Foaki ʻo Fakalaka ʻi he Malavá

“ʻE ʻATĀ pē ke mou ui au ko ha tokotaha kolekole; ʻe ʻikai te u ʻita au ai. ʻOku ou kolé maʻa Sīsū.” Ko e ngaahi lea fakahāhā ko ia ʻa ha faifekau Palotisaní ʻokú ne fakaʻilongaʻi ʻa e fakakikihi ʻoku fevilotakaiʻaki ʻi he tokoni paʻanga fakalotú. Ko e lotu kuo fokotuʻú ʻoku hā ngali ke malava pē ʻo hokohoko atú ʻi haʻane maʻu ha tokoni lahi fakapaʻanga. ʻOku fiemaʻu ke totongi ʻa e ngaahi vāhengá, fiemaʻu ke langa ʻa e ngaahi temipale pea tauhi, fiemaʻu ke fakapaʻanga ʻa e ngaahi feingangāue fakaʻevangeliō. ʻOku anga-fēfē ke maʻu ʻa e paʻanga ʻoku fiemaʻú?

Ki he ngaahi siasi lahi, ko e talí ko e vahe hongofulú.a “Ko e vahe hongofulú ko e founga ia ʻa e ʻOtuá ki hono fakapaʻanga ʻa Hono puleʻanga ʻi he māmaní,” ko e taukaveʻi ia ʻa e ʻevangeliō ko Norman Robertson. “Ko ʻEne founga fakaʻekonōmiká ʻoku malava ai ke malangaʻi ʻa e Kōsipelí.” ʻI he ʻikai mā fekauʻaki mo hono fakamanatu ki hono kau muimuí ʻa honau fatongia ke foakí, ʻokú ne fakamamafaʻi: ‘Ko e vahe hongofulú ʻoku ʻikai ko ha meʻa ia ʻoku mou fai koeʻuhí ko hoʻomou malava iá. Ko ha ngāue ia ʻo e talangofua. Ko e ʻikai ke vahe hongofulú ko hano maumauʻi mataʻāʻā ia ʻo e ngaahi fekau ʻa e ʻOtuá. Ko e kākā ia ʻi he paʻangá.’​—Tithing​—God’s Financial Plan.

Ngalingali ʻokú ke loto-tatau ko e foakí ʻoku totonu ke hoko ko ha konga ia ʻo e lotu faka-Kalisitiané. Kae kehe, ʻoku hoko ʻo fakahohaʻa kia koe ʻa e kole paʻanga hokohokó, naʻa mo ʻene fakatupu ʻita nai? Ko e teolosia Pelēsila ko Inácio Strieder ʻokú ne tukuakiʻi ʻa e ngaahi siasí ʻi he kumi tokoni ki he vahe hongofulú ke “solovaʻaki ʻenau ngaahi palopalema fakaekautahá” pea ʻokú ne ui ʻa e ngaahi tōʻonga peheé ʻoku “taʻefakalao, fakameleʻi, pea ko ha hē fakateolosia.” Ko e olá, ʻokú ne fakamatalaʻi ko e “kakai taʻemaʻungāue, kau uitou, kau nofo masiva, mo e faʻahinga ʻoku ʻikai malava ke nau fakaʻuhinga totonú, ʻoku nau fakaʻosiʻaki kuo liʻaki kinautolu ʻe he ʻOtuá pea ʻoku fakamālohiʻi kinautolu ke nau foaki lahi ki he ‘tokotaha malangá’ ʻo fiekaia ai honau ngaahi fāmilí tonu.”

Te ke fifili nai: ‘ʻOku ngāue totonu ʻaki ʻe he ngaahi siasi ʻoku nau fakamālohiʻi ʻa e vahe hongofulú ʻa e Konga Tohitapú? Pe ʻoku ngāueʻaki ʻe he ngaahi lotú ʻa e manavahē ki he tautea ʻa e ʻOtuá ke kākaaʻi ʻaki ʻa e paʻanga ʻa e tākangá? Ko e moʻoni, ʻoku ʻamanekina mai ʻe he ʻOtuá ke tau foaki ʻo fakalaka ia ʻi heʻetau malavá?’

[Fakamatala ʻi lalo]