Puha Fehuʻi

◼ Ko e hā ʻa e ngaahi fakatokanga ʻoku totonu ke tau tokanga ki ai ʻi he taimi faifakamoʻoni ki he kau pōpulá?

ʻI māmani lahi ʻoku ʻikai siʻi hifo ʻi he kau pōpula ʻe toko valu miliona, ʻa ia ko e niʻihi ai ʻoku nau fakahāhā ha mahuʻingaʻia ʻi he ongoongo leleí. (1 Tim. 2:4) ʻOku maʻu ʻe ha ʻōfisi vaʻa ʻe taha ʻa e ngaahi tohi ʻe 1,400 nai ʻi he māhina taki taha mei he kau pōpulá mo e ngaahi mēmipa ʻo honau fāmilí ʻo kole ha ʻū tohi pe ko ha ʻaʻahi fakafoʻituitui. Neongo ko e mahuʻingaʻia ʻa e kau pōpula tokolahi ʻoku moʻoni, kuo fakahaaʻi mei he meʻa ʻoku hokosiá ko e niʻihi ʻoku nau fakahaaʻi ha mahuʻingaʻia loi, ʻi he feinga ke ngāueʻaki ʻi he tuʻunga siokita ʻa e kakai ʻa e ʻOtuá. ʻI he vakai atu ki he meʻá ni, ʻoku totonu ke tokanga kotoa ki he ngaahi fakatokanga hono hoko fekauʻaki mo e faifakamoʻoni ki he kau pōpulá.

ʻI he ngaahi tuʻunga lahi ʻoku fai ki he kau pōpulá ha fakamoʻoni fakafou ʻi he faitohí. ʻOku fai ʻa e fakahinohino mālohi ke ʻoua ʻe tohi ʻa e fanga tuofāfiné ki he kau pōpula tangatá, neongo ai pē kapau ko e taumuʻá ki hono fai ha tokoni fakalaumālie. Ko e fatongia ko iá ʻoku totonu ke fai ia ʻe he fanga tokoua tāú pē. Ko e fanga tuofāfine tāú ʻe vaheʻi nai ke nau fetuʻuaki mo e kau pōpula fefine ʻoku nau fakahāhā ʻa e mahuʻingaʻia moʻoni ʻi he moʻoni faka-Tohitapú. ʻOku ʻikai totonu ke ʻave ha paʻanga pe ko e ngaahi meʻaʻofa fakafoʻituitui ki he kau pōpulá, neongo ʻa e moʻoniʻi meʻa ko ia ʻo e lava ke fai ha kole ki aí.

ʻI he taimi ʻoku fakahaaʻi ai ʻe ha tokotaha tuku pōpula ʻa e mahuʻingaʻiá, ʻoku totonu ke ʻave ʻa hono hingoá mo e tuʻasilá ki he fakatahaʻanga ʻi he feituʻu ʻo e ʻapi pōpulá. ʻOku faʻa ʻiloʻi ʻe he fanga tokoua taau ʻi aí ʻa e founga ke ngāue ai ki he ngaahi tuʻunga kehekehe ʻe lava ke malanga haké. Kapau ʻoku ʻikai ke ʻiloʻi ʻa e fakatahaʻangá, ʻoku totonu ke ʻave ʻa e fakamatalá ki he ʻōfisi vaʻá.

ʻOku ʻikai taʻefiemaʻu ke fai ʻe he fanga tokoua kuo vaheʻí ha ngaahi fakataha mo e kau pōpulá koeʻuhi ke lava ʻo ako ai ha niʻihi ʻi he taimi pē ʻe taha. Kae kehe, ko e ngaahi tuʻunga makehe ʻa ia ʻoku feohi tauʻatāina ai ʻa e kau malangá mo e kau pōpulá ʻoku ʻikai totonu ke fai ia ʻi he ngaahi ʻapi pōpulá. ʻIkai ko ia pē, ʻoku ʻikai faleʻi ki he kau malangá ke ʻaʻahi taʻepalani ki ha ʻapi pōpula pea feohi vāofi mo e kau pōpulá.

ʻOfa ke tau hoko ʻo “fakapotopoto ʻo hangē ko ha ngata, pea vale ʻi he kovi ʻo hangē ko ha lupe” ʻi heʻetau vahevahe atu ʻa e ongoongo leleí ki he kau pōpulá.—Mt. 10:16.