ʻOkú Ke Manatuʻi?

Kuó ke fiefia ʻi hono lau ʻa e ngaahi ʻīsiu fakamuimui ʻo e Taua Leʻo? Sai, sio angé pe ʻe lava ke ke tali ʻa e ngaahi fehuʻi ko ení:

• Ko e hā ʻa e ikuna fakalao ʻo kau ki he lotú naʻe tokoni ki ai ʻa e Fakamaauʻanga Konisitūtone Fakapuleʻanga ʻa Siamané?

Naʻe liliu ʻe he fakamaauʻanga ko iá ʻa e tuʻutuʻuni ʻikai lelei ʻa e fakamaauʻanga ʻe taha ʻo fekauʻaki mo e Kau Fakamoʻoni ʻa Sihová pea mo honau fakaʻatā ko ha kautaha ʻi he malumalu ʻo e lao fakapuleʻangá. Ko e tuʻutuʻuni ʻi he ikuná naʻe pehē ai, ʻi loto ʻi he tuʻunga ʻo e tauʻatāina fakalotú ʻe hoko nai ai ha taha ʻo ‘talangofua ki he ngaahi tui ʻa e lotú’ ʻo laka hake ia ʻi he ngaahi meʻa ʻoku kounaʻi ʻe he Puleʻangá.​—8/15, peesi 8.

• Ko e hā ʻa e lōloa ʻo e vahaʻa taimi naʻe faingataʻaʻia ai ʻa Siopé?

ʻOku ʻikai ke fakahaaʻi ʻe he tohi ʻa Siopé naʻá ne faingataʻaʻia ʻi he ngaahi taʻu lahi. Ko e faingataʻaʻia ʻa Siopé pea mo hono fakaleleiʻí naʻe hoko nai ia ʻi loto ʻi ha ngaahi māhina siʻi, mahalo ʻo siʻi hifo he taʻu ʻe tahá.​—8/15, peesi 31.

• Ko e hā ʻoku lava ai ke tau fakapapauʻi ko e Tēvoló ʻoku ʻikai ko ha tui fakafaʻahikehe pē?

Naʻe ʻiloʻi ʻe Sīsū Kalaisi ko e tokotaha moʻoni ʻa e Tēvoló. Naʻe ʻahiʻahiʻi ʻa Sīsū ʻe ha tokotaha moʻoni, ʻo ʻikai ko ha kovi pē ʻi loto ʻiate ia. (Mātiu 4:​1-​11; Sione 8:​44; 14:30)​—9/1, peesi 5-6.

• ʻOku pehē ʻe he Palovepi 10:15 (PM): “Koe kolo malohi oe tagata koloaia ko ene koloa: ka e auha ae majiva koe nau majiva.” ʻOku anga-fēfē ʻa e moʻoni ʻo e meʻá ni?

ʻOku lava ke hoko ʻa e koloá ko ha maluʻanga mei ha ngaahi meʻa taʻepau ʻi he moʻuí, hangē pē ko hano tokonaki ʻe ha kolo mālohi ha tuʻunga ʻo e maluʻangá maʻá e faʻahinga ʻoku nau nofo ʻi aí. ʻI he tafaʻaki ʻe tahá, ʻoku lava ke fakatupu-maumau ʻa e masivá ʻi he taimi ʻoku hoko taʻeʻamanekina ai ha ngaahi meʻa.​—9/15, peesi 24.

• ʻI he ʻuhinga fē naʻe kamata ai ha “ui . . . ki he huafa o Jihova” ʻi he ngaahi ʻaho ʻo ʻĪnosí? (Senesi 4:​26, PM)

Kuo ngāueʻaki ʻa e huafa ʻo e ʻOtuá talu mei he kamata ʻo e hisitōlia fakaetangatá; ko ia ai, ko e meʻa naʻe kamata ʻi he taimi ʻo ʻĪnosí naʻe ʻikai ko ha ui ia kia Sihova ʻi he tui. Naʻe ngāueʻaki taʻefakaʻapaʻapa nai ʻe he kau tangatá ʻa e huafa ʻo e ʻOtuá kiate kinautolu pe ki he niʻihi kehé ʻa ia fakafou ʻiate kinautolu naʻa nau fakangalingali ʻoku nau lotu ki he ʻOtuá.​—9/15, peesi 29.

• Hangē ko ia ʻoku ngāueʻaki ʻi he Tohitapú, ko e hā ʻa e ʻuhinga ʻo e foʻi lea “akonekiná”?

ʻOku ʻikai ke fakahuʻunga ʻi he foʻi leá ha faʻahinga founga ʻo e ngaohikoviʻi pe anga-fakamamahi. (Palovepi 4:​13; 22:15) Ko e foʻi lea faka-Kalisi ki he “akonekiná” ʻoku felāveʻi tefito ia mo e fakahinohino, ako, fakatonutonu pea ʻi he taimi ʻe niʻihi ko e tautea mālohi ka ʻi he ʻofa. Ko ha founga mahuʻinga ʻa ia ʻoku lava ke faʻifaʻitaki ai ʻa e ngaahi mātuʻá kia Sihová ko e feinga ke tauhi ke ʻatā ʻa e tuʻunga ʻo e fetuʻutaki mo ʻenau fānaú. (Hepelu 12:​7-​10)​—10/1, peesi 8, 10.

• ʻOku anga-fēfē hono fakahaaʻi ʻe he kau Kalisitiane moʻoni ʻi he ʻaho ní ʻoku nau poupou ki he pule ʻa e ʻOtuá?

ʻI hono poupouʻi ʻa e Puleʻanga ʻo e ʻOtuá, ʻoku ʻikai ke kau ʻa e Kau Fakamoʻoni ʻa Sihová ʻi he ngaahi meʻa fakapolitikí pe fakaʻaiʻai ha angatuʻu, naʻa mo e ʻi he ngaahi fonua ʻa ia ʻoku tapui ai ʻa e Kau Fakamoʻoní. (Taitusi 3:1) ʻOku nau fai ha tokoni ʻaonga ʻi he founga naʻe fai ʻe Sīsū mo ʻene muʻaki kau ākongá pea feinga ke tokoniʻi ʻa e kakaí ke nau ngāueʻaki ʻa e ngaahi meʻa mahuʻinga faka-Tohitapu leleí, hangē ko e faitotonú, ʻulungaanga maʻá mo ha tuʻunga fakaengāue lelei.​—10/15, peesi 6.

• ʻOku anga-fēfē ʻa e tafe ʻa e ngaahi vai foaki-moʻuí ʻi he ʻEnitesí?

ʻOku fai ʻe he Kau Fakamoʻoni ʻa Sihova ʻi aí ʻa e feinga ke ʻoatu ʻa e ngaahi moʻoni faka-Tohitapú ki he kakaí, naʻa mo e ʻi he ongo lea fakalotofonuá, ʻa e Kēsauā mo e ʻAimalá. ʻOku ʻaʻahi ʻa e Kau Fakamoʻoní ki he kakai ʻoku nau nofo ʻi he ngaahi motu ʻi he Anovai Titikaká, ʻo kau ai ʻa e ngaahi tuʻuʻanga ko e motu ʻoku “tētē” naʻe faʻu mei he kaho ʻoku tupu ʻi he vai he anovaí.​—10/15, peesi 8-10.

• Ko e hā kuo ʻomai ʻe he ʻOtuá maʻa hotau tatakí ʻa ia ʻe fakatatau nai ia ki he founga tataki fakakomipiuta ʻi he ngaahi vakapuna uta pāsese ʻi onopōní?

Kuo teuʻi ʻe he ʻOtuá ʻa e tangatá ʻaki ʻa e malava ki ha tataki fakaeʻulungaanga, ko ha ongoʻi fakaeʻulungaanga ʻi loto. Ko hotau konisēnisi eni kuo tau tupu mo iá. (Loma 2:​14, 15)​—11/1, peesi 3-4.

• Ko e hā ʻoku mahuʻinga lahi ai ʻa e pekia ʻa Sīsuú?

ʻI he taimi naʻe faiangahala ai ʻa e tangata haohaoa ko ʻĀtamá, naʻá ne fakamoleki ai meiate ia pea mo ʻene fānaú ʻa e moʻui fakaetangatá. (Loma 5:​12) ʻI he tuʻunga ko ha tangata haohaoá, naʻe feilaulauʻi ʻe Sīsū ʻa ʻene moʻui fakaetangatá, ʻo tokonaki mai ai ʻa e huhuʻi ʻa ia ʻokú ne ʻai ke malava ai ki he faʻahinga ʻo e tangata loto-tōnungá ke nau maʻu ʻa e moʻui taʻengatá.​—11/15, peesi 5-6.

• Ko hai ʻa e kau Sitia ʻoku lave ki ai ʻi he Kolose 3:​11?

Ko e kau Sitiá ko ha puleʻanga nofo hikihiki holo ʻi he feituʻu ʻikai ʻuluʻakauʻia ʻo ʻIulope-ʻĒsiá, naʻa nau maʻu ʻa e tuʻunga mālohi ʻi he 700 ki he 300 K.M. nai. Ko e kau tangata heka hoosi fakamanavahē mo e kakai tau kinautolu. ʻOku fakahuʻunga nai ʻa e Kolose 3:​11, ʻo ʻikai ki ha puleʻanga pau, ka ki he kovi taha ʻi he kakai taʻesivilaisé.​—11/15, peesi 24-25.

• Ko e hā ʻoku lava ai ke tau pehē ko e Lao Koulá ko ha akonaki ia ʻoku tuha mo ʻetau tokanga tuʻumaʻú?

Ko e moʻoni fakaeʻulungaanga ko ení ʻoku fakamatalaʻi ia ʻi he lotu faka-Siú, lotu Putá, filōsofia faka-Kalisí mo e lotu faka-Konifusioó. Kae kehe, ko e meʻa naʻe fakahaaʻi ʻe Sīsū ʻi he Malanga he Moʻungá ʻoku fiemaʻu ki ai ʻa e ngaahi ngāue lelei, pea ʻoku kaunga ia ki he moʻui ʻa e kakaí ʻi he feituʻu kotoa pē pea ʻi he kuonga kotoa pē. (Mātiu 7:​12)​—12/1, peesi 3.