ʻUnuʻunu Ofi ki he ʻOtuá
Ko ha Tamai Taʻehanotatau
“TAMAI.” ʻOku fakatupunga ʻe he ngaahi foʻi lea siʻi pē ʻa e ngaahi ongoʻi loloto ange ʻi he faʻahinga ʻo e tangatá. Ko ha tamai ʻoku ʻofa moʻoni heʻene fānaú ʻokú ne tokoniʻi kinautolu ke nau lakalakaimonū. ʻI he ʻuhinga lelei, ʻoku lave ʻa e Tohi Tapú kia Sihova ko e ʻOtuá ko e “Tamai.” (Mātiu 6:9) Ko e faʻahinga Tamai fēfē ʻa Sihova? Ke tali iá, tau sivisiviʻi angé ʻa e ngaahi lea naʻe folofolaʻaki ʻe Sihova kia Sīsū ʻi he taimi ʻo ʻene papitaisó. He ko e moʻoni, ko e founga lea ʻa ha tamai ki heʻene fānaú ʻoku fakahaaʻi ai ʻa e meʻa lahi pe ko e faʻahinga tamai fēfē ia.
ʻI ʻOkatopa 29 T.S. nai, naʻe ʻalu ai ʻa Sīsū ki he Vaitafe Sioataní ke papitaiso. ʻOku fakamatala ʻa e Tohi Tapú ki he meʻa naʻe hokó: “Pea kuo papitaiso ʻa Sisu, naʻa ne ʻalu hake leva mei he vai; pea vakai, naʻe matangaki ʻa e langi kiate ia, pea ne mamata ki he Laumalie ʻo e ʻOtua ʻoku ʻalu hifo ʻi he tatau ʻo ha lupe, ʻo ne aʻu kiate ia. Pea ʻiloange, naʻe ai ha leʻo mei he langi naʻe pehe mai, Ko Hoku ʻAlo Pele ʻena, ʻa ia kuo u hōifua ai.”a (Mātiu 3:16, 17) ʻI hono leaʻaki ʻe Sihova tonú, ko e ngaahi lea ʻofa ko iá ʻoku tala mai ai kia kitautolu ʻa e meʻa lahi pe ko e faʻahinga Tamai fēfē ia. Fakatokangaʻi ange ʻa e meʻa ʻe tolu naʻe fakahaaʻi ʻe Sihova ki hono ʻAló.
ʻUluakí ʻi he ngaahi lea ‘ko hoku ʻAló ená,’ ko hono moʻoní, naʻe pehē ai ʻe Sihova, ‘ʻOku ou laukauʻaki ʻeku hoko ko hoʻo Tamaí.’ Ko ha tamai ʻiloʻilo ʻokú ne fakalato ʻa e fakaʻamu ʻa ʻene fānaú ke fakamālōʻiaʻi mo tokanga makehe ange kia kinautolú. ʻOku fiemaʻu ʻe he fānaú ke fakapapauʻi ʻoku nau mahuʻinga ʻi he tuʻunga ko e ngaahi mēmipa makehe ʻo e fāmilí. Fakaʻuta atu ki he maongo ʻoku pau naʻe hoko kia Sīsū—naʻa mo hono tuʻunga ko ha tokotaha lahí—ke maʻu ha fakamālōʻia pehē mei heʻene Tamaí!
Uá, ʻi he lave ki hono ʻAló ko e “Pele,” naʻe fakamatalaʻi fakahāhā ai ʻe Sihova ʻa ʻene ʻofa kia Sīsuú. ʻI ha ʻuhinga, naʻe pehē ʻe he Tamaí, ‘ʻOku ou ʻofa ʻiate koe.’ Ko ha tamai lelei ʻokú ne tala ki heʻene fānaú ʻokú ne ʻofa lahi ʻia kinautolu. Ko e ngaahi lea peheé—fakataha mo e ʻofa fakanatulá—ʻoku tokoniʻi ai ʻa e fānaú ke nau lakalakaimonū. He pau moʻoni ne maongo ki he loto ʻo Sīsuú ʻa e fanongo ki he leʻo ʻo ʻene Tamaí ʻi heʻene fakahāhā ʻa e ʻofa kiate iá!
Tolú, ʻi he lea “kuo u hōifua ai,” naʻe fakahaaʻi heni ʻe Sihova ʻene hōifua ki hono ʻAló. ʻOku hangē ia naʻe pehē ʻe Sihova, ‘foha, ʻoku ou fiefia ʻi he meʻa kuó ke faí.’ Ko ha tamai ʻofa ʻoku kumi ia ki ha ngaahi faingamālie ke ʻai ke ʻiloʻi ʻe heʻene fānaú ʻokú ne fiefia ʻi he ngaahi meʻa lelei ʻoku nau leaʻaki pe faí. ʻOku maʻu ʻe he fānaú ʻa e mālohi mo e loto-toʻa ʻi he fiefia ʻenau mātuʻá ʻia kinautolú. Ko e moʻoni ʻoku pau pē naʻe fakalototoʻaʻi ʻa Sīsū heʻene fanongo ʻoku hōifua kiate ia ʻa ʻene Tamaí!
Ko e moʻoni, ko Sihová ko ha Tamai taʻehanotatau ia. ʻOku fakaʻamua ʻe ho lotó ha tamai pehē? Kapau ko ia, ʻe lava leva ke ke fiemālie ʻi hono ʻiloʻi ʻoku malava ke ke maʻu ha vahaʻangatae mo Sihova. Kapau ʻokú ke ako ʻi he tuí fekauʻaki mo ia pea feinga loto-moʻoni ke fai ʻa hono finangaló, te ne tali. ʻOku pehē ʻe he Tohi Tapú: “Unuʻunu atu ki he ʻOtua, pea ʻe ʻunuʻunu mai ia kiate kimoutolu.” (Semisi 4:8) Ko e hā ʻe lava ke ne ʻai koe ke ke ongoʻi malu ange ka ko hono maʻu ha haʻi vāofi mo Sihova ko e ʻOtuá, ʻa e Tamai lelei taha ʻoku ala fakaʻuta atu ki aí?
[Fakamatala ʻi lalo]
a Fakatatau ki he fakamatala tatau ʻi he Kōsipeli ʻa Luké, naʻe ngāueʻaki ʻe Sihova ʻa e fetonginauna fakafoʻituitui ko e “koe,” ʻi heʻene pehē: “Ko hoku ʻAlo Pele koe, ko koe kuo u hōifua ai.”—Fakaʻītali ʻamautolu; Luke 3:22.