Ko ha Kātoanga ʻOkú Ne Ueʻi Koe

ʻI HEʻENE ʻi māmaní, naʻe fokotuʻu ai ʻe Sīsū Kalaisi ha kātoanga ʻa ia ʻoku fakalāngilangiʻi ai ʻa e ʻOtuá. Ko e kātoanga fakalotu pē eni ʻe taha naʻá ne fekauʻi fakahangatonu ʻa hono kau muimuí ke nau kātoangaʻí. Ko e Kai Efiafi ia ʻa e ʻEikí, ʻa ia ʻoku toe ʻiloa ko e ʻOhomohé.

Fakaʻuta atu ko e toko taha siotonu taʻehāmai koe ʻo e ngaahi meʻa ʻoku tataki atu ki he taimi ko iá. Kuo fakatahataha mai ʻa Sīsū mo ʻene kau ʻapositoló ki ha loki ʻi ʻolunga ʻi Selusalema ke kātoangaʻi ʻa e Pāsova faka-Siú. Kuo ʻosi ʻenau kai ʻa e meʻakai anga-maheni ʻo e Pāsová, ʻoku kau ki ai ʻa e lami kuo tunu, lauʻiʻakau konokona, mā taʻelēvani pea mo e uaine kulokula. Ko e ʻapositolo taʻemateaki ko Siutasi ʻIsikalioté kuo fakaʻatā ia pea ʻe vavé ni ke ne lavakiʻi ʻa hono ʻEikí. (Mātiu 26:​17-​25; Sione 13:​21, 26-​30) ʻOku ʻi ai pē ʻa Sīsū mo ʻene kau ʻapositolo faitōnunga ʻe toko 11. Ko Mātiú ko e taha ia ʻo kinautolu.

Fakatatau ki he fakamatala siotonu ʻa Mātiú, ko e founga eni ʻo hono fokotuʻu ʻe Sīsū ʻa e Kai Efiafi ʻa e ʻEikí: “Naʻe toʻo ʻe Sisu ha foʻi ma [taʻelēvani], ʻo ne tapuaki ia, mo ne pakipaki ʻo tufaki ki he kau ako, ʻo ne pehe, Toʻo ʻo kai; ko hoku sino ʻeni. Naʻa ne toʻo foki ha ipu [uaine], mo ne fakafetaʻi, ʻo ne ʻange kiate kinautolu, mo ne pehe, Mou inu kotoa pe mei ai; he ko hoku toto ʻeni ko e toto fuakava, ʻa ia ʻoku lilingi koeʻuhi ko e tokolahi ke lava ai ʻa e fakamolemole angahala.”—Mātiu 26:​26-28.

Ko e hā naʻe fokotuʻu ai ʻe Sīsū ʻa e Kai Efiafi ʻa e ʻEikí? ʻI hono fai iá, ko e hā naʻá ne ngāueʻaki ai ʻa e mā taʻelēvaní mo e uaine kulokulá? Naʻe pau ki he kau muimui kotoa ʻo Kalaisí ke nau maʻu ʻinasi mei he ongo meʻa fakaefakatātā ko ení? Naʻe pau ke kātoangaʻi tuʻo fiha ʻa e houa kai ko ení? Pea ʻoku ʻi ai moʻoni hano ʻuhinga kiate koe?