Ko e Hā ʻOku Leaʻaki ʻe he Tohi Tapú Fekauʻaki mo e Foakí?
Tali ʻa e Tohi Tapú
ʻOku fakalototoʻaʻi mai ʻi he Tohi Tapú ke tau mateuteu ke fai ha foaki ki he niʻihi kehé pea ke fakahoko ia ʻi he fakaueʻiloto totonu. Ko e foaki peheé ʻoku ʻaonga ia ki he tokotaha ʻoku fai ki ai ʻa e foakí pea pehē foki ki he tokotaha foakí. (Palōveepi 11:25; Luke 6:38) Naʻe pehē ʻe Sīsū: “ʻOku ʻi ai ʻa e fiefia lahi ange ʻi he foaki atú ʻi he maʻu maí.”—Ngāue 20:35.
Ko fē foaki ʻoku fiefia ai ʻa e ʻOtuá?
ʻOku ʻaonga ʻa e foakí ʻi he taimi ʻoku fai ai ʻi he loto-leleí. “Tuku ki he tokotaha taki taha ke ne fai ʻa e meʻa tofu pē ko ia kuó ne fakapapauʻi ʻi hono lotó,” ko e lau ia ʻa e Tohi Tapú, “ʻo ʻikai ʻi he toumoua pe ʻi hono kounaʻi, he ʻoku ʻofa ʻa e ʻOtuá ʻi ha tokotaha foaki fiefia.”—2 Kolinitō 9:7, fakamatala ʻi lalo.
Ko e foaki mei he lotó ko e konga ia ʻo e “founga lotu” ʻoku fakahōifua ki he ʻOtuá. (Sēmisi 1:27) Ko ha tokotaha ʻoku foaki nima-homo ki he faʻahinga ʻoku nau fiemaʻu iá ʻokú ne fai ai ʻa e meʻa ʻoku fakahōifua ki he ʻOtuá, ʻa ia ʻoku vakai ʻa e ʻOtuá ki he foaki peheé ko ha nō kiate ia. (Palōveepi 19:17) ʻOku akoʻi ʻe he Tohi Tapú ko e ʻOtuá tonu te ne totongi fakafoki ia ki he tokotaha foakí.—Luke 14:12-14.
Ko fē foaki ʻoku ʻikai fiefia ai ʻa e ʻOtuá?
Kapau ʻoku fai ia ʻi ha taumuʻa siokita. ʻOku kau ai ʻa e ngaahi fakatātā ko ení:
Ke fakahōhōʻiaʻi ʻa e niʻihi kehé.—Mātiu 6:2.
Ke maʻu fakafoki mai ha meʻa.—Luke 14:12-14.
Ke fakatau mai ʻaki ʻa e fakamoʻuí.—Ngāue 8:20.
Kapau ʻoku poupouʻi ai ha ngāue pe ʻulungaanga ʻoku fakahalaiaʻi ʻe he ʻOtuá. Ko e fakatātaá, ʻe hala ke ʻoange ha paʻanga ki ha tokotaha ke pelepaʻanga pe ngāuehalaʻaki ʻa e faitoʻo kona tapú pe ʻolokaholó. (1 Kolinitō 6:9, 10; 2 Kolinitō 7:1) ʻI he tuʻunga tatau, ʻoku ʻikai totonu ke foaki ki ha taha ʻa ia ʻoku malava ke ne ngāue paʻanga ke tokonaki maʻana ka ʻoku ʻikai ke ne fie ngāue.—2 Tesalonaika 3:10.
Kapau te tau foaki ʻo fuʻu lahi ki he niʻihi kehé kae ʻikai ke tokonaki maʻa hotau fāmilí. ʻOku akoʻi ʻe he Tohi Tapú kuo pau ki he ngaahi ʻuluʻi fāmilí ke nau tokonaki ʻa e ngaahi fiemaʻu maʻá e faʻahinga ʻi hono falé tonu. (1 Tīmote 5:8) ʻOku ʻikai totonu ki ha ʻuluʻi fāmili ke ne foaki ʻo fuʻu lahi ki he niʻihi kehé kae faingataʻaʻia ai hono fāmilí tonu. ʻI he tuʻunga meimei tatau, ʻoku fakahalaiaʻi ʻe Sīsū ʻa e faʻahinga ko ia ʻoku fakafisi ke tokonaki maʻa ʻenau ngaahi mātuʻa taʻumotuʻá ʻaki hono taukaveʻi ko ʻenau ngaahi koloá “ko ha meʻaʻofa ia kuo fakatapui ki he ʻOtuá.”—Maʻake 7:9-13.