Ko e Hā ʻa e Watch Tower Bible and Tract Society?
Ko e Watch Tower Bible and Tract Society of Pennsylvania ko ha kautaha ʻoku ʻikai fakatupu paʻanga naʻe fokotuʻu ʻi he 1884 ʻi he malumalu ʻo e ngaahi lao ʻo e Kominiueli ʻo Pennsylvania, U.S.A. ʻOku ngāueʻaki ia ʻe he Kau Fakamoʻoni ʻa Sihová ke poupouʻi ʻenau ngāue ʻi māmani lahí, ʻoku kau ki ai hono pulusi ʻo e Tohi Tapú mo e ʻū tohi makatuʻunga Fakatohitapú.
Fakatatau ki heʻene tohi aleapaú, ʻoku fakataumuʻa ʻa e kautahá ki he “lotu, ako mo e tokoni ʻofa,” tautefito ke “malanga mo akoʻi ʻa e kōsipeli ʻo e Puleʻanga ʻo e ʻOtuá ʻi he malumalu ʻo Kalaisi Sīsū.” Ko e kau mēmipa ʻi he kautahá ʻoku fakaafeʻi pē kinautolu ka ʻoku ʻikai makatuʻunga ʻi he lahi ʻo e tokoni ʻa e tokotahá. Ko e kau mēmipa ʻo e kautahá mo e kau talēkitá ʻoku nau tokoni ki he Kulupu Pule ʻo e Kau Fakamoʻoni ʻa Sihová.
Kautaha Fakalao Fengāueʻaki Fakataha
Tuku kehe ʻa e Watch Tower Bible and Tract Society of Pennsylvania, ʻoku ngāueʻaki ʻe he Kau Fakamoʻoni ʻa Sihová ʻa e ngaahi kautaha fakalao lahi ʻi he ngaahi fonua kehekehe. Ko e niʻihi ʻo e ngaahi kautaha ko ení ʻoku kau ʻi honau hingoá ʻa e “Watch Tower,” “Watchtower,” pe ko hano liliu ha taha ʻo e hingoá ni.
Ko e ngaahi kautaha fakalao kehekehe ko ení ʻoku malava ai ke mau fakahoko ha ngaahi meʻa lahi talu mei hono fokotuʻú, hangē ko e ngaahi meʻá ni:
Hiki-tohi mo e pulusi. Kuo mau pulusi ʻa e Tohi Tapu ʻe 253 miliona nai. Ko ʻemau ʻū tohí ʻoku ala maʻu ʻi he lea ʻe 1,050 tupu. Ko e uepisaiti jw.org ʻoku malava ai ʻa e kakaí ke nau lau taʻetotongi ʻa e Tohi Tapú ʻi he ʻinitanetí ʻi he lea ʻe 300 tupu pea maʻu mo e ngaahi tali ki he fehuʻi Fakatohitapu hangē, “Ko e hā ʻa e Puleʻanga ʻo e ʻOtuá?”
Ako. ʻOku mau fakahoko ha ngaahi ako kehekehe ki ha fakahinohino Fakatohitapu. Ko e fakatātaá, talu mei he 1943, ko e Kau Fakamoʻoni ʻa Sihova ʻe 10,000 nai kuo nau maʻu ʻaonga mei he ako lahi ange ʻoku tokonaki ʻe he Akoʻanga Tohi Tapu Taua Leʻo ko Kiliatí, ʻoku fakamafeia ai kinautolu ke nau ngāue ko ha kau misinale pe ke tokoni ki hono fokotuʻu maʻu mo fakaivimālohiʻi ʻa e ngāue ʻi māmani lahí. Pea ʻi he uike taki taha, ʻoku laui miliona ʻa e kakai, kau ai ʻa e faʻahinga ʻikai ko ha Fakamoʻoni, ʻoku nau maʻu ʻa e fakahinohino ʻi he ngaahi fakataha ʻoku fakahoko ʻi heʻemau ngaahi fakatahaʻanga taki taha. ʻOku mau toe fakahoko mo e ngaahi kalasi ako lautohi mo tohi pea kuo ʻi ai mo e ngaahi tohi ako ʻi he ngaahi lea ʻe 136 ʻoku akoʻi ai ʻa e kakaí ki he lautohí mo e tohí.
Tokoni ʻOfa. Kuo mau tokonaki ha ngaahi tokoni fakamatelie ki he faʻahinga ʻoku nau tofanga ʻi he ngaahi fakatamakí—pe ko e fakatupunga ʻe he tangatá, hangē ko e fakaʻauha fakafaʻahinga ʻi Luanitā ʻi he 1994, pe ngaahi fakatamaki fakanatula, hangē ko e mofuike ʻi Haiti ʻi he 2010.
Neongo ʻoku lahi ʻa e ngaahi meʻa ʻoku fakahoko fakafou ʻi he ngaahi kautaha fakalao ʻoku mau ngāueʻakí, ʻoku ʻikai fakatuʻunga ʻemau ngāué ʻiate kinautolu. ʻOku maʻu ʻe he Kalisitiane taki taha ʻa e fatongia ke fakahoko ʻa e fekau kuo ʻomai ʻe he ʻOtuá ke malanga mo akoʻi ʻa e ongoongo leleí. (Mātiu 24:14; 28:19, 20) ʻOku mau tui ʻoku kau ʻa e ʻOtuá ʻi heʻemau ngāué pea te ne hoko ai pē ko e tokotaha ʻokú ne “ʻai ia ke tupú.”—1 Kolinitō 3:6, 7.