Ngaahi Fehuʻi mei he Kau Lautohí

Naʻe ʻi fē ʻa Taniela ʻi he taimi naʻe ʻahiʻahiʻi ai ʻa e toko tolu Hepeluú ʻi he ʻao ʻo e fuʻu ʻīmisi naʻe fokotuʻu ʻe Nepukanesa ʻi he tokalelei ʻo Tulá?

ʻOku ʻikai ke tala mai ia ʻe he Tohitapú, ko ia ʻoku ʻikai ha tangata ʻi he ʻahó ni ʻe lava ke ne fakapapauʻi ʻa e ngaahi feituʻu naʻe ʻi ai ʻa Taniela ʻi he lolotonga ʻa e ʻahiʻahi ko iá.

Kuo pehē ʻe he niʻihi ko e tuʻunga fakaʻofisiale ʻo Tanielá pe ko ʻene tuʻu fakahōifua kia Nepukanesá naʻe māʻolunga ange ai ia ʻia Setaleki, Mēsake, mo ʻApitenikō, pea ko ia ai, naʻe ʻikai fiemaʻu ke ʻalu ʻa Taniela ia ki he tokalelei ʻo Tulá. ʻOku fakahaaʻi ʻi he Taniela 2:49 naʻe ʻi ai hono tuʻunga māʻolunga ange ʻi ha taimi ʻi he tuʻunga ʻo hono kaungāmeʻa ʻe toko tolú. Ka ʻoku ʻikai lava ke tau fakamoʻoniʻi naʻe fakaʻatā ia ʻe he meʻá ni mei he fakatahataha mo e niʻihi kehé ʻi he ʻao ʻo e ʻīmisí.

ʻI he feinga ke fakamatalaʻi ʻa e ʻikai ke ʻi ai ʻa Tanielá, kuo pehē ʻe he niʻihi naʻá ne mamaʻo nai ʻi ha ngāue fakaʻofisiale pe naʻá ne puke ʻo ʻikai lava ai ke kau ki ai. Kae kehe, ʻoku ʻikai ke tala mai ia ʻe he Tohitapú. ʻI ha tuʻunga pē, ko e ʻalunga ʻo Tanielá kuo pau pē naʻe ʻikai malava ke fakaangaʻi, he kapau naʻe pehē, naʻe ngāueʻaki taʻetoeveiveiua ia ʻe he kau ʻōfisa Pāpilone meheká ke ʻomai ai ha ngaahi tukuakiʻi fekauʻaki mo ia. (Taniela 3:8) Fakatouʻosi ki muʻa pea ʻi he hili ʻa e meʻa ko eni naʻe hokó, naʻe fakamoʻoniʻi ai ʻe Taniela ʻa ʻene hoko ko e tokotaha tauhi anga-tonu, ʻo mateaki ki he ʻOtuá ʻo tatau ai pē pe ko e hā ʻa e ʻahiʻahi naʻá ne fehangahangai mo iá. (Taniela 1:8; 5:​17; 6:​4, 10, 11) Ko ia, neongo ʻoku ʻikai ke tala ʻe he Tohitapú ʻa e ʻuhinga naʻe ʻikai ke ʻi ai ai ʻa Taniela ʻi he tokalelei ʻo Tulá, ʻoku lava ke tau falala pau naʻá ne faitōnunga ʻo taʻefakangaloku kia Sihova ko e ʻOtuá.​—Isikeli 14:14; Hepelu 11:33.