Talanoa ki he Moʻuí
ʻOku Fakapaleʻi Lahi ʻe Sihova ʻa Kinautolu ʻOku Nau Tauhi ʻa Hono ʻAlungá
FAKAMATALA FAI ʻE ROMUALD STAWSKI
ʻI he taimi naʻe kamata ai ʻa e tau hono ua ʻa māmaní ʻi Sepitema 1939, ko Pōlani fakatokelau naʻe hoko lahi ai ʻa e taú. ʻI he tuʻunga ko ha kiʻi tamasiʻi taʻu hiva fieʻiló, naʻá ku ʻalu ai ki ha malaʻe tau ofi mai ke fai hano vakaiʻi. Ko e meʻa naʻá ku sio aí naʻe fakalilifu—naʻe ngaeve ʻa e kelekelé ʻi he ngaahi ʻangaʻangá, pea naʻe fonu ʻa e ʻeá ʻi he ngaahi kohu fakafulutāmakia. Neongo naʻá ku fakakaukau tāfataha pē ki he founga ke u hao ai ki ʻapí, naʻe haʻu ki hoku ʻatamaí ha ngaahi fehuʻi: “Ko e hā ʻoku fakaʻatā ai ʻe he ʻOtuá ʻa e ngaahi meʻa fakalilifu peheé ke hokó? Ko e faʻahi ʻa hai ʻokú ne kau ki aí?”
ʻI HE ofi ke ngata ʻa e taú, naʻe fakamālohiʻi ʻe he puleʻanga Siamané ʻa e fānau tangatá ke ngāue. Ko ha taha pē naʻe fakatoʻotoʻa ke fakafisi naʻe tautau ia ʻi ha fuʻu ʻakau pe ʻi ha hala fakakavakava fakataha mo e fakaʻilonga “tokotaha lavaki” pe “tokotaha maumau” ʻi hono fatafatá. Ko homau koló, ʻa Gdynia, naʻe tuʻu ia ʻi he vahaʻa ʻo e ongo faʻahi naʻe taú. ʻI he taimi naʻa mau ō ai ki tuʻa mei he koló ke ʻutu vaí, naʻe tatangi ʻa e mahafú mo e pomú ʻi ʻolunga ʻi homau ʻulú, pea naʻe lavea ʻo mate ai ʻa hoku tokoua siʻisiʻi ko Henryk. Koeʻuhi ko e ngaahi tuʻunga fakalilifú, naʻe ʻave ai ʻe heʻeku faʻeé ʻa kimautolu fānau ʻe toko faá ki ha loki ʻi lalo fale ke malu ai. ʻI aí, naʻe mate ai ʻa hoku kiʻi tokoua taʻu ua ko Eugeniusz ʻi he ngaloʻafú.
Naʻá ku toe ʻeke hifo kiate au: “Ko fē ʻa e ʻOtuá? Ko e hā ʻokú ne fakaʻatā ai ʻa e faingataʻaʻia kotoa ko ʻení?” Neongo naʻá ku hoko ko ha tokotaha Katolika faivelenga pea ʻalu maʻu pē ki he lotú, naʻe ʻikai ke u maʻu ʻe au ʻa e talí.
Naʻá Ku Tali Lelei ʻa e Moʻoni Fakatohitapú
Ko e tali ki heʻeku ngaahi fehuʻí naʻe haʻu ia mei ha maʻuʻanga taʻeʻamanekina. Naʻe ngata ʻa e taú ʻi he 1945, pea ʻi he konga ki muʻa ʻo e 1947, naʻe ʻaʻahi mai ai ʻa e taha ʻo e Kau Fakamoʻoni ʻa Sihová ki homau ʻapí ʻi Gdynia. Naʻe talanoa ʻa ʻeku faʻeé ki he tokotaha Fakamoʻoní, pea naʻá ku fanongo ai ki he meʻa ʻe niʻihi naʻe fai ki ai ʻa e talanoá. Naʻe hā ngali moʻoni ia, ko ia naʻa mau tali ai ha fakaafe ki ha fakataha faka-Kalisitiane. ʻI ha māhina pē ʻe taha ki mui ai, neongo naʻe teʻeki ai ke u mahinoʻi kakato ʻa e moʻoni ʻi he Tohi Tapú, naʻá ku kau fakataha mo ha kulupu ʻo e Kau Fakamoʻoni fakalotofonuá pea malanga ki he niʻihi kehé ʻo fekauʻaki mo ha māmani lelei ange, ʻa ia ʻoku ʻataʻatā mei he taú mo e anga-fakamamahí. Naʻe ʻomi ʻe he meʻá ni kiate au ha fiefia lahi.
ʻI Sepitema 1947, naʻá ku papitaiso ai ʻi ha ʻasemipilī fakasēketi ʻi Sopot. ʻI Mē taʻu hono hokó, naʻá ku kamata ai ʻi he ngāue tāimuʻa taimi-kakató, ʻo līʻoa ʻa e lahi taha ʻo hoku taimí ke malangaʻi ʻa e pōpoaki ʻo e Tohi Tapú ki he niʻihi kehé. Naʻe fakafepakiʻi loto-kona ʻe he haʻa faifekau fakalotofonuá ʻemau ngāué pea nau fakaʻaiʻai ai ha fakamālohi kiate kimautolu. ʻI ha taimi ʻe taha, naʻe ʻohofi ai kimautolu ʻe ha fuʻu kakai ʻita, tolomakaʻi kimautolu pea haha lahi kimautolu. ʻI ha toe taimi ʻe taha naʻe fakaʻaiʻai ai ʻe he kau tāupoʻou mo e kau tangata faifekau fakalotofonuá ha kulupu ʻo ha kakai ke ʻohofi kimautolu. Naʻa mau kumi hūfanga ai ki ha ʻapi polisi, ka naʻe ʻātakaiʻi ʻe he fuʻu kakaí ʻa e falé, ʻo fakamanamana ke haha kimautolu. Naʻe faifai atu pē ʻo fakatokolahi mai ʻa e kau polisí, pea naʻe ʻave kimautolu ʻaki ha fakafeʻao mālohi.
ʻI he taimi ko iá, naʻe ʻikai ke ʻi ai ha fakatahaʻanga ia ʻi homau ʻēliá. ʻI he taimi ʻe niʻihi naʻa mau nofo ai ʻi tuʻa ʻi he poó kakato ʻi he vaó. Naʻa mau fiefia ʻi heʻemau lava ke fakahoko ʻa e ngāue fakamalangá neongo ʻa e ngaahi tuʻunga ne hokó. ʻI he ʻahó ni, ʻoku ʻi he feituʻu ko iá ha ngaahi fakatahaʻanga mālohi.
Ngāue Pētelí mo Hono Puke Pōpula
ʻI he 1949, naʻe fakaafeʻi ai au ki he ʻApi Pētelí ʻi Łódź. He monū moʻoni ē naʻe hokó ke ngāue ʻi ha feituʻu pehē! Ko e meʻa pangó, naʻe ʻikai ke fuʻu fuoloa ʻa ʻeku nofo ʻi aí. ʻI Sune 1950, ʻi ha māhina ki muʻa ke tapui fakaʻofisiale ʻemau ngāué, naʻe puke fakataha ai au mo ha fanga tokoua kehe ʻi he Pētelí. Naʻe ʻave au ki pilīsone, pea ko hono olá, naʻe pau ai ke u fehangahangai mo ha fakaʻekeʻeke anga-fakamamahi.
Koeʻuhi naʻe ngāue ʻeku tamaí ʻi ha vaka naʻe ʻalu tuʻumaʻu ki Niu ʻIoke, naʻe feinga ai ʻa e kau ʻōfisa naʻa nau fai ʻa e fakatotoló ke ʻai au ke u vetehia ʻo pehē naʻá ne sipai maʻá e ʻIunaite Seteté. Naʻá ku fuesia ha fakaʻekeʻeke taʻefaimeesi. Tānaki atu ki ai, naʻe feinga fakataha ha kau ʻōfisa ʻe toko fā ke ʻai au ke u talatalaakiʻi ʻa Tokoua Wilhelm Scheider, ʻa ia naʻá ne tokangaʻi ʻi he taimi ko iá ʻemau ngāue ʻi Pōlaní. Naʻa nau haha au ʻi hoku ongo muivaʻé ʻaki ha ngaahi vaʻakau fō lalahi. ʻI heʻeku tokoto fetotoʻi ʻi he falikí, ʻo ongoʻi ʻe ʻikai malava ke toe kātakiʻi iá, naʻá ku kaila, “Sihova, tokoni mai!” Naʻe ʻohovale ʻa hoku kau fakamamahí pea taʻofi ʻa hono haha aú. ʻI ha ngaahi miniti siʻi mei ai, naʻa nau tō ʻo mohe. Naʻá ku ongoʻi nonga hifo pea toe maʻu mai ʻa hoku mālohí. Naʻe fakatuipauʻi au ʻe he meʻá ni ko Sihová ʻokú ne tali anga-ʻofa ki heʻene kau sevāniti fakatapuí ʻi he taimi ʻoku nau kalanga hake ai kiate iá. Naʻe fakafefekaʻi ai ʻa ʻeku tuí pea akoʻi au ke tuku ʻa ʻeku falala kakató ki he ʻOtuá.
Naʻe kau ʻi he līpooti fakaʻosi ʻo e fakatotoló ha fakamoʻoni loi tokua ke pehē ko au naʻá ku faí. ʻI heʻeku lea ʻo fakafepakiʻi iá, naʻe tala mai ʻe ha ʻōfisa kiate au, “Te ke fakamatalaʻi ia ʻi he fakamaauʻangá!” Naʻe faleʻi mai ha kaungā pōpula anga-fakakaumeʻa ke ʻoua te u hohaʻa au, koeʻuhi ko e līpooti fakaʻosí naʻe pau ke fakapapauʻi ia ʻe ha loea fakakautau, ʻa ia ʻe ʻomi ai kiate au ha faingamālie ke fakahalaʻi ʻa e fakamoʻoni loí. Naʻe hoko ʻo moʻoni ʻa e meʻa ko iá.
Ngāue Fakasēketi mo ha Toe Tuku Pōpula
Naʻe tukuange au ʻi Sanuali 1951. ʻI ha māhina ʻe taha ki mui ai, naʻá ku kamata ai ke ngāue ko ha ʻovasia fefonongaʻaki. Neongo ʻa hono tapuí, naʻá ku ngāue mo e fanga tokoua kehe ke ʻai ke mālohi ʻa e ngaahi fakatahaʻangá pea mo tokoniʻi ʻa e kaungā Kau Fakamoʻoni ko ia ne nau movete holo koeʻuhi ko e ngāue ʻa e kau polisi leʻó. Naʻa mau fakalototoʻaʻi ʻa e fanga tokouá ke hokohoko atu ʻi he ngāue fakafaifekaú. ʻI ha ngaahi taʻu ki mui ai, ko e fanga tokoua ko ʻení naʻa nau poupou loto-toʻa ki he kau ʻovasia fefonongaʻakí pea fakahoko ʻa e ngāue ʻo hono pulusi mo tufaki fakapulipuli ʻa e ngaahi tohi Fakatohitapú.
ʻI he ʻaho ʻe taha ʻi ʻEpeleli 1951, ʻi he hili ʻa e ʻalu ki ha fakataha faka-Kalisitiane, naʻe puke au ʻi he halá ʻe ha kau ʻōfisa leʻo ʻa ia kuo nau ʻosi siofi fakalelei au. Koeʻuhi naʻá ku fakafisi ke tali ʻenau ngaahi fehuʻí, naʻa nau ʻave ai au ki ha pilīsone ʻi Bydgoszcz pea kamata hono fakaʻekeʻeke aú ʻi he pō ko iá. Naʻe fekauʻi au ke u tuʻu ʻo falala ki ha holisi ʻi he ʻaho mo e pō ʻe ono, ʻo ʻikai ha meʻakai pe inu, pea ʻi he ʻahu lahi mei he sikaleti ʻa e kau ʻōfisá. Naʻe haha au ʻaki ha pōvai pea tutuʻaki ʻa e ngaahi foʻi sikaletí. ʻI he taimi naʻá ku pongia aí, naʻa nau pī vaiʻi au pea toe hoko atu ʻa e fakaʻekeʻeké. Naʻá ku kōlenga kia Sihova ki ha mālohi ke kītaki, pea naʻá ne tokoniʻi au.
Ko e nofo pilīsone ʻi Bydgoszcz naʻe ʻi ai hono ngaahi lelei. ʻI aí naʻá ku malava ai ke vahevahe ʻa e ngaahi moʻoni Fakatohitapú ki he kakai naʻe ʻikai mei lava ke fai ha aʻu ki aí. Pea ʻoku moʻoni, naʻe lahi ʻa e ngaahi faingamālie ke fakahoko ai ha faifakamoʻoní. Koeʻuhi ko honau tuʻunga fakamamahi mo faʻa ʻikai ha toe ʻamanakí, naʻe fakaʻatā loto-lelei ʻe he kau pōpulá honau telingá mo e lotó ki he ongoongo leleí.
Ongo Liliu Mahuʻinga
ʻI he hili pē hono fakaʻatā au ʻi he 1952, ne u fetaulaki ai pea mo Nela ʻa ia ko ha tuofefine tāimuʻa faivelenga. Naʻá ne ngāue tāimuʻa ʻi he tafaʻaki fakatonga ʻo Pōlaní. Ki mui ai naʻá ne ngāue ʻi ha “fale mā,” ʻa ia ko hono moʻoní ko ha feituʻu fakapulipuli ʻa ia naʻe pulusi ai ʻemau ngaahi tohí. Ko ha ngāue faingataʻa ia ʻa ia naʻe fiemaʻu ki ai ʻa e tokanga mo e feilaulauʻi-kita. Naʻá ma mali ʻi he 1954, pea naʻá ma hokohoko atu ʻi he ngāue taimi-kakató ʻo aʻu ki hono fāʻeleʻi ʻa homa ʻofefiné, ko Lidia. Naʻá ma fili leva koeʻuhi ke fakaʻatā au ke hokohoko atu ʻi he ngāue fefonongaʻakí, ke taʻofi ʻe Nela ʻa ʻene ngāue taimi-kakató, kae foki ki ʻapi, ʻo tokangaʻi ʻa homa ʻofefiné.
ʻI he taʻu tatau, naʻá ma fehangahangai ai mo ha toe fili mahuʻinga. Naʻe fai e kole kiate au ke u ngāue ko ha ʻovasia fakavahe ʻi ha feituʻu naʻe kāpui ai ʻa e vahe tolu ʻe taha ʻo Pōlani. Naʻá ma fakakaukau ki he meʻá ʻi he lotu. Naʻá ku ʻiloʻi ʻa e mahuʻinga ko ia ke fakaivimālohiʻi ʻa homa fanga tokoua naʻe ʻi he malumalu ʻo e tapuí. Naʻe lahi ʻa e fanga tokoua naʻe puke pōpulá, ko ia naʻe ʻi ai leva ha fiemaʻu lahi ki ha fakalototoʻa fakalaumālie. ʻAki ʻa e tokoni ʻa Nelá, naʻá ku tali ai ʻa e ngāue naʻe vaheʻi maí. Naʻe tokoniʻi au ʻe Sihova ke u ngāue ʻi he tuʻunga ko ʻení ʻi he taʻu ʻe 38.
Tokangaʻi ʻa e “Ngaahi Fale Maá”
ʻI he ngaahi ʻaho ko iá, naʻe tokangaʻi ʻe he ʻovasia fakavahé ʻa e “ngaahi fale maá,” ʻa ia naʻe tuʻu ʻi he ngaahi feituʻu pulipulia. Naʻe muimuiʻi maʻu pē ʻe he kau polisí ʻa kimautolu, ʻo feinga ke maʻu pea ke taʻofi ʻemau ngaahi ngāue pulusí. ʻI he taimi ʻe niʻihi naʻa nau lavameʻa ai, ka naʻe ʻikai te mau taʻemaʻu ʻa e meʻakai fakalaumālie naʻe fiemaʻú. Naʻe mātuʻaki hā mahino naʻe tokangaʻi kimautolu ʻe Sihova.
Ke hoko ʻo fakaafeʻi ke fai ʻa e ngāue faingataʻa mo fakatuʻutāmaki ʻo e ngāue pulusí, naʻe pau ki he tokotaha ko iá ke mateaki, tokanga, feilaulauʻi-kita pea mo talangofua. Ko e ngaahi ʻulungāanga ko iá naʻá ne ʻai ai ha “fale mā” ke malava ke hokohoko atu e ngāué ʻi ha tuʻunga malu. Ko e kumi ki ha tuʻuʻanga lelei ki he ngāue pulusi fakapulipulí naʻe toe faingataʻa foki. Naʻe hā ngali feʻungamālie ʻa e ngaahi tuʻuʻanga ʻe niʻihi, ka ko e fanga tokoua naʻe ʻi aí naʻe ʻikai te nau fuʻu fakapotopoto. ʻI he ngaahi tuʻuʻanga kehé, naʻe fehangahangai tofu pē ai ʻa e tuʻungá ia. Naʻe loto-lelei ʻa e fanga tokouá ke fai ha ngaahi feilaulau makehe atu. Naʻá ku houngaʻia moʻoni ʻi he kotoa ʻo e fanga tokoua mo e fanga tuofāfine ʻa ia naʻá ku maʻu ʻa e monū ke ngāue mo kinautolú.
Taukapoʻi ʻa e Ongoongo Leleí
Lolotonga e ngaahi taimi faingataʻa ko iá, naʻe toutou tukuakiʻi ai kimautolu ki hono fai e ngāue taʻefakalao mo fakatupu maveuveu pea ʻave kimautolu ki he fakamaauʻangá. Naʻe hoko ʻeni ko ha palopalema koeʻuhí naʻe ʻikai ke ʻi ai haʻamau kau loea ke taukapoʻi kimautolu. Naʻe loto-lelei ʻa e kau loea ʻe niʻihi, ka ko e tokolahi ne nau ilifia naʻa ʻilo ʻe he kakaí pea ne ʻikai te nau loto ke ʻi ha tuʻunga fakatuʻutāmaki ʻi hano fakaʻitaʻi ʻa e kau maʻu mafaí. Kae kehe, naʻe lāuʻilo ʻa Sihova ki heʻemau ngaahi fiemaʻú, pea naʻá ne tataki feʻungamālie ʻa e ngaahi meʻá ʻi hono taimi totonú.
Ko Alojzy Prostak, ko ha ʻovasia fefonongaʻaki mei Kraków, naʻe ngaohikoviʻi anga-fakamanu ia lolotonga ha fakaʻekeʻeke ʻa ia naʻe pau ai ke ʻave ki he falemahaki ʻo e pilīsoné. Ko ʻene tuʻumaʻu neongo ʻa e fakamamahi fakaʻatamai mo fakaesinó naʻá ne maʻu ai ʻa e fakaʻapaʻapa mo e leleiʻia ʻa e kau pōpula kehe ʻi he falemahakí. Ko e taha ʻo kinautolú ko ha loea naʻe hingoa ko Witold Lis-Olszewski, ʻa ia naʻe maongo kiate ia ʻa e loto-toʻa ʻa Tokoua Prostak. Naʻá ne talanoa kiate ia ʻi he taimi lahi pea palōmesi ange, “ʻI hono tukuange pē au pea fakaʻatā ke toe hoko atu ʻeku ngāué, te u loto-lelei ke taukapoʻi ʻa e Kau Fakamoʻoni ʻa Sihová.” Naʻá ne fai ki he meʻa naʻá ne leaʻakí.
Ko Mr. Olszewski naʻe ʻi ai ʻa ʻene timi loea pē ʻaʻana, ʻa ia ko ʻenau tukupaá naʻe mātuʻaki lelei ʻaupito. Lolotonga ʻa e taimi naʻe mālohi taha ai ʻa e fakafepakí, naʻa nau taukapoʻi ʻa e fanga tokouá ʻi he meimei ngaahi hopo ʻe 30 ʻi he māhina—ʻa ia ko e taha he ʻaho! Koeʻuhi naʻe fiemaʻu kia Mr. Olszewski ke ne ʻilo lelei fekauʻaki mo e kotoa ʻo e ngaahi keisí, naʻe vaheʻi mai kiate au ke toutou fetuʻutaki mo ia. Naʻá ku ngāue mo ia ʻi he taʻu ʻe fitu ʻi he 1960 tupú mo e 1970 tupú.
Naʻá ku ako e meʻa lahi ʻo fekauʻaki mo e ngāue fakalaó lolotonga e ngaahi ʻaho ko iá. Naʻá ku faʻa siofi ai ʻa e ngaahi hopó, ngaahi fakamatala ʻa e kau loeá—fakatouʻosi ʻa e lelei mo e kovi—ngaahi founga ʻo e taukapoʻi fakalaó pea mo e fakamoʻoni ʻa e kaungātui naʻe tukuakiʻí. Naʻe hoko kotoa ia ʻo ʻaonga ʻi hono tokoniʻi homau fanga tokouá, ʻo tautautefito ki he faʻahinga ko ia naʻe fiemaʻu mai ke nau fai ha fakamoʻoní, ke ʻiloʻi ʻa e meʻa ke leaʻakí pea mo e taimi ke fakalongolongo ai ʻi he ʻao ʻo e fakamaauʻangá.
ʻI he taimi naʻe fai ai ha hopó, naʻe faʻa nofo ai ʻa Mr. Olszewski he poʻulí ʻi he ngaahi ʻapi ʻo e Kau Fakamoʻoni ʻa Sihová. Naʻe ʻikai hoko iá koeʻuhi naʻe ʻikai te ne lava ʻo totongi ha loki hōtele, kae hangē ko ia ko ʻene lea he taimi ʻe taha, “Ki muʻa he hopó, ʻoku ou loto ke maʻu ha niʻihi ʻo e anga ʻo hoʻomou fakakaukaú.” Mālō mo ʻene poupoú, naʻe lava ai ʻa e ngaahi hopo lahi ʻi ha tuʻunga ola lelei. Naʻá ne taukapoʻi au ʻi he ngaahi taimi lahi, pea naʻe ʻikai ʻaupito ke ne tali ʻe ia ha paʻanga ʻe taha meiate au. ʻI ha tuʻunga ʻe taha, naʻá ne fakafisingaʻi ai ʻa e totongí ʻi he ngaahi keisi ʻe 30. Ko e hā hono ʻuhingá? Naʻá ne leaʻaki, “ʻOku ou loto ke tokoni naʻa mo ha kiʻi meʻa siʻi pē ki hoʻomou ngāué.” Pea naʻe ʻikai ko ha paʻanga siʻisiʻi eni. Ko e ngāue ʻa e timi ʻa Mr. Olszewski naʻe ʻikai taʻefakatokangaʻi ia ʻe he kau maʻu mafaí, ka naʻe ʻikai ke fakalotosiʻi ai ia mei hono tokoniʻi ko ia ʻa kimautolú.
ʻOku faingataʻa ke fakamatala ki he fakamoʻoni lelei naʻe fai ʻe homau fanga tokouá lolotonga ʻa e ngaahi hopo ko iá. Ko e tokolahi ne nau omi ki he ngaahi fakamaauʻangá ke sio he ngaahi hopó pea ke fakaivimālohi ki homau fanga tokoua naʻe tukuakiʻí. Lolotonga ʻa e taimi ʻo e ngaahi hopo lahi tahá, naʻá ku lau ai ʻo aʻu ki he kau poupou pehē ʻe toko 30,000 ʻi he taʻu ʻe taha. Ko e fuʻu kakai tokolahi moʻoni ē ʻo e Kau Fakamoʻoní!
Ko ha Vāhenga-Ngāue Foʻou
ʻI he 1989 naʻe toʻo ai ʻa hono tapui ko ia ʻemau ngāué. ʻI he taʻu ʻe tolu ki mui ai naʻe langa ha ʻōfisi vaʻa foʻou pea fakatapui. Naʻe fakaafeʻi au ki ai ke ngāue ʻi he Ngaahi Ngāue Fakahinohino Fakafalemahakí, ʻa ia ko e vāhenga-ngāue naʻá ku tali fiefia. ʻI he ngāue ko e timi naʻe toko tolu, naʻa mau poupouʻi ai homau ngaahi tokoua ko ia ne nau fehangahangai mo e ʻīsiu ʻo e totó pea tokoniʻi ai kinautolu ke taukapoʻi ʻenau tuʻu ʻo makatuʻunga ʻi honau konisēnisi faka-Kalisitiané.—Ngāue 15:29.
Ko au mo hoku uaifí naʻá ma mātuʻaki houngaʻia ʻi he monū ʻo e ngāue kia Sihova ʻi he ngāue fakafaifekau ki he kakaí. Naʻe tokoni mo fakalototoʻa maʻu pē ʻa Nela kiate au. ʻOku ou fakamālōʻia maʻu pē he ko e hā pē e taimi naʻá ku femoʻuekina ai ʻi he ngaahi ngāue fakateokalati naʻe vaheʻi maí pe ʻave au ki he pilīsoné, naʻe ʻikai ʻaupito te ne lāunga ʻo fekauʻaki mo ʻeku puli mei ʻapí. ʻI he ngaahi taimi faingataʻá, naʻá ne fakafiemālieʻi ʻa e niʻihi kehé kae ʻikai hoko ʻo loto-mafasia.
Ko e fakatātaá, ʻi he 1974, naʻe puke au fakataha mo e kau ʻovasia fefonongaʻaki kehe. Ko e fanga tokoua ʻe niʻihi ne nau ʻilo fekauʻaki mo iá ne nau loto ke fakahā ia ki hoku uaifí ʻi ha founga fakaalaala. ʻI he taimi ne nau sio ai kiate iá, naʻa nau pehē ange, “ʻE Tuofefine Nela, ʻokú ke mateuteu ki he ongoongo kovi tahá?” ʻUluakí, naʻá ne longo ʻi he ilifiá, ʻi heʻene fakakaukau ne u mate. ʻI heʻene ʻiloʻi ʻa e meʻa moʻoni naʻe hokó, naʻá ne pehē ʻi he fiemālie: “ʻOkú ne moʻui! ʻOku ʻikai ko hono ʻuluaki tuku pōpulá eni.” Naʻe tala mai ki mui ai ʻe he fanga tokouá ne maongo loloto kiate kinautolu ʻa ʻene fakafeangai loto-falalá.
Neongo ne ma fāinga mo ha ngaahi hokosia fakamamahi ʻi he kuohilí, kuo tāpuakiʻi lahi maʻu pē ʻe Sihova kimaua ʻi he tauhi ko ia ʻa hono ʻalungá. He fiefia ē ka ko kimaua ʻi he hoko moʻoni ʻa homa ʻofefiné, ʻa Lidia mo hono husepānití, ko Alfred DeRusha, ko ha ongo meʻa Kalisitiane faʻifaʻitakiʻanga lelei. Kuó na tauhi hake ʻa hona ongo fohá, ko Christopher mo Jonathan, ʻo na hoko ko ha ongo sevāniti fakatapui ʻa e ʻOtuá, ʻa ia ʻoku tānaki mai ia ki heʻema fiefiá. Ko hoku tokouá, ko Ryszard pea mo hoku tuofefiné, ko Urszula, kuó na hoko foki mo kinaua ko e ongo Kalisitiane faitōnunga ʻi he ngaahi taʻu lahi.
Kuo ʻikai ʻaupito liʻaki kimaua ʻe Sihova, pea ʻokú ma loto ke hanganaki tauhi ʻaufuatō kiate ia. Kuó ma hokosia fakafoʻituitui ʻa e moʻoni ko ia ʻo e ngaahi lea ʻo e Sāme 37:34: “Tatali kia Sihova, pea tauhi hono ʻalunga, pea te ne hakeakiʻi koe ke maʻu ʻa e fonua.” ʻOkú ma sioloto atu ki he taimi ko iá ʻaki ʻa homa lotó kotoa.
[Fakatātā ʻi he peesi 17]
ʻI ha ʻasemipilī naʻe fai he ngoue ʻa ha tokoua ʻi Kraków, 1964
[Fakatātā ʻi he peesi 18]
Mo hoku uaifí, ʻa Nela, pea mo homa ʻofefiné, ʻa Lidia, ʻi he 1968
[Fakatātā ʻi he peesi 20]
Mo ha kiʻi tamasiʻi Fakamoʻoni ki muʻa pea fai ʻa hono tafa ʻo ʻikai ngāueʻaki ʻa e totó
[Fakatātā ʻi he peesi 20]
Mo Nela, ʻi he 2002
[Fakatātā ʻi he peesi 20]
Mo Dr. Wites, ko e toketā pule tafa mafu taʻengāueʻaki ʻa e totó ki he fānaú, ʻi ha Falemahaki ʻi Katowice