Ko ha Fanongonongo Makehe
ʻI HE fakamulituku ʻo e fakataha fakataʻu ʻa e Watch Tower Bible and Tract Society of Pennsylvania ʻi ʻOkatopa 7, 2000, naʻe fai ai ha fanongonongo makehe ʻe he tokotaha seá, ko John E. Barr ʻo e Kulupu Pulé. Naʻe makatuʻunga ʻi he fanongonongo ko ení ha ongo malanga naʻe fai ki muʻa ʻi he ʻaho ko iá ʻe Theodore Jaracz mo Daniel Sydlik.—Sio ki he peesi 12-16 mo e 28-31 ʻo e makasini ko ení.
ʻI hono fakahaaʻi ha foʻi poini mātuʻaki mahuʻinga, naʻe pehē ai ʻe Tokoua Barr: “Ko e ‘tamaioeiki agatonu mo botó’ mo hono Kulupu Pulé kuo tuku kiate kinautolu ʻa e ngaahi meʻa ʻoku māʻolunga ange mo kau ai ʻa e ngaahi meʻa lahi mamaʻo ange ʻi he ngaahi meʻa ko ia kuo tuku ki he ngaahi kautaha fakalaó. ʻOku fokotuʻu ʻi he tohi fakamafaí ko e ngaahi taumuʻa taki taha ʻa e ngaahi kautaha fakalao peheé ko e ngaahi meʻa ʻa ia ʻoku fakangatangata pē ʻi honau tuʻungá. Kae kehe, ko hotau Pulé, ʻa Sīsū Kalaisi, kuó ne fakanofo ʻa e kalasi tamaioʻeiki anga-tonú ki heʻene ‘mea’ kotoa pē, pe ngaahi meʻa ʻo e Puleʻangá ʻi heni ʻi he māmaní.”—Mātiu 24:45-47, PM.
Fekauʻaki mo e kautaha Pennsylvania, naʻe tānaki mai ʻe Tokoua Barr: “Talu mei hono fokotuʻu ʻi he 1884, kuo fakahoko ʻe he Watch Tower Bible and Tract Society of Pennsylvania ha ngafa mahuʻinga ʻi hotau hisitōlia ʻi onopōní. Neongo ia, ko ha meʻangāue fakalao pē ia ʻoku ala maʻu ke ngāueʻaki ʻe he ‘tamaioeiki agatonu mo botó’ ʻi he taimi ʻoku fiemaʻu aí.”
ʻI heʻena malangá, ko Tokoua Sydlik mo Jaracz naʻá na fakamatalaʻi ko e moʻoniʻi meʻa ko ia ʻa hono tuku ki he “tamaioeiki agatonu mo boto” ʻa e kotoa ʻo e ngaahi meʻa fakaemāmani ʻa e ʻEikí ʻoku ʻikai ke taʻofi ai ʻa e kalasi tamaioʻeikí mei hono fakaʻatā ʻo e kau tangata taau mei he lotolotonga ʻo e “fanga sipi kehe” ke nau tokangaʻi ʻa e ngaahi fatongia pau fakaefakahoko ngāue ʻi he founga-tuʻumaʻú. (Sione 10:16) Pea ʻoku ʻikai ha ʻuhinga Fakatohitapu ke fiemaʻu ai ʻa e kotoá pe ko e taha pē ʻo e kau talēkita ʻo e ngaahi kautaha fakalao ʻoku ngāueʻaki ʻe he Kau Fakamoʻoni ʻa Sihová ke nau hoko ko e kau Kalisitiane pani.
Naʻe tala ʻe Tokoua Barr ki he kau fanongó ʻo pehē ki muí ni mai ko e kau mēmipa ʻe niʻihi ʻo e Kulupu Pule ʻa e Kau Fakamoʻoni ʻa Sihová ʻa ia naʻa nau ngāue ko e kau talēkita mo e kau ʻōfisá naʻa nau mavahe loto-lelei mei he ngaahi poate ʻo e kau talēkita ʻo e ngaahi kautaha kotoa naʻe ngāueʻaki ʻe he “tamaioeiki agatonu mo boto” ʻi he ʻIunaite Seteté. Ko e fanga tokoua falalaʻanga ʻo e kalasi fanga sipi kehé naʻe fili kinautolu ko e ngaahi fetongi.
Ko e fili ko ení ʻoku ʻaonga moʻoni. ʻOku fakaʻatā ai ʻa e kau mēmipa ʻo e Kulupu Pulé ke nau fakamoleki ʻa e taimi lahi ange ʻi hono teuteu ʻa e meʻakai fakalaumālié pea tokangaʻi ʻi ha tuʻunga ʻa e ngaahi fiemaʻu fakalaumālie ʻa e fetokouaʻaki ʻi māmani lahí.
ʻI hono fakamulitukú, naʻe tala ʻe he tokotaha seá ki heʻene kau fanongo fiefiá: “Lolotonga kuo vaheʻi ʻa e ngaahi fatongia fakalao mo fakaengāue kehekehe ki he kau ʻovasia taukeí, . . . ko kinautolu kotoa ʻoku nau ngāue ʻi he malumalu ʻo e tataki fakalaumālie ʻa e Kulupu Pulé. . . . Ko kitautolu kotoa ʻoku tau hanga fakamātoato kia Sihova ki heʻene tāpuakí ke ʻi heʻetau ngaahi ngāue ʻi hono fai ʻa hono finangaló, ki he lāngilangi mo e kolōlia ʻa hono huafa lahí.”