʻo e ngaahi moʻunga, pea ʻe mahiki hake ʻi he ngaahi foʻi maʻolunga; pea ʻe tafe ki ai ʻa e ngaahi kakai kotoa pe. ʻIo, ʻe ōange ʻa e ngaahi kakai lahi, pea te nau pehe, Haʻuā, ke tau ʻalu hake ki he moʻunga ʻo Sihova, ki he fale ʻo e ʻOtua ʻo Sekope; pea te ne ako kiate kitautolu hano ngaahi ʻalunga, pea te tau fou ʻi hono ngaahi founga.”—Aisea 2:2, 3.
Ko e fāʻūtaha ʻa e Kau Fakamoʻoni ʻa Sihová ʻoku makehe. Laka hake he ngaahi fakatahaʻanga ʻe 87,000 ʻi māmani lahi, ʻoku nau maʻu ʻinasi ʻi he meʻakai fakalaumālie tatau ʻi heʻenau ngaahi fakatahá ʻi he uike ki he uike. (Mātiu 24:45-47) Kae kehe, mei he vaeuaʻanga ʻo e 1998 ʻo aʻu ki he konga ki muʻa ʻo e 1999, naʻe fakahāhā ai ʻe he Kau Fakamoʻoní ʻenau fāʻūtahá ʻi ha toe founga ʻe taha—ʻaki ʻenau fakatahataha ʻi heʻenau ngaahi Fakataha-Lahi ʻaho tolu “Founga ʻa e ʻOtuá ki he Moʻuí” ʻi he māmaní kotoa. ʻI he ngaahi fonua ʻe 13, ko e ngaahi fakatahatahá ni naʻe kau ki ai ʻa e fuʻu kau fakafofonga mei he ngaahi fonua kehekehe pea naʻe ui ia ko e ngaahi fakataha-lahi fakavahaʻapuleʻanga. Ko e niʻihi ko e ngaahi fakataha-lahi fakavahe ia kuo ʻosi vaheʻi. Ka ko e kotoa ʻo e ngaahi fakataha-lahí ni naʻa nau fai ʻa e polokalama tatau ʻo e ngaahi meʻa lelei fakalaumālie.
He fakafiefia moʻoni ē ke vakai atu ki ha kau fakafofonga fiefia, teunga lelei ʻoku nau ʻaukolo mai ki he ngaahi faiʻanga sipoti mo e ngaahi sitētiumé ke akoʻi ʻe Sihova! Naʻe taau mo ia ʻa e fakamatala ʻa ha fakafofonga ʻe taha ki he fakataha-lahi fakavahaʻapuleʻanga naʻe fai ʻi Michigan, U.S.A. Naʻá ne pehē: “Ko ha fiefia moʻoni ē ke sio ki hotau fanga tokoua mei he māmaní kotoa—ko e Lepupilika Sekí, Pāpetosi, Naisīlia, Hungali, ʻIngilani, Hōlani, ʻItiōpea, Kīnia, mo e ngaahi fonua kehe lahi—ʻoku nau fefāʻofuaʻaki! Naʻe fakaʻofoʻofa ʻa e vakai atu ki he fanga tokouá ʻoku nau nofo fakataha ʻi he fāʻūtahá, ʻo fakatō loʻimata fiefia koeʻuhi ko e ʻofa ʻoku nau maʻu ʻiate kinautolú pea ki honau ʻOtua lahi ko Sihová.” ʻE sivisiviʻi ʻi he kupu hokó ʻa e polokalama ʻo e fakataha-lahí naʻe fiefia ai ʻa e laui miliona ʻi he kotoa ʻo e māmaní.
[Maʻuʻanga ʻo e Tā ʻi he peesi 3]
Mountain High Maps® Copyright © 1997 Digital Wisdom, Inc.