Ngaahi Mātuʻa—Ko e Hā ʻa e Kahaʻu ʻOku Mou Fiemaʻu ki Hoʻomou Fānaú?

“Ae kau tagata talavou, moe kau taahine . . . Ke nau fakamalo ki he huafa o Jihova.”—Sāme 148:​12, 13, PM.

1. Ko e hā ʻa e ngaahi loto-moʻua ʻoku maʻu ʻe he ngaahi mātuʻá ʻo fekauʻaki mo ʻenau fānaú?

KO HAI ia ha ngaahi mātuʻa ʻoku ʻikai te nau tokanga lahi fekauʻaki mo e kahaʻu ʻo ʻenau fānaú? Mei he mōmeniti ʻoku fāʻeleʻi ai ha kiʻi valevale—pe naʻa mo e ki muʻa aí—ʻoku kamata ke hohaʻa ai ʻa e ongo mātuʻá ʻo fekauʻaki mo ha lelei maʻana. Te ne moʻui lelei? Te ne tupu anga-maheni hake pē? ʻI he tupu hake ʻa e kiʻi tamá ʻo motuʻa angé, ʻoku toe ʻi ai ʻa e ngaahi loto-moʻua kehe. ʻI he tuʻunga fakalūkufuá, ʻoku fiemaʻu pē ʻe he ngaahi mātuʻá ʻa e meʻa ʻoku lelei tahá ki heʻenau fānaú.—1 Samiuela 1:​11, 27, 28; Sāme 127:​3-5.

2. Ko e hā ʻoku ongoʻi mālohi ai ʻa e ngaahi mātuʻa tokolahi fekauʻaki mo hano maʻu ʻe heʻenau fānaú ha moʻui ʻoku leleí ʻi heʻenau tupu haké?

² Kae kehe, ʻi he māmani ʻo e ʻaho ní, ko ha pole ia ki he ngaahi mātuʻá ke tokonaki ʻa e meʻa ʻoku lelei tahá ki heʻenau fānaú. Kuo foua ʻe he ngaahi mātuʻa tokolahi ʻa e ngaahi taimi faingataʻa—ngaahi tau, ngaahi maveuveu fakapolitikale, ngaahi faingataʻa fakaʻekonōmika, ngaahi mamahi fakaesino pe fakaeongo, mo e alā meʻa pehē. ʻOku fakanatula pē, ko ʻenau holi loto-moʻoní ia ke ʻoua ʻe toe foua ʻe heʻenau fānaú ʻa e ngaahi meʻa tatau. ʻI he ngaahi fonua tuʻumālié, ʻoku fakatokangaʻi nai ai ʻe he ngaahi mātuʻá ʻa e ngaahi foha mo e ngaahi ʻofefine ʻo honau ngaahi kaumeʻá mo e ngaahi kāingá ʻoku nau ngaʻunu ki muʻa ʻi he ngaahi ngāue tuʻumaʻu fakapalōfesinalé pea maʻu nai ai ha moʻui ʻoku hā ngali lavameʻa. Ko ia ai, ʻoku nau ongoʻi ʻoku ueʻi kinautolu ke fai ʻa e meʻa kotoa pē te nau malavá ke fakapapauʻi ʻe malava mo ʻenau fānaú foki ke maʻu ha moʻui fakafiemālie mo malu feʻunga—ko ha moʻui ʻoku lelei—ʻi heʻenau tupu haké.—Koheleti 3:13.

Ko Hono Fili ha Moʻui ʻOku Leleí

3. Ko e hā ʻa e fili kuo fai ʻe he kau Kalisitiané?

³ ʻI he tuʻunga ko e kau muimui ʻo Sīsū Kalaisí, kuo fili ai ʻa e kau Kalisitiané ke fakatapui ʻenau moʻuí kia Sihova. Kuo nau tokanga ki he ngaahi lea ʻa Sīsuú: “Kabau e muimui ha taha kiate au, tuku ke jiaki ia eia, bea too hake ene akau māfajia i he aho kotoabe, bea muimui iate au.” (Luke 9:​23, PM; 14:27) ʻIo, ko e moʻui ʻa ha Kalisitiane ʻoku kau ai ʻa e feilaulauʻi-kita. Kae kehe, ʻoku ʻikai ko ha moʻui ia ʻo e masiva mo e loto-mamahi. ʻI hono kehé, ko ha moʻui fiefia mo fiemālie ia—ko ha moʻui ʻoku lelei—koeʻuhi ʻoku kau ki ai ʻa e foaki, pea hangē ko ia naʻe leaʻaki ʻe Sīsuú, “ʻoku lahi ange ʻa e fiefiá ʻi he foaki atú ʻi he maʻu maí.”—Ngāue 20:​35, NW.

4. Ko e hā naʻe ekinaki ʻe Sīsū ki hono kau muimuí ke nau tuli ki aí?

⁴ Ko e kakai ʻi he ʻaho ʻo Sīsuú naʻa nau moʻui ʻi he malumalu ʻo e ngaahi tuʻunga mātuʻaki faingataʻa. Tānaki atu ki he feinga ki he maʻuʻanga moʻuí, naʻe pau ke nau kātekina ʻa e pule kakaha ʻa e kau Lomá mo e kavenga fakafeʻātungia ʻa e kau lotu fakaeouau ʻo e taimi ko iá. (Mātiu 23:​2-4) Ka neongo ia, ko e tokolahi ko ia naʻe fanongo fekauʻaki mo Sīsuú naʻa nau liʻaki loto-lelei ʻa ʻenau ngaahi ngāue fakafoʻituituí—naʻa mo e ngaahi ngāue tuʻumaʻú—pea hoko ko hono kau muimui. (Mātiu 4:​18-22; 9:9; Kolose 4:14) Naʻe fai ʻe he kau ākonga ko iá ha meʻa ʻe kaunga kovi mo fakatuʻutāmaki ki honau kahaʻú? Fakatokangaʻi ʻa e ngaahi lea ʻa Sīsuú: “ʻIlonga ha taha kuo ne liʻaki ha ngāhi tokoua, pe ha ngāhi tuofāfine, pe ha tamai, pe ha faʻe, pe ha fānau, pe ha ngāhi tokanga ngoue, pe ha ngāhi fale, koeʻuhiā ko hoku hingoa, te ne toe maʻu ʻo lōlahi, pea ʻe to moʻona foki ʻa e moʻui taʻengata.” (Mātiu 19:29) Naʻe fakapapauʻi ʻe Sīsū ki hono kau muimuí ʻoku ʻafioʻi ʻe he Tamai fakahēvaní ʻenau ngaahi fiemaʻú. Ko ia ai, naʻá ne ekinaki kiate kinautolu: “Ka mou fuofua kumi ae buleaga oe Otua, mo ene maonioni; bea e fakalahi aki ae gaahi mea ni kotoabe kiate kimoutolu.”—Mātiu 6:​31-33, PM.

5. ʻOku anga-fēfē ʻa e ongoʻi ʻa e ngaahi mātuʻa ʻe niʻihi ʻo fekauʻaki mo e fakapapau ʻa Sīsū ʻe tokangaʻi ʻe he ʻOtuá ʻene kau sevānití?

⁵ ʻOku ʻikai ke fuʻu kehekehe ʻa e ngaahi meʻá ʻi he ʻahó ni. ʻOku ʻafioʻi ʻe Sihova ʻetau ngaahi fiemaʻú, pea ko e faʻahinga ko ia ʻoku nau fakamuʻomuʻa ʻa e ngaahi meʻa ʻo e Puleʻangá ʻi heʻenau moʻuí, tautefito ki he faʻahinga ʻoku nau tuli ki he ngāue fakafaifekau taimi-kakató, ʻoku nau maʻu ʻa e fakapapau tatau te ne tokangaʻi kinautolu. (Malakai 3:​6, 16; 1 Pita 5:7) Kae kehe, ʻoku taʻepauʻia ʻa e ngaahi mātuʻa ia ʻe niʻihi ʻi he meʻá ni. ʻI he tafaʻaki ʻe taha, te nau saiʻia ke sio ki heʻenau fānaú ʻoku nau laka ki muʻa ʻi he ngāue ʻa Sihová, ʻo iku nai ai ki haʻanau hū ki he ngāue fakafaifekau taimi-kakató. ʻI he tafaʻaki ʻe tahá, ko e fakakaukau atu ko ia ki he tuʻunga fakaʻekonōmiká mo e ngāue ʻi he māmani ʻo e ʻaho ní, ʻoku nau ongoʻi ʻe kinautolu ʻoku mahuʻinga ki he fānaú ke nau ʻuluaki maʻu ha ako lelei koeʻuhi ke nau maʻu ai ʻa e ngaahi tuʻunga poto taau ʻoku fiemaʻú ki ha ngāue lelei pe ke ʻi ai ha meʻa ke falala ki ai ʻo ka fiemaʻu. Ki he ngaahi mātuʻa peheé, ko ha ako leleí ʻoku faʻa ʻuhinga iá ki ha ako māʻolunga ange.

Ko e Teuteu ki he Kahaʻú

6. ʻI he founga fē ʻoku ngāueʻaki ai ʻi he kupu ko ʻení ʻa e foʻi lea “ako māʻolunga ange”?

⁶ ʻOku kehekehe ʻa e sisitemi fakaeakó ʻi he fonua ki he fonua. Ko e fakatātaá, ʻi he ʻIunaite Seteté, ʻoku ʻoatu ai ʻe he ngaahi ako ʻa e puleʻangá ha ako tefito ʻi he taʻu ʻe 12. ʻI he hili iá, ʻe fili nai ʻa e fānau akó ke nau hū ki ha ʻunivēsiti ʻi ha toe taʻu ʻe fā pe lahi ange, ʻo iku atu ai ki ha ʻuluaki mataʻitohi pe ki ha ngaahi ako he hili ʻa e maʻu mataʻitohí ki he ngaahi ngāue tuʻumaʻu ʻi he faitoʻó, laó, ʻenisiniá mo e alā meʻa peheé. Ko e ako fakaʻunivēsiti peheé ʻa e meʻa ʻoku ʻuhinga ki ai ʻi hono ngāueʻaki ʻi he kupu ko ʻení ʻa e foʻi lea “ako māʻolunga ange.” ʻI he tafaʻaki ʻe tahá, ʻoku ʻi ai ʻa e ngaahi ʻapiako fakatekinikale mo ako ngāue, ʻoku nau tuku atu ha ngaahi koosi taimi-nounou ʻe iku ai ki ha tohi fakamoʻoni ako pe tipiloma ʻi ha faʻahinga pōtoʻi pe ngāue.

7. Ko e hā ʻa e ngaahi tenge ʻoku hoko ki he fānau ako ʻi he ngaahi ʻapiako māʻolungá?

⁷ Ko e ʻalunga he ʻahó ni ki he ngaahi ʻapiako kolisí pe ngaahi ʻapiako māʻolungá ko hono teuʻi ʻenau fānau akó ki ha ako māʻolunga ange. Ke aʻusia ʻení, ʻoku tokangataha ai ʻa e lahi taha ʻo e ngaahi ʻapiako māʻolungá ki he ngaahi lēsoni fakaako te ne fakamafeia ʻa e fānau akó ke nau maaka māʻolunga ai ʻi he ngaahi sivi hū ki he ʻunivēsití kae ʻikai ko e ngaahi koosi te ne teuʻi ʻa e fānau akó ke maʻu ai ha ngāué. ʻOku tofanga ʻa e fānau ako ʻi he ngaahi ʻapiako māʻolungá he ʻahó ni mo e tenge lahi fakaʻulia mei he kau faiakó, kau faleʻí mo e kaungāakó ke nau fakataumuʻa ke hū ki he ngaahi ʻunivēsiti lelei tahá, ʻa ē ʻoku nau ʻamanaki te nau maʻu ai ʻa e ngaahi mataʻitohi ʻa ia ʻe lava ke ne fakaava mai kiate kinautolu ʻa e ngaahi matapā ki he ngaahi ngāue ʻoku ngalingali ʻe lavameʻa mo totongi leleí.

8. Ko e hā ʻa e ngaahi fili ke fai ʻoku fetaulaki mo e ngaahi mātuʻa Kalisitiané?

⁸ Ko e hā leva ke fai ʻe he ngaahi mātuʻa Kalisitiané? Ko hono moʻoní, ʻoku nau fiemaʻu ʻenau fānaú ke nau lavameʻa ʻi he ʻapiakó pea ako ki he ngaahi pōtoʻi ʻoku fiemaʻu ki hono tauhi kinautolu ʻi he ngaahi ʻaho ʻoku hanga mai mei muʻá. (Palovepi 22:29) Ka ʻoku totonu ke nau tuku pē ʻenau fānaú ke tākiekina ʻe he laumālie ʻo e feʻauʻauhi ki he laka ki muʻá mo e lavameʻa fakamatelié? Ko e hā ʻa e faʻahinga taumuʻa ʻoku nau fokotuʻu atu ki heʻenau fānaú, ʻi he lea pe ʻi he faʻifaʻitakiʻanga fakafoʻituituí? ʻOku ngāue mālohi ʻaupito ʻa e ngaahi mātuʻa ʻe niʻihi mo fakahū paʻanga koeʻuhi ke malava ʻo ʻaveʻaki ʻenau fānaú ki he ngaahi ʻunivēsití ʻi heʻene hoko mai ʻa e taimi ko iá. ʻOku loto-lelei ʻa e niʻihi kehe ke aʻu ʻo nau moʻua fakapaʻanga koeʻuhi ko e taumuʻa ko ʻení. Kae kehe, ko e fakamole ʻo ha faʻahinga fili peheé heʻikai malava ke fakafuofuaʻi pē ia ʻaki ʻa e paʻangá. Ko e hā ʻa e fakamole ʻo e tuli ki ha ako māʻolunga ange ʻi he ʻaho ní?—Luke 14:​28-33.

Ko e Fakamole ʻo e Tuli ki he Ako Māʻolunga Angé

9. Ko e hā ʻoku malava ke leaʻaki fekauʻaki mo e fakamole fakapaʻanga ki he ako māʻolunga ange he ʻaho ní?

⁹ ʻI heʻetau fakakaukau atu ki he fakamolé, ʻoku tau faʻa fakakaukau fekauʻaki mo e ngaahi fakamole fakapaʻangá. ʻI he ngaahi fonua ʻe niʻihi, ko e ako māʻolunga angé ʻoku fakapaʻanga ia ʻe he puleʻangá pea ko e fānau ako ko ia ʻoku taau ki aí ʻoku ʻikai ke nau totongi ha meʻa pe totongi ako. Kae kehe, ʻi he ngaahi feituʻu lahi tahá, ʻoku totongi mamafa ai ʻa e ako māʻolunga angé ia pea ʻoku fakaʻau ki he toe mamafa ange. ʻOku pehē ʻe ha kupu fehangahangai mo e peesi ʻa e ʻētitá ʻi he New York Times: “Naʻe faʻa vakai ki he ako māʻolunga angé ko ha maʻuʻanga ia ʻo e faingamālié. ʻI he taimi ní ʻokú ne fakapapauʻi mai ʻa e foʻi vaha ʻi he vahaʻa ʻo e kau tuʻumālié mo e ʻikai loko tuʻumālié.” ʻI hono fakalea ʻe tahá, ko e ako ʻoku tuʻunga māʻolunga angé ʻoku vave ʻene hoko ko e feituʻu ia ʻo e kau tuʻumālié mo faitākiekiná, ʻa ē ʻoku nau fakahū ki ai ʻenau fānaú ke fakapapauʻi te nau hoko mo kinautolu foki ko e kau tuʻumālie mo faitākiekina ʻo e sōsaieti ko ʻení. ʻOku totonu ki he ngaahi mātuʻa Kalisitiané ke nau fili ha taumuʻa pehē ki heʻenau fānaú?—Filipai 3:​7, 8; Semisi 4:4.

10. ʻOku anga-fēfē ʻa e fekauʻaki vāofi ʻa e ako māʻolunga angé mo hono ʻai ke laka ki muʻa ʻa e fokotuʻutuʻu lolotongá?

¹⁰ Naʻa mo e feituʻu ʻoku taʻetotongi ai ʻa e ako māʻolunga angé, ʻoku ʻi ai nai ha ngaahi meʻa ʻoku kau ki ai. Ko e fakatātaá, ʻoku fakamatala ʻa e Wall Street Journal ʻo pehē ʻi he fonua ʻĒsia Tonga-hahake ʻe taha, ʻoku fakalele ai ʻe he puleʻangá ha “faʻunga fakaako sīpinga fakapilamita ʻokú ne teke taʻeufi hake ai ʻa e fānau ako lelei tahá ki he tuʻunga māʻolunga tahá.” Ko e “tuʻunga māʻolunga tahá” ʻoku ʻuhinga tefito ia ki he hū ki he ngaahi akoʻanga ongoongoa ʻo e māmaní—ʻa Oxford mo Cambridge ʻi ʻIngilaní, ko e ngaahi ʻapiako Ivy League ʻi he ʻIunaite Seteté, mo e ngaahi ʻapiako kehe. Ko e hā ʻoku tokonaki ai ʻe he puleʻangá ha polokalama lōloa peheé? “Ke langaʻi ʻa e ʻekonōmika ʻo e fonuá,” ko e lau ia ʻa e fakamatalá. ʻOku taʻetotongi nai hono fai ʻo e akó, ka ko e mahuʻinga ʻoku totongi ʻe he kau akó ko ha moʻui ʻoku nōfoʻi ʻi hono ʻai ke laka ki muʻa ʻa e fokotuʻutuʻu lolotongá. Neongo ko ha founga moʻui pehē ʻoku tuli lahi ki ai ʻi he māmaní, ko e meʻa ia ʻoku fiemaʻu ʻe he ngaahi mātuʻa Kalisitiané ki heʻenau fānaú?—Sione 15:19; 1 Sione 2:​15-17.

11. Ko e hā ʻoku fakahaaʻi ʻe he ongo līpooti fekauʻaki mo e ngāuekoviʻaki ʻo e ʻolokaholó pea mo e ʻulungāanga taʻetaau fakaefehokotaki fakasino ʻi he lotolotonga ʻo e fānau ako ʻunivēsití?

¹¹ Toe fakakaukau ange ki he ʻātakaí. ʻOku ongoongoa ʻa e ngaahi ʻapiako ʻunivēsití ʻi he ʻulungāanga koví—ngāuekoviʻaki ʻo e faitoʻo kona tapú mo e ʻolokaholó, ʻulungāanga taʻetāú, kākaá, fakaʻaiʻai fakakaukengí mo e ngaahi tōʻonga meimei tatau. Fakakaukau atu ki he ngāuekoviʻaki ʻo e ʻolokaholó. ʻI he līpooti fekauʻaki mo e inu taʻemapuleʻí, ʻa ia ko e inu ʻi he taumuʻa pē ke hoko ʻo konaá, ʻoku pehē ʻe he makasini New Scientist: “Ko e peseti nai ʻe 44 ʻo e [kau ako ʻunivēsiti ʻi he ʻIunaite Seteté] ʻoku nau inu taʻemapuleʻi ʻo ʻikai toe siʻi hifo he tuʻo tahá ʻi he uike ʻe ua kotoa pē.” Ko e palopalema tatau pē ʻoku hoko lahi ʻi he lotolotonga ʻo e toʻutupu ʻi ʻAositelēlia, Pilitānia, Lūsia mo ha feituʻu kehe pē. ʻI he fekauʻaki mo e ʻulungāanga taʻetaau fakaefehokotaki fakasinó, ko e talanoa ʻi he lotolotonga ʻo e kau akó he ʻaho ní ʻoku fekauʻaki ia mo e “faingāmeʻa,” ʻa ia fakatatau ki ha līpooti ʻa e Newsweek “ʻoku fakamatala ai ki he ngaahi fetaulaki fakaefehokotaki fakasino tuʻo-taha—ha meʻa pē mei he ʻuma ki he fehokotaki fakasino—ʻi he vahaʻa ʻo e ngaahi maheni kuo ʻikai haʻanau taumuʻa ki ai naʻa mo ha talanoa ki ai ʻi he hili iá.” ʻOku fakahaaʻi ʻe he ngaahi fakatotoló ko e peseti ʻe 60 ki he 80 ʻo e kau akó ʻoku nau kau ʻi he faʻahinga tōʻonga ko ʻení. “Kapau ko ha tokotaha ako ʻunivēsiti anga-maheni pē koe,” ko e lea ia ʻa ha tokotaha fakatotolo ʻe taha, “ʻokú ke fai ia.”—1 Kolinito 5:11; 6:​9, 10.

12. Ko e hā ʻa e ngaahi tenge ʻoku eʻa atu ki ai ʻa e fānau ako ʻunivēsití?

¹² Tānaki atu ki he ʻātakai koví, ʻoku ʻi ai ʻa e tenge ʻa e ngāue fakaakó mo e ngaahi siví. Ko hono moʻoní, ʻoku fiemaʻu ki he tamaiki akó ke nau ako mo fai ʻenau ngaahi homueká ke nau lava ʻi he ngaahi siví. ʻOku toe fiemaʻu nai ki he niʻihi ke nau fai ha ngāue konga-taimi lolotonga ʻenau akó. Ko e kotoa ʻo e meʻá ni ʻoku fiemaʻu ki ai ha konga lahi ʻo honau taimí mo e iví. Ko e hā leva ʻe toe ki he ngaahi ngāue fakalaumālié? ʻI he tupulaki ʻa e ngaahi tengé, ko e hā te nau liʻakí? ʻE kei fakamuʻomuʻa ʻa e ngaahi meʻa ʻo e Puleʻangá, pe ʻe tuku ia ki he tafaʻakí? (Mātiu 6:33) ʻOku ekinaki mai ʻa e Tohi Tapú ki he kau Kalisitiané: “Mou hanganaki tokanga lahi ki he anga hoʻomou ʻaʻevá ke ʻoua te mou taʻefakapotopoto ai ka ke mou hoko ko e faʻahinga ʻoku fakapotopoto, ʻo fakatau mai ʻa e taimi faingamālié maʻamoutolu, koeʻuhi ʻoku kovi ʻa e ngaahi ʻahó.” (Efeso 5:​15, 16, NW) He fakamamahi moʻoni ē ko e mavahe ʻa e niʻihi mei he tuí ko e tupu mei he tō ki he ngaahi meʻa ʻokú ne kounaʻi honau taimí mo e iví pe ko e fihia ʻi he ʻulungāanga taʻefakatohitapu ʻi he ʻunivēsití!

13. Ko e hā ʻa e ngaahi fehuʻi kuo pau ke fakakaukau ki ai ʻa e ngaahi mātuʻa Kalisitiané?

¹³ Ko e moʻoni, ko e ʻulungāanga taʻetāú, ʻulungāanga koví, mo e ngaahi tengé ʻoku ʻikai ke hoko pē ia ʻi he ngaahi ʻapiako ʻunivēsití. Kae kehe, ʻoku vakai ʻa e kau talavou tokolahi ʻi he māmaní ki he kotoa ʻo e ngaahi meʻa peheé ko ha konga pē ia ʻo e akó, pea ʻoku ʻikai haʻanau fakakaukau hala ʻanautolu ki ai. ʻOku totonu ki he ngaahi mātuʻa Kalisitiané ke nau fakaeʻa ʻiloʻilo pau atu ʻenau fānaú ki he faʻahinga ʻātakai ko iá ki ha taʻu ʻe fā nai pe lahi ange? (Palovepi 22:3; 2 Timote 2:22) ʻOku tuha pē ʻa e tuʻunga fakatuʻutāmaki ʻoku ʻi aí mo ha faʻahinga ʻaonga pē ʻe maʻu nai ʻe he kau talavoú? Pea ko e mahuʻinga tahá, ko e hā ʻoku akoʻi ki he kau talavoú fekauʻaki mo e ngaahi meʻa ʻoku totonu ke fakamuʻomuʻa ʻi heʻenau moʻuí?a (Filipai 1:10; 1 Tesalonaika 5:21) Kuo pau ke fai ʻe he ngaahi mātuʻá ha fakakaukau fakamātoato mo faʻa lotu ki he ongo fehuʻí ni, pea pehē ki he fakatuʻutāmaki ʻo hono ʻave ʻenau fānaú ki he akoʻanga ʻi ha kolo lahi kehe pe ki ha toe fonua ʻe taha.

Ko e Hā ʻa e Ngaahi Meʻa ke Fetongiʻakí?

14, 15. (a) Neongo ʻa e fakakaukau ʻoku manakoá, ko e hā ʻa e akonaki Fakatohitapu ʻoku kaungatonu ʻi he ʻaho ní? (e) Ko e hā ʻa e ngaahi fehuʻi ʻe lava ke ʻeke hifo ʻe he kau talavoú kiate kinautolú?

¹⁴ ʻI he ʻahó ni, ko e foʻi fakakaukau manakoá ke lavameʻa ʻa e kau talavoú, ko e filí pē ke maʻu ha tuʻunga fakaako fakaʻunivēsiti. Kae kehe, ʻi he ʻikai ke muimui ʻi he meʻa ʻoku manakoá, ʻoku talangofua ʻa e kau Kalisitiané ki he ekinaki ʻa e Tohi Tapú: “ʻOua naʻa mou tuku ke fakaangatatau kimoutolu ki he maama ko eni: kae tuku ke fai ai pe homou liliu, he fakafoʻou ʻo homou ʻatamai, ke mou sivi ʻo ʻilo pe ko e ha ʻa e finangalo ʻo e ʻOtua, ʻa e meʻa ʻoku lelei, ʻa e meʻa te ne hōifua ai, ʻa e meʻa ʻoku haohaoa.” (Loma 12:2) Ko e hā ʻa e finangalo ʻo e ʻOtuá ki hono kakaí, ʻa e kei siʻi mo e taʻumotuʻa, ʻi he tuʻunga fakaʻosi ko ʻeni ʻo e taimi ʻo e ngataʻangá? Naʻe ekinaki ʻa Paula kia Tīmote: “Ke leo be akoe i he mea kotoabe, kataki ae gaahi mea mamahi, fai ae gaue oe evagelio, fai ke kakato hoo gaue fakafaifekau.” ʻOku kaungatonu moʻoni ʻa e ngaahi lea ko iá ki he kotoa ʻo kitautolu ʻi he ʻaho ní.—2 Timote 4:​5, PM.

¹⁵ ʻI he lelei ange ke ʻoua ʻe hoko ʻo maʻunimā ʻe he laumālie tuli ki he meʻa fakamatelie ʻo e māmaní, ko kitautolu kotoa ʻoku fiemaʻu ke tau hanganaki “leo”—hotau ʻalunga fakalaumālié. Kapau ko ha talavou koe, ʻeke hifo kiate koe: ‘ʻOku ou fai ʻeku feinga lelei tahá ke “kakato ʻeku ngāue fakafaifekaú,” ke ʻai au ke u hoko ko ha faifekau taau ʻo e Folofola ʻa e ʻOtuá? Ko e hā ʻeku ngaahi palani ki he tuli ke “kakato” ʻeku ngāue fakafaifekaú? Kuó u fakakaukau ke ʻai ʻa e ngāue taimi-kakató ko ha ngāue tuʻumaʻu ia?’ Ko e ngaahi fehuʻi faingataʻa ʻeni, tautefito ki he taimi ʻokú ke sio ai ki he kau talavou kehé ʻoku nau kau ʻi he ngaahi ngāue siokitá, ʻi he ‘kumi ki ha ngaahi meʻa lalahi’ ʻa ē ʻoku nau fakakaukau ʻe taki atu ai ki ha kahaʻu lakalakaimonuú. (Selemaia 45:5) Ko ia ai, ʻoku tokonaki fakapotopoto ʻe he ngaahi mātuʻa Kalisitiané ki heʻenau fānaú mei he kei valevalé ʻa e faʻahinga ʻātakai mo e ako totonu fakalaumālié.—Palovepi 22:6; Koheleti 12:2 (Koh 12:​1, PM); 2 Timote 3:​14, 15.

16. ʻE malava fēfē ke tokonaki fakapotopoto ʻe he ngaahi mātuʻa Kalisitiané ʻa e faʻahinga ʻātakai fakalaumālie totonú ki heʻenau fānaú?

¹⁶ “Naʻe tokanga lelei ʻaupito ʻa e faʻeé ki heʻemau feohí,” ko e manatu ia ʻa e lahi taha ʻi he tamaiki tangata ʻe toko tolu ʻi he fāmili ʻe taha ʻa ia naʻe hoko ai ʻa e faʻeé ko ha faifekau taimi-kakato ʻi ha laui taʻu. “Naʻe ʻikai te mau feohi mo homau kaungāakó ka ko e faʻahinga pē ʻi he fakatahaʻangá ʻa ia naʻa nau maʻu ha ngaahi tōʻonga fakalaumālie leleí. Naʻá ne toe fakaafeʻi maʻu pē ʻa e faʻahinga ʻi he ngāue taimi-kakató—ʻa e kau misinalé, kau ʻovasia fefonongaʻakí, kau ngāue Pētelí, mo e kau tāimuʻá—ki homau ʻapí ki ha feohi. ʻI he fanongo ki heʻenau ngaahi hokosiá pea sio ki heʻenau fiefiá naʻe tokoni ia ki hono tō ʻi homau lotó ʻa e holi ki he ngāue taimi-kakató.” Ko ha fiefia lahi ē ke sio he ʻahó ni ki he kotoa ʻo e ngaahi foha ʻe toko tolú ni ʻi he ngāue fakafaifekau taimi-kakató—ʻoku ngāue ʻa e toko taha ʻi Pēteli, ko e taha kuo hū ki he Akoʻanga Ako Fakafaifekaú, pea ko e taha ʻoku tāimuʻa!

17. Ko e hā ʻa e tataki ʻoku malava ke tokonaki ʻe he ngaahi mātuʻá ki he fānaú ʻi heʻenau fili ʻa e ngaahi lēsoni ʻi he ʻapiakó pea mo e ngaahi taumuʻa ngāué? (Sio ki he puha ʻi he peesi 29.)

¹⁷ Tānaki atu ki hono tokonaki ha ʻātakai fakalaumālie mālohí, kuo pau ke toe ʻoatu ʻe he ngaahi mātuʻá ki heʻenau fānaú, ʻi he tōmuʻa taha ʻe malavá, ʻa e tataki totonu ki he fili fekauʻaki mo e ngaahi lēsoni ʻi he ʻapiakó pea mo e ngaahi taumuʻa ngāué. Ko ha toe kiʻi talavou ʻe taha, ʻoku ngāue ʻi Pēteli he taimí ni, ʻokú ne pehē: “Naʻe tāimuʻa fakatouʻosi ʻeku ongo mātuʻá ki muʻa pea mo e hili ʻena malí pea naʻá na fai hona lelei tahá ke fokotuʻu ʻa e laumālie tāimuʻá ki he fāmilí fakakātoa. ʻI ha taimi pē naʻa mau fai ai ha fili ki he ngaahi lēsoni ʻi he ʻapiakó pe ko hono fai ha ngaahi fili ʻe kaunga ki homau kahaʻú, naʻá na fakalototoʻaʻi maʻu pē kimautolu ke mau fai ha fili te ne ʻomai kiate kimautolu ʻa e faingamālie lelei taha ke maʻu ai ha ngāue konga-taimi pea tāimuʻá.” ʻI he ʻikai ke fili ha ngaahi lēsoni fakaako ʻoku fakataumuʻa ki ha ako fakaʻunivēsití, ʻoku fiemaʻu ki he ongo mātuʻá mo e fānaú ke nau fakakaukau ki he ngaahi koosi ʻa ia ʻoku ʻaonga ʻi he tuli ki he ngāue tuʻumaʻu fakateokalatí.b

18. Ko e hā ʻa e ngaahi faingamālie ngāue ʻe lava ke fakakaukau atu ki ai ʻa e kau talavoú?

¹⁸ ʻOku fakahaaʻi ʻe he ngaahi fakatotoló ʻo pehē ʻi he ngaahi fonua lahi, ʻoku ʻi ai ha fiemaʻu fakavavevave, ʻo ʻikai ki ha kau maʻu tohi fakamoʻoni ako fakaʻunivēsiti, ka ki ha kakai ke ngāue ʻi he ngaahi ngāue ʻoku fiemaʻu ki ai ʻa e pōtoʻí mo e ngaahi ngāue tokoni. ʻOku līpooti mai ʻe he USA Today ko e “70% ʻo e kau ngāue ʻi he ngaahi hongofuluʻi taʻu ka hoko maí ʻe ʻikai fiemaʻu ai ha mataʻitohi fakaʻunivēsiti taʻu-fā ia, ka, ʻi hono kehé, ko ha mataʻitohi taʻu-ua pē ia mei ha kolisi komiunitī pe ko ha faʻahinga tohi fakamoʻoni ako fakatekinikale.” ʻOku lahi ʻa e ngaahi akoʻanga pehē ʻoku nau ʻoatu ha ngaahi koosi taimi-nounou ki he ngaahi pōtoʻi fakaʻōfisí, ngaahi ʻo e meʻalelé, ngaahi ʻo e komipiutá, palamá, ngaohi-ʻulú, mo ha toe ngaahi pōtoʻi ngāue kehe. Ko ha ngaahi ngāue lelei ʻeni? ʻIo! Mahalo pē ʻoku ʻikai ke fakamānako ia ʻi he fakakaukau atu ki ai ʻa e niʻihi, ka ʻoku nau ʻomai ʻa e moʻuiʻanga pea mo e tuʻunga ngaofengofua ʻoku fiemaʻu ʻe he faʻahinga ko ia ko ʻenau ngāue moʻoní ko e ngāue kia Sihová.—2 Tesalonaika 3:8.

19. Ko e hā ʻa e founga pau taha ki ha moʻui ʻo e fiefiá mo e fiemālié?

¹⁹ “Ae kau tagata talavou, moe kau taahine,” ko e kōlenga mai ia ʻa e Tohi Tapú, “ke nau fakamalo ki he huafa o Jihova: he ko hono huafa be oku maoluga; mo hono nāunāu oku maoluga hake ia i mamani moe lagi.” (Sāme 148:​12, 13, PM) ʻI hono fakahoa ki he ngaahi tuʻunga mo e ngaahi pale ʻoku ʻomai ʻe he māmaní, ko ha ngāue tuʻumaʻu ʻi he ngāue taimi-kakato kia Sihová ʻoku ʻikai ha veiveiua ko e founga pau taha ia ki ha moʻui ʻo e fiefia mo e fiemālié. Manatuʻi ʻa e fakapapau ʻa e Tohi Tapú: “Ko e tapuaki ʻa Sihova, ko ia ia ʻoku fakakoloa: pea ʻoku ʻikai te ne ʻatu mo ia ha mamahi.”—Palovepi 10:22.

[Fakamatala ʻi lalo]

ʻE Lava Ke Ke Fakamatalaʻi?

• Ko e hā ʻoku tuku ki ai ʻe he kau Kalisitiané ʻenau falala ki ha kahaʻu malú?

• Ko e hā ʻa e ngaahi pole ʻoku fehangahangai mo e ngaahi mātuʻa Kalisitiané ʻi he fekauʻaki mo e kahaʻu ʻo ʻenau fānaú?

• Ko e hā kuo pau ke fakakaukau ki ai ʻi hono fatu ʻa e fakamole fekauʻaki mo e tuli ki ha ako māʻolunga angé?

• ʻE malava fēfē ke tokoniʻi ʻe he ngaahi mātuʻa Kalisitiané ʻenau fānaú ke nau tuli ki ha ngāue tuʻumaʻu ʻi he ngāue ʻa Sihová?

[Puha ʻi he peesi 29]

Ko e Hā ʻa e Mahuʻinga ʻo e Ako Māʻolunga Angé?

Ko e kakai tokolahi taha ʻoku nau hū ki ha ʻunivēsití ʻoku nau fakatuʻamelie atu ki hano maʻu ha mataʻitohi te ne fakaava ʻa e ngaahi matapā kiate kinautolu ki he ngaahi ngāue totongi lelei mo malú. Kae kehe, ʻoku fakahaaʻi ʻe he ngaahi līpooti ʻa e puleʻangá ko e vahe fā pē ʻe taha nai ʻo e faʻahinga ʻoku hū ki ha ʻunivēsití ʻoku nau maʻu ha mataʻitohi ʻi loto ʻi he taʻu ʻe onó—ko ha tuʻunga fakamamahi ʻo e lavameʻá. Naʻa mo ia, ʻoku hanga ʻe he mataʻitohi ko iá ʻo fakapapauʻi mai ha ngāue lelei? Fakatokangaʻi ʻa e meʻa kuo pau ke leaʻaki ʻi ha fakatotolo mo ha ngaahi ako ʻoku lolotonga fai.

“Ko e ʻalu ki he [ongo ʻunivēsiti] Harvard pe ko Duke ʻe ʻikai hokonoa pē ʻene ʻomai ha ngāue lelei ange mo totongi māʻolunga angé. . . . ʻOku ʻikai ke ʻiloʻi ʻe he ngaahi kautahá ia ha meʻa lahi fekauʻaki mo e kau kole ngāue kei siʻí. Ko ha tohi fakamoʻoni ako tuʻu-ki-muʻa (ko ha mataʻitohi mei Ivy League) ʻe maongo nai ia. Ka ʻi he hili iá, ko e meʻa ʻoku malava pe ʻikai malava ke fai ʻe he kakaí ʻoku mahuʻinga angé.”—Newsweek, Nōvema 1, 1999.

“Neongo ʻoku fiemaʻu ʻe he ngāue anga-maheni ʻo e ʻaho ní ha ngaahi pōtoʻi māʻolunga ange ia ʻi he kuohilí . . . , ko e ngaahi pōtoʻi ʻoku fiemaʻu ki he ngaahi ngāué ni ko e ngaahi pōtoʻi mālohi he lēvolo ʻapiako māʻolungá—ko e fika, lautohi, mo e tohi ʻi ha lēvolo ʻo e taʻu hono hivá . . . , ʻikai ko e ngaahi pōtoʻi he lēvolo ʻunivēsití. . . . ʻOku ʻikai fiemaʻu ia ki he kau akó ke nau ō ki he ʻunivēsití kae maʻu ha ngāue lelei, ka ʻoku fiemaʻu ke nau poto ʻaupito ʻi he ngaahi pōtoʻi ʻi he lēvolo ʻo e ʻapiako māʻolungá.”—American Educator, Faʻahitaʻu Failau 2004.

“Ko e lahi taha ʻo e ngaahi ʻunivēsití ʻoku nau mamaʻo ʻaupito kinautolu mei he tuʻunga moʻoni ʻoku ʻi ai ʻa e māmaní ʻi hono ʻai ke mateuteu ʻa e kau akó ke hoko ko ha kau ngāue ʻi he māmaní ʻi he ʻosi mei he ʻunivēsití. Ko e ngaahi ʻapiako ako ngāué . . . ʻoku tupulaki fakafokifā ʻene manakoá. Naʻe tupu ʻa e tokolahi ʻenau kau akó ʻaki ʻa e 48% mei he 1996 ki he 2000. . . . ʻI he taimi tatau pē, kuo hoko ʻa e ngaahi tipiloma fakaʻunivēsiti totongi mamafa mo fakamole taimí ia ʻo toe siʻi ange ʻi ha toe taimi ki muʻa ʻa hono mahuʻingá.”—Time, Sanuali 24, 2005.

“Ko ha fakafuofua mei he Potungāue Leipa ʻa e U.S. ki he fakakātoa ʻo e 2005 ʻokú ne fakahaaʻi mai ʻa e tuʻunga fakalotosiʻi heʻikai toe siʻi hifo ʻi he vahe tolu ʻe taha ʻo e kau maʻu tohi fakamoʻoni ako taʻu fā ʻi he ʻunivēsití heʻikai maʻu haʻanau ngāue ʻe feʻunga mo honau ngaahi mataʻitohí.”—The Futurist, Siulai/ʻAokosi 2000.

ʻI he vakai atu ki he kotoa ʻo e meʻá ni, ʻoku lahi ange mo toe lahi ange ʻa e kau ako ʻoku nau mātuʻaki veiveiua ki he mahuʻinga ʻo e ako māʻolunga angé he ʻahó ni. “ʻOku tau akoʻi ʻa e kakaí ki ha ngaahi kahaʻu hala,” ko e ngaahi tangilāulau ia ʻoku līpooti ʻi he Futurist. ʻI hono kehé, fakatokangaʻi ʻa e meʻa ʻoku leaʻaki ʻe he Tohi Tapú ʻo fekauʻaki mo e ʻOtuá: “Ko au Sihova ko ho ʻOtua, ʻoku ou ako koe ke fai meʻa ʻaonga, ʻoku ou tataki koe ʻi he hala ʻoku totonu ke ke fou ai. Taumaiā naʻa ke tokanga ki heʻeku ngaahi tuʻutuʻuni! pehe kuo hange ha vaitafe hoʻo fiemalie, pea ko hoʻo maʻoniʻoni hange ko e ngaahi peau ʻo e tahi.”—Aisea 48:​17, 18.

[Fakatātā ʻi he peesi 26]

Naʻa nau liʻaki ʻa ʻenau ngaahi ngāue fakafoʻituituí pea muimui ʻia Sīsū

[Fakatātā ʻi he peesi 31]

ʻOku tokonaki fakapotopoto ʻe he ngaahi mātuʻa Kalisitiané ki heʻenau fānaú mei he kei valevalé ha ʻātakai fakalaumālie mālohi