Founga ʻOku Kehe Ai ʻa e Kulupu Pulé mei ha Kautaha Fakalaó
KUO fai ʻa e ngaahi fakataha fakataʻu ʻa e Watch Tower Bible and Tract Society of Pennsylvania talu mei Sanuali ʻo e 1885. ʻI he taimi naʻe fai ai ʻa hono tānaki fakataha ʻo e kau Kalisitiane paní ʻi he konga ki mui ʻo e senituli hono 19, ko e kau talēkita mo e kau ʻōfisa ʻo e kautaha ko ení naʻa nau maʻu ʻa e ʻamanaki fakahēvaní. Ko hono moʻoní, kuo meimei hoko ko e tuʻungá maʻu pē eni.
Naʻe ʻi ai ha meʻa makehe ʻe taha. ʻI he 1940, ko Hayden C. Covington—ko e faleʻi fakalao ia ʻa e Sōsaietí ʻi he taimi ko iá pea ko e taha ia ʻo e “fanga sipi kehe,” fakataha mo e ʻamanaki fakaemāmaní—naʻe fili ai ia ko ha talēkita ʻo e Sōsaietí. (Sione 10:16) Naʻá ne ngāue ko e tokoni palesiteni ʻa e Sōsaietí mei he 1942 ki he 1945. ʻI he taimi ko iá, naʻe fakafisi ai ʻa Tokoua Covington ʻi he tuʻunga ko e talēkitá, ke liliu ki he meʻa naʻe hā ngali ʻi he taimi ko iá ko e finangalo ia ʻo Sihová—ko e kotoa ʻo e kau talēkita mo e kau ʻōfisa ʻo e kautaha Pennsylvania ko e kau Kalisitiane pani. Naʻe fetongi ʻe Lyman A. Swingle ʻa Hayden C. Covington ʻi he poate ʻo e kau talēkitá, pea ko Frederick W. Franz naʻe fili ko e tokoni palesitení.
Ko e hā naʻe tui ai ʻa e kau sevāniti ʻa Sihová ʻoku totonu ke hoko ko e kau Kalisitiane pani ʻa e kotoa ʻo e kau talēkita mo e kau ʻōfisa ʻo e Watch Tower Bible and Tract Society of Pennsylvania? Koeʻuhi ʻi he taimi ko iá, ko e poate ʻo e kau talēkitá mo e kau ʻōfisa ʻo e kautaha Pennsylvania naʻe vakai ki ai ko e Kulupu Pule ai pē ia ʻa e Kau Fakamoʻoni ʻa Sihová, ʻa ia naʻe faʻuʻaki maʻu pē ia ʻa e kotoa ʻo e kau tangata pani ʻe he laumālié.
Ko ha Fakataha Fakataʻu Fakahisitōlia
ʻI he fakataha fakataʻu naʻe fai ʻi ʻOkatopa 2, 1944, ʻi Pittsburgh, naʻe ngāueʻaki ai ʻe he kau mēmipa ʻo e kautaha Pennsylvania ʻa e ngaahi fakapapau ʻe ono ʻo fakatonutonuʻaki ʻa ʻene tohi fakamafaí. Naʻe fiemaʻu ʻe he tohi fakamafaí ke tuku atu ha ngaahi sea ke kau ʻi he fili ʻa e kau tokoni fakapaʻanga ki he ngāue ʻa e Sōsaietí, ka naʻe fakangata ʻe he fakatonutonu hono tolú ʻa e fiemaʻu ko iá. Naʻe pehē ʻe ha līpooti ʻi he fakataha fakataʻu ko iá: “Ko e tuʻunga mēmipa ʻi he Sōsaietí ʻe fakangatangata ia ke ʻoua ʻe laka hake ʻi he toko 500 . . . Ko e tokotaha taki taha kuo filí kuo pau ko ha sevāniti taimi-kakato ia ʻa e Sōsaietí pe ko ha sevāniti konga taimi ʻa ha kautaha [fakatahaʻanga] ʻa e kau fakamoʻoni ʻa Sihová pea kuo pau ke ne fakahāhā ʻa e laumālie ʻo e ʻEikí.”
Hili iá, ko e kau talēkita ʻo e Sōsaietí naʻe pau ke fili kinautolu ki he lakangá ʻe he faʻahinga tāutaha ʻa ia naʻa nau līʻoa kakato kia Sihova, tatau ai pē pe ko e hā e lahi ʻo e paʻanga naʻa nau tokoniʻaki ki hono ʻai ke laka ki muʻa ʻa e ngāue ʻo e Puleʻangá. Naʻe hoko eni ʻo feʻungamālie mo e ngaahi fakalelei fakaefakalakalaka naʻe tomuʻa tala ʻi he Aisea 60:17 (NW), ʻa ia ʻoku tau lau: “Te u ʻomi koula ko e fetongi ʻo e kopá, pea te u ʻomi siliva ko e fetongi ʻo e ʻaioné, pea ko e kopá ko e fetongi ʻo e ʻakaú, pea ko e ʻaioné ko e fetongi ʻo e maká; pea te u fokotuʻu ʻa e melinó ko ho kau ʻovasia pea ko e māʻoniʻoní ko ho kau vahe fatongia.” ʻI he lave ki he “kau ʻovasiá” mo e “kau vahe fatongiá,” ʻoku fakamatala ʻa e kikite ko ení ki he ngaahi fakalelei ʻi he ngaahi founga fakaekautaha ʻi he lotolotonga ʻo e kakai ʻa Sihová.
Ko e sitepu mahuʻinga ko eni ʻi hono ʻomai ʻa e kautahá ki he tuʻunga fakateokalatí naʻe hoko mai ia ʻi he ngataʻanga ʻo e “ngaahi efiafi mo e ngaahi pongipongi ʻe ua afe tolungeau,” naʻe lave ki ai ʻi he Taniela 8:14 (NW). ʻI he taimi ko iá, ko e “feituʻu māʻoniʻoní” naʻe “ʻomai ia ki hono tuʻunga totonú.”
Kae kehe, hili ʻa e fakataha fakataʻu fakahisitōlia ʻi he 1944, naʻe kei tuʻu ai ha foʻi fehuʻi mātuʻaki mahuʻinga. Koeʻuhi ko e Kulupu Pulé naʻe vakai ki ai ʻi he taimi ko iá ko e poate ai pē ia ʻo e kau talēkita mēmipa ʻe toko fitu ʻo e kautaha Pennsylvania, naʻe ʻuhinga ení ʻe ʻikai ʻaupito lava ke faʻuʻaki ʻa e Kulupu Pulé ha kau Kalisitiane pani laka hake ʻi he toko fitú? ʻIkai ngata aí, koeʻuhi ko e kau talēkitá ʻoku fili kinautolu ʻe he kau mēmipa ʻo e kautahá, naʻe fili ʻe he kau mēmipa ʻo e kautahá ʻa e kau mēmipa ʻo e Kulupu Pulé ʻi he fakataha fakataʻu ʻo e taʻu taki taha? Ko e kau talēkita mo e kau ʻōfisa ʻo e Watch Tower Bible and Tract Society of Pennsylvania pea mo e kau mēmipa ʻo e Kulupu Pulé ʻoku nau taha ʻo nau tatau pē mo e kau mēmipa ʻo e Kulupu Pulé, pe ʻoku nau kehekehe?
Ko ha Toe Fakataha Fakataʻu Fakangalongataʻa
Ko e ngaahi fehuʻí ni naʻe tali ia ʻi he fakataha fakataʻu naʻe fai ʻi ʻOkatopa 1, 1971. ʻI he taimi ko iá, ko e taha ʻo e kau malangá naʻá ne fakamatalaʻi ai ko e kulupu pule ʻo e “tamaioeiki agatonu mo boto,” naʻa nau ʻi muʻa kinautolu ʻi he Watch Tower Bible and Tract Society of Pennsylvania ʻaki ʻa e taʻu ʻe lauingeau. (Mātiu 24:45-47, PM) Naʻe faʻu ha kulupu pule ʻi he Penitekosi ʻo e 33 T.S., ko e laka hake ia ʻi he senituli ʻe 18 ki muʻa ke ʻi ai ʻa e kautaha Pennsylvania. ʻI he ʻuluaki taimí, ko e kulupu pulé naʻe kau ki ai ʻo ʻikai ko e kau tangata ʻe toko 7, ka ko e kau ʻapositolo ʻe toko 12. ʻOku hā mahino, ko hono tokolahí naʻe fakalahi ia ki mui ange, he “ko e kau ʻapositoló pea mo e kau tangata matuʻotuʻa ʻi Selusalemá” naʻa nau takimuʻá.—Ngāue 15:2, NW.
ʻI he 1971 naʻe fakamatalaʻi ai ʻe he tokotaha malanga tatau pē ko e kau mēmipa ʻo e Sōsaieti Taua Leʻó ʻe ʻikai lava ke nau fili ʻa e kau mēmipa ʻo e Kulupu Pule paní. Ko e hā hono ʻuhingá? “Koeʻuhi,” naʻá ne pehē, “ko e kulupu pule ʻo e kalasi ‘tamaioeikí’ ʻoku ʻikai ke fili ia ʻe ha tangata. ʻOku fili ia ʻe . . . Sīsū Kalaisi, ko e ʻUlu ʻo e fakatahaʻanga Kalisitiane moʻoní pea mo e ʻEiki mo e Pule ʻo e kalasi ‘tamaioeiki agatonu mo botó.’” ʻOku hā mahino leva, ko e kau mēmipa ʻo e Kulupu Pulé ʻe ʻikai lava ke fili ki he lakangá ʻe ha mēmipa ʻo ha kautaha fakalao pē.
ʻI he hoko atú, ko e tokotaha malangá naʻá ne fai ʻa e fakamatala mahuʻinga ʻaupito ko ení: “Ko e kulupu pulé ʻoku ʻikai te nau maʻu ha kau ʻōfisa ʻo hangē ko e Poate ʻo e kau Talēkita ʻo e Sōsaietí, ʻa ia ʻoku ʻi ai ʻa e palesiteni, tokoni palesiteni, sekelitali tauhi paʻanga mo e tokoni sekelitali tauhi paʻanga. ʻOku ʻi ai pē ʻa hono tokotaha sea.” ʻI he ngaahi taʻu lahi, ko e palesiteni ʻo e kautaha Pennsylvania naʻe toe hoko ia ko e mēmipa muʻomuʻa ʻo e Kulupu Pulé. ʻE ʻikai ke kei pehē ʻa e tuʻungá. Lolotonga ʻa e ʻikai ke tatau ʻi he taukeí pe malavá, ko e kau mēmipa ʻo e Kulupu Pulé te nau tatau ʻi he fatongiá. Naʻe tānaki mai ʻe he tokotaha malangá: “Ko ha mēmipa pē ʻo e kulupu pulé ʻe lava ke hoko ia ko e tokotaha sea ʻo ia ʻo ʻikai hoko ʻi he taimi tatau ko e palesiteni ʻo e . . . Sōsaietí . . . ʻOku fakatuʻunga kotoa ia ʻi he founga vilo ki he tuʻunga sea ʻi he kulupu pulé.”
ʻI he fakataha fakataʻu fakangalongataʻa ko ia ʻi he 1971, naʻe fakahaaʻi ai ha faikehekehe mahino ʻi he vahaʻa ʻo e kau mēmipa ʻo e Kulupu Pule pani ʻe he laumālié pea mo e kau talēkita ʻo e kautaha Pennsylvania. Neongo ia, ko e kau mēmipa ʻo e Kulupu Pulé naʻe hokohoko mai ʻenau ngāue ko e kau talēkita mo e kau ʻōfisa ʻo e Sōsaietí. Kae kehe, ʻi he ʻahó ni, ʻoku malanga hake ai ʻa e foʻi fehuʻi: ʻOku ʻi ai ha fakamatala Fakatohitapu ki he ʻuhinga kuo pau ke hoko ai ʻa e kau talēkita ʻo e Watch Tower Bible and Tract Society of Pennsylvania ko e kau mēmipa ʻo e Kulupu Pulé?
Ko e tali ki aí ko e ʻikai. Ko e kautaha Pennsylvania ʻoku ʻikai ko e meʻangāue fakalao pē ia ʻe taha ʻoku ngāueʻaki ʻe he Kau Fakamoʻoni ʻa Sihová. ʻOku ʻi ai ʻa e niʻihi kehe. Ko e taha ko e Watchtower Bible and Tract Society of New York, Incorporated. ʻOkú ne fakafaingofuaʻi ʻetau ngāue ʻi he ʻIunaite Seteté. Kuo hā mahino ʻa e ʻi he kautaha ko iá ʻa e tāpuaki ʻa Sihová, neongo ko hono kau talēkitá mo e kau ʻōfisá ko ʻenau haʻu tefito pē mei he “fanga sipi kehe.” Ko e International Bible Students Association ʻoku ngāueʻaki ia ʻi Pilitānia. ʻOku ngāueʻaki ʻa e ngaahi kautaha fakalao kehe ke pouaki ʻaki ʻa e ngaahi meʻa ʻo e Puleʻangá ʻi he ngaahi fonua kehe. Ko kinautolu kotoa ʻoku nau tokoni feongoongoi pea ʻi ai honau ngafa ke fakahoko ʻi hono ʻai ke malangaʻi ʻa e ongoongo leleí ʻi māmani lahi. Tatau ai pē pe ʻoku nau tuʻu ʻi fē pe ko hai ʻoku ngāue ʻi he tuʻunga ko e kau talēkitá pe kau ʻōfisá, ko e ngaahi kautaha ko ení ʻoku fakahinohino fakateokalati pea ngāueʻaki ʻe he Kulupu Pulé. Ko ia ai, ko e ngaahi kautaha peheé ʻoku ʻi ai ʻenau ngaahi ngāue kuo vaheʻi ke fakahoko ʻi hono fakalahi atu ʻa e ngaahi meʻa ʻo e Puleʻangá.
ʻOku ʻaonga kiate kitautolu ke maʻu ha ngaahi kautaha fakalao. ʻOku tau fai fakatatau ai ki he ngaahi lao fakafeituʻú mo fakafonuá, hangē ko ia ʻoku fiemaʻu mai ʻe he Folofola ʻa e ʻOtuá. (Selemaia 32:11; Loma 13:1) Ko e ngaahi kautaha fakalaó ʻoku nau fakafaingofuaʻi ʻetau ngāue ko hono fakamafola ʻa e pōpoaki ʻo e Puleʻangá ʻaki hono pulusi ʻo e ngaahi Tohitapu, ngaahi tohi, ngaahi makasini, ngaahi polosiua, pea mo e ngaahi naunau kehe. Ko e ngaahi kautaha peheé ʻoku nau toe ngāue ko e ngaahi meʻangāue fakalao ke nau fakaleleiʻi ʻa e ngaahi meʻa felāveʻi mo e maʻu ʻo ha kelekele, ngaahi ngāue fakaetokoni, ngaahi konituleki ki hono ngāueʻaki ʻo e ngaahi langa ki he fakataha-lahí, mo e hā fua. ʻOku tau fakamālō ki he ngaahi ngāue ʻa e ngaahi kautaha fakalao peheé.
Fakamuʻomuʻa ʻa e Huafa ʻo Sihová
ʻI he 1944, ko e Kupu II ʻo e tohi fakamafai ʻa e Watch Tower Bible and Tract Society of Pennsylvania naʻe fakaleleiʻi ia ke fakamamafaʻi ai ʻa e ngaahi taumuʻa ʻa e kautahá ni. Fakatatau ki he tohi fakamafaí, ko e ngaahi taumuʻa ʻa e Sōsaietí ʻoku kau ai ʻa e taumuʻa tefito ko ení: “Ke malangaʻi ʻa e kōsipeli ʻo e puleʻanga ʻo e ʻOtuá ʻi he malumalu ʻo Kalaisi Sīsuú ki he puleʻanga kotoa pē ko ha fakamoʻoni ki he huafa, folofola mo e tuʻunga aoniu ʻo e ʻOtua Māfimafi-Aoniu ko SIHOVÁ.”
Talu mei he 1926 mo hono fakamuʻomuʻa ʻe he ‘tamaioeiki agatonú’ ʻa e huafa ʻo Sihová. Naʻe tautefito ʻa e ʻiloa ʻa e 1931 ʻi hono ohi ʻe he Kau Ako Tohitapú ʻa e hingoa ko e Kau Fakamoʻoni ʻa Sihová. (Aisea 43:10-12) Ko e ngaahi tohi ʻa e Sōsaietí kuo fakamamafaʻi ai ʻa e huafa ʻo e ʻOtuá ʻoku kau ai ʻa e ʻū tohi Jehovah (1934), “Let Your Name Be Sanctified” (1961), mo e “The Nations Shall Know That I Am Jehovah”—How? (1971).
Kuo pau ke fai ʻa e lave makehe ki he New World Translation of the Holy Scriptures, naʻe pulusi ʻi hono tuʻunga kakató ʻi he faka-Pilitāniá 1960. ʻOku ʻi ai ʻa e huafa ʻo Sihová ʻi he feituʻu kotoa pē ʻoku hā ai ʻa e Tetakalamatoní ʻi he Ngaahi Konga Tohitapu Faka-Hepeluú. ʻOku toe kau ʻi he liliu ko ení ʻa e huafa fakaʻotuá ʻi he ngaahi feituʻu ʻe 237 ʻi he Ngaahi Konga Tohitapu Faka-Kalisi Kalisitiané ʻa ia naʻe fakahaaʻi ʻi hano ʻanalaiso fakalelei naʻe fakapapauʻi ai ʻa e meʻá ni. He fakamālō ē ko kitautolu, ʻi he ngaahi founga kehekehe, ʻi hono fakaʻatā ʻe Sihova ʻa e “tamaioeiki” mo hono Kulupu Pulé ke ngāueʻaki ʻenau ngaahi meʻangāue pulusí mo e ngaahi kautaha fakalaó ʻi hono ʻai ʻa hono huafá ke ʻiloa ʻi māmani lahi!
Pouaki ʻa Hono Tufaki ʻo e Folofola ʻa e ʻOtuá
Kuo hokohoko faifakamoʻoni ʻa e kakai ʻa Sihová ki hono huafá pea kuo nau poupouʻi ʻa ʻene Folofolá ʻaki hono pulusi mo tufaki ʻa e laui miliona ʻo e ngaahi tohi makatuʻunga ʻi he Tohitapú pea pehē ki he Tohitapú tonu. ʻI he konga ki muʻa ʻo e 1900 tupú, naʻe hoko ai ʻa e Sōsaieti Taua Leʻó ko ia ʻa e mafai pulusi tohi ʻo e The Emphatic Diaglott, ko e pulusinga Kalisi-Pilitānia ʻo e Ngaahi Konga Tohitapu Faka-Kalisi Kalisitiané ʻa Benjamin Wilson. Naʻe pulusi ʻe he Sōsaietí ʻa e pulusinga ʻo e King James Version ʻa e Kau Ako Tohitapú, ʻa ia naʻe kau ai ha ʻapenitiki peesi ʻe 500. ʻI he 1942 naʻá ne pulusi ai ʻa e King James Version fakataha mo e ngaahi maʻuʻanga fakamatala ʻi he tafaʻakí. ʻI he 1944 leva naʻe kamata ai ʻe he Sōsaietí ke pulusi ʻa e American Standard Version ʻo e 1901, ʻa ia ʻoku ngāueʻaki ai ʻa e huafa fakaʻotuá. Ko e huafa ʻo Sihová ko ha toe faʻunga ia ʻo e The Bible in Living English, ʻa Stephen T. Byington, naʻe pulusi ʻe he Sōsaietí ʻi he 1972.
Ko e ngaahi kautaha fakalao naʻe ngāueʻaki ʻe he Kau Fakamoʻoni ʻa Sihová kuo nau tokoni ʻi hono pulusi mo tufaki ʻa e kotoa ʻo e ngaahi liliu Tohitapu ko ení. Kae kehe, ko e meʻa ʻoku ʻiloa tahá, ko e fāitaha vāofi ʻaupito ʻi he vahaʻa ʻo e Sōsaieti Taua Leʻó pea mo e kulupu ʻo e Kau Fakamoʻoni pani ʻa Sihová ʻi hono faʻu ʻa e Kōmiti Liliu Tohitapu New World. ʻOku tau fiefia, he ʻi he fakakātoá pe ʻi hano konga, ke fakahaaʻi ʻoku laka hake ʻi he tatau ʻe 106,400,000 ʻo e liliú ni kuo pulusi ia ʻi he lea ʻe 38. Ko e Watch Tower Bible and Tract Society of Pennsylvania ko ha sōsaieti Tohitapu moʻoni ia!
Ko e ‘tamaioeiki agatonú’ kuo ‘fakanofo ia ki he mea kotoa a hono Eikí.’ ʻOku kau ʻi he ngaahi meʻá ni ʻa e ngaahi langa ʻi he ʻuluʻi ʻōfisi ʻi he Vahefonua Niu ʻIoke, U.S.A., pea mo e vaʻa ʻe 110 ʻoku lolotonga ngāue ʻi māmani lahí. ʻOku ʻiloʻi ʻe he kau mēmipa ʻo e kalasi tamaioʻeikí ʻe ui kinautolu ke nau fai ha fakamatala ki he founga ko ia kuo nau ngāueʻaki ai ʻa e meʻa naʻe tuku kiate kinautolú. (Mātiu 25:14-30) Neongo ia, ʻoku ʻikai ke taʻofi ʻe he meʻá ni ʻa e ‘tamaioeikí’ mei hono fakaʻatā ʻa e kau ʻovasia taau ʻi he haʻohaʻonga ʻo e “fanga sipi kehe” ke nau tokangaʻi ʻa e ngaahi fatongia fakalaó mo fakaefakahoko ngāué. Ko hono moʻoní, ʻoku fakaʻatā heni ʻa e kau mēmipa ʻo e Kulupu Pulé ke nau līʻoa ʻa e taimi lahi ange “ki he lotu, bea moe malaga aki ae folofola.”—Ngāue 6:4, PM.
Lolotonga hono kei fakaʻatā ʻe he ngaahi tuʻunga ʻi he māmani ko ení, ko e Kulupu Pulé, ʻokú ne fakafofongaʻi ʻa e “tamaioeiki agatonu mo boto,” te ne ngāueʻaki ʻa e ngaahi kautaha fakalaó. ʻOku faingamālie ʻa e ngaahi kautahá ni, ka ʻoku ʻikai ke fiemaʻu fakaʻaufuli kinautolu. Kapau ʻoku fakangata ha kautaha fakalao ʻe ha tuʻutuʻuni fakapuleʻanga, ʻe kei hoko atu pē ʻa e ngāue fakamalangá ia. Naʻa mo e taimí ni, ʻi he ngaahi fonua ʻoku fakahoko ai ʻa e ngaahi fakangatangatá pea ʻoku ʻikai ke ngāueʻaki ai ha ngaahi kautaha fakalaó, ʻoku fanongonongo ai ʻa e pōpoaki ʻo e Puleʻangá, ʻoku fai ai ʻa e ngaohi-ākonga, pea ʻoku hokohoko atu ai ʻa e tupulekina fakateokalatí. ʻOku hoko ení koeʻuhi ʻoku tō mo fuʻifuʻi ʻe he Kau Fakamoʻoni ʻa Sihová, pea ʻoku ‘ʻa e ʻOtuá ai pe ʻa e fakatupú.’—1 Kolinito 3:6, 7.
ʻI heʻetau hanga atu ki he kahaʻú, ʻoku tau tuipau ʻe tokangaʻi ʻe Sihova ʻa e ngaahi fiemaʻu fakalaumālie mo fakamatelie ʻa hono kakaí. Ko ia mo hono ʻAló, ʻa Sīsū Kalaisi, te na hokohoko atu ʻa hono tokonaki mai ʻa e tataki mo e poupou fakahēvani ʻoku fiemaʻu ke fakakakato ʻaki ʻa e ngāue malangaʻi ʻo e Puleʻangá. Ko e moʻoni, ko e hā pē ʻoku tau lavaʻi ʻi he tuʻunga ko e kau sevāniti ʻa e ʻOtuá ʻoku fai iá ʻo ‘ʻikai ko ha mea i ha kau tau be i ha malohi, ka i he Laumalie ʻo Sihová.’ (Sakalaia 4:6, PM) Ko ia ai, ʻoku tau lotu ki he tokoni fakaʻotuá, ʻi hono ʻiloʻi ʻi he mālohi ʻoku tokonaki mai ʻe Sihová, te tau malava ai ke fakaʻosi ʻa e ngāue kuó ne foaki mai ke tau fai ʻi he taimi ko eni ʻo e ngataʻangá!