Ko e Hā ʻOkú Ne ʻAi ke ʻUhinga Hoʻo Moʻuí?

NAʻE ngāue ʻa Kenny ʻi ha kautaha lelei, fakaʻuli ʻi ha fuʻu kā totongi mamafa pea ʻi ai hono nofoʻanga masani ʻi ha feituʻu tuʻumālie ʻo ha fuʻu kolo lahi. Koeʻuhi ko ha tokotaha puna fakamaluʻea potopotoʻi ia, naʻá ne saiʻia ʻi he puna tūʻulu hifo mei he māʻolunga ʻoku laui afeʻi fute ki he kelekelé. Naʻe kakato nai ʻene moʻuí? Fakatatau ki he Wall Street Journal, naʻá ne pehē: “Ko hoku taʻu 45 eni, pea ʻoku ʻikai ha kahaʻu moʻoni ʻo ʻeku moʻuí . . . ʻOku ngeʻesi ʻeku moʻuí.”

Naʻe feinga mālohi ʻa Elyn ke hoko ko ha tokotaha sikeiti potopotoʻi ʻi he ʻaisí. Naʻe faifai pē ʻo ne aʻu ki he tumutumú. Naʻe ongoongoa ʻa Elyn ʻo hangē ko ia naʻá ne fiemaʻú. Ka ko ʻene laulaú eni: “Ko fē fua ʻa e fiefia naʻe tonu ke u maʻú? Naʻá ku fuʻu ongoʻi taʻelata fau. Kuo mei haʻu ʻa e motuʻá pea neongo naʻe lahi ʻeku paʻangá, ʻe hoko ko e koto ngeʻesi ʻa e moʻuí kapau ko hono ʻātungá pē eni.”

ʻI he ʻiloa ʻa Hideo ʻi heʻene pōtoʻi ʻi hono ngāueʻaki ʻa e ngaahi lanú, naʻá ne moʻui pē maʻa ʻene ngaahi lavameʻa fakaeʻātí. Naʻe ʻikai te ne fakatau atu ʻene ngaahi ngāué; naʻá ne fakakaukau ʻe fakangaloku ai ʻa ʻene ngaahi tuʻunga fakaeʻātí. ʻI he ofi ki he ngataʻanga ʻo e taʻu ʻe 98 ʻo ʻene moʻuí, naʻá ne foaki ʻa e lahi taha ʻo ʻene ngaahi ngāue fakaeʻātí ki ha misiume. Naʻá ne līʻoa ʻene moʻuí ki heʻene ngāué. Neongo ia, naʻe ʻikai te ne fiemālie ʻi heʻene fakakaukau heʻikai pē malava ke ne ʻai ke haohaoa ʻene ʻātí.

Ko e kakai ʻe niʻihi ʻoku nau femoʻuekina lahi ʻaupito ʻi hono tokoniʻi ʻa e niʻihi kehé. Tau fakatātāʻaki ha tokotaha ko e pule ʻi he faʻuʻanga faivá ʻi Holiuti. Koeʻuhi ko ha tokoni palesiteni ia ʻi he taha ʻo e ngaahi kautaha faiva lalahi taha ʻi ʻAmeliká, naʻá ne feohi ai mo e kau sitaá pea nofo ʻi ha feituʻu ʻo e kau tuʻumālié. ʻI haʻane ʻeveʻeva ki Kemipōtia, naʻe aʻu atu ai kiate ia ha kiʻi taʻahine ʻo kole paʻanga ʻi heʻene kai ʻi ha falekai ʻi Phnom Penh. Naʻá ne ʻoange kiate ia ha paʻanga ʻe taha pea mo ha inu mokomoko. Naʻe fiefia ʻa e kiʻi taʻahiné. Kae kehe, ʻi he pō hono hokó naʻá ne toe ʻi ai pē ʻo fai ʻa e kolekolé. Naʻe sio leva ai ʻa e tokotahá ni naʻe fiemaʻu ke fai ha tokoni lahi ange.

ʻI he taʻu ʻe taha mei ai, naʻe pehē ai ʻe he pule ko ení ke fetongi ʻene ngāué—mei heʻene ngāue ki he faʻuʻanga faivá ki hono tokoniʻi ʻo e kau masiva ʻi Kemipōtiá. Naʻá ne fokotuʻu ha ʻapiako ʻa ia naʻe tokonaki ai ʻa e nofoʻanga, meʻakai mo e ako. Neongo ʻa e meʻá ni, ʻokú ne fekuki hokohoko mo ha ngaahi ongoʻi puputuʻu—ʻo fiefia mo fiemālie ʻi he meʻa ʻokú ne fakahokó fakataha mo e ongoʻi siva ʻa e ʻamanakí mo e ongoʻi feifeitamaki koeʻuhi ko e ngaahi palopalema fakautuutu kuo pau ke ne fekuki mo iá.

Ko e toko fā kotoa ko eni naʻe toki fai ki ai ʻa e talanoá naʻa nau fakakaukau naʻa nau ʻilo ʻa e meʻa naʻe fakataumuʻa ki ai ʻenau moʻuí. Ka naʻa nau ongoʻi ha koto ngeʻesi ʻi heʻenau aʻu ki he taumuʻa naʻa nau ngāue mālohi ke lavaʻí. Ko e hā ʻoku fakataumuʻa ki ai ʻa hoʻo moʻuí? Ko e hā ʻa e meʻa ʻoku muʻomuʻa ʻi hoʻo moʻuí? ʻOkú ke fakapapauʻi heʻikai te ke fakaʻiseʻisa ʻamui ʻi he founga ʻo hoʻo moʻuí?