Fāmili ʻo Sīsuú—Ko Hai Kinautolu?

ʻI HE ngaahi konga lahi ʻo e māmaní, ʻi he lolotonga ʻo Tīsemá ʻokú ke faʻa sio ai ki he ngaahi fakatātā ʻaloʻi ʻo e valevale ko Sīsuú ʻi he tokanga ʻofa ʻa ʻene faʻeé, ʻa Mele, mo ʻene tamai ohi ko Siosefá. Ko e ngaahi fakatātā ʻaloʻi fakafāmili peheé ʻoku tohoakiʻi nai ai naʻa mo e faʻahinga ʻoku ʻikai te nau taku ko e kau Kalisitiane kinautolú. Koeʻuhi ko Sīsū ʻa e tokotaha tefitó, ko e hā ʻoku tala mai ʻe he ngaahi Konga Tohitapú kia kitautolu ʻo fekauʻaki mo e fāmili fakaetangata ʻo Sīsuú?

Naʻe maʻu ʻe Sīsū ha puipuituʻa fakafāmili mātuʻaki mahuʻinga. Naʻe ʻaloʻi ia ʻe ha tāupoʻou ko hono hingoá ko Mele, ʻo ne hoko ai ko ha mēmipa ʻo e fāmili fakaetangatá. Fakatatau ki he Tohitapú, naʻe hiki ʻa ʻene moʻuí mei hēvani ki he manava ʻo Melé fakafou ʻi he laumālie māʻoniʻoní. (Luke 1:​30-​35) Ki muʻa ke fanongonongo ʻa e tuʻituʻiaʻi fakaemana ʻo Sīsuú, naʻe fakamaʻu ʻa Mele mo ha tangata ko hono hingoá ko Siosefa, ʻa ia naʻe pau ke ne hoko ko e tamai ohi ʻa Sīsuú.

Hili hono ʻaloʻi ʻo Sīsuú, naʻe maʻu ʻe Siosefa mo Mele ʻa e fānau kehe, ko e fanga tokoua mo e fanga tuofāfine faʻē-taha ʻo Sīsuú. ʻOku hā mahino ia mei he fehuʻi ki mui ʻa e kau nofo ʻi Nasaletí ʻo fekauʻaki mo Sīsū: “ʻIkai ko e foha ʻeni ʻo e motuʻa tufunga? ʻikai ʻoku hingoa ʻene faʻe ko Mele? mo hono ngāhi tokoua, ʻikai ko Semisi mo Siosefa mo Saimone mo Siutasi? pea ko hono ngāhi tuofāfine, ʻikai ʻoku nau felemofafo kotoa pe ʻiate kitautolu?” (Mātiu 1:25; 13:​55, 56; Maake 6:3) ʻOku lava ke tau fakaʻosiʻaki mei he meʻá ni ko e fāmili tonu ʻo Sīsuú naʻe kau ki ai ʻa ʻene ongo mātuʻá, fanga tokoua ʻe toko fā, pea ʻikai siʻi hifo he tuofāfine ʻe toko uá.

Kae kehe, ʻoku ʻikai tui ʻa e niʻihi ia he ʻahó ni ko e fanga tokoua mo e fanga tuofāfine ʻo Sīsuú ko e fānau ʻa Siosefa mo Mele. Ko e hā hono ʻuhingá? “Ko e Siasí,” ko e lau ia ʻa e New Catholic Encyclopedia, “mei hono muʻaki ngaahi ʻahó naʻe akoʻi ai ko Melé naʻe tāupoʻou maʻu pē ia. ʻI he vakai leva ki he meʻá ni, ʻoku ʻikai lava ke toe veiveiua naʻe ʻikai ke maʻu ʻe Mele ha toe fānau kehe.” Ko e tohi maʻuʻanga fakamatala tatau ʻoku taukaveʻi ai ko e ongo foʻi lea “tokoua” mo e “tuofefiné” ʻe lava ke ʻuhinga ia ki ha “taha pe faʻahinga ʻoku fāʻūtaha ʻi ha haʻi fakalotu pe ko ha haʻi anga-maheni kehe” pe ki he ngaahi kāingá, ko ha faʻahinga nai ʻoku tokouaʻaki.

Ko e tuʻungá moʻoni ia? Naʻa mo e kau teolosia Katolika ʻe niʻihi, ʻi he taʻefelotoi mo e tokāteline tukufakaholó, ʻoku nau poupouʻi ʻa e fakakaukau naʻe maʻu ʻe Sīsū ʻa e fanga tokoua mo e fanga tuofāfine fakakakanó. Ko John P. Meier, ko ha palesiteni ki muʻa ʻo e Kautaha Tohitapu Katolika ʻa ʻAmeliká, naʻá ne tohi: “ʻI he F[uakava] F[oʻoú] ko e adelphos [tokouá], ʻi hono ngāueʻaki ʻo ʻikai fakaefakatātā ʻataʻatā pē pe fakametafoa ka ke fakahaaʻi ha faʻahinga vahaʻangatae fakaekakano pe fakalaó, ʻoku ʻuhinga ia ki he tokoua moʻoni pē pe tokoua tamai-taha pe faʻē-taha, ʻo ʻikai ko ha toe meʻa kehe.”a ʻIo, ʻoku fakahaaʻi ʻe he ngaahi Konga Tohitapú naʻe ʻi ai ʻa e fanga tokoua mo e fanga tuofāfine ʻo Sīsū ʻa ia naʻe fāʻeleʻi kinautolu kia Siosefa mo Mele.

ʻOku lave ʻa e ngaahi Kōsipelí ki he ngaahi kāinga kehe ʻo Sīsū, ka tau tokangataha angé he taimí ni ki he fāmili tonu ʻo Sīsuú pea sio ai pe ko e hā ʻe lava ke tau ako meia kinautolú.

[Fakamatala ʻi lalo]