Tangatá mo e Fefiné—Naʻe Ngaohi Ke Na Fefakakakatoʻaki
KUO fakaʻamu maʻu pē ʻa e tangatá mo e fefiné ke na fakataha. Naʻe tupu ʻa e holi ko ʻení mei he ʻOtuá. Naʻe vakai ʻa Sihova ʻoku ʻikai lelei ki he ʻuluaki tangatá, ʻa ʻĀtama, ke ne hokohoko atu ʻiate ia pē. Ko ia naʻe ngaohi ai ʻe he ʻOtuá “ha tokoni [ki he tangatá] ke ʻao mo ia.”
Naʻe fakatupunga ʻe Sihova ha mohe maʻu kia ʻĀtama, pea naʻá ne toʻo leva ha taha ʻo hono ngaahi hui vakavaká ʻo ne “faʻu ʻaki ia . . . ha fefine, ʻo ne ʻomi ia ki he tangata.” Naʻe fiefia ʻaupito ʻa ʻĀtama ʻi heʻene feʻiloaki mo e fakatupu fakaʻofoʻofa ko ʻeni ʻa Sihová ʻo ne talaki ai: “Ko e fai ko eni ko e hui mei hoto hui, mo e kakano mei hoto kakano.” ʻI hono ngaahi ʻulungāanga fakaefefiné, naʻe ala ʻofaʻi moʻoni ai ʻa e fefine haohaoa ko ʻeni ko ʻIví. Pea naʻe tuha mo e tokotaha haohaoa ko ʻĀtamá ʻa e fakaʻapaʻapa ʻi hono tuʻunga molumalu fakaetangatá. Naʻe ngaohi kinauá ke na fefakakakatoʻaki. ʻOku pehē ʻe he Tohi Tapú: “Ko ia ʻe tukuange ʻe he tangata ʻene tamai mo ʻene faʻe, kae pikitai ki hono uaifi: pea te na hoko ko e kakano pe taha.”—Senesi 2:18-24.
Kae kehe, ʻoku movetevete ʻa e ngaahi fāmili lahi ʻi he ʻahó ni, pea ko e vahaʻangatae ʻo e tangatá mo e fefiné ʻoku faʻa maumau pe puleʻi ʻe he siokitá. Kuo fakatupunga ʻe ha laumālie ʻo e feʻauʻauhi ʻi he vahaʻa ʻo e tangatá mo e fefiné ʻa e fepaki mo e taʻefeongoongoi. ʻOku fepaki kotoa ʻeni ia mo e taumuʻa ʻa e ʻOtuá ki he tangatá mo e fefiné. Naʻe faʻu ʻa e tangatá ke ne fakahoko ha ngafa fisifisimuʻa ʻi he māmaní. Ko e fefiné leva ke ne fakahoko ha tuʻunga makehe mo taau ʻo poupou kakato ki he tangatá. Naʻe taumuʻá ke na ngāue feongoongoi fakataha. Talu mei he kamataʻanga ʻo e faʻahinga ʻo e tangatá, kuo feinga faitōnunga ai ʻa e kau tangata mo e kau fefine anga-fakaʻotua ke fakahoko ʻa e ngaahi ngafa naʻe fakataumuʻa ʻe Sihova kiate kinautolú, pea kuo tokoni ʻeni ki heʻenau fiefiá mo e fiemālié. Ko e hā ʻa e ngaahi ngafa ko ʻení, pea ʻe malava fēfē ke tau fakahoko kinautolu?
[Fakatātā ʻi he peesi 3]
Naʻe faʻu ʻa e tangatá mo e fefiné ke na fakahoko ha ngaahi ngafa molumalu ʻi he fokotuʻutuʻu ʻa e ʻOtuá