“Kuo Mou Liliu ʻa ʻEku Ongoʻi Fekauʻaki mo e Kau Fakamoʻoni ʻa Sihová”
KO E anga ia ʻo e tali ʻa ha ʻōfisa pilīsone Pōlani ʻe taha ki ha kupu fekauʻaki mo e ngāue ʻa e Kau Fakamoʻoni ʻa Sihová, hangē ko ia naʻe līpooti ʻi heʻetau ʻīsiu ʻo ʻOkatopa 15, 1998. Ko e kupú, “ʻI he Taimi ʻOku Tali Ai ʻe he Ngaahi Loto ʻOku Fefeká,” naʻe fakamoʻoniʻi ai ʻa e lavameʻa naʻe maʻu ʻe he Kau Fakamoʻoni ʻa Sihová ʻi he ngāue mo e kau nofo pilīsone ʻi Wołów, Pōlani.
Ki muʻa ʻi hono tukuange atu ki he kakaí ʻa e makasini Taua Leʻo naʻe lave ki ai ʻi ʻolungá, naʻe fokotuʻutuʻu ʻi Sepitema 13, 1998, ha fakataha makehe ke fai maʻá e kau nofo ʻi he pilīsone Wołów. Ko e faʻahinga ko ia naʻe fakaafeʻi ke nau maʻu iá naʻe kau ai ʻa e Kau Fakamoʻoni ʻi he feituʻú, ko e kau pōpula ʻosi papitaiso mo e faʻahinga mahuʻingaʻia kehe, mo ha kau ʻōfisa pilīsone. Ko hono hokó ko e niʻihi ia ʻo e ngaahi fakamatala naʻe fai ʻe he faʻahinga naʻa nau maʻu iá.
Ko Jerzy, ko e taha ʻo e Kau Fakamoʻoni ʻa Sihova ʻa ia naʻe papitaiso ʻi he pilīsoné laka hake he taʻu ʻe nima kuohilí, naʻá ne pehē: “ʻOku ou fiefia ʻaupito, he ʻoku lava ke u lau he ʻahó ni fekauʻaki mo e lahi ʻo e feinga kuo fai ʻe he fanga tokoua mei he ngaahi fakatahaʻanga ofi maí ke tokoniʻi kimautolú.” Naʻá ne tānaki mai ki ai: “ʻOku ou hokohoko feinga ke u fakalakalaka, pea ʻoku lava ke u sio ki he anga ʻo hono oʻi au ʻe Sihová.”
Ko e tokotaha pōpula ʻe taha, ko hono hingoá ko Zdzisław, naʻá ne pehē fekauʻaki mo e ngāue fakaefakamoʻoni ʻi he pilīsoné: “ʻI he lolotonga ní, ʻoku teuteu ai ʻa e kau pōpula ʻe toko fā ki he papitaisó, pea ʻoku hokohoko atu ʻa e maʻu ʻa e ngaahi fakataha ʻi homau holó ʻe he faʻahinga mahuʻingaʻia foʻoú. Ko e kupú ni ko ha fakaueʻiloto mālohi ia kiate kimautolu ki ha ngāue lahi ange ʻi he malaʻé ni.” Ko ha fakakaukau pau moʻoni ē, ʻi he vakai atu ʻoku kei toe ʻa e taʻu ʻe 19 ke ngāue ai ʻa Zdzisław ʻi he pilīsoné!
Hili hono lau ʻa e kupu fekauʻaki mo e pilīsone Wołów, naʻe pehē ʻe ha ʻōfisa pilīsone ʻe taha: “Kuo mau lāngilangiʻia tefito. Naʻe ʻikai ʻaupito te u fakakaukau ʻe maʻu ʻe he pilīsone ko ení ha fakahāhā pau ʻi he ngaahi lea ʻe 130 ʻi he māmaní. ʻOku ou saiʻia ʻi he kakai ko kimoutolú, pea ʻoku ou houngaʻia ʻi hoʻomou ngaahi ngāue mālohi maʻá e kau pōpulá.” Naʻe tānaki mai ʻe he ʻōfisa ʻe taha: “Kuo mou liliu ʻa ʻeku ongoʻi fekauʻaki mo e Kau Fakamoʻoni ʻa Sihová. Ki muʻá, naʻá ku vakai kiate kimoutolu ko ha kau lotu māfana tōtuʻa. Ka ʻoku ou sio he taimí ni ko e kakai kimoutolu ʻo e tefitoʻi moʻoni.”
Ko e talēkita ʻo e pilīsone Wołów, ko Marek Gajos, naʻá ne malimali peá ne pehē: “Naʻa mau ʻuluaki fakakaukau te mou lavaʻi ʻa e meʻa mātuʻaki siʻisiʻi. Naʻa mau fakakaukau ko e toe lotu pē ʻe taha kimoutolu fakataha mo ha holi lahi ki hano toe fakaleleiʻi faka-Tohitapu ʻo e kau pōpulá. Kae kehe, ʻi he sio ki he ngaahi ola ʻo hoʻomou muʻaki ngāué, naʻa mau fakapapauʻi ai ke tau ngāue vāofi. Kuo mou haʻu taʻehelaʻia ki heni ʻo feʻunga he taimí ni mo e taʻu ʻe hiva, pea ʻoku ou fakahoungaʻi lahi ʻaupito ʻa e meʻa ko ia kuo mou faí.”
Kae kehe, naʻe fēfē hono tali ʻa e kupú ʻe he tokolahi fakalūkufua ʻi he pilīsone ʻi Wołów? Ko e mahuʻingaʻia ʻi he lotolotonga ʻo e kau nofo aí naʻe mātuʻaki māʻolunga he naʻe ʻave kotoa ʻe he Kau Fakamoʻoni ʻi he pilīsoné ʻa honau ʻinasi ʻi he makasiní. Naʻe toe fakahaaʻi ʻe he kau ʻōfisa pilīsoné ʻa e mahuʻingaʻiá ʻaki hono kole ha ngaahi tatau lahi ange ʻe 40 maʻanautolu. Ke fakalato ʻa e tupulaki ʻo e fiemaʻú, naʻe tokoni ʻa e ngaahi fakatahaʻanga ʻi he feituʻú pea tokonaki mai ha ngaahi tatau lahi ange ʻe 100 maʻá e fanga tokoua ʻi he pilīsoné. ʻI he taimi tatau, naʻe tupulaki ʻa e maʻu fakataha ʻi he pilīsoné.
Ko Piotr Choduń, ko ha ʻōfisa pilīsone ʻa ia kuó ne ngāue vāofi mo e Kau Fakamoʻoni ʻa Sihová, naʻá ne pehē: “Naʻa mau fili ke fakaʻaliʻali ʻa e kupu ko ení ʻi he ngaahi puha fakaʻaliʻali kotoa ʻi homau pilīsoné. ʻOku mau ʻamanaki ko e kotoa ʻo e kau nofo ai ʻoku teʻeki ke nau ako mo kimoutolu ʻa e Tohitapú te nau lau ʻa e makasiní.”
Ko e faʻifaʻitakiʻanga lelei ʻa e Kau Fakamoʻoní pea mo ʻenau ngaahi ngāue fakamalanga kuo fakapapauʻí ʻoku hokohoko atu ʻene maʻu ʻa e ngaahi ola leleí. ʻI he tānaki atu ki he kau pōpula ʻe toko 15 kuo nau fakalakalaka ʻo aʻu ki he tuʻunga ke papitaisó, kuo fakatapui ʻe he ongo ʻōfisa pilīsone ʻe toko 2 ʻena moʻuí kia Sihova, pea kuo kole ha ʻōfisa pilīsone ʻe taha ki ha ako Tohitapu. Ko e moʻoni, ko e fanga tokoua ko ia ʻoku nau malanga ʻi he pilīsone Wołów ʻoku nau ʻoatu ʻa e lāngilangi kotoa kia Sihova ko e ʻOtuá ʻi heʻenau lavameʻá.—Fakafehoanaki mo 1 Kolinito 3:6, 7.
[Fakatātā ʻi he peesi 28]
Ko e Kau Fakamoʻoni ʻa Sihova ʻe toko tolu mo ha pōpula ʻi hono foaki atu ʻa e makasiní ʻi he holo ako ʻi he pilīsoné