“ʻOku Aʻaku ʻa e Siliva, pea Aʻaku ʻa e Koula”

ʻI HE senituli hono onó K.M., naʻe tukuange ai ʻe Tuʻi Kōlesi ʻo Pēsiá ʻa e kakai ʻa e ʻOtuá mei he nofo pōpula ʻi Pāpiloné. Ko e laui afe ʻo kinautolu ne nau foki ki Selusalema ke toe langa ʻa e ngaahi toetoenga ʻo e temipale ʻo Sihová. Ko e tuʻunga fakaʻekonōmika ʻo e faʻahinga ko ia naʻe fokí naʻe ʻi he tuʻunga taʻepau, pea naʻe fakafepakiʻi ʻe he ngaahi kaungāʻapi fakafilí ʻa hono toe langá. Ko ia naʻe fifili ai ʻa e niʻihi ʻo e kau langá pe ʻe faifai ange pea ʻosi ʻa e ngāue mahuʻinga ko iá.

Fakafou ʻi heʻene palōfita ko Hākeaí, naʻe toe fakapapauʻi ʻe Sihova ki he kau langá naʻá Ne kau mo kinautolu. “Te u luluʻi ʻa e ngaahi puleʻanga kotoa, pea ko e holi [pe ngaahi meʻa manakoa] ʻo e ngaahi puleʻanga kotoa pe ʻe hoko mai; pea te u fakafonu langilangi ʻa e fale ni,” ko e folofola ia ʻa e ʻOtuá. ʻI he fekauʻaki mo e hohaʻa fakaʻekonōmika ʻa e kau langá, naʻe tuku atu ʻe Hākeai ʻa e pōpoaki ko ʻení: “ʻOku aʻaku ʻa e siliva, pea aʻaku ʻa e koula—ko Sihova Sapaoti ia mei he Taʻehamai.” (Hakeai 2:​7-9) ʻI loto he taʻu ʻe nima hili hono leaʻaki ʻe Hākeai ʻa e ngaahi lea fakaueʻiloto ko iá, naʻe kakato ʻa e ngāué.—Esela 6:​13-15.

Naʻe toe ueʻi ʻe he ngaahi lea ʻa Hākeaí ʻa e kau sevāniti ʻa e ʻOtuá ʻi he ngaahi taimi ki muí ni maí ʻi he lolotonga ʻa e ngaahi ngāue lalahi ʻoku felāveʻi mo e lotu kia Sihová. ʻI he 1879 ʻi hono kamata pulusi ʻe he kalasi tamaioʻeiki anga-tonu mo potó ʻa e pepa ko ʻení, ʻa ia naʻe ui ʻi he taimi ko iá ko e Zion’s Watch Tower and Herald of Christ’s Presence, naʻe ʻasi ai ʻa e fakamatala ko ʻení: “Ko e ‘Zion’s Watch Tower’ ʻoku mau tui, ʻokú ne maʻu ʻa e poupou ʻa SIHOVÁ, pea ʻi heʻene peheé ʻe ʻikai ʻaupito ke ne kōlenga pe tautapa ki he tangatá ki ha poupou. ʻI he taimi ʻe ʻikai toe tokonaki mai ai ha paʻanga feʻunga ʻe Ia ʻokú ne pehē: ‘ʻOku aʻaku ʻa e siliva, pea aʻaku ʻa e koula,’ te mau mahinoʻi leva ko e taimi ia ke tuʻu ai ʻa e pepá ni.”

Kuo ʻikai ʻaupito teitei tuʻu ʻa e pepá ni. Ko e ʻuluaki ʻīsiú naʻe pulusi ia ʻi he tatau ʻe 6,000, ʻi he lea faka-Pilitāniá pē. ʻI he ʻahó ni, ko e fakaʻavalisi ki hono pulusi ʻo e ʻīsiu taki taha ko e tatau ʻe 28,578,000, ʻi he lea ʻe 161.a Ko e Awake!, ʻa e makasini ʻoku faʻa haʻu fakataha mo e Taua Leʻo, ʻokú ne maʻu ʻa e ʻavalisi ko hono pulusi ʻa e tatau ʻe 34,267,000, ʻi he lea ʻe 80.

ʻOku fakahoko ʻe he Kau Fakamoʻoni ʻa Sihová ʻa e ngaahi ngāue lahi ʻa ia ʻoku taumuʻa tatau mo e Taua Leʻo—ʻa ia ko hono hakeakiʻi ʻa Sihova ʻi hono tuʻunga ko e ʻEiki Hau ʻo e ʻunivēsí mo hono fanongonongo ʻa e ongoongo lelei ʻo hono Puleʻangá. (Mātiu 24:14; Fakahā 4:11) Ko e tuipau ʻa e Kau Fakamoʻoni ʻi he ʻaho ní ʻoku tatau ia mo ia naʻe talaki ʻe he pepá ni ʻi he 1879. ʻOku nau tui ʻoku poupouʻi ʻe he ʻOtuá ʻenau ngāué pea ʻe maʻu pē ʻa e paʻanga ia ki he ngaahi ngāue ʻokú ne finangalo ki aí. Ka ʻi he tuʻunga hā maí, ʻoku anga-fēfē hono fakapaʻanga ʻa e ngaahi ngāue ʻa e Kau Fakamoʻoni ʻa Sihová? Pea ko e hā ʻa e faʻahinga ngāue ʻoku nau fakahoko koeʻuhi ke malangaʻi ai ʻa e ongoongo leleí ʻi māmani lahi?

ʻOku Anga-Fēfē Hono Fakapaʻanga ʻa e Ngāué?

ʻI heʻenau malanga ki he kakaí, ʻoku maheni ai ʻa e Kau Fakamoʻoni ʻa Sihová he fanongo ki he fehuʻi: “ʻOku mou vahe ʻi hono fai ʻa e ngāué ni?” Ko e talí ko e ʻikai, ʻoku ʻikai te nau vahe. ʻOku foaki tauʻatāina ʻa honau taimí. ʻOku fakamoleki ʻe he kau ngāue fakaʻevangelioó ni ʻa e ngaahi houa lahi ʻi he talanoa mo e niʻihi kehé ʻo fekauʻaki mo Sihova pea mo e talaʻofa ʻa e Tohi Tapú ki ha kahaʻu lelei angé, koeʻuhi ʻoku ueʻi kinautolu ʻe he houngaʻiá. ʻOku nau houngaʻia ʻi he meʻa kuo fai ʻe he ʻOtuá maʻa kinautolú mo e lahi ʻo e pōpoaki ʻo e ongoongo leleí kuó ne ʻai ke lelei ange ai ʻenau moʻuí mo ʻenau vakaí tonu. Ko ia ai, ʻoku nau loto ke vahevahe ʻa e ngaahi meʻa lelei ko ʻení ki he niʻihi kehé. ʻI he fai peheé, ʻoku nau muimui ai ki he tefitoʻi moʻoni naʻe fakahā ʻe Sīsū: “Kuo mou maʻu taʻetotongi pea mou ʻatu taʻetotongi.” (Mātiu 10:8) Ko e moʻoni, ko ʻenau holi ke hoko ko e kau fakamoʻoni ʻa Sihova mo Sīsuú ʻoku ueʻi ai kinautolu ke nau fakamoleki ʻa e paʻanga mei honau kató tonu koeʻuhi ke vahevahe atu ʻenau tuí ki he kakaí, ʻo aʻu ki he kakai ʻoku nofo mamaʻó.—Aisea 43:10; Ngāue 1:8.

Ko e lahi ʻo e ngāue fakamalanga ko ʻení pea mo e ngaahi koloa ʻoku ngāueʻaki ke lavaʻi ai ʻení—ʻa e ngaahi faiʻanga pulusi, ʻōfisi, Holo ʻAsemipilī, ʻapi misinale mo e hā fua—ʻoku fiemaʻu ki ai ʻa e ngaahi fakamole lahi. ʻOku maʻu mei fē ʻa e paʻangá? Ko hono fakapaʻanga ʻa e kotoa ʻo e ngaahi ngāue ko ʻení ʻoku haʻu ia mei he ngaahi tokoni loto-fiefoaki. ʻOku ʻikai kounaʻi ʻe he Kau Fakamoʻoni ʻa Sihová ʻa e ngaahi mēmipa ʻi he fakatahaʻangá ke foaki ha paʻanga ke tokoni ki he ngaahi ngāue fakaekautahá, pea ʻoku ʻikai ke nau fakatau atu ʻa e ngaahi tohi ʻoku nau tufakí. Kapau ʻoku loto ha taha pē ke fai ha foaki ke tokoni ki he ngāue ʻo hono akoʻi kinautolú, ʻoku talitali lelei ia ʻe he Kau Fakamoʻoní. Tau lāulea angé ki he meʻa ʻoku kau ʻi he tafaʻaki pē ʻe taha ʻo ʻetau ngaahi feinga ke malangaʻi ʻi māmani lahi ʻa e ongoongo leleí—ʻa e liliu leá.

Ngaahi Tohi ʻi he Lea ʻe 437

ʻI he laui hongofuluʻi taʻu, ko e ngaahi tohi ʻa e Kau Fakamoʻoni ʻa Sihová kuo kau ia ʻi he haʻohaʻonga ʻo e ngaahi tohi kuo liliu lahi taha ʻi he māmaní. Ko e ngaahi tuleki, polosiua, makasini mo e ngaahi tohí, kuo liliu ia ki he lea ʻe 437. ʻIo, ko e liliu leá ʻo hangē ko e ngaahi ngāue kehe ʻoku kau ki hono malangaʻi ʻa e ongoongo leleí, ʻoku fiemaʻu ki ai ʻa e koloa fakamatelie lahi. Ka ko e hā koā ʻoku kau ʻi he ngāue liliu leá?

ʻI he taimi ʻoku aofangatuku ai ʻe he kau ʻētita ʻo e ngaahi tohi ʻa e Kau Fakamoʻoni ʻa Sihová ʻa e ngaahi fakamatala ʻo ha kupu ʻi he faka-Pilitāniá, ʻoku ʻave fakaʻilekitulōnika leva ʻo lava ke maʻu ia ʻe he ngaahi timi ko e kau liliu lea kuo akoʻi takatakai ʻi he foʻi kolopé. Ko e timi liliu lea taki taha ʻokú ne tokangaʻi ʻa e taha ʻo e ngaahi lea ʻa ia ʻoku fakataumuʻa ki ai ʻa e ngaahi tohí. Fakatuʻunga ʻi he lahi ʻo e ngaahi ngāue ʻoku nau fakahokó mo e mafatukituki ʻo e lea ʻa ia ʻoku nau liliu ki aí—ʻa e lea ʻoku fakataumuʻa ki aí—ʻoku lava ke faʻuʻaki ʻa e ngaahi timí ni fakafuofua ki he mēmipa ʻe toko 5 ki he 25.

ʻOku toe vakaiʻi leva ʻa e meʻa kuo liliú pea mo hono kalamá. Ko e taumuʻá ke fakaeʻa ʻa e ngaahi fakakaukau naʻe tomuʻa ʻomi he tatau faka-Pilitāniá ʻi he tonu mo e mahino taha ʻe ala lavá. ʻOku ʻomi ʻe he meʻá ni ʻa e ngaahi pole kehekehe. ʻI he ngāue ki ha kupu ʻoku ngāueʻaki ai ha faʻahinga lea kuo faʻu pē ki ha meʻa pau, ʻe fiemaʻu nai ai ʻa e kau liliu leá mo e kau fakasio kalamá ke fai ha fekumi lahi ange fakatouʻosi ki he lea tefitó (faka-Pilitānia, pe ko ha lea tefito hono ua, hangē ko e faka-Falanisē, Lūsia pe faka-Sipeini) mo e lea ʻoku liliu ki aí ke fakapapauʻi ʻoku tonu. Ko e fakatātaá, ʻi he taimi ʻoku lāulea ai ha kupu ʻi he ʻĀ Hake! ki ha tuʻunga-lea fakatekinikale pe fakahisitōlia, ʻe fiemaʻu ki ai ha fekumi lahi ange.

Ko e kau liliu lea tokolahi ʻi he ngaahi ʻōfisi vaʻa ʻo e Kau Fakamoʻoni ʻa Sihová, ʻoku nau ngāue taimi-kakato pe konga-taimi. Ko e niʻihi ia ʻoku nau ngāue kinautolu ʻi he feituʻu ʻa ia ʻoku leaʻaki ai ʻa e lea ʻoku nau liliu ki aí. ʻOku ʻikai ke maʻu ʻe he kau liliu leá ha vahe ʻi he ngāue ʻoku nau faí. Ko e meʻa pē ʻoku tokonaki ki he kau liliu lea taimi-kakató ko ha nofoʻanga mo e meʻakai mo ha kiʻi tokoni fakaepaʻanga feʻunga ki heʻenau ngaahi fakamole tefito fakafoʻituituí. ʻI māmani lahi, ʻoku ngāue ai ʻa e toko 2,800 nai ʻo e Kau Fakamoʻoní ko e kau liliu lea. ʻI he lolotongá ni, ʻoku fakanaunau ʻe he ngaahi ʻōfisi vaʻa ʻe 98 ʻo e Kau Fakamoʻoni ʻa Sihová ʻa e ngaahi timi liliu leá pe tokangaʻi ʻa e ngaahi timi ʻi he ngaahi feituʻu kehe. Ke ʻoatu ha fakatātā pē ʻe taha, ʻoku tokangaʻi ʻe he vaʻa Lūsiá laka hake he kau liliu lea ngāue taimi-kakato pe konga-taimi ʻe 230 ʻa ia ʻoku nau liliu ki he lea laka hake he 30, ʻo kau ki ai ʻa e lea ʻe niʻihi ʻoku ʻikai fuʻu loko ʻiloʻi ʻi tuʻa mei he feituʻú, ʻo hangē ko e lea Chuvash, Ossetian mo e Uighur.

ʻAi ke Lelei Ange ʻa e Tuʻunga ʻo e Liliu Leá

Hangē ko ia ʻoku ʻiloʻi ʻe ha taha pē kuó ne ʻosi feinga ke ako ha lea ʻe taha, ʻoku ʻikai ko ha meʻa faingofua ia ke liliu tonu mātē ʻa e ngaahi fakakaukau ʻoku fihí. Ko e taumuʻá ke tonu hono liliu ʻa e ngaahi moʻoniʻi meʻa mo e fakakaukau ʻo e lea faka-Pilitāniá pea ke ʻai ʻi he taimi tatau ʻa e liliú ke fakanatula hono laú, ʻo hangē pē naʻe fuofua hiki ia ʻi he lea ko iá. Ko hono lavaʻi ʻení, ko ha malava pōtoʻi ia. ʻOku fiemaʻu ʻa e ngaahi taʻu ki he kau liliu lea foʻoú ke nau matiketika ʻi he liliu leá, pea ʻoku tokonaki ʻe he Kau Fakamoʻoni ʻa Sihová ʻa e polokalama ako hokohoko maʻa kinautolu. ʻOku ʻaʻahi ʻa e kau faiako ʻi he taimi ʻe niʻihi ki he ngaahi timí ke tokoni ʻi hono ʻai ke lelei ange ʻa e ngaahi pōtoʻi fakaeliliuleá mo hono ngāueʻaki ʻo e komipiutá.

ʻOku ʻomi ʻe he polokalama ako ko iá ʻa e ngaahi ola lelei. Ko e fakatātaá, ʻoku līpooti mai mei he ʻōfisi ʻi Nikalākuā ʻo e Kau Fakamoʻoni ʻa Sihová: “ʻI he fuofua taimí, kuo maʻu ai ʻe heʻemau kau liliu lea Misikitó ʻa e ako ki he ngaahi foungá mo e pōtoʻí mei ha faiako mei he vaʻa Mekisikoú. Kuo hoko ai ha laka ki muʻa moʻoni ʻi he founga ʻoku fakahoko ai ʻe heʻemau kau liliu leá ʻa ʻenau ngāué. Kuo lelei ʻaupito ange ai ʻa e tuʻunga ʻo e liliu leá.”

Ngaahi Lea ʻOku Maongo ki he Lotó

Ko e ngaahi feinga ke faʻu ʻa e Tohi Tapú mo e ngaahi tohi makatuʻunga aí ʻi he lea tuʻufonua ʻa e kakaí ʻoku fakataumuʻa ke maongo ki honau lotó, pea ko e meʻa tofu pē ia ʻoku hokó. ʻI he 2006, naʻe mātuʻaki fiefia ʻaupito ʻa e Kau Fakamoʻoni ʻa Sihova ʻi Pulukāliá ʻi hono tukuange ʻa e New World Translation of the Christian Greek Scriptures ʻi he faka-Pulukāliá. ʻOku līpooti mai ʻe he vaʻa Pulukāliá ʻenau maʻu ʻa e ngaahi fakahāhā ʻo e houngaʻia lahi ʻi he meʻa ko iá. ʻOku pehē ʻe he faʻahinga he fakatahaʻangá ʻoku “maongo moʻoni ʻa e Tohi Tapú ʻi he taimí ni ki honau lotó, ʻo ʻikai ki heʻenau fakakaukaú pē.” Naʻe pehē ʻe ha tangata matuʻotuʻa mei Sofia: “Kuó u ʻosi lau ʻa e Tohi Tapú ʻi he ngaahi taʻu lahi, ka kuo teʻeki ʻaupito ke u lau ha liliu ʻoku faingofua ange ke mahinoʻi pea aʻu hangatonu ki he lotó.” ʻI he tuʻunga meimei tatau, ʻi ʻAlipēnia, ʻi he hili hono maʻu ha tatau kakato ʻo e New World Translation ʻi he faka-ʻAlipēniá, naʻe pehē ʻe ha Fakamoʻoni he feituʻu ko iá: “He ongo fakaʻofoʻofa ē ko e Folofola ʻa e ʻOtuá ʻi he faka-ʻAlipēniá! He monū moʻoni ia ke folofola mai ʻa Sihova kiate kitautolu ʻi heʻetau leá tonu!”

Ko hono liliu ʻa e Tohi Tapú kātoa ʻe lava ke fai ia ʻe ha timi liliu lea ʻi ha ngaahi taʻu. Ka ʻi he taimi ko e olá ia ʻe lava moʻoni ai ʻa e laui miliona ke mahinoʻi ʻa e Folofola ʻa e ʻOtuá ʻi he ʻuluaki taimí, ʻikai te ke pehē naʻe ʻaonga moʻoni ʻa e feingá kotoa?

‘Ko e Kaungāngaue Kitautolu mo e ʻOtuá’

Ko e moʻoni, ko e liliu leá ko e taha pē ia ʻo e ngaahi ngāue lahi ʻoku fiemaʻu ke malangaʻi ola lelei ai ʻa e ongoongo leleí. Ko hono hiki, pulusi, mo hono fakafolau ʻa e ngaahi tohi Fakatohitapú pea mo e ngaahi ngāue kehekehe ʻoku felāveʻi mo ia ʻi he ngaahi vaʻa, sēketi, mo e fakatahaʻanga ʻo e Kau Fakamoʻoni ʻa Sihová ʻoku fiemaʻu ki ai ʻa e feinga mo e fakamole lahi. Neongo ia, ʻoku “tali ko au” ki ai ʻa e kakai ʻa e ʻOtuá ke fakahoko ʻa e ngāué ni. (Sāme 110:3) ʻOku nau lau ko ha monū ia ke malava ke fai ʻenau tokoni ʻiate kinautolu pē pea vakai ki ai ko ha lāngilangi ia he ko ē, ʻoku vakai mai ʻa Sihova kiate kinautolu ko hono “kaungāngaue.”—1 Kolinito 3:​5-9.

Ko e moʻoni ia ʻoku ʻikai ke fakafalala ʻa e tokotaha ʻokú ne pehē ‘“oku aʻaku ʻa e siliva, pea aʻaku ʻa e koula” ki heʻetau tokoni fakaepaʻangá kae toki lava ke fakahoko ai ʻene ngāué. Neongo ia, kuo fakangeingeiaʻi ʻe Sihova ʻa ʻene kau sevānití ʻaki ʻa e monū ko e kau ʻi hono fakamāʻoniʻoniʻi hono huafá ʻi heʻenau fai ha tokoni fakapaʻanga ki hono malangaʻi ʻa e moʻoni fakaefakahaofí “ki he ngāhi kakai kotoa pe.” (Mātiu 24:14; 28:​19, 20) ʻIkai ʻoku ueʻi koe ke fai ʻa e kotoa te ke lavá ke poupouʻi ʻa e ngāue ko ʻeni ʻa ia ʻe ʻikai ʻaupito toe fai ʻi ha taimí?

[Fakamatala ʻi lalo]

[Fakatātā ʻi he peesi 18]

‘ʻAI KE MAU FAKAKAUKAU FAKAMĀTOATO’

Naʻe tohi ʻe ha kiʻi taʻahine taʻu 14 ki he ʻōfisi ʻi Kameluni ʻo e Kau Fakamoʻoni ʻa Sihová: “Hili ʻeku fakatau ʻeku naunau ako ki he taʻu ní, naʻe malava ai ke u fakatau atu ʻa ʻeku ongo tohi lēsoni ʻe ua ʻi he taʻu kuo ʻosí ʻo feʻunga mo e franc ʻe 2,500 [$5 ʻAmelika]. ʻOku ou foaki atu ʻa e paʻanga ko iá fakataha mo ha toe franc ʻe 910 [$1.82 ʻAmelika] mei heʻeku tātānakí. ʻOku ou loto ke fakalototoʻaʻi atu kimoutolu ke hokohoko atu ʻa e ngāue lelei ʻoku mou faí. Fakamālō atu koeʻuhi ko e ngaahi makasini Taua Leʻo mo e ʻĀ Hake! ʻOku nau ʻai kimautolu ke mau fakakaukau fakamātoato.”

[Puha/Fakatātā ʻi he peesi 18]

KO HA TOKONI LAULŌTAHA

Naʻe maʻu ʻe he vaʻa ʻi Mekisikou ʻo e Kau Fakamoʻoni ʻa Sihová ʻa e tohi hokó mei ha kiʻi taʻu ono loto-houngaʻia, ko Manuel, ʻokú ne nofo ʻi Chiapas State. ʻI he teʻeki ai ke ne poto he tohí, ne fai ai ʻe hano kaungāmeʻa ʻa e tohí maʻana. ʻOku pehē ʻe Manuel: “Naʻe ʻomi ʻe heʻeku kui-fefiné maʻaku ha puaka sināmanu. ʻI he taimi naʻe fāʻele aí, ne u filiʻi pē ʻa e kiʻi puaka fakaʻofoʻofa tahá pea tauhi ia ʻi he tokoni ʻa e fanga tokouá. Fakataha mo e ʻofa lahi, ʻoku ʻoatu heni ko ha tokoni ʻa e meʻa ne u maʻu mei hono fakatau atu ʻa e kiʻi puaká. Naʻe feʻunga hono mamafá mo e kilokalami ʻe 100, pea naʻá ku maʻu mei ai ʻa e peso ʻe 1,250 [$110 ʻAmelika]. Kātaki ʻo ngāueʻaki ʻa e paʻangá maʻa Sihova.”

[Puha ʻi he peesi 19]

‘NGĀUEʻAKI ʻENI KE LILIU ʻA E TOHI TAPÚ’

ʻI he ngaahi fakataha-lahi fakavahe 2005 ʻa e Kau Fakamoʻoni ʻa Sihová ʻi ʻIukalainé, naʻe tukuange ai ʻi he faka-ʻIukalainé ʻa e New World Translation of the Christian Greek Scriptures. ʻI he ʻaho hono hokó, naʻe maʻu ai ʻa e pōpoaki ko ʻení ʻi ha puha lī meʻaʻofa maʻá e fakataha-lahí: “ʻOku ou taʻu hiva. Fakamālō lahi ʻaupito atu koeʻuhi ko e Greek Scriptures. Naʻe ʻomi ʻe heʻema faʻeé ʻa e paʻanga ko ʻení kiate au mo hoku kiʻi tuongaʻané ke ma totongi pasi ʻaki ki he akó. Ka ʻi he taimi naʻe ʻikai ʻuha aí, naʻá ma lue lalo ai ki he akó pea tauhi pē ʻa e hryvnia ʻe 50 [$10 ʻAmelika] ko ʻení. ʻOku ou loto mo hoku tehiná ke mou ngāueʻaki ʻeni ke liliu ai ʻa e Tohi Tapú kātoa ki he faka-ʻIukalainé.”

[Puha ʻi he peesi 20, 21]

NGAAHI FOUNGA ʻOKU FILI AI ʻA E NIʻIHI KE FAI HA FOAKÍ

NGAAHI MEʻAʻOFA KI HE NGĀUE ʻI MĀMANI LAHÍ

ʻOku tuku mavahe, pe vaheʻi ʻe he tokolahi ha paʻanga, ʻa ia ʻoku nau tuku ki he ngaahi puha meʻaʻofa kuo leipolo ko e “Ngaahi Meʻaʻofa ki he Ngāue ʻi Māmani Lahí—Mātiu 24:14.”

ʻI he māhina taki taha, ʻoku ʻoatu ai ʻe he ngaahi fakatahaʻangá ʻa e paʻanga ko ení ki he ʻōfisi vaʻa ʻo e Kau Fakamoʻoni ʻa Sihova ʻa ia ʻokú ne tokangaʻi ʻa honau ngaahi fonuá taki taha. Ko e ngaahi tokoni paʻanga loto-fiefoakí ʻe lava ke toe ʻoatu fakahangatonu ia ki he ʻŌfisi Tauhi Paʻangá, Watchtower Bible and Tract Society of New Zealand, PO Box 75142, Manurewa, Manukau 2243. ʻE lava foki ke tokoni nai ʻaki ʻa e ngaahi siueli pe ngaahi koloa mahuʻinga kehé. Ko ha tohi nounou ʻo fakamatalaʻi ai ko e ngaahi meʻa peheé ko ha meʻaʻofa fakahangatonu ia ʻoku totonu ke ʻave fakataha mo e ngaahi tokoni ko ení.

FOKOTUʻUTUʻU ʻO E TOKONI ʻOFÁ

ʻE lava ke meʻaʻofaʻaki ha paʻanga ʻi he malumalu ʻo ha fokotuʻutuʻu makehe ʻa ia, ʻoku totonu ai ki he tokotaha-foakí ke ne maʻu ha fiemaʻu fakafoʻituitui, ʻe lava ʻo fai ai ha tokoni fakapaʻanga kiate ia. Ki ha fakamatala lahi ange, kātaki ʻo fetuʻutaki ki he ʻŌfisi Tauhi Paʻangá ʻi he tuʻasila kuo hiki ʻi ʻolungá.

FOAKI ʻOSI PALANI

Tānaki atu ki he ngaahi meʻaʻofa paʻanga fakahangatonú mo e ngaahi tokoni ʻofa ʻo e paʻangá, ʻoku ʻi ai ʻa e ngaahi founga kehe ʻo e foakí ke ʻaonga ki he ngāue ʻo e Puleʻangá ʻi māmani lahí. ʻOku kau ki heni ʻa e:

Maluʻi: ʻE lava ke tohi-tuku nai ki he Sōsaieti Taua Leʻó ha tohi fakamoʻoni maluʻi moʻui/fokotuʻutuʻu ʻo ha vāhenga mālōlō.

Ngaahi ʻInasi mo e Ngaahi Pōnite: ʻE foaki atu nai ʻa e ngaahi ʻinasi mo e ngaahi pōnite ki he Sōsaieti Taua Leʻó ko ha meʻaʻofa fakahangatonu.

Kelekele: ʻE lava nai ke foaki ha konga kelekele ʻe ala fakatau ki he Sōsaieti Taua Leʻó ʻi hano fai ha meʻaʻofa fakahangatonu pe ʻi hano tauhi ha kelekele ʻo e tokotaha-foakí, ʻa ia ʻe lava ke hokohoko atu ʻene nofo aí ʻi heʻene kei moʻuí. Fetuʻutaki ki he ʻōfisi vaʻá ki muʻa ke ʻoatu ha kelekelé.

Ngaahi Tohi-Tuku mo e Ngaahi Talāsiti: ʻE tohi-tuku nai ha koloa pe paʻanga ki he Sōsaieti Taua Leʻó ʻo fakafou ʻi ha tohi-tuku fakahoko fakalao, pe ʻe ʻai nai ʻa e hingoa ʻo e Sōsaieti Taua Leʻó ke tohi-tuku ki ai ha aleapau ʻo ha talāsiti.

Ke maʻu ha tokoni ki hono fokotuʻutuʻu ha foaki ʻosi palani ke ʻaonga ki he ngāue ʻi māmani lahi ʻa e Kau Fakamoʻoni ʻa Sihová kātaki ʻo fetuʻutaki ki he ʻōfisi Tauhi Paʻangá ʻi ha faitohi pe ʻi he telefoní, ʻi he tuʻasila ʻi laló.

ʻŌfisi Tauhi Paʻanga

Watchtower Bible and Tract Society of New Zealand

PO Box 75142

Manurewa, Manukau 2243

Telefoni: (09) 267-2227

[Fakatātā ʻi he peesi 19]

Ongo liliu lea Misikitó, Vaʻa Nikalākuaá