Ngaahi Fehuʻi mei he Kau Lautohí
ʻI he vakai ki he loto-lelei ʻa Sihova ke fakamolemoleʻi ʻa e angahalá koeʻuhi ko e mahuʻinga ʻo e feilaulau huhuʻí, ko e hā ʻoku fiemaʻu ai ki he kau Kalisitiané ke nau vete hia ki he kau mātuʻa ʻi he fakatahaʻangá?
Hangē ko ia ʻoku lava ke vakai ki ai ʻi he tuʻunga ʻo Tēvita mo Patisepá, naʻe fakamolemoleʻi ʻe Sihova ʻa e angahala ʻa Tēvitá, neongo ne mafatukituki, koeʻuhi ko e fakatomala loto-moʻoni ʻa Tēvitá. ʻI he fakaofiofi ki ai ʻa e palōfita ko Nētané, naʻe vete fakahāhā ʻe Tēvita: “Kuo u hia kia Sihova.”—2 Samiuela 12:13.
Kae kehe, ʻoku ʻikai ngata pē ʻi hono tali ʻe Sihova ha vete hia loto-moʻoni ʻa ha tokotaha angahala pea fakaaʻu ki ai ʻa e fakamolemolé ka ʻokú ne toe fai foki ha ngaahi tokonaki anga-ʻofa ke tokoniʻi ʻa e tokotaha faihalá ke fakalakalaka ki he tuʻunga ʻo e toe moʻuilelei fakalaumālié. ʻI he tuʻunga ʻo Tēvitá, naʻe fakafou mai ʻa e tokoní ʻi he palōfita ko Nētané. Ko e ʻahó ni, ʻi he fakatahaʻanga Kalisitiané, ʻoku ʻi ai ʻa e kau tangata matuʻotuʻa fakalaumālie, pe ko e kau mātuʻa. ʻOku fakamatala ʻe he ākonga ko Sēmisí: “ʻOku ʻi ai hamou taha ʻoku mahaki [fakalaumālie]? ke ne ui ange ʻa e kau matuʻa ʻo e siasi; pea te nau lotua ia, ʻo tākai ʻaki ʻa e lolo ʻi he huafa ʻo e ʻEiki. Pea ko e lotu ʻa tui te ne fakamoʻui ʻa e mahaki, pea ʻe fokotuʻu ia ʻe he ʻEiki; pea neongo kuo ne fai ha angahala, ka ʻe fakamolemole ia.”—Semisi 5:14, 15.
ʻOku malava ke fai ʻe he kau mātuʻa taukeí ha meʻa lahi ke fakanongaʻaki ʻa e loto-mamahi ʻoku fuesia ʻe he tokotaha faihala fakatomalá. ʻOku nau feinga ke faʻifaʻitaki kia Sihova ʻi heʻenau ngaahi feangainga mo iá. ʻOku ʻikai ʻaupito te nau loto ke anga-fefeka, neongo ko e valoki mālohí ʻe feʻungamālie nai. ʻI hono kehé, ʻoku nau fakakaukau manavaʻofa ki he ngaahi fiemaʻu tonu ʻa e tokotahá. ʻOku nau feinga anga-kātaki ke fakatonutonu ʻa e fakakaukau ʻa e tokotaha faihalá ʻaki hono ngāueʻaki ʻa e Folofola ʻa e ʻOtuá. (Kaletia 6:1) Naʻa mo e ʻikai vete tauʻatāina ʻe ha tokotaha ʻene angahalá, ʻe kei ueʻi nai pē ia ke ne fakatomala ʻi he taimi ʻoku fakaofiofi atu ai ʻa e kau mātuʻá, ʻo hangē pē ko Tēvitá ʻi he taimi naʻe fakaofiofi ai kiate ia ʻa Nētané. Ko e poupou ko ia ʻoku fakahoko ʻe he kau mātuʻá ʻoku tokoniʻi ai ʻa e tokotaha faihalá ke ne fakaʻehiʻehi mei he fakatuʻutāmaki ʻo hono toe fai ʻo e angahalá mo e ngaahi nunuʻa mafatukituki ʻo e hoko ko ha tokotaha faiangahala loto-fefeká.—Hepelu 10:26-31.
Ko e moʻoni ʻoku ʻikai faingofua ke vete ki he niʻihi kehé ʻa e ngaahi tōʻonga ʻoku ongoʻi mā ai ha taha pea ke kumi ki ha fakamolemole. ʻOku fiemaʻu ha mālohi ʻi loto. Neongo ia, fakakaukau angé ʻi ha kiʻi mōmeniti, ki he tafaʻaki ʻe tahá. Naʻe pehē ʻe ha tangata ʻe taha ʻa ia naʻe ʻikai te ne fakahaaʻi ʻene angahala mamafá ki he kau mātuʻa ʻi he fakatahaʻangá: “Naʻá ku ongoʻi ha mamahi ʻi hoku lotó ʻa ia naʻe ʻikai ʻaupito mole. Naʻá ku fakalahi ʻeku ngaahi feinga ʻi he ngāue fakamalangá, ka naʻe kei nofo pē ʻa e ongoʻi loto-laveá ia.” Naʻá ne ongoʻi ko e lotu ʻo vete hia ki he ʻOtuá naʻe feʻunga, ka ʻoku hā mahino naʻe ʻikai, he naʻá ne hokosia tatau ʻa e ngaahi ongoʻi ʻa Tuʻi Tēvitá. (Sāme 51:8, 11) He lelei lahi ange ē ke tali ʻa e tokoni anga-ʻofa ʻa ia ʻoku tokonaki mai ʻe Sihova fakafou ʻi he kau mātuʻá!