ʻOkú Ke Manatuʻi?
Kuó ke houngaʻia ʻi hono lau ʻa e ngaahi ʻīsiu fakamuimui ʻo e Taua Leʻo? Sai, sio angé pe ʻe lava ke ke tali ʻa e ngaahi fehuʻi ko ení:
• Ko e hā ʻoku lava ke tau ako mei he talanoa fakatātā ʻa Sīsū ki he tokotaha-talitali vili taʻeʻunuá? (Luke 11:5-10)
ʻOku fakahaaʻi ʻi he talanoa fakatātā ko ení ʻa e anga ʻoku totonu ke tau maʻú ʻi he taimi ʻoku tau lotu aí. ʻOku totonu ke tau kole taʻeʻunua, pe hanganaki kole, tautefito ki he laumālie māʻoniʻoni ʻo e ʻOtuá. (Luke 11:11-13)—12/15, peesi 20-2.
• Ko e talanoa fakatātā ʻa Sīsū fekauʻaki mo ha uitou pea mo ha fakamāú ʻoku ʻi ai ʻa e lēsoni ko e hā kia kitautolu? (Luke 18:1-8)
ʻOku fakamamafaʻi ai ʻa e fiemaʻu ke lotú. ʻI he kehe mei he fakamāú, ʻoku māʻoniʻoni ʻa Sihova pea ʻokú ne loto ke tokoniʻi kitautolu. ʻIkai ngata aí, ʻoku totonu ke tau maʻu ʻa e tui hangē ko e tui ko ia ʻa e uitou ʻi he talanoa fakatātaá.—12/15, peesi 26-8.
• Ko e hā naʻe tala ai ʻe he ʻapositolo ko Paulá ki he kau Kalisitiane Kolinitoó ke nau “fano” atú? (2 Kolinito 6:11-13)
ʻOku hā ngali naʻe ʻikai houngaʻia ʻa e niʻihi ʻi Kolinitō ʻi he kaungātuí, ʻo ʻikai te nau fano atu pea ʻikai te nau loto fiefoaki. ʻOku fiemaʻu ke tau fai ha feinga ke fakatupulekina ʻa e houngaʻia moʻoni ki he kaungātuí, naʻa mo e fai ha feinga ke maʻu ha ngaahi kaumeʻa foʻou.—1/1, peesi 9-11.
• Ko e hā ʻa e silaʻi ʻoku lave ki ai ʻi he Fakahā 7:3?
ʻI hono pani ʻe he ʻOtuá ʻa e kau Kalisitiané ʻaki ʻa e laumālie māʻoniʻoní, ʻoku ʻuluaki silaʻi ai ʻa e faʻahingá ni. Ka ʻoku lave ʻa e Fakahā 7:3 ki ha silaʻi fakaʻosi, ʻi hono fakapapauʻi ko e faʻahinga pani ko iá ʻoku nau fakahāhā kakato ʻenau mateakí.—1/1, peesi 30-1.
• ʻE lava ke ako ʻe he ngaahi mātuʻá ʻa e hā mei he lēkooti ʻa e Tohi Tapú fekauʻaki mo Sāmiuelá?
Ko e meʻa ʻe taha, ʻoku totonu ke nau akoʻi ki heʻenau fānaú ʻa e Folofola ʻa e ʻOtuá, ʻo hangē ko hono akoʻi moʻoni ʻo Sāmiuela ʻe heʻene ongo mātuʻá. Tānaki atu ki ai, ʻoku totonu ke nau fakalototoʻaʻi ʻenau fānaú ke nau ʻai ʻa e ngāue kia Sihová ko ʻenau ngāue ia ʻi he moʻuí.—1/15, peesi 16.
• ʻE lava fēfē ke tau fakahaaʻi ʻoku tau fiefia ke tatali kia Sihova?
ʻOku tau “nofoʻaki tali . . . ʻa e ʻaho ʻo e ʻOtua,” ʻo hanga atu ki he fakafiemālie ʻi heʻene toʻo ʻosi ʻa e kakai fakaʻotuamaté kotoa. (2 Pita 3:7, 12) Ka neongo ʻa e vēkeveke ʻa Sihova ke fakangata ʻa e koví kotoa, ʻokú ne ngāueʻaki ʻa e faʻa mataʻofi koeʻuhi ke ne fakahoko ʻa e fakamoʻui ʻo e kau Kalisitiané ʻi ha founga ʻa ia ʻe fakalāngilangiʻi ai ʻa hono huafá. ʻOku totonu ke tau falala ʻoku ʻafioʻi ʻe Sihova ʻa e taimi totonu ke ngāue aí, pea ʻi he lolotonga ní, ʻoku totonu ke tau fakahīkihikiʻi longomoʻui ia. (Sāme 71:14, 15)—3/1, peesi 17-18.
• Naʻe ʻave ʻe Noa ki he ʻaʻaké ʻa e toko fitu mei he manu maʻa taki taha pe ko e fitu-ngaʻahoa ʻo e manu maʻa taki taha?
Naʻe tala kia Noa ke ne ‘too maʻana o tautau toko fitu’ mei he manu maʻa taki taha. (Senesi 7:1, 2, PM ) ʻI he faka-Hepeluú, ko e foʻi lea “tautau toko fitu” ko hono lau fakafoʻileá ko e “fitu fitu.” Ko e founga ko ia ʻo hono leaʻakí ʻoku ʻikai ʻuhinga iá ko e fitu-ngaʻahoa, hangē ko ia ʻoku fakahaaʻi ʻi he ngaahi konga Tohi Tapu kehé. ʻOku hā mahino naʻe ʻave ʻe Noa ʻa e fitu mei he kalasi taki taha, ko e tolu-ngaʻahoa tānaki atu ki ai mo e manu ʻe taha ʻa ia naʻe lava ke ne ngāueʻaki ki mui ki he feilaulaú. (Senesi 8:20)—3/15, peesi 31.
• Ko e hā ʻoku totonu ai ki he kau Kalisitiané ke nau “fakatokangaʻi” ʻa e ikuʻanga ʻo e tui ʻa e kau mātuʻá, ʻa e faʻahinga ʻoku takimuʻá?
ʻOku fakaafeʻi kitautolu ʻe he ʻapositolo ko Paulá ke tau “fakatokangaʻi,” pe siofi fakalelei, ʻa e ikuʻanga ʻo e tōʻonga ʻa e kau mātuʻá pea ke muimui ʻi he ngaahi faʻifaʻitakiʻanga pehē ʻo e tuí. (Hepelu 13:7) ʻOku tau fai eni koeʻuhi ʻoku tataki kitautolu ke tau fai pehē ʻi he Folofola ʻa e ʻOtuá. Pehē foki, ʻoku fakalotoʻi kitautolu ke tau tui ʻoku maʻu fakatouʻosi ʻe he kau mātuʻá ʻa e mahuʻingaʻia ʻi he ngaahi meʻa ʻo e Puleʻangá mo e tokanga ki heʻetau leleí.—4/1, peesi 28.