Ngaahi Fehuʻi mei he Kau Lautohí
ʻI he ngaahi konga lahi ʻo e māmaní, ʻoku angaʻaki ai ke foaki ʻa e ngaahi meʻaʻofa mali. Ko e hā ʻa e ngaahi tefitoʻi moʻoni Fakatohitapu ʻoku totonu ke tau fakakaukau ki ai ʻi hono foaki pe maʻu ʻa e ngaahi meʻaʻofa peheé?
ʻOku tali ʻe he Tohitapú ʻa e foaki meʻaʻofá ʻi he taimi ʻoku fai ai ia ʻi he taumuʻa totonú pea ʻi he taimi totonú. ʻI he meʻa fekauʻaki mo e foakí, ʻoku fakalototoʻaʻi ʻe he Tohitapú ʻa e kau Kalisitiane moʻoní ke nau faʻifaʻitaki ki honau Tokotaha-Tokonaki nima-homo ko Sihová. (Semisi 1:17) Naʻe ekinaki ʻa e ʻapositolo ko Paulá ki he kaungā Kalisitiané: “Koe fai lelei, moe foaki, ke oua naa galo: he koe gaahi feilaulau behe oku leleiia ai ae Otua.” Ko ia ai, ʻoku fakalototoʻaʻi ʻa e kau Kalisitiané ke nau nima-homo.—Hepelu 13:16, PM; Luke 6:38.
Fēfē ʻa hono ngāueʻaki ha meʻaʻofa lēsisita, ko ha tōʻonga maheni ʻi he ʻIunaite Seteté? ʻI ʻIngilani ʻoku ui ia ai ko ha lisi mali. ʻI he tuʻunga mahení, ko ha ongo meʻa teu mali ʻokú na lēsisita ʻi ha falekoloa ʻaki ʻena sivisiviʻi ʻa e koloa ʻa e falekoloá pea ʻai ha lisi ʻo e ngaahi meʻa te na saiʻia ke maʻu ko ha ngaahi meʻaʻofá. Ko e ngaahi kāinga mo e kaungāmeʻa ʻo e ongo meʻá ʻoku fakaafeʻi kinautolu ki he falekoloa totonú ke nau fakatau ha meʻa mei he lisi lēsisita ʻa e ongo meʻá. Mei ha vakai ʻaonga, ko ha lisi lēsisita meʻaʻofa ʻokú ne fakaʻatā ai ʻa e tokotaha foakí mei hono fakamoleki ʻa e ngaahi houa ʻi he kumi holo ki ha meʻaʻofá, lolotonga ia ʻoku hao ai ʻa e faʻahinga ʻoku nau maʻu ʻa e meʻaʻofá mei he taʻefaingamālie ke fakafoki ai ʻa e ngaahi meʻaʻofa ʻoku ʻikai fiemaʻú ki he falekoloá.
Pe ʻoku fakaʻamu ha ongo meʻa ʻokú na teu mali ke ngāueʻaki ha lēsisita meʻaʻofa pe ʻikai ko ha meʻa ia ke na fili fakafoʻituitui ki ai. Kae kehe, ʻe loto ha Kalisitiane ke tokanga ke fakaʻehiʻehi mei ha ngaahi tōʻonga pē ʻa ia te ne maumauʻi nai ʻa e ngaahi tefitoʻi moʻoni faka-Tohitapú. Hangē ko ení, fēfē kapau ʻe ʻai ʻe ha ongo meʻa kuó na fakamaʻu ha lisi ʻoku tuʻu ai ʻa e ngaahi meʻa totongi mātuʻaki mamafá? ʻI ha tuʻunga pehē, ko e faʻahinga ʻoku fakangatangata ʻenau patisetí ʻe ʻikai nai malava ke nau tokonaki ha meʻaʻofa, pe te nau ongoʻi nai ʻe lelei ange ke fakafoki ʻa e fakaafe ke kau ki he malí koeʻuhí ke nau hao ai mei he mā ʻi hono ʻave ha meʻaʻofa ʻikai totongi mamafá. Naʻe tohi ha fefine Kalisitiane ʻe taha: “ʻOku hoko ia ko e meʻa fakamafasia. Kuó u feinga ke nima-homo, ka ki mui mai ko e kotoa ʻo e fiefia naʻá ku angaʻaki ke maʻu ʻi hono fai ʻa e foakí kuo mole ia.” He meʻa fakalotomamahi ē kapau ʻoku hoko ha mali ko ha matavai ia ʻo e fakalotosiʻí!
Ko e moʻoni, ko e kau foakí ʻoku ʻikai totonu ke ʻai ke nau ongoʻi kuo pau ke fakatau mai ha meʻa mei ha falekoloa pau, pe fokotuʻu mai ha fakamole pau koeʻuhí ke ala tali ai ʻenau meʻaʻofá. Hili ko iá, naʻe fakahaaʻi ʻe Sīsū Kalaisi ko e meʻa ʻoku mahuʻinga taha ʻi he vakai mai ʻa e ʻOtuá ko e anga ʻo e loto ʻo e tokotaha foakí, ʻo ʻikai ko e mahuʻinga fakamatelie ʻo e meʻaʻofá. (Luke 21:1-4) ʻI he founga tatau, ʻi he fekauʻaki mo e ngaahi meʻaʻofa ʻo e meesi ki he masivá, naʻe tohi ʻa e ʻapositolo ko Paulá: “Ke taki taha fai ki he meʻa kuo ne tuʻutuʻuni ʻi hono loto; pea ʻoua ʻe fai ʻi he mamahi, pe ko e puʻia; he ʻoku ʻofa ʻa e ʻOtua ki ha taha ʻoku vekeveke foaki.”—2 Kolinito 9:7.
ʻI he tuʻunga faka-Tohitapú, ʻoku ʻikai ha meʻa ʻe hala ʻi hono ʻai ke ʻiloʻi kita ko e tokotaha foaki ʻo ha meʻaʻofá, mahalo pē ʻi hono fakakau ha nouti fakataha mo e meʻaʻofá. Kae kehe, ʻi he ngaahi feituʻu ʻe niʻihi, ko e anga fakafonuá ia ke fakahaaʻi ʻa e tokotaha foakí ki he kotoa ʻo e faʻahinga ʻoku ʻi aí. Ko e anga fakafonua ko ení ʻe lava ke iku ia ki he ngaahi palopalema. Ko e faʻahinga ʻoku nau foaki ha meʻaʻofá te nau loto nai ke taʻefakahaaʻi ai pē honau hingoá koeʻuhí ke kalofi ai ʻa e tohoakiʻi mai ʻo e tokanga taʻetotonu kia kinautolú. Ko e faʻahinga tāutaha peheé ʻoku nau ngāue ʻo fakatatau ki he tefitoʻi moʻoni ʻoku maʻu ʻi he Mātiu 6:3, ʻa ia ʻoku pehē ai ʻe Sīsū: “Ka ko koe, ʻi hoʻo fai haʻo foaki, ke ʻoua naʻa ʻilo ʻe ho nima toʻohema ʻa e meʻa ʻoku fai ʻe ho toʻomataʻu.” ʻE ongoʻi nai ʻe he niʻihi ko e foaki meʻaʻofá ko ha meʻa fakafoʻituitui ia ʻa ia ʻoku totonu ke fakapulipuli ai pē ia ʻi he vahaʻa ʻo e tokotaha foakí mo e tokotaha ʻokú ne maʻú. ʻIkai ngata aí, ko hono ʻiloʻi ʻa e faʻahinga ʻoku foakí ʻe lava ke iku ai ki he ngaahi fakafehoanaki ʻo e ngaahi meʻaʻofá, “ʻo langaʻi ai ʻa e feʻauʻauhi.” (Kaletia 5:26, NW) Ko e moʻoni ʻe loto ʻa e kau Kalisitiané ke fakaʻehiʻehi mei hono ʻai ha taha pē ke ne ongoʻi taʻefiemālie pe mā ʻaki hono fanongonongo fakahāhā ʻa e ngaahi hingoa ʻo e kau foakí.—1 Pita 3:8.
ʻIo, ʻi he ngāue ʻo fehoanaki mo e ngaahi tefitoʻi moʻoni ʻoku maʻu ʻi he Folofola ʻa e ʻOtuá, ko e foaki meʻaʻofá ʻe hoko ai pē ia ko ha matavai ʻo e fiefiá.—Ngāue 20:35.