Puha Fehuʻi

◼ ʻOku feʻungamālie ke ngāueʻaki ʻe he ngaahi fakatahaʻangá pe faʻahinga tāutaha ʻa e ngaahi fakaʻilonga ʻa e ngaahi kautaha fakalao ʻoku ngāueʻaki ʻe he Kau Fakamoʻoni ʻa Sihová?

Ko e fakaʻilongá ko ha hingoa, fakatātā, pe hingoa fakalao kuo faʻufaʻu ke ʻiloʻingofua ai mo papau ha kautaha. Ko e fakaʻilonga Watch Tower ʻokú ne fakafofongaʻi ʻa e Watch Tower Bible and Tract Society of Pennsylvania mo e ngaahi kautaha fakalao kehe ʻoku ngāueʻaki ʻe he kautahá. ʻOku ngāueʻaki ʻe he Christian Congregation of Jehovah’s Witnesses ha fakaʻilonga ʻo ha Tohi Tapu ʻoku fakaava ʻi he ʻuluʻitohí. Ko e ngaahi kautaha fakalao kehe ʻoku ngāueʻaki ʻe he Kau Fakamoʻoni ʻa Sihová ʻoku kehekehe ʻenau ngaahi fakaʻilongá.

ʻOku ʻikai totonu ke ngāueʻaki ʻe he ngaahi fakatahaʻangá pe faʻahinga tāutaha ʻa e ngaahi fakaʻilonga pe hingoa ʻo e kautaha fakalaó, pe ngaahi fakaʻilonga meimei tatau, ʻi honau ngaahi Fale Fakatahaʻangá, papa ʻi he Fale Fakatahaʻangá, ʻuluʻitohí, ngaahi meʻa fakafoʻituituí, mo e alā meʻa pehē. Ko e ngāueʻaki pehē ʻo e ngaahi fakaʻilonga ʻa e kautahá ʻe fakatupunga nai ai ʻa e puputuʻu ki he kau ʻōfisa fakapuleʻangá, kau faipulusí, mo e niʻihi kehe fekauʻaki mo e felāveʻi fakalao ʻa e fakatahaʻangá mo e ngaahi kautaha fakalaó. ʻI he tuʻunga meimei tatau, ʻe lava ke fakaʻuhingahalaʻi ʻa e feʻaveʻaki tohí ko hono fakamafaiʻi pe ʻomai mei he ʻuluʻiʻapitangá pe ko e ʻōfisi vaʻá.

Ko e fakaʻilonga Watch Tower, pe ko ha fakaʻilonga meimei tatau, ʻoku ʻikai totonu ke ngāueʻaki ia ʻi he ngaahi langa Fale Fakatahaʻanga ʻi he kahaʻú ʻo tatau ai pē pe ko e Fale Fakatahaʻangá ko e meʻa ia ʻa e Watch Tower. Ko e ngaahi fakatahaʻanga ʻoku lolotonga ʻi honau Fale Fakatahaʻanga ha fakaʻilongá ʻoku ʻikai fiemaʻu ia ke fai leva ha ngaahi liliu ki he fakaʻilongá pe ko e tisainí, koeʻuhi ko e ngaahi liliu ko iá ʻe kau nai ki ai ha feliliuaki lahi mo e taimi, feinga, pea mo e fakamole lahi. Kae kehe, ʻoku totonu ke fai ha fakakaukau ke fai ha liliu kapau ʻoku siʻisiʻi ʻa e meʻa ke liliú pea heʻikai fiemaʻu ki ai ha ngāue lahi. Pea ka ʻikai, ʻe lava ke fai ia ʻi he taimi ʻoku fakataimitēpileʻi ai ke fakaleleiʻi ʻa e falé pe ko e fakaʻilongá.