ʻOku Vahe Hongofulu ʻa e Kau Fakamoʻoni ʻa Sihová?

ʻIkai, ʻoku ʻikai vahe hongofulu ʻa e Kau Fakamoʻoni ʻa Sihová; ko ʻemau ngāué ʻoku fakapaʻanga ʻaki ʻa e ngaahi tokoni loto-fiefoaki. Ko e hā ʻa e vahe hongofulu pea ko e hā ʻoku ʻikai vahe hongofulu ai ʻa e Kau Fakamoʻoni ʻa Sihová?

Ko e fekau ki he vahe hongofulú, pe ko e tokoni ʻaki ʻa e vahe hongofulu ʻo e meʻa ʻoku maʻu ʻe ha taha, ko e konga ia ʻo e Lao naʻe ʻoange ki he puleʻanga ʻIsileli ʻo e kuonga muʻá. Kae kehe, ʻoku fakahaaʻi mahino ʻe he Tohi Tapú ko e Lao ko ení—kau ai ʻa e “tuʻutuʻuni ke nau tānaki ʻa e ngaahi vahe hongofulú”—ʻoku ʻikai ngāueʻaki ia ki he kau Kalisitiané.​—Hepelū 7:​5, 18; Kolose 2:​13, 14.

ʻI he ʻikai foaki ʻa e vahe hongofulu ʻoku fiemaʻú mo e feilaulaú, ko e Kau Fakamoʻoni ʻa Sihová ʻoku nau faʻifaʻitaki ki he muʻaki kau Kalisitiané pea poupouʻi ʻenau ngāue fakafaifekaú ʻi he founga ʻe ua: ʻaki ʻa e malanga mo e faiako taʻetotongi pea ʻaki hono fai ʻa e ngaahi tokoni loto-fiefoaki.

Ko ia ʻoku mau muimui ki he tataki ʻa e Tohi Tapú ki he kau Kalisitiané: “Tuku ki he tokotaha taki taha ke ne fai ʻa e meʻa tofu pē ko ia kuó ne fakapapauʻi ʻi hono lotó, ʻo ʻikai ʻi he taʻefiefiefai pe ʻi hono kounaʻi, he ʻoku ʻofa ʻa e ʻOtuá ʻi ha tokotaha foaki fiefia.”​—2 Kolinitō 9:7.