Ngaahi Fehuʻi mei he Kau Lautohí

Koeʻuhi naʻe ʻikai ha tofiʻa ʻo e kau Līvaí ʻi ʻIsileli ʻo e kuonga muʻá, naʻe lava fēfē ke fakatau atu ʻe he Līvai ko ʻAnamelí ha konga vao ki he Līvai naʻá ne tokouaʻaki ko Selemaiá, hangē ko ia ʻoku fakahaaʻi ʻi he Selemaia 32:7?

ʻI he fekauʻaki mo e kau Līvaí, naʻe tala ʻe Sihova kia ʻĒlone: “ʻE ʻikai hao tofiʻa ai, pe hao vahe ʻi honau lotolotonga [ʻa e kau ʻIsilelí].” (Nomipa 18:20) Ka neongo ia, naʻe vaheʻi ki he kau Līvaí ʻa e ngaahi kolo ʻe 48 fakataha mo honau ngaahi kaikaiʻanga ki he fanga manú, ʻa ia naʻe tuʻu movetevete holo ʻi he kotoa ʻo e Fonua ʻo e Talaʻofá. Ko e kolo tupuʻanga ʻo Selemaiá ko ʻAnatoti, ʻa e taha ʻo e ngaahi kolo naʻe vaheʻi ki he “hako ʻo Elone ko e taulaʻeiki.”—Siosiua 21:​13-19; Nomipa 35:​1-8; 1 Kalonikali 6:​54, 60.

ʻI he Livitiko 25:​32-​34, ʻoku tau ʻilo ai naʻe ʻoange ʻe Sihova ʻa e ngaahi fakahinohino pau fekauʻaki mo e ‘ʻatā ke huhuʻi [pe toe fakatau]’ ʻa e koloa naʻe maʻu ʻe he kau Līvaí. ʻOku hā mahino, ko e ngaahi fāmili Līvai tāutahá te nau maʻu ʻa e ngaahi totonu tukufakaholo fekauʻaki mo hono maʻu, ngāueʻaki, mo hono fakatau atu ha ngaahi ʻinasi pau. Ko e ngaahi meʻa peheé ʻe kau totonu ki ai ʻa e fakatau atu mo e toe fakatau mai ʻo ha kelekele.a ʻI he ngaahi tafaʻaki lahi, naʻe maʻu ʻe he kau Līvaí pea ngāueʻaki ʻa e kelekelé ʻi ha ngaahi founga tatau mo e kau ʻIsileli ʻo e ngaahi matakali kehé.

Ngalingali, ko e toko taha naʻe ʻaʻana ʻa e kelekele Līvai peheé naʻe foaki atu ki ai fakafou ʻi he tukufakaholo fakafāmilí. Kae kehe, fekauʻaki mo e ‘ʻatā ke toe fakatau,’ naʻe fakaʻatā ʻa e fakahoko pisinisí ʻi he vahaʻa pē ʻo e kau Līvaí. Pehē foki, ʻoku hā ngali ko e fakatau atu mo e toe fakatau ʻo e kelekelé naʻe ngāueʻaki pē ia ki he kelekele ʻi loto he ngaahi koló, koeʻuhi “ko e vao takatakai honau ngaahi kolo” naʻe ʻikai fiemaʻu ia ke fakatau atu koeʻuhi ko ha “tofiʻa tuʻumaʻu ia moʻonautolu.”—Livitiko 25:​32, 34.

Ko ia, ko e konga vao naʻe toe fakatau ʻe Selemaia meia ʻAnamelí ʻoku hā mahino naʻe ʻi ha faʻahinga natula ʻe lava ke foaki atu fakafou ʻi hano toe fakatau. Mahalo pē naʻe tuʻu ia ʻi loto ʻi he ngaahi ngataʻanga ʻo e koló. Naʻe fakapapauʻi ʻe Sihova tonu ko e “konga vao” ʻoku fai ki ai ʻa e lāuleá ko e meʻa ia ʻa ʻAnameli pea naʻe maʻu ʻe Selemaia ʻa e totonu ‘ke ne toe fakatau.’ (Selemaia 32:​6, 7) Naʻe ngāueʻaki fakaefakatātā ʻe Sihova ʻa e fakahoko pisinisi ko ení koeʻuhi ke ʻai ai ke mālohi ʻene talaʻofa ʻe toe foki ʻa e kau ʻIsilelí ke toe maʻu honau tofiʻa ʻi he fonuá hili ha vahaʻa taimi ʻo e fakaheeʻi ki Pāpiloné.​—Selemaia 32:​13-​15.

ʻOku ʻikai ha fakahaaʻi naʻe hoko ʻo maʻu taʻetotonu ʻe ʻAnameli ʻa e kelekele ʻi ʻAnatotí. ʻOku ʻikai fakahaaʻi ʻi ha meʻa naʻá ne maumauʻi ʻa e lao ʻa Sihová ʻi hono fakaafeʻi ʻa Selemaia ke ne fakatau ʻa e konga vao ko eni ʻi ʻAnatotí pe naʻe ngāueʻaki taʻetotonu ʻe Selemaia ʻa ʻene totonu ʻo e toe fakataú ʻi hono fakatau ʻa e konga vaó.​—Selemaia 32:​8-​15.

[Fakamatala ʻi lalo]