Ngaahi Fehuʻi mei he Kau Lautohí
Ko e hā naʻe kole ai ʻa ʻIlaisa ki he “ʻinasi loua” ʻo e laumālie ʻo ʻIlaisiaá?
Ki muʻa pē ʻi he ʻosi ʻa e vāhenga-ngāue ʻa ʻIlaisiā ko ha palōfita ʻi ʻIsilelí, ko e palōfita kei siʻi ange ko ʻIlaisá naʻá ne kole kiate ia: “Tuku muʻa ke to kiate au ha ʻinasi loua mei ho laumalie.” (2 Tuʻi 2:9) ʻI he ʻuhinga fakalaumālié, ʻoku hā mahino naʻe koleʻi ʻe ʻIlaisa ha konga ʻe ua hangē ko ia naʻe foaki ki ha ʻuluaki fohá. (Teutalonome 21:17) Ko ha lāulea nounou ki he fakamatalá te ne ʻai ke mahino eni pea ʻe tokoniʻi ai kitautolu ke maʻu ha ngaahi lēsoni mei he meʻa naʻe hokó.
ʻI he fehoanaki mo e tataki ʻa Sihová, naʻe pani ai ʻe he palōfita ko ʻIlaisiaá ʻa ʻIlaisa ko hono fetongi. (1 Tuʻi 19:19-21) ʻI ha taʻu nai ʻe ono, naʻe ngāue ai ʻa ʻIlaisa ko e tauhi faitōnunga ʻo ʻIlaisiā pea naʻá ne fakapapauʻi ke fai eni ki he ngataʻangá. Naʻa mo e ʻaho fakaʻosi ʻo ʻIlaisiā ʻi he tuʻunga ko ha palōfita ʻi ʻIsilelí, naʻe ngāue vāofi ʻa ʻIlaisa mo ʻene faiakó. Neongo naʻe fakaʻaiʻai ʻe ʻIlaisiā ʻa ʻIlaisa ke tuku ʻene muimui ʻiate iá, naʻe fakahaaʻi tuʻo tolu ʻe he palōfita kei siʻi angé: “E ikai teu mahui meiate koe.” (2 Tuʻi 2:2, 4, 6, PM; 2 Tuʻi 3:11) Ko e moʻoni, naʻe vakai ʻa ʻIlaisa ki he palōfita taʻumotuʻa angé ko ʻene tamai fakalaumālie.—2 Tuʻi 2:12.
Kae kehe, naʻe ʻikai ko ʻIlaisa pē ʻa e foha fakalaumālie ʻo ʻIlaisiaá. Ko ʻIlaisiā mo ʻIlaisá naʻá na feohi mo ha kulupu ʻo e kau tangata naʻe ʻiloa ko e “gaahi foha oe kau balofita.” (2 Tuʻi 2:3, PM) Ko e fakamatala ʻi he Ua Tuʻí ʻoku fakahaaʻi ai ko e “gaahi foha” ko ení naʻa nau toe maʻu ʻe kinautolu foki ha vahaʻangatae vāofi mo ʻenau tamai fakalaumālie ko ʻIlaisiaá. (2 Tuʻi 2:3, 5, 7, 15-17) Neongo ia, ʻi he tuʻunga ko e tokotaha fetongi naʻe paní, ko ʻIlaisa naʻe tuʻu-ki-muʻa ʻi he haʻohaʻonga ʻo e ngaahi foha fakalaumālie ʻo ʻIlaisiaá—naʻá ne hangē ko e ʻuluaki fohá. ʻI ʻIsileli ʻo e kuonga muʻá, naʻe maʻu ai ʻe ha ʻuluaki foha totonu ʻa e ʻinasi lōua ʻo e tofiʻa ʻa ʻene tamaí, lolotonga ia ko e ngaahi foha kehé naʻa nau maʻu taki taha ha ʻinasi ʻe taha. Ko ia ai, naʻe kole ʻe ʻIlaisa ha ʻinasi lōua ʻo e tofiʻa fakalaumālie ʻo ʻIlaisiaá.
Ko e hā naʻe fai ai ʻe ʻIlaisa ʻa e kole ko ení ʻi he taimi tefito ko iá? Koeʻuhi naʻá ne teu ke fua ha fatongia mamafa—ʻa ia ko e fetongi ʻo ʻIlaisiā ʻi he tuʻunga ko e palōfita ʻi ʻIsilelí. Naʻe ʻiloʻi ʻe ʻIlaisa ke fakahoko ʻa e ngaahi fatongia felāveʻi mo e vāhenga-ngāue lahi fakaʻulia ko ení, naʻá ne fiemaʻu ʻa e mālohi fakalaumālie ʻa ia ʻoku mahulu mamaʻo atu ʻi heʻene ngaahi malava ʻaʻaná, ko e mālohi ʻa ia ko Sihova pē taha ʻe lava ke ne tokonaki maí. Naʻe fiemaʻu ke ne taʻemanavahē hangē ko ia naʻe ʻi ai ʻa ʻIlaisiaá. (2 Tuʻi 1:3, 4, 15, 16) Ko ia ai, naʻá ne kole ki ha ʻinasi lōua ʻo e laumālie ʻo ʻIlaisiaá, ko ha laumālie ʻo e loto-toʻa mo e hoko ʻo “matuʻaki fuaʻa koeʻuhi ko Sihova”—ko e ongo ʻulungaanga fakamānako ia ʻoku fakatupu ʻe he laumālie ʻo e ʻOtuá. (1 Tuʻi 19:10, 14) Naʻe anga-fēfē ʻa e tali ʻa ʻIlaisiaá?
Naʻe ʻiloʻi ʻe ʻIlaisiā naʻe kole ʻa ʻIlaisa ki he meʻa naʻe ʻikai ko ia ka ko e ʻOtuá pē ʻoku ʻi ai ʻene totonu ke ne foakí. Ko ia naʻe tali fakanānā ange ʻe ʻIlaisiā: “Kuo ke kole ki ha meʻa faingataʻa: ka ʻo kapau te ke sio kiate au ʻi hoku ʻave meiate koe, pea ʻe hoko atu.” (2 Tuʻi 2:10) Pea ko e moʻoni, naʻe fakaʻatā ʻe Sihova ʻa ʻIlaisa ke ne sio ki hono ʻohake ʻo ʻIlaisiā ʻi ha ʻahiohió. (2 Tuʻi 2:11, 12) Naʻe ʻoange ʻa e kole ʻa ʻIlaisá. Naʻe ʻoange ʻe Sihova kiate ia ʻa e laumālie naʻá ne fiemaʻu ke kamataʻaki ʻa ʻene ngāue foʻoú pea ke fehangahangai ai mo e ngaahi ʻahiʻahi ka hoko maí.
ʻI he ʻahó ni, ko e kau Kalisitiane paní (ʻoku ui he taimi ʻe niʻihi ko e kalasi ʻIlaisá) mo e kau sevāniti ʻa e ʻOtuá ʻi hono fakalūkufuá ʻe lava ke nau maʻu ha fakalototoʻa lahi mei he fakamatala faka-Tohitapu ko ení. ʻI he taimi ʻe niʻihi, ʻoku tau ongoʻi taulōfuʻu nai mo taʻefeʻunga ʻi hono ʻomai ha vāhenga-ngāue foʻou, pe ʻe mole nai ʻetau loto-toʻa ke hokohoko atu ʻetau ngāue malangaʻi ʻo e Puleʻangá ʻi heʻetau fehangahangai mo e loto-noá pe fakafepaki fakautuutu ʻi hotau feituʻu ngāué. Neongo ia, kapau te tau kōlenga kia Sihova ki heʻene poupoú, te ne ʻomai kia kitautolu hono laumālie māʻoniʻoní ʻi heʻetau fiemaʻu ia ke fekuki ai mo e ngaahi polé pea mo e ngaahi tuʻunga feliliuakí. (Luke 11:13; 2 Kolinito 4:7; Filipai 4:13) ʻIo, hangē pē ko hono fakaivia ʻe Sihova ʻa ʻIlaisa ki hono ngaahi fatongia mamafa angé, te ne tokoniʻi kitautolu kotoa, ʻa e taʻu siʻi mo e taʻumotuʻa, ke fakahoko ʻetau ngāue fakafaifekaú.—2 Timote 4:5.