Ko e Hā ʻOku Fakangofua Ai ʻe he ʻOtuá ʻa e Fulikivanú?
KO FĒ pē ha feituʻu ʻokú ke ʻi ai ʻokú ke fakatokangaʻi ai ʻoku hakeʻuta ʻa e koví mo e faingataʻá. ʻOku tāmateʻi ʻi he ngaahi taú ʻa e kau siviliane pea pehē ki he kau sōtia. ʻOku mafolalahia ʻa e faihiá mo e fakamālohí. Kuo maʻukovia nai koe ki muí ni mai ʻi he tomuʻa fehiʻá pe fakamaau taʻetotonú. ʻI he vakai atu ki he meʻa kuó ke mātā mo hokosiá, ngalingali kuó ke ʻeke nai, ‘Ko e hā ʻoku fakangofua ai ʻe he ʻOtuá ʻa e fulikivanú?’
ʻOku ʻeke ʻe he tokolahi ʻa e fehuʻi tatau. ʻI he taʻu nai ʻe 3,600 kuo maliu atú, naʻe ʻeke ai ʻe ha tamaioʻeiki mateaki ʻa e ʻOtuá ko Siope hono hingoá: “Koeha oku moui ai ae agakovi, o hoko o motua?” (Siope 21:7, PM) ʻI hono fakalotomamahiʻi ʻe he ngaahi ʻulungāanga kovi ʻo e kakai ʻi hono fonuá, naʻe ʻeke ai ʻe he palōfita ko Selemaiá ʻi he senituli hono fitu K.M.: “Ko e ha ʻoku monuʻia ai ʻa e founga ʻo e kau angahala? Ko e ha ʻoku tuʻumalie ai ʻa kinautolu fuape ʻoku fai kākā?” (Selemaia 12:1) Fakatouʻosi ʻa Siope mo Selemaia naʻá na ʻiloʻi ʻoku māʻoniʻoni ʻa e ʻOtuá. Ka neongo ia, naʻá na fifili ko e hā naʻe lahi fau ai ʻa e fulikivanú. Mahalo ʻoku fakapuputuʻuʻi mo koe foki ʻe he meʻá ni.
ʻOku tukuakiʻi ʻe he kakai ʻe niʻihi ʻa e ʻOtuá ki he fulikivanú mo e faingataʻaʻiá. ʻOku fifili ʻa e niʻihi: ‘Kapau ʻoku mafeia ʻe he ʻOtuá ʻa e meʻa kotoa, ʻokú ne fakamaau totonu, mo ʻofa, ko e hā ʻoku ʻikai te ne fakangata ai ʻa e koví mo e faingataʻá? Ko e hā kuó ne fakangofua ai ʻa e koví ke hokohoko atu ʻo aʻu mai ki he ʻahó ni?’ ʻOku lāulea ʻa e kupu hono hokó ki he tali ʻo e ngaahi fehuʻi ko ení pea mo e ngaahi fehuʻi mātuʻaki mahuʻinga kehe.
[Maʻuʻanga Tā ʻi he peesi 3]
AP Photo/Adam Butler