ʻOkú Ke Fakamahuʻingaʻi ʻa e Kaungātui Taʻumotuʻá?
ʻI HE taimi naʻe ʻi ha vahaʻangatae fuakava ai ʻa e kakai ʻo ʻIsileli ʻo e kuonga muʻá mo e ʻOtuá, naʻe fekauʻi kia kinautolu: “Te ke tuʻu ki ʻolunga ʻi he ʻao ʻo e ʻuluhinā, pea te ke fakaʻapaʻapa kiate ia ʻoku motuʻa, pea te ke ʻapasia ki ho ʻOtua.” (Livitiko 19:32) Ko ia ai, ko e fakaʻapaʻapa ki he faʻahinga taʻumotuʻá ko ha fatongia toputapu ia, ʻoku felāveʻi mo e hoko ʻo fakamoʻulaloa ki he ʻOtuá. Neongo ko e kau Kalisitiane he ʻaho ní ʻoku ʻikai te nau kei ʻi he malumalu ʻo e Lao ʻa Mōsesé, ʻoku fakamanatu mai kia kitautolu ʻoku vakai mai ʻa Sihova ki he kau taʻumotuʻa ʻoku tauhi kiate iá ʻoku nau mahuʻinga mo maʻongoʻonga. (Palovepi 16:31; Hepelu 7:18) ʻOku tau tapua atu ʻa e vakai ʻa Sihová? ʻOku tau fakamahuʻingaʻi hotau fanga tokoua mo e fanga tuofāfine Kalisitiane taʻumotuʻá?
Naʻá Ne Fakamahuʻingaʻi Hono Kaumeʻa Motuʻa Angé
Ko e fakamatala faka-Tohitapu ʻe taha ʻa ia ʻoku fakahanga ai ʻa e tokangá ki hono fakahaaʻi ʻa e fakaʻapaʻapa ki he faʻahinga taʻumotuʻá ʻoku maʻu ia ʻi he tohi Ua Tuʻí. ʻOku ʻi ai ha fakamatala ki he founga hono fetongi ʻo e palōfita ko ʻIlaisiaá ʻe he palōfita siʻi ange ko ʻIlaisá. Fakakaukau ki he meʻa naʻe hoko ʻi he ʻaho fakaʻosi ʻo ʻIlaisiā ko ha palōfita ʻi he puleʻanga matakali ʻe hongofulu ʻo ʻIsilelí.
ʻI he ʻaho ko iá, naʻe fakahinohinoʻi ai ʻa e palōfita taʻumotuʻá ʻe Sihova ke ne fononga mei Kilikali ki Pēteli, mei Pēteli ki Sielikō, pea mei Sielikō ki he Vaitafe Sioataní. (2 Tuʻi 2:1, 2, 4, 6) Lolotonga ʻa e fononga ko ia ʻo e meimei kilomita ʻe 50, naʻe ekinaki tuʻo tolu ai ʻa ʻIlaisiā kia ʻIlaisa ke tuku ʻene muimui kiate iá. Kae kehe, hangē ko e fakafisi mālohi ʻa e finemui ko Luté ʻi he laui senituli ki muʻa angé ke mavahe meia Nāomí, naʻe pehē pē ʻa e fakafisi ʻa ʻIlaisa ke mavahe mei he palōfita motuʻa angé. (Lute 1:16, 17) Naʻe fakamatala tuʻo tolu ʻa ʻIlaisa: “Oku moui a Jihova, bea oku moui ho laumalie, bea e ikai teu mahui meiate koe.” (2 Tuʻi 2:2, 4, 6, PM) ʻI he tuʻunga ko iá, ne ʻosi tokoni ʻa ʻIlaisa kia ʻIlaisiā ʻi ha taʻu nai ʻe ono. Neongo ia, naʻá ne holi ke tauhi kia ʻIlaisiā ʻi he fuoloa taha ʻe ala lavá. Ko hono moʻoní, ʻoku tānaki mai ʻe he fakamatalá: “Vakai, lolotoga a e na kei alu atu, mo talanoa, . . . nae alu hake a Ilaija i he ahiohio ki he lagi.” (2 Tuʻi vahe 2 Veesi 11, PM) Naʻe fetalanoaʻaki ʻa ʻIlaisiā mo ʻIlaisa ʻo aʻu ki he mōmeniti fakaʻosi tonu ʻo e ngāue fakafaifekau ʻa ʻIlaisiā ʻi ʻIsilelí. Ko e palōfita siʻi angé ʻoku hā mahino naʻá ne vēkeveke ke maʻu ʻa e ngaahi foʻi lea lahi ʻo e fakahinohino mo e fakalototoʻa ʻe ala maʻu mei he palōfita taʻumotuʻa mo taukei angé. ʻOku hā mahino, naʻá ne fakamahuʻingaʻi ʻa hono kaumeʻa motuʻa angé.
‘Hange ko e Ngaahi Tamai mo e Ngaahi Faʻe’
ʻOku ʻikai faingataʻa ke sio ki he ʻuhinga naʻe ʻofa ai ʻa ʻIlaisa ʻi he palōfita motuʻa angé hangē ha kaumeʻá—naʻa mo ha tamai fakalaumālié. (2 Tuʻi 2:12, PM) Ki muʻa pē ʻi he ngata ʻo e vāhenga-ngāue ʻa ʻIlaisiā ʻi ʻIsilelí, naʻá ne pehē ange kia ʻIlaisa: “Ke ke tala mai be koeha ha mea teu fai maau i he teeki ave au meiate koe.” (2 Tuʻi vahe 2 Veesi 9, PM) Ko ia ʻo aʻu pē ki he ngataʻangá, naʻe fakahāhā ʻe ʻIlaisiā ʻa ʻene tokanga ki he lelei fakalaumālie ʻa hono fetongí pea ki hono hokohoko atu ʻo e ngāue ʻa e ʻOtuá.
ʻI he ʻahó ni, ʻoku fakalotomāfana ke fakatokangaʻi ʻa e tokanga fakaetamai mo fakaefaʻē tatau ʻi hotau fanga tokoua mo e fanga tuofāfine Kalisitiane taʻumotuʻa angé ʻi heʻenau vahevahe loto-fiefoaki ʻenau ʻiló mo e potó ki he faʻahinga iiki angé. Hangē ko ení, ko e kau ngāue pole taimi lōloa ʻi he ngaahi ʻōfisi vaʻa ʻo e Kau Fakamoʻoni ʻa Sihová ʻoku nau loto-lelei ke tokoniʻi a e kau mēmipa foʻou ʻo e fāmili Pētelí ke nau maʻu ʻa e ngaahi pōtoʻi ʻoku nau fiemaʻu ke fakahokoʻaki ʻenau ngāué. ʻI he founga tatau, ko e kau ʻovasia fefonongaʻaki mo honau ngaahi uaifi ʻa ia kuo nau ʻaʻahi ki he ngaahi fakatahaʻangá ʻi he ngaahi taʻu lahi ʻoku nau vahevahe fiefia atu ʻenau taukei lahí ki he faʻahinga ʻa ia ʻoku akoʻi ke nau ngāue ko e kau faifekau fefonongaʻakí. ʻIkai ngata aí, ʻi he ngaahi fakatahaʻanga ʻa e Kau Fakamoʻoni ʻa Sihova takatakai ʻi he foʻi kolopé, ʻoku ʻi ai ʻa e fanga tokoua mo e fanga tuofāfine taʻumotuʻa ange ʻa ia kuo nau tauhi faitōnunga kia Sihova ʻi he laui hongofuluʻi taʻu pea ʻoku nau vahevahe fiefia atu ʻenau poto mo e taukei ʻaongá ki he kau mēmipa foʻou ange ʻo e fakatahaʻangá.—Palovepi 2:7; Filipai 3:17; Taitusi 2:3-5.
Ko e tokanga loto-moʻoni ʻoku fakahaaʻi ʻe he siʻi kau Kalisitiane motuʻa ange ko ení ʻokú ne ʻai ʻa hono fakahaaʻi ʻo e fakaʻapaʻapa ki he faʻahinga taʻumotuʻa peheé ko ha meʻa fakafiefia moʻoni. Ko ia ai, ʻoku tau loto ke faʻifaʻitaki ki he faʻifaʻitakiʻanga ʻa ʻIlaisa ʻi hono fakahoungaʻi lahi ʻa e kaungātui taʻumotuʻá. Hangē ko ia ʻoku fakamanatu mai kia kitautolu ʻe he ʻapositolo ko Paulá, tau hokohoko atu ke fai ki ‘ha motuʻa, . . . ʻo hange ko ha tamaí’ pea ki he ‘kau fineʻeikí ʻo hange ko ha ngaahi faʻeé.’ (1 Timote 5:1, 2) ʻI he fai peheé, ʻoku tau tokoni lahi ai ki he lele lelei mo e fakalakalaka ʻa e fakatahaʻanga Kalisitiané ʻi he māmaní kotoa.
[Fakatātā ʻi he peesi 30]
Naʻe holi ʻa ʻIlaisa ke ngāue mo ʻIlaisiā ʻi he fuoloa taha ʻe ala lavá
[Fakatātā ʻi he peesi 31]
Ko e faʻahinga iiki angé ʻoku nau maʻu ʻaonga lahi mei he kau Kalisitiane taʻumotuʻá