ʻOkú Ke Maʻu ʻa e Fiefia ʻi he “Monū ʻo Hono Fai ha Foaki ʻOfa”?
KO E muʻaki kau Kalisitiane ʻi Filipaí naʻe ʻiloa kinautolu ʻi heʻenau poupou nima-homo ki he lotu moʻoní. ʻI heʻene tohi fakamānavaʻi kia kinautolú, naʻe tohi ai ʻe he ʻapositolo ko Paulá: “ʻOku ou fakafetaʻi maʻu pē ki hoku ʻOtuá ʻi heʻeku manatuʻi kimoutolu ʻi he hū tōtōaki kotoa pē ʻoku ou fai maʻá e kotoa ʻo kimoutolú. ʻOku ou fai ʻa e hū tōtōaki taki taha fakataha mo e fiefia, koeʻuhi ko e tokoni kuo mou fai ki he ongoongo leleí mei he ʻuluaki ʻahó pē ʻo aʻu mai ki he mōmeniti ko ení.” (Fil. 1:3-5) Naʻe manatuʻi lelei ʻe Paula ʻa e taimi naʻe papitaiso ai ʻa Litia mo hono falé pea naʻá ne vilitaki ange ʻi he anga-talitali kakai kiate ia mo hono ngaahi kaungāmalangá ke nau nofo ʻi hono ʻapí.—Ngā. 16:14, 15.
ʻIkai fuoloa mei ai, ko e fakatahaʻanga foʻou naʻe toki fokotuʻu ʻi Filipaí naʻa nau ʻave tuʻo ua ʻa e ngaahi tokonaki kia Paula he lolotonga ʻene nofo ʻi he ngaahi uike ʻe niʻihi mo e ngaahi kaungātui ʻi Tesalonaiká, ʻi he meimei maile nai ʻe 100 (kilomita ʻe 160) hono mamaʻó. (Fil. 4:15, 16) ʻI ha ngaahi taʻu siʻi ki mui ai, lolotonga ʻa e hokosia ʻe he fanga tokoua Filipai mo e fanga tokoua kehe ʻi Masitōniá ʻa e faingataʻá mo e “masiva ʻangoʻango,” naʻa nau fanongo fekauʻaki mo e fiemaʻu ʻa e kau Kalisitiane naʻe fakatangaʻi ʻi Selusalemá pea nau loto ke tokoniʻi kinautolu. Naʻe fakamoʻoniʻi ʻe Paula ko e meʻa ko ení naʻe mātuʻaki “lahi atu ia ʻi he meʻa naʻa nau maʻú.” Neongo ia, naʻá ne tohi: “[Naʻa nau] hanganaki kole fakamātoato mai . . . ke nau maʻu ʻa e monū ʻo hono fai ha foaki ʻofa.”—2 Kol. 8:1-4; Loma 15:26.
ʻI ha taʻu nai ʻe hongofulu hili hono fuofua tali lelei ʻe he kau Filipaí ʻa e lotu faka-Kalisitiané, naʻa nau kei fakahāhā pē ʻa e laumālie nima-homo tatau. ʻI he fanongo naʻe tuku pilīsone ʻa Paula ʻi Lomá, naʻa nau fekau atu ʻa ʻEpafalotaito ke fononga ʻi he maile ʻe 800 (kilomita ʻe 1,287) ʻi ʻuta mo tahi ʻo ʻave ʻa e ngaahi tokonaki ki he ʻapositoló. ʻOku hā mahino, naʻe loto ʻa e kau Filipaí ke tokonaki maʻa Paula koeʻuhi ke ne lava ʻo hokohoko atu hono fakaivimālohiʻi ʻa e fanga tokouá mo fai ʻa e malangá, neongo ʻene kei nofo pilīsoné.—Fil. 1:12-14; 2:25-30; 4:18.
ʻI he ʻahó ni, ʻoku lau ʻe he kau Kalisitiane moʻoní ko ha monū ia ke poupouʻi ʻa e ngāue malangaʻi ʻo e Puleʻangá mo e ngaohi-ākongá. (Māt. 28:19, 20) ʻOku nau pouaki ʻa e ngaahi meʻa ʻo e Puleʻangá ʻaki hono foaki ʻo e taimi, feinga mo e paʻanga. Ko e puha ʻoku ʻasi fakataha atu hení ʻoku ʻoatu ai ʻa e ngaahi founga ʻe niʻihi ʻa ia ʻe lava ke ke kau ai ʻi hono poupouʻi ʻa e ngāue ko eni kuo ʻomai ʻe he ʻOtuá.
[Puha ʻi he peesi 22]
NGAAHI FOUNGA ʻOKU FILI AI ʻA E NIʻIHI KE FAI HA FOAKÍ
NGAAHI MEʻAʻOFA KI HE NGĀUE ʻI MĀMANI LAHÍ
ʻOku tuku mavahe, pe vaheʻi ʻe he tokolahi ha paʻanga, ʻa ia ʻoku nau tuku ki he ngaahi puha meʻaʻofa kuo leipolo ko e “Ngāue ʻi Māmani Lahí.”
ʻI he māhina taki taha, ʻoku ʻoatu ai ʻe he ngaahi fakatahaʻangá ʻa e paʻanga ko ení ki he ʻōfisi ʻo e Kau Fakamoʻoni ʻa Sihova ʻa ia ʻokú ne tokangaʻi ʻa honau ngaahi fonuá taki taha. Ko e ngaahi tokoni paʻanga loto-fiefoakí ʻe lava ke toe ʻoatu fakahangatonu ia ki he Watchtower Bible and Tract Society of New Zealand, PO Box 75142, Manurewa, Auckland 2243, pe ki he ʻōfisi vaʻa ʻo e Kau Fakamoʻoni ʻa Sihová ʻokú ne tokangaʻi ho fonuá. (Ko e ngaahi tokoni loto-fiefoaki ʻoku fakahaaʻi ʻi he ngaahi konga ʻi laló ʻe lava ke toe ʻave ki he ʻōfisi vaʻa ʻo e Kau Fakamoʻoni ʻa Sihova ʻoku nau tokangaʻi ho fonuá.) Ko e ngaahi sieke ʻoku ʻave ki he tuʻasila ʻi ʻolungá ʻoku totonu ke ʻai ke ala totongi ia ki he “Watch Tower.” Ko e ngaahi siueli pe ngaahi koloa mahuʻinga kehé ʻe lava foki ke tokoni nai ʻaki. Ko ha tohi nounou ʻo fakamatalaʻi ai ko e ngaahi meʻa peheé ko ha foaki fakahangatonu ia ʻoku totonu ke ʻave fakataha mo e ngaahi meʻaʻofa ko ení.
FOKOTUʻUTUʻU FAKATALĀSITI KI HE TOKONI FAIFAKATUʻUNGA
ʻE tuku nai ʻa e paʻangá ki ha talāsiti ke ngāueʻaki ʻi Nuʻu Sila pe ʻi māmani lahi. Kae kehe, ʻi hano kole ʻa e paʻangá ʻe fakafoki atu ia. Ki ha fakamatala lahi ange, kātaki ʻo fetuʻutaki ki he ʻŌfisi Tauhi Paʻangá ʻaki ʻa e faitohi ki he tuʻasila ʻoku hā ʻi ʻolungá pe telefoni ki he (00649) 2683380.
FOAKI ʻOSI PALANI
Tānaki atu ki he ngaahi meʻaʻofa paʻanga fakahangatonú, ʻoku ʻi ai ʻa e ngaahi founga kehe ʻo e foakí ke ʻaonga ki he ngāue ʻo e Puleʻangá ʻi māmani lahí. ʻOku kau ki heni ʻa e:
Maluʻi: ʻE lava ke tohi-tuku nai ki he Sōsaieti Taua Leʻo Tohi Tapu mo e Tuleki ʻi Nuʻu Silá ha tohi fakamoʻoni maluʻi moʻui pe ko ha fokotuʻutuʻu ʻo ha vāhenga mālōlō.
Ngaahi ʻInasi mo e Ngaahi Pōnite: ʻE foaki atu nai ʻa e ngaahi ʻinasi mo e ngaahi pōnite ki he Sōsaieti Taua Leʻo ʻi Nuʻu Silá ko ha meʻaʻofa fakahangatonu.
Kelekele: ʻE lava nai ke foaki ha kelekele ʻe ala fakatau ʻi hano fai ha meʻaʻofa fakahangatonu pe ʻi he tuʻunga ʻo ha konga ʻapi ʻoku nofoʻi, ʻi hano tauhi ha kelekele ʻo e tokotaha-foakí, ʻa ia ʻe lava ke hokohoko atu ʻene nofo aí ʻi heʻene kei moʻuí. Fetuʻutaki ki he ʻōfisi vaʻa ʻi ho fonuá ki muʻa ke foaki fakalao ha kelekele.
Ngaahi Tohi-Tuku mo e Ngaahi Talāsiti: ʻE foaki nai ha koloa pe paʻanga ki he Sōsaieti Taua Leʻo Tohi Tapu mo e Tuleki ʻi Nuʻu Silá fakafou ʻi ha tohi-tuku fakahoko fakalao, pe ʻe ʻai nai ʻa e hingoa ʻo e Sōsaieti Taua Leʻó ke tohi-tuku ki ai ha aleapau ʻo ha talāsiti. Ko ha talāsiti ʻoku maʻu ʻaonga mei ai ha kautaha fakalotu ʻe tokonaki mai nai ai ha ngaahi ʻaonga pau ki he tukuhaú.
Ki ha fakamatala lahi ange, ʻe lava ke ke fetuʻutaki ki he ʻŌfisi Tauhi Paʻangá, ʻi ha faitohi pe ʻi he telefoní, ʻi he tuʻasila kuo fakahā ʻi ʻolungá, pe ko e ʻōfisi vaʻa ʻokú ne tokangaʻi ho fonuá.