Ngaahi Fehuʻi mei he Kau Lautohí
ʻIkai naʻe fakangaloku ʻe he ʻapositolo ko Paulá ʻa ʻene tui faka-Kalisitiané ʻi heʻene pehē ʻi he ʻao ʻo e Sanetalimí: “Ko au ko e Falesi”?
Ke mahinoʻi ʻa e fakamatala ʻa Paula ʻoku maʻu ʻi he Ngāue 23:6, ʻoku fiemaʻu ke tau fakakaukau ki hono potutohí.
Hili hono ʻohofi ia ʻe he fuʻu kakai Siu ʻi Selusalemá, naʻe lea ai ʻa Paula ki he fuʻu kakaí. Naʻá ne lave ai ko iá naʻá ne ‘taʻutu [ʻi Selusalema] ʻi he vaʻe ʻo Kamelielí, ʻo ako ke mamafa ki he ngaahi mingimingiʻi meʻa ʻo e lao ʻa e ngaahi kuí.’ Neongo naʻe fanongo ʻa e fuʻu kakaí ʻi ha taimi siʻi ki heʻene taukapó, ʻi he iku ʻo nau ʻitá, naʻe ʻave ai ʻe he ʻeiki-tau fakafeʻaó ʻa Paula ki he nofoʻanga ʻo e kau sōtiá. ʻI he teu ke uipi iá, naʻe pehē ʻe Paula: “ʻOku ngofua koā ke mou kauʻimaea ha tangata Loma, kaeʻumaʻā ha toko taha kuo teʻeki fakamāu?”—Ngāue 21:27–22:29.
ʻI he ʻaho hoko maí, naʻe ʻave ai ʻe he ʻeiki-taú ʻa Paula ki he ʻao ʻo e fakamaauʻanga māʻolunga faka-Siú, ʻa e Sanetalimí. Naʻe sio fakamamaʻu ʻa Paula kia kinautolu ʻo ne ʻiloʻi ai naʻe faʻuʻaki ʻa e Sanetalimí ʻa e kau Sātusi mo e kau Fālesi. Naʻá ne pehē ange leva: “Kainga Matāpule, ko au ko e Falesi, ko e hakoʻi Falesi: ko e meʻa ʻoku tau ʻamanakia, ʻio, ʻa e toetuʻu ʻa e pekia, ko ia ʻoku ʻekea ai au.” Ko hono olá, naʻe malanga hake ai ha fakakikihi ʻi he vahaʻa ʻo e kau Fālesí mo e kau Sātusí, “he ʻoku lau ʻa e haʻa Satusi, tokua ʻoku ʻikai ha toetuʻu, pe ha angelo, pe ha laumālie: ka ʻoku tui ʻa e haʻa Falesi ʻoku ʻi ai fakatouʻosi.” Ko e niʻihi naʻe kau ki he faʻahi ʻa e kau Fālesí naʻa nau fakakikihi ʻi he ʻita: “ʻOku ʻikai te mau ʻilo ha kovi ʻi he tangata ni.”—Ngāue 23:6-10.
ʻI hono ʻiloa ko ha Kalisitiane faivelenga ʻaupitó, naʻe ʻikai lava ke fakatuipauʻi ʻe Paula ki he Sanetalimí ko iá ko ha mēmipa ia ʻo e kau Fālesí. Ko e kau Fālesi naʻe ʻi aí naʻe ʻikai te nau mei tali ha fakangaloku pe fakafofonga hala. Ko ia ko e fakamatala ʻa Paula fekauʻaki mo ʻene hoko ko ha Fālesí kuo pau pē naʻe ʻi ai hono ngaahi fakangatangataʻanga, pea ko e kau Fālesi naʻe ʻi aí kuo pau pē naʻa nau mahinoʻi ʻa e ngaahi lea ʻa Paulá ʻi he potutohi ko iá.
ʻI he pehē naʻe fakamāuʻi ia ʻi he ʻamanaki ʻo e toetuʻu ʻa e kau maté, ʻoku hā mahino naʻe ʻuhinga ʻa Paulá naʻá ne hangē ko e kau Fālesí ʻi he tafaʻaki ko ení. ʻI ha fakakikihi pē ʻi he tuʻunga-lea ko ení, naʻe pau ke fakafekauʻaki ʻa Paula mo e kau Fālesí kae ʻikai ko e kau Sātusí, ʻa ia naʻe ʻikai te nau tui ki he toetuʻú.
Ko e meʻa naʻe tui ki ai ʻa Paula ʻi he tuʻunga ko ha Kalisitiané naʻe ʻikai fepaki ia mo e ngaahi tui ʻa e kau Fālesí ʻi he ngaahi meʻa hangē ko e toetuʻú, kau ʻāngeló mo e ngaahi tuʻunga ʻe niʻihi ʻo e Laó. (Filipai 3:5) Ko ia ʻi loto ʻi he ngaahi ngataʻanga ko ení, naʻe lava ke fakafekauʻaki ai ʻe Paula ʻa ia mo e kau Fālesí, pea naʻe ʻi loto ʻi he fakangatangata ko ení ʻa hono mahinoʻi ʻa ʻene ngaahi leá ʻe he faʻahinga naʻe ʻi ai ʻi he Sanetalimí. Naʻá ne ngāueʻaki ai ʻa hono puipuituʻá ke feangainga mo e fakamaauʻanga māʻolunga faka-Siu tomuʻa fehiʻá.
Kae kehe, ko e fakamoʻoni lahi taha naʻe ʻikai fakangaloku ʻe Paula ʻa ʻene tuí ʻoku hā ia ʻi heʻene hokohoko atu ke maʻu ʻa e hōifua ʻa Sihová. Ko e pō hili hono fai ʻe Paula ʻa e fakamatala ʻi he fehuʻí, naʻe pehē ai ʻe Sīsū: “ʻOua te ke lotosiʻi: he hange ko hoʻo talatalatonu ʻi Selusalema ʻa e ngaahi meʻa ʻoku kau kiate au, pehē foki kuo pau te ke fakamatala ʻi Loma.” Koeʻuhi naʻe maʻu ʻe Paula ʻa e hōifua ʻa e ʻOtuá, kuo pau ke tau fakaʻosiʻaki naʻe ʻikai fakangaloku ʻe Paula ʻa ʻene tui faka-Kalisitiané.—Ngāue 23:11.