Ngaahi Fehuʻi mei he Kau Lautohí

ʻOku ʻuhinga ʻa e fakahinohino ʻa e ʻOtuá ʻoku lēkooti ʻi he Selemaia 7:​16 ʻe ʻikai ke lotu ʻa e kau Kalisitiané fekauʻaki mo ha taha kuo kapusi mei he fakatahaʻanga Kalisitiané koeʻuhi ko ha tokotaha faiangahala taʻefakatomala ia?

Hili ʻene fakahaaʻi ʻene fakamaau ki Siuta taʻefaitōnungá, naʻe folofola ʻa Sihova kia Selemaia: “Pea ko koe, ʻoua te ke hufekina ʻa e kakai ni, pea ʻoua te ke ofaʻaki haʻo tangi pe lotu koeʻuhi ko kinautolu, pea ʻoua te ke oʻi au; he ʻoku ʻikai te u ongoʻi koe.”—Selemaia 7:16.

Ko e hā naʻe fekauʻi ai ʻe Sihova ʻa Selemaia ke ʻoua ʻe lotu maʻá e kau ʻIsilelí? ʻOku hā mahino koeʻuhi ko ʻenau ngaahi talangataʻa tekeutua ki heʻene Laó. ʻI he fai fakahāhā mo e taʻemaá, naʻa nau “kaihaʻa, ke fai ha fakapo. Pea ke tono ʻunoho, pea ke fuakava ki ha loi, pea ke tutu inisenisi kia Peali, pea ke muimui ki he ngaahi ʻotua kehe.” Fakatatau ki ai, naʻe tala ʻe Sihova ki he kau Siu taʻemateakí: “Te u liʻaki kimoutolu mei hoku ʻao, ʻo hange kuo u liʻaki homou fuʻu kainga na ʻa e hako kotoa ʻo Ifalemi.” Ko e moʻoni, naʻe taʻetotonu kia Selemaia, pe ko ha taha kehe pē, ke lotu kia Sihova ke ne fakafoki ʻa ʻEne fakamāú.—Selemaia 7:​9, 15.

ʻI he fekauʻaki mo e meʻá ni, naʻe tohi ʻa e ʻapositolo ko Sioné ʻo fekauʻaki mo e lotu totonu ki he ʻOtuá. ʻUluakí, naʻá ne fakapapauʻi ki he kau Kalisitiané: “Ka tau ka kole ha meʻa ʻi he funga ʻo hono finangalo ʻoku ne tokanga kiate kitautolu.” (1 Sione 5:14) Pea, ʻi he fekauʻaki mo e lotu maʻá e niʻihi kehé, naʻe hoko atu ʻa Sione: “Kapau ʻe ʻilo ʻe ha taha ʻa hono tokoua ʻoku ne fai ha angahala ʻoku ʻikai tonu ki he mate, te ne kole, pea te ne tuku kiate ia ha moʻui, ʻio, kiate kinautolu ʻoku fai angahala kae ʻikai tonu ki he mate. ʻOku ʻi ai ha angahala ʻoku tonu ki he mate: ʻoku ʻikai te u pehe ke ne alaʻaki kole koeʻuhi ko e angahala ko ia.” (1 Sione 5:16) Naʻe toe lea ʻa Sīsū fekauʻaki mo e angahala ʻa ia “ʻe ʻikai fakamolemole,” ʻa ia ko e angahala ki he laumālie māʻoniʻoní.—Mātiu 12:​31, 32.

ʻOku ʻuhinga ení ko e faʻahinga kotoa ʻoku kapusi mei he fakatahaʻanga Kalisitiané ʻi he angahala taʻefakatomalá kuo nau fai ʻa e ngaahi angahala ʻoku “tonu ki he mate” pea ko ia ʻoku ʻikai ai totonu ke lotu fekauʻaki mo kinautolu? ʻE ʻikai moʻoni ke pehē ko e tuʻunga tefitó eni koeʻuhi ʻi he ngaahi tuʻunga ʻe niʻihi ko e ngaahi talangataʻa peheé ʻoku ʻikai ko e ngaahi angahala ia ʻoku tonu ki he mate. Ko hono moʻoní, ʻoku faingataʻa ke tala pe ʻoku nau pehē. Ko ha fakatātā mahino ko Tuʻi Manase ʻo Siutá. Naʻá ne fokotuʻu ʻa e ngaahi ʻōlita ki he ngaahi ʻotua loí, foaki ʻa hono ngaahi fohá tonu ʻi he feilaulau, fai ʻa e fakahaʻele faʻahikehé, pea fokotuʻu ha ʻīmisi kuo tongi ʻi he temipale ʻo Sihová. Ko hono moʻoní, ʻoku pehē ʻe he Tohitapú ko Manase mo e kakaí naʻa nau fai “ʻa e meʻa naʻe tau kovi ki he finangalo ʻo Sihova, ʻo hange ko e fai fakalielia ʻa e hiteni ne kapusi ʻe Sihova mei he ʻao ʻo haʻa Isileli.” ʻI he meʻá ni kotoa, naʻe tautea ʻe Sihova ʻa Manase ʻaki hono fekauʻi ia ko ha pōpula haʻi sēini ki Pāpilone.—2 Tuʻi 21:​1-9; 2 Kalonikali 33:​1-11.

Ko e ngaahi angahala ʻa Manasé, neongo ʻenau mamafá, ʻa e faʻahinga angahala ʻoku tonu ki he maté? ʻOku hā mahino naʻe ʻikai, he ʻoku hoko atu ʻa e fakamatalá ʻo fekauʻaki mo ia: “Pea ʻi he to ʻa e mamahi kiate ia naʻa ne ngaue ke fakamokomoko ʻa e finangalo ʻo Sihova ko hono ʻOtua, pea ne matuʻaki fakavaivaiʻi ia ʻi he ʻao ʻo e ʻOtua ʻo hono tupuʻanga. ʻIo, naʻa ne punou ʻo hu ki Heʻene ʻAfio, pea ne afeitaulalo mai ʻo ongoʻi ʻene hu totoaki, ʻo ne fakafoki ia ki Selusalema ki hono puleʻanga. Toki ʻilo ʻe Manase ko Sihova pe ʻa e ʻOtua.”—2 Kalonikali 33:​12, 13.

Ko ia ai, ʻoku ʻikai totonu ke tau fakaʻosiʻaki kuo pau ʻoku halaia ha tokotaha ʻi he angahala ʻoku tonu ki he maté koeʻuhi pē ʻoku kapusi ia mei he fakatahaʻangá. ʻOku fiemaʻu nai ʻa e taimi ke fakaeʻa ai ʻa e tuʻunga totonu ʻo e loto ʻo e tokotahá. Ko hono moʻoní, ʻoku faʻa fakahaaʻi ko e taha ʻo e ngaahi taumuʻa ʻo e tuʻusí ke fakatupunga ʻa e tokotaha angahalá ke fakakaukau lelei pea ʻi he ʻamanaki ke ne fakatomala pea tafoki.

Koeʻuhi ʻoku ʻikai ke kei ʻi he fakatahaʻangá ʻa e tokotahá, ko ha liliu pē ʻi hono lotó mo e fakakaukaú ʻe lava ke ʻuluaki fakatokangaʻi ia ʻe he faʻahinga ʻoku ofi kiate iá, ʻo hangē ko ha hoa mali pe ko e ngaahi mēmipa ʻo e fāmilí. Ko e faʻahinga ʻoku nau sio ki he ngaahi liliu peheé te nau fakaʻosiʻaki nai ko e tokotaha talangataʻá naʻe ʻikai te ne fai ha angahala ʻoku tonu ki he maté. ʻE ueʻi nai kinautolu ke nau lotu ke lava ke ne maʻu ha mālohi mei he Folofola fakamānavaʻi ʻa e ʻOtuá pea ʻe ngāue ʻa Sihova ki he tokotaha angahalá ʻo fehoanaki mo Hono finangaló.​—Sāme 44:21; Koheleti 12:14.

Lolotonga ʻoku ʻi ha tuʻunga nai ʻa e niʻihi ke sio ki he fakamoʻoni feʻunga ke tui ai kuo fakatomala ha tokotaha angahala, ʻe ʻikai nai ko e tuʻunga eni ʻi he fakatahaʻangá fakalūkufua. Te nau puputuʻu, hohaʻa, naʻa mo tūkia kapau te nau fanongo ki ha taha ʻoku lotu fakahāhā fekauʻaki mo e tokotaha faihalá. ʻI he ʻuhingá ni, ko e faʻahinga ʻoku nau ongoʻi ʻoku ueʻi kinautolu ke nau lotu fekauʻaki mo e tokotaha faiangahalá ʻoku totonu ke nau fai ia fakafoʻituitui pē, ʻo tuku ʻa e meʻa lahi ange ʻe hoko atú ki he nima ʻo e kau mātuʻa fua fatongia ʻi he fakatahaʻangá.

[Fakatātā ʻi he peesi 31]

Ko e ngaahi angahala mamafa ʻa Manasé naʻe fakamolemoleʻi ia ʻi heʻene fakatōkilaloʻi ia ʻi he ʻao ʻo Sihová

[Maʻuʻanga ʻo e Tā ʻi he peesi 30]

Reproduced from Illustrierte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s