ʻEke ʻe he Kau Lautohí

ʻOku ʻi Ho Lotó ʻa e Puleʻanga ʻo e ʻOtuá?

ʻOku tui ʻa e tokolahi he ʻahó ni ko e tali ki he fehuʻi ʻi ʻolungá ko e ʻio. Ko e fakatātaá, ʻoku taukaveʻi ʻe he Catholic Encyclopedia: “Ko e puleʻanga ʻo e ʻOtuá ʻoku ʻuhingá . . . ko e pule ʻa e ʻOtuá ʻi hotau lotó.” ʻOku akoʻi lahi ʻe he haʻa faifekaú ʻa e foʻi fakakaukau ko ení. ʻOku akoʻi moʻoni ʻe he Tohi Tapú ʻoku ʻi he loto ʻo e tangatá ʻa e Puleʻanga ʻo e ʻOtuá?

ʻOku pehē ʻe he niʻihi ko Sīsū tonu naʻá ne ʻuluaki pouaki ʻa e foʻi fakakaukau ko e Puleʻanga ʻo e ʻOtuá ʻoku ʻi he loto ʻo e tangatá. Naʻe pehē tonu ʻe Sīsū: “Vakai, ko e Puleʻanga ʻo e ʻOtua ʻoku ʻi homou lotolotonga ni.” (Luke 17:21) ʻOku pehē heni ʻe he ngaahi liliu ʻe niʻihi: “Ko e Puleʻanga ʻo e ʻOtuá ʻoku ʻiate kimoutolu” pe naʻa mo e pehē ʻoku “ʻi loto ʻia kimoutolu.” Ko ha ngaahi fakalea totonu ia ʻo e lea ʻa Sīsuú? Naʻá ne ʻuhinga moʻoni ko e Puleʻanga ʻo e ʻOtuá ʻoku maʻu ia ʻi he loto ʻo e tangatá?

ʻUluakí, fakakaukau angé ki he loto ʻo e tangatá. ʻI he lave ki ai ʻa e Tohi Tapú, ʻoku ʻuhinga ʻa e lotó ki he tokotaha ʻi lotó, ʻa e matavai ʻo e ngaahi fakakaukau, ngaahi tōʻonga mo e ongoʻi ʻa ha taha. Ko e fakakaukau ko ia ko ha meʻa ʻoku māʻolunga hangē ko e Puleʻanga ʻo e ʻOtuá ʻoku ʻi he loto ʻo e tangatá—ko e fakatātaá, ʻi he founga ʻo ʻene liliuʻi mo hakeakiʻi ʻa e kakaí—ʻoku ongo fakamānako nai, ka ʻoku ʻuhinga lelei?

ʻOku tala mai ʻe he Tohi Tapú: “Ko e fungani ʻi he meʻa kākā ka ko e loto, pea ʻoku hilio hono kovi.” (Selemaia 17:9) Naʻe pehē ʻe Sīsū tonu: “ʻOku hū kituʻa mei he loto ʻo e kakai ʻa e ngaahi fakakaukau ʻoku kovi, ʻa e ngaahi feʻauaki, ʻa e ngaahi kaihaʻa, ʻa e ngaahi fakapo, ʻa e ngaahi faikovi ʻa alafia, ʻa e ngaahi manumanu, ʻa e angafitaʻa.” (Maake 7:20-22) Fakakaukau angé: Heʻikai nai lava ke fakahaaʻi ko e lahi ʻo e fakamamahi ʻoku tau sio ai he māmaní he ʻaho ní ko e tupu ia mei he loto angahalaʻia ʻo e faʻahinga ʻo e tangatá? Ko ia ʻe lava fēfē ke hoko mai ʻa e Puleʻanga haohaoa ʻo e ʻOtuá mei ha matavai pehē? Ko e moʻoni, ko e loto ʻo e tangatá heʻikai lava ke ne ʻomai ʻa e Puleʻanga ʻo e ʻOtuá ʻo hangē pē ko e ʻikai lava ke ʻomai ʻe ha talatalaʻāmoa ha fiki.—Mātiu 7:16.

ʻUá, fakakaukau angé ki he kau fanongo naʻe lea ki ai ʻa Sīsū ʻi heʻene leaʻaki ʻa e ngaahi lea ʻoku ʻi he Luke 17:21. ʻOku pehē ʻe he veesi ki muʻá: “Naʻe fai ha fehuʻi kiate ia ʻe he kau Falesi, pe hoko fakakū ʻa e Puleʻanga ʻo e ʻOtua; pea ne tali kiate kinautolu.” (Luke 17:20) Ko e kau Fālesí ko e ngaahi fili kinautolu ʻo Sīsū. Naʻe fakahaaʻi ʻe Sīsū ko e kau mālualoi ko iá heʻikai te nau hū ki he Puleʻanga ʻo e ʻOtuá. (Mātiu 23:13) Sai kapau naʻe pau ke ʻikai hū ʻa e kau Fālesí ki he Puleʻanga ʻo e ʻOtuá, ʻe lava nai ke ʻi honau lotó ʻa e Puleʻangá? Mole ke mamaʻo! Ko e hā leva naʻe ʻuhinga ki ai ʻa Sīsuú?

ʻI hono liliu ʻa e ngaahi lea ko eni ʻa Sīsuú, ʻoku ngāueʻaki ʻe ha ngaahi liliu Tohi Tapu fakamākukanga ʻe niʻihi ʻa e fakalea meimei tatau mo ia ʻoku maʻu ʻi he Ko e Tohitapu Katoa (Paaki Foʻou). ʻOku pehē ʻe he liliu ʻe niʻihi ko e Puleʻangá ʻoku “ʻi homou haʻohaʻongá” pe “ʻi homou lotolotongá.” Naʻe anga-fēfē ʻa e ʻi he haʻohaʻonga ʻo e kakai he taimi ko iá ʻa e Puleʻanga ʻo e ʻOtuá, ʻo kau ai ʻa e kau Fālesí? Sai, ko Sīsū ʻa e tokotaha kuo fakanofo ʻe Sihova ko e ʻOtuá ke hoko ko e Tuʻi ʻo e Puleʻangá. ʻI hono tuʻunga ko e Tuʻi-Fakanofó, naʻe ʻi ai tonu ʻa Sīsū ʻi he lotolotonga ʻo e kakai ko iá. Naʻá ne faiako fekauʻaki mo e Puleʻanga ʻo e ʻOtuá pea aʻu ʻo ne fakahoko ʻa e ngaahi mana, ʻi hono tomuʻa fakaʻali kia kinautolu ʻa e meʻa ʻe fakahoko ʻe he Puleʻanga ko iá. ʻI ha ʻuhinga mātuʻaki moʻoni leva, ko e Puleʻangá naʻe ʻi honau lotolotongá.

ʻOku hā mahino, ʻoku ʻikai ha poupou Fakatohitapu ki he fakakaukau ko ia ko e Puleʻanga ʻo e ʻOtuá ʻoku ʻi he loto ʻo e tangatá. ʻI hono kehé, ko ha founga-pule moʻoni ia, ko e founga-pule ia te ne fakahoko mai ʻa e ngaahi liliu fakaofo ki he māmaní, ʻo hangē tofu pē ko ia naʻe tomuʻa tala ʻe he kau palōfitá.—Aisea 9:6, 7 (Ai 9:5, 6, PM); Taniela 2:44.