Ngaahi Fehuʻi mei he Kau Lautohí

Ko e hā ʻoku lau ai ʻa e Aisea 30:21 (NW) ʻo fekauʻaki mo e folofola ʻa Sihova ʻoku haʻu “mei homou tuʻá,” koeʻuhí he ko e foʻi veesi ki muʻá Ai. 30:20 ʻoku fokotuʻu ai ʻa Sihova ʻi muʻa ʻaki ʻa e pehē, “ʻE sio maʻu homou mata ki hoʻomou Faiako Maʻongoʻongá”?

ʻOku pehē ʻi he Aisea 30:​20, 21 (NW): “ʻE ʻikai kei fufū ia ʻe hoʻomou Faiako Maʻongoʻongá, ka ʻe sio maʻu homou mata ki hoʻomou Faiako Maʻongoʻongá. Pea ʻe fanongo ʻe homou telingá ki ha lea mei homou tuʻá, ʻo pehē: ‘Ko eni ʻa e halá, fou ai ʻa kimoutolu,’ ka ai haʻomou afe ki toʻomataʻu, pe ka ai haʻomou afe ki toʻohema.”

ʻI he fakakaukau fakahangatonu ki he konga tohí, ʻoku sio ai ʻa e tokotaha lautohí kia Sihova, ko e Faiako Maʻongoʻongá, ʻi muʻa ʻiate ia ka ʻokú ne fanongo ki Hono leʻó mei hono tuʻá. Kae kehe, ko e ngaahi foʻi leá ʻoku fakaefakatātā pea ʻoku totonu ke mahinoʻi peheni ia.

Ko e lea fakaefakatātā ʻoku ʻomai ʻe he Aisea vahe 30 veesi 20 ki he fakakaukaú ʻoku fekauʻaki ia mo ha sevāniti ʻoku tuʻu tali-fekau ki hono pulé, ʻo mateuteu ai pē ke fai ki he ngaahi fakahinohino ʻa e pulé. Hangē tofu pē ko ha sevāniti ʻoku sio tokanga ki he nima ʻo hono pulé koeʻuhi ke ne ʻiloʻi ʻa e fakahaaʻi ʻo e meʻa ʻokú ne loto ki aí, ko e kakai ʻa Sihova ʻi he ʻaho ní ʻoku fakahanga lelei ʻenau tokangá ki he ngaahi fakahinohino makatuʻunga faka-Tohitapu hokohoko ʻoku ʻomai ʻe Sihova fakafou ʻi heʻene kautaha fakaemāmaní. (Sāme 123:​1, 2) ʻIo, ʻoku nau ngāue fakatatau ki heʻene tatakí, ʻo tokanga ki ha meʻa pē ʻoku fakahaaʻi ʻe Sihova fakafou ʻi he “tamaioeiki agatonu mo boto.”—Mātiu 24:​45-47, PM.

ʻOku ʻuhinga leva ki he hā ʻa e lea ʻoku fanongo ki ai ʻene kau sevānití mei honau tuʻá? ʻOku ʻuhinga lelei ke fakaʻosiʻaki ko e leʻo mei he tuʻá ko e leʻo ia ʻo e ʻOtuá mei he kuohilí, ʻa ʻene lea fakafou ʻi heʻene Folofola kuo tohí hangē ko ia ʻoku ʻai ke ala mahinoʻi fakafou ʻi heʻene “setuata anga-tonú.” (Luke 12:​42, NW) Ko e kau sevāniti ʻa e ʻOtuá ʻi onopōní ʻoku nau fanongo ki hono leʻó ʻi heʻenau ako tōtōivi ʻa e Tohitapú pea ʻi hono ngāueʻaki ʻa hono ngaahi tefitoʻi moʻoní ʻi heʻenau moʻuí ʻi he tokoni ʻa e ʻū tohi kuo teuteuʻi ʻe he “tamaioeiki agatonu mo boto,” “a e setuata anga-tonú.” ʻI he falala mo e tokanga ki he tataki taimi tonu ʻoku ʻomai ʻe he Faiako Maʻongoʻongá pea ʻi hono ako ʻa e Folofola ʻa e ʻOtuá, ʻa ia naʻe hiki ʻi he laui senituli kuohilí, ʻoku sio ai ʻi he tuʻunga fakaefakatātā ʻene kau sevānití kiate ia ʻi muʻa ʻia kinautolu pea fanongo ki hono leʻó mei honau tuʻá.​—Loma 15:4.