ʻOku ʻI Ai ha ʻAmanaki ki he Fakamoʻuí?
Ko e senituli hono 20 kuo ui ia ko e taha ʻo e ngaahi senituli totoʻia taha kuo iku ʻo ʻiloa ʻe he faʻahinga ʻo e tangatá. Ko e faihiá, ngaahi taú, fekeʻikeʻi fakafaʻahingá, ngāuekoviʻaki ʻa e faitoʻo kona tapú, taʻefaitotonú mo e fakamālohí kuo mafola noa pē tautefito ʻi he lolotonga ʻo e ngaahi hongofuluʻi taʻu siʻi fakamuimuí. ʻOku tānaki atu ki he meʻá ni ʻa e langa pea mo e mamahi ʻa ia ko e tupu ia mei he mahamahakí, taʻumotuʻá pea mo e maté. Ko hai ia ʻoku ʻikai te ne fakaʻamu ki ha tauʻatāina mei he ngaahi palopalema lalahi ʻoku hoko ʻi he māmaní he ʻaho ní? ʻI heʻetau hanga atu ki he kahaʻú, ʻoku ʻi ai ha ʻamanaki ki he fakamoʻuí?
FAKAKAUKAU angé ki he vīsone naʻe tuku ki he ʻapositolo ko Sioné ʻi he taʻu nai ʻe 2,000 kuo maliu atú. Naʻá ne tohi: “Ko eni, ko e tapanekale ʻo e ʻOtua, ʻoku tuʻu mo e kakai. Pea ʻe nofo hono Sikaina mo kinautolu, pea te nau nofo ko hono kakai; pea ʻe nofo ʻe he ʻEne ʻAfio, ko e ʻOtua ʻoku kau maʻanautolu, ʻio, ko honau ʻOtua. Pea te ne holoholo ʻa e loʻimata kotoa pē mei honau mata; pea ʻe ʻikai toe ai ha mate, pea ʻe ʻikai toe ai ha mamahi, pe ha tangi, pe ha ongosia; kuo mole ʻa e ngaahi meʻa muʻa.” (Fakahā 21:3, 4) Naʻe tomuʻa tala ʻa e meʻa tatau ʻe he palōfita ko ʻAiseá: “Te ne folofua ʻa mate ʻo taʻengata; pea ko Atonai Sihova te ne holoholo ʻa e loʻimata mei he mata fuape; pea te ne ʻave ʻa e manukiaʻanga ʻo hono kakai mei he funga ʻo mamani katoa: he kuo folofola ki ai ʻa Sihova.”—Aisea 25:8.
Fakaʻuta atu pē ki he meʻa ʻe ʻuhinga ki ai ʻa hono fakahoko ʻo e ngaahi talaʻofa ʻa e ʻOtuá! ʻE fakahaofi ʻa e faʻahinga ʻo e tangatá, pe fakatauʻatāinaʻi, mei he fakafeʻātungiá mo e fakamālohí pea mei he ngaahi tupuʻanga ʻo e mamahí mo e faingataʻá. He ko ē, naʻa mo e mahamahakí, taʻumotuʻá pea mo e maté ʻe ʻikai te nau fakahohaʻasi kitautolu! Ko e Folofola ʻa e ʻOtuá ko e Tohitapú, ʻokú ne talaʻofa mai ʻa e moʻui taʻengata ʻi he malumalu ʻo e ngaahi tuʻunga haohaoa ʻi he māmaní. (Luke 23:43; Sione 17:3) Pea ʻoku ala maʻu ia ʻe he faʻahinga kotoa ʻoku nau holi ki aí. “[Ko e ʻOtuá] ʻoku ne finangalo ke maʻu moʻui ʻe he kakai kotoa pe, pea ke nau aʻusia ʻa e ʻilo kanokano ki he moʻoni.”—1 Timote 2:3, 4.
Ko ia ai, ke maʻu ʻaonga mei he ngaahi talaʻofa ʻa e ʻOtuá, kuo pau ke mahino kiate kitautolu ʻa e ngafa ʻoku fakahoko ʻe Sīsū Kalaisi ʻi hotau fakamoʻuí pea ngāueʻi ʻa e tui kiate iá. Naʻe pehē ʻe Sīsū tonu: “Naʻe ʻofa pehe ʻa e ʻOtua ki māmāni, ko ia naʻa ne foaki hono ʻAlo tofu-pe-taha-ne-fakatupu, koeʻuhi ko ia kotoa pe ʻoku tui pikitai kiate ia ke ʻoua naʻa ʻauha, kae maʻu ʻa e moʻui taʻengata.” (Sione 3:16) ʻI hono fakahaaʻi ʻa e ngafa mātuʻaki mahuʻinga ʻo Sīsū Kalaisí ʻi he meʻá ni, naʻe pehē ʻe he ʻapositolo ko Pitá: “ʻOku ʻikai ke tuʻu ʻi ha taha kehe ʻa e fakamoʻui; he talaʻehai ʻoku ʻi ai mo ha hingoa kehe ʻi he lalo langi kuo fokotuʻu ʻi he lotolotonga ʻo e kakai, ʻa ia kuo tuʻutuʻuni ke tau moʻui ai.” (Ngāue 4:12) Naʻe enginaki ʻa e ʻapositolo ko Paulá mo hono kaungāmeʻa ko Sailosí ki ha tokotaha loto-totonu naʻá ne fai ha fehuʻi: “Tui falala ni ki he ʻEiki ko Sisū, pea te ke moʻui, ʻa koe mo ho fale.”—Ngāue 16:30, 31.
ʻIo, ko Sīsū Kalaisi ʻa e “Fakafofonga Tefito ʻo e moʻuí,” pea ʻoku malava ke maʻu ʻa e fakamoʻuí ʻo fakafou ʻiate ia pē. (Ngāue 3:15, NW) Ka ʻe lava fēfē ke hoko ha tangata pē taha ko ha tokotaha tefito ia ʻi hono fakamoʻui kitautolú? Ko hono maʻu ha mahino māʻalaʻala ki hono ngafá ʻi he fekauʻaki mo e meʻá ni ʻoku totonu ke ne fakaivimālohiʻi ʻetau ʻamanaki ki he fakamoʻuí.
[Maʻuʻanga ʻo e Tā ʻi he peesi 2]
Peesi 3: Vakapuna laku pomu: USAF photo; fānau fiekaia: UNITED NATIONS/J. FRAND; vaka tau vela: U.S. Navy photo