‘Vakai ki he Gaue Fakafaifekau Kuó Ke Maʻu mei he Eikí’
“Vakai ki he gaue [fakafaifekau] kuo ke maʻu mei he Eiki, koeuhi ke ke fai ia.”—KOL. 4:17, PM.
1, 2. Ko e hā ʻa e fatongia ʻo e kau Kalisitiané ke fai ki he faʻahinga ʻo e tangatá?
ʻOKU ʻi ai hotau fatongia mamafa ki he kakai ʻoku nofo takatakai ʻiate kitautolú. Ko e ngaahi fili ʻoku nau fai he taimi ní ʻe ʻuhinga iá ko ʻenau moʻui pe mate lolotonga ʻa e “mamahi lahi.” (Fkh. 7:14) Ko e tokotaha-tohi fakamānavaʻi ʻo e tohi Palōvepí naʻá ne pehē: “Fakahaofi ʻa kinautolu ʻoku ʻave ke mate, pea ʻoku ʻalu tetetete pe ke tamateʻi; tauange mo koe ke ke taʻofi.” He ngaahi lea fakaueʻiloto moʻoni! Ko e taʻemalava ke fai ʻa e fatongia ʻo e fakatokanga ki he kakaí fekauʻaki mo e fili ʻoku nau faí ʻe lava ke iku ia ki heʻetau halaia ʻi he toto. Ko hono moʻoní, ʻoku hoko atu ʻa e kupu tatau: “Kapau te ke lea mai, ‘Si, naʻe ʻikai te mau ʻilo ʻoku pehe:’ ʻA, ko ia ʻoku ne fua ʻa e ngaahi loto ʻikai ʻe mahino kiate ia? Pea ko ia ʻoku ne tauhi ho laumalie ʻikai ʻoku ne ʻilo pe? Pea ʻikai te ne fakafoki ki he tangata ʻa e meʻa kuo ne fai?” ʻOku hā mahino, heʻikai lava ke pehē ʻe he kau sevāniti ʻa Sihová ʻoku ‘ʻikai te nau ʻilo’ fekauʻaki mo e fakatuʻutāmaki ʻoku fehangahangai mo e kakaí.—Pal. 24:11, 12.
2 ʻOku fakamahuʻingaʻi ʻe Sihova ʻa e moʻuí. ʻOkú ne ekinaki ki heʻene kau sevānití ke nau fai honau tūkuingatá ke tokoni ki hono fakahaofi ʻa e moʻui lahi taha te nau malavá. Ko e faifekau taki taha ʻa e ʻOtuá kuo pau ke ne ʻai ke ʻiloa ʻa e pōpoaki fakahaofi moʻui ʻoku maʻu ʻi he Folofola ʻa e ʻOtuá. ʻOku meimei tatau ʻetau ngāué mo e ngāue ʻa ha tangata-leʻo ʻa ia ʻokú ne fakaongo atu ha fakatokanga ʻi heʻene sio ki ha fakatuʻutāmaki ʻoku maluʻaki mai. ʻOku ʻikai te tau loto ke ʻi hotau ʻulú ʻa e toto ʻo e faʻahinga ʻoku ʻi he fakatuʻutāmaki ʻo e pau ke nau ʻauhá. (Isi. 33:1-7) Ko ia ai, he mātuʻaki mahuʻinga moʻoni ke tau kītaki ʻi heʻetau ngaahi feinga ke “malangaʻaki ʻa e folofola”!—Lau ʻa e 2 Timote 4:1, 2, 5.
3. Ko e hā ʻa e ngaahi tuʻunga-lea ʻe lāulea ki ai ʻi heni pea mo e ongo kupu hoko maí?
3 ʻE lāulea ʻa e kupu ko ení ki he founga ʻe lava ke ke ikuʻi ai ʻa e ngaahi fakafaingataʻaʻiaʻanga ki hoʻo ngāue fakafaifekau fakahaofi moʻuí mo e founga te ke lava nai ai ke tokoniʻi ha kakai tokolahi ange. Ko e kupu hoko maí ʻe sivisiviʻi ai ʻa e founga ʻe lava ke ke fakatupulekina ai ʻa e pōtoʻi fakafaiako ʻi hono akoʻi ʻa e ngaahi moʻoni mātuʻaki mahuʻingá. Ko e kupu ako hono tolú ʻe fakamatala ai ki he niʻihi ʻo e ngaahi ola fakalototoʻa ʻa ia ʻoku maʻu ʻe he kau fanongonongo ʻo e Puleʻangá ʻi māmani lahi. Kae kehe, ki muʻa ke tau lāulea ki he ngaahi tuʻunga-lea ko ení, ʻe lelei ke siviʻi ʻa e ʻuhinga ko ia ʻoku mātuʻaki mahuʻinga ai hotau taimí.
ʻUhinga ʻOku ʻIkai Ai ha ʻAmanaki ʻa e Tokolahi
4, 5. Ko e hā ʻoku hokosia ʻe he faʻahinga ʻo e tangatá, pea ʻoku anga-fēfē ʻa e fakafeangai ki ai ʻa e kakai tokolahi?
4 Ko e ngaahi meʻa ʻoku hoko ʻi he māmaní ʻoku fakahaaʻi ai ʻoku tau moʻui ʻi he “fakaʻosiʻosi ʻo e fokotuʻutuʻu ʻo e ngaahi meʻá” pea ko e ngataʻangá ʻoku ofi ʻaupito. ʻOku hokosia ʻe he faʻahinga ʻo e tangatá ʻa e ngaahi meʻa ʻoku hoko mo e ngaahi tuʻunga ʻa ia naʻe pehē ʻe Sīsū mo ʻene kau ākongá ʻe fakaʻilongaʻiʻaki ʻa e “kuonga fakamui.” Ko e ngaahi “langā,” ʻoku kau ai ʻa e ngaahi tau, honge, mofuike mo e ngaahi fakatamaki kehe ʻokú ne fakamamahiʻi ʻa e faʻahinga ʻo e tangatá. Ko e maumau-laó, siokitá mo e ngaahi tōʻonga taʻefakaʻotuá ʻoku hulu fau. Naʻa mo e kakai ʻoku nau feinga ke moʻui ʻo fakatatau ki he ngaahi tuʻunga ʻa e Tohi Tapú ʻoku nau ʻiloʻi ko e “ngaahi taimi faingataʻa” eni ke fekuki mo ia.—Mt. 24:3, 6-8, 12, NW; 2 Tim. 3:1-5.
5 Kae kehe, ko e fuʻu tokolahi ʻo e faʻahinga ʻo e tangatá ʻoku ʻikai te nau lāuʻilo ki he ʻuhinga moʻoni ʻo e ngaahi meʻa ʻoku hoko ʻi he māmaní. Ko hono olá, ʻoku loto-moʻua ʻa e tokolahi fekauʻaki mo ʻenau malú pea pehē ki he malu ʻa honau ngaahi fāmilí. Ko e mole atu ʻa e ngaahi ʻofaʻanga ʻi he maté pe ko e ngaahi meʻa fakamamahi kehe fakafoʻituituí ʻoku fakatupunga ai ʻa e mamahi ki he tokolahi. ʻI he ʻikai ha ʻilo totonu ki he ʻuhinga ʻoku hoko ai ʻa e ngaahi meʻa peheé mo e feituʻu ʻoku ʻi ai ʻa e fakaleleiʻangá, ko e kakaí ni ʻoku ʻikai haʻanau ʻamanaki.—Ef. 2:12.
6. Ko e hā kuo ʻikai malava ai ʻe “Babilone koe Lahi” ke tokoniʻi ʻa hono kau muimuí?
6 Ko “Babilone koe Lahi,” ʻa e ʻemipaea ʻo e lotu loi ʻi he māmaní, kuo ʻikai te ne ʻomai ha fakafiemālie ki he faʻahinga ʻo e tangatá. ʻI hono kehé, fakafou ʻi he “uaine o ene feauaki,” kuó ne ʻai ʻa e fuʻu tokolahi ke nau puputuʻu fakalaumālie. ʻIkai ngata aí, ʻi heʻene ngāue hangē ha paʻumutú, kuo fakataueleʻi ʻe he lotu loí ʻo puleʻi ʻa e ‘gaahi tuʻi ʻo mamaní,’ ʻi hono ngāueʻaki ʻa e ngaahi tokāteline loi mo e ngaahi tōʻonga fakahaʻele faʻahikehe ke puke ʻaki ʻa e tokolahi tahá ke nau fakamoʻulaloa taʻetoefehuʻia ki honau ngaahi puleʻanga fakapolitikalé. Ko ia kuo maʻu ai ʻe he lotu loí ʻa e mafai mo e tākiekina, ka ʻi he taimi tatau, kuó ne talitekeʻi fakaʻaufuli ʻa e moʻoni fakalotú.—Fkh. 17:1, 2, 5, PM; Fkh. 18:23.
7. Ko e hā ʻa e ʻamanaki ki he tokolahi taha ʻo e faʻahinga ʻo e tangatá, ka ʻe anga-fēfē nai hono tokoniʻi ʻo e niʻihi?
7 Naʻe akoʻi ʻe Sīsū ʻo pehē ko e tokolahi taha ʻo e faʻahinga ʻo e tangatá ʻoku nau fononga atu ʻi he hala fālahi ʻa ia ʻoku taki atu ki he ʻauha. (Mt. 7:13, 14) Ko e faʻahinga ʻe niʻihi ʻoku nau ʻi he hala fālahí koeʻuhi kuo nau fai ha fili ʻosi fakakaukauʻi ke siʻaki ʻa e meʻa ʻoku akoʻi ʻe he Tohi Tapú, ka ko e tokolahi kehe ʻoku nau ʻi aí koeʻuhi kuo kākaaʻi kinautolu, pe ʻikai fakamaama kinautolu, ʻo fekauʻaki mo e meʻa ʻoku fiemaʻu moʻoni ʻe Sihova meiate kinautolú. Mahalo pē naʻe mei liliu ʻe he niʻihi ʻenau founga moʻuí kapau naʻe ʻoange kia kinautolu ʻa e ngaahi ʻuhinga Fakatohitapu lelei ke fai pehē. Ka ko e faʻahinga ʻoku nau kei ʻi Pāpilone ko e Lahi pea ʻoku hokohoko atu ʻenau siʻaki ʻa e ngaahi tuʻunga ʻa e Tohi Tapú heʻikai fakahaofi kinautolu ʻi he “mamahi lahi.”—Fkh. 7:14.
Hanganaki Malanga ʻo “ʻIkai Tuku”
8, 9. Naʻe anga-fēfē ʻa e fakafeangai ʻa e kau Kalisitiane he ʻuluaki senitulí ʻi heʻenau fehangahangai mo e fakafepakí, pea ko e hā hono ʻuhingá?
8 Naʻe pehē ʻe Sīsū ko ʻene kau ākongá te nau malangaʻi ʻa e ongoongo lelei ʻo e Puleʻangá mo ngaohi-ākonga. (Mt. 28:19, 20) Ko ia ai, ko e kau Kalisitiane moʻoní, kuo nau fakakaukau maʻu pē ko e kau ʻi he ngāue fakamalangá ko ha meʻa ia ʻoku fekauʻaki mo ʻenau mateaki ki he ʻOtuá pea ko ha fiemaʻu tefito ia ki heʻenau tuí. Ko ia ai, ko e muʻaki kau muimui ʻo Sīsuú naʻa nau kītaki ʻo aʻu ki heʻenau fehangahangai mo e fakafepakí. Naʻa nau falala kia Sihova ki ha mālohi, ʻo lotu kiate ia ke ne fakamafeia kinautolu ke hokohoko atu ʻenau ‘lea malohi [pe loto-toʻa] aki ʻene folofolá.’ ʻI he tali ki aí, naʻe fakafonu kinautolu ʻe Sihova ʻaki ʻa e laumālie māʻoniʻoní, pea naʻa nau lea loto-toʻa ʻaki ʻa e folofola ʻa e ʻOtuá.—Ng. 4:18, 29, 31, PM.
9 ʻI he hoko ʻa e fakafepakí ʻo anga-fakamālohí, naʻe veiveiua ʻa e kau muimui ʻo Sīsuú ʻi heʻenau fakapapau ke malangaʻi ʻa e ongoongo leleí? ʻIkai ʻaupito. ʻI hono fakaʻitaʻi ʻe he malanga ʻa e kau ʻapositoló, naʻe puke ʻe he kau taki lotu Siú ʻa e kau ʻapositoló, ʻo fakamanamanaʻi pea haha kinautolu. Neongo ia, ko e kau ʻapositoló naʻe “ʻikai tuku ʻenau ako mo malangaʻaki ʻa Sisu, ko e Misaia ia.” Naʻa nau mahinoʻi lelei kuo pau ke nau “fai ki he pule ʻa e ʻOtua ʻi he pule ʻa e tangata.”—Ng. 5:28, 29, 40-42.
10. Ko e hā ʻa e ngaahi pole ʻoku fehangahangai mo e kau Kalisitiané he ʻaho ní, ka ko e hā nai ʻe hoko ʻi heʻenau ʻulungāanga leleí?
10 Ko e tokolahi taha ʻo e kau sevāniti ʻa e ʻOtuá he ʻaho ní kuo ʻikai pau ke nau kātekina ʻa e ngaahi haha pe tuku pilīsone koeʻuhi ko ʻenau ngāue fakamalangá. Kae kehe, ko e kau Kalisitiane moʻoni kotoa pē ʻoku nau fehangahangai mo e ngaahi sivi mo e ʻahiʻahi kehekehe. Ko e fakatātaá, ko ho konisēnisi kuo akoʻi ʻe he Tohi Tapú, ʻe ueʻi nai ai koe ke ke tali ha ʻalunga taʻemanakoa ʻo e ʻulungāangá pe ʻokú ne ʻai nai koe ke ke tuʻu makehe. Ko e ngaahi kaungāngāué, kaungāakó, pe ngaahi kaungāʻapí te nau fakakaukau nai ʻokú ke faikehe koeʻuhi ko e fakatuʻunga hoʻo ngaahi filí ʻi he ngaahi tefitoʻi moʻoni Fakatohitapú. Kae kehe, ko ʻenau fakafeangai ʻikai leleí ʻoku ʻikai totonu ke fakalotosiʻi ia kiate koe. Ko e māmaní ʻoku toloto ia ʻi he fakapoʻuli fakalaumālie, ka ko e kau Kalisitiané kuo pau ke nau “[ulo] ko e ngaahi maamaʻanga.” (Fili. 2:15) Mahalo pē ʻe sio mai ha kau mamata loto-moʻoni ʻo nau leleiʻia ʻi hoʻo ngaahi ngāue leleí pea hoko ai ʻo nau fakamālōʻiaʻi ʻa Sihova.—Lau ʻa e Mātiu 5:16.
11. (a) ʻOku anga-fēfē nai ʻa e fakafeangai ʻa e niʻihi ki he ngāue fakamalangá? (e) Ko e hā ʻa e faʻahinga fakafepaki naʻe fehangahangai mo e ʻapositolo ko Paulá, pea naʻe anga-fēfē ʻene tali ki aí?
11 ʻOku fiemaʻu kia kitautolu ʻa e loto-toʻa ke hanganaki malangaʻi ai ʻa e pōpoaki ʻo e Puleʻangá. Ko e kakai ʻe niʻihi, naʻa mo e ngaahi kāingá, te nau manukiʻi nai koe pe feinga ʻi ha founga kehe ke ʻai koe ke ke loto-siʻi. (Mt. 10:36) Ko e ʻapositolo ko Paulá naʻe haha tā tuʻo lahi koeʻuhi ko ʻene fakahoko faitōnunga ʻa ʻene ngāue fakafaifekaú. Fakatokangaʻi ange ʻa e anga ʻo ʻene tali ki he fakafepaki peheé: “Hili ʻemau ʻuluaki mamahi mo ngaohikovia,” ko ʻene tohí ia, “naʻa mau langaʻi ʻa e loto-toʻa fakafou ʻi hotau ʻOtuá ke leaʻaki kiate kimoutolu ʻa e ongoongo lelei ʻa e ʻOtuá fakataha mo ha fuʻu fāinga lahi.” (1 Tes. 2:2, NW) Ko e moʻoni ko ha pole ia kia Paula ke ne hanganaki leaʻaki ʻa e ongoongo leleí hili hono puke, ʻo vete hono valá, haha ʻaki ʻa e ʻakau pea lī ki he pilīsoné. (Ng. 16:19-24) Ko e hā naʻá ne ʻoange kiate ia ʻa e loto-toʻa ke hokohoko atú? Ko ʻene holi mālohi ke fakahoko ʻa ʻene fekau kuo ʻomai ʻe he ʻOtuá ke malangá.—1 Kol. 9:16.
12, 13. Ko e hā ʻa e ngaahi pole ʻoku fehangahangai mo e niʻihi, pea kuo anga-fēfē ʻenau feinga ke ikuʻi iá?
12 ʻOku toe lava foki ke hoko ko ha pole hono tauhi maʻu ʻetau faivelenga ʻi he ngaahi feituʻu ngāue ʻa ia ʻoku tātātaha ke ʻi ʻapi ai ʻa e kakaí pea ʻoku siʻi ai hono tali ʻa e pōpoaki ʻo e Puleʻangá. Ko e hā ʻoku lava ke tau fai ʻi he ngaahi tuʻunga peheé? Te tau ʻiloʻi nai ʻoku fiemaʻu ke langaʻi ha loto-toʻa lahi ange ke lea ai ki he kakaí ʻi he ngaahi tuʻunga ʻikai anga-mahení. ʻE toe fiemaʻu nai ke tau feʻunuʻaki ʻetau taimi-tēpilé pe fakahangataha ʻetau ngaahi feingá ki he malanga ʻi he ngaahi feituʻu ʻa ia ʻe lava ke tau fetuʻutaki ai mo e kakai tokolahi ange.—Fakafehoanaki mo e Sione 4:7-15; Ngāue 16:13; 17:17.
13 Ko e ngaahi faingataʻa kehe kuo pau ke fāinga mo e tokolahi ko e taʻumotuʻá mo e mahamahakí, ʻa ia ʻoku fakangatangata nai ai ʻa e meʻa ʻoku lava lelei ke nau fai ʻi he ngāue fakamalangá. Kapau ko e meʻa ia ʻoku hoko kiate koé, ʻoua ʻe loto-siʻi. ʻOku lāuʻilo lelei ʻa Sihova ki ho ngaahi ngātangá pea ʻokú ne houngaʻia ʻi he meʻa ʻoku lava ke ke faí. (Lau ʻa e 2 Kolinito 8:12.) Ko e hā pē ʻa e faʻahinga ʻahiʻahi ʻokú ke fehangahangai nai mo iá—ko e fakafepaki, taʻemahuʻingaʻia, pe mahamahaki—fai ʻa e meʻa kotoa pē ʻoku lava ke fakaʻatā ʻi ho tuʻungá ʻi hono vahevahe atu ʻa e ongoongo leleí ki he niʻihi kehé.—Pal. 3:27; fakafehoanaki mo e Maake 12:41-44.
‘Vakai ki Hoʻo Gaue Fakafaifekaú’
14. Ko e hā e faʻifaʻitakiʻanga naʻe fokotuʻu ʻe he ʻapositolo ko Paulá ki he kaungā Kalisitiané, pea ko e hā ʻa e akonaki naʻá ne faí?
14 Naʻe fakahoko mātuʻaki fakamātoato ʻe he ʻapositolo ko Paulá ʻene ngāue fakafaifekaú, pea naʻá ne fakalototoʻaʻi ʻa e kaungātuí ke nau fai ʻa e meʻa tatau. (Ng. 20:20, 21; 1 Kol. 10:34 [1Ko 11:1, PM]) Ko e tokotaha ʻa ia naʻe fili ʻe Paula ke fakalototoʻaʻi makehe ko ha Kalisitiane he ʻuluaki senitulí ko hono hingoá ko ʻĀkipo. ʻI heʻene tohi ki he kau Kolosé, naʻe pehē ai ʻe Paula: “Tala kia [ʻĀkipo], Ke ke vakai ki he gaue [fakafaifekau] kuo ke maʻu mei he Eiki, koeuhi ke ke fai ia.” (Kol. 4:17, PM) ʻOku ʻikai ke tau ʻiloʻi pe ko hai ʻa ʻĀkipo pe ko e hā hono ngaahi tuʻungá, ka ʻoku hā mahino naʻá ne tali ha ngāue fakafaifekau. Kapau ko ha Kalisitiane ʻosi fakatapui koe, kuó ke tali ʻe koe foki ha ngāue fakafaifekau. ʻOkú ke hokohoko atu ʻa e vakaiʻi ʻo e ngāue fakafaifekaú koeʻuhi ke fakahoko ia?
15. Ko e hā ʻoku kau ki he fakatapui faka-Kalisitiané, ʻo taki atu ai ki he ngaahi fehuʻi ko e hā?
15 Ki muʻa ʻi heʻetau papitaisó, naʻa tau fakatapui ʻetau moʻuí kia Sihova ʻi he lotu fakamātoato. Naʻe ʻuhinga ení naʻa tau fakapapauʻi ke fai hono finangaló. Ko ia ʻoku lelei ke tau ʻeke hifo kia kitautolu he taimí ni, ‘Ko hono fai ʻa e finangalo ʻo e ʻOtuá ʻa e meʻa mahuʻinga moʻoni taha ʻi heʻeku moʻuí?’ ʻOku tau maʻu nai mo e ngaahi fatongia kehekehe ʻoku ʻamanekina mai ʻe Sihova ke tau tokangaʻi—hangē ko ia ko e tokonaki maʻa hotau fāmilí. (1 Tim. 5:8) Ka ʻoku anga-fēfē ʻetau ngāueʻaki ʻa e toenga ʻo hotau taimí mo e iví? Ko e hā ʻoku tau fakamuʻomuʻa ʻi he moʻuí?—Lau ʻa e 2 Kolinito 5:14, 15.
16, 17. Ko e hā e ngaahi fatongia ʻe fakakaukau nai ki ai ʻa e kau talavou Kalisitiané pe ko e faʻahinga ʻoku siʻi honau ngaahi fatongiá?
16 Ko ha Kalisitiane fakatapui kei siʻi koe kuo ʻosi pe ʻoku mei ʻosi ʻa hoʻo akó? Ngalingali, ʻoku teʻeki ai ke ʻi ai hao ngaahi fatongia mamafa fakafāmili. Ko ia, ko e hā ʻokú ke palani ke fai ʻaki hoʻo moʻuí? Ko e hā ʻa e ngaahi fili te ne ʻai lahi koe ke ke fakahoko hoʻo palōmesi ke fai ʻa e finangalo ʻo Sihová? Kuo fokotuʻutuʻu ʻe he tokolahi ʻenau ngaahi meʻá koeʻuhi ke nau tāimuʻa, pea kuo nau utu mei ai ʻa e fiefia mo e fiemālie lahi.—Sāme 110:3; Koh. 12:2 (Koh. 12:1, PM).
17 Mahalo pē ko ha talavou koe. ʻOkú ke ngāue paʻanga taimi-kakato ka ʻoku siʻi ho ngaahi fatongiá tuku kehe pē hono tokangaʻi koé. ʻOku ʻikai ha veiveiua kuó ke fiefia ʻi he kau ʻi he ngaahi ngāue ʻa e fakatahaʻangá ʻi he tuʻunga ʻoku fakaʻatā ʻi hoʻo taimi-tēpilé. ʻE lava nai ke ke maʻu ha fiefia ʻoku toe lahi ange? Kuó ke fakakaukau fekauʻaki mo hono fakalahi hoʻo kau ʻi he ngāue fakafaifekaú? (Sāme 34:8; Pal. 10:22) ʻI he ngaahi feituʻu ngāue ʻe niʻihi, ʻoku kei toe ʻa e ngāue lahi ke fai ke aʻu ai ki he tokotaha kotoa mo e pōpoaki foaki moʻui ʻo e moʻoní. ʻE lava ke ke fai ha ngaahi feʻunuʻaki ʻi hoʻo moʻuí, ke ngāue nai ʻi ha feituʻu ʻa ia ʻoku lahi ange ai ʻa e fiemaʻu ʻo e kau fanongonongo ʻo e Puleʻangá?—Lau ʻa e 1 Timote 6:6-8.
18. Ko e hā ʻa e ngaahi feʻunuʻaki naʻe fai ʻe ha ongo meʻa kei siʻi, pea ko e hā hono olá?
18 Fakakaukau angé ki he faʻifaʻitakiʻanga ʻa Kēvini mo ʻElenā, mei ʻAmelika.a Hangē ko ia ʻoku angamaheniʻaki ʻi he kau mali foʻou ʻi honau feituʻú, naʻá na ongoʻi kuo pau ke na fakatau ha fale. Naʻá na fakatou ngāue paʻanga taimi-kakato pea ko ia naʻe lava ai ke na maʻu ha founga moʻui fiemālie. Neongo ia, ko ʻena taimi-tēpile ngāué mo e ngaahi ngāue ʻi ʻapí naʻe toe siʻi pē ai ʻa e taimi ki he ngāue fakamalangá. Naʻá na ʻiloʻi ne līʻoa ʻa e meimei kotoa ʻo hona taimí mo e iví ki heʻena koloá. Kae kehe, ʻi heʻena sio ki he founga moʻui faingofua ʻa ha ongo meʻa tāimuʻa fiefia, naʻe fakapapauʻi ai ʻe Kēvini mo ʻElenā ke liliu ʻa e meʻa ʻokú na fakamuʻomuʻa ʻi he moʻuí. Hili ʻa e kumi ki he tataki ʻa Sihová ʻi he lotu, naʻá na fakatau atu hona ʻapí peá na hiki ki ha kiʻi fale nofo totongi. Naʻe fakasiʻisiʻi ʻe ʻElenā ʻa e ngaahi houa naʻá ne ngāue paʻanga aí ʻo ne hoko ko ha tāimuʻa. ʻI he loto-toʻa ʻi he ngaahi hokosia naʻe maʻu ʻe hono uaifí, naʻe tukuange ʻe Kēvini ʻa ʻene ngāue paʻanga taimi-kakató peá ne kamata tāimuʻa. ʻI ha taimi ki mui ai, naʻá na hiki ki ha fonua ʻi ʻAmelika Tonga ke ngāue ai ʻi he feituʻu ʻoku lahi ai ʻa e fiemaʻu ʻo e kau malanga ʻo e Puleʻangá. “Naʻá ma maʻu maʻu pē ha nofo mali fiefia,” ko e lau ia ʻa Kēvini, “ka ʻi he taimi naʻá ma ngāue ai ki he ngaahi taumuʻa fakalaumālié, naʻe aʻu ai ʻema fiefiá ki ha tuʻunga ʻoku toe lahi ange.”—Lau ʻa e Mātiu 6:19-22.
19, 20. Ko e hā ko e ngāue mahuʻinga taha ai ʻi he ʻaho ní ʻa hono malangaʻi ʻo e ongoongo leleí?
19 Ko e malangaʻi ʻo e ongoongo leleí ʻa e ngāue mahuʻinga taha ʻoku fai ʻi māmani he ʻaho ní. (Fkh. 14:6, 7) ʻOku tokoni ia ki hono fakamāʻoniʻoniʻi ʻa e huafa ʻo Sihová. (Mt. 6:9) Ko e pōpoaki ʻa e Tohi Tapú ʻoku fakaleleiʻi ai ʻa e moʻui ʻa e laui afe ʻa ia ʻoku nau tali ia he taʻu taki taha, pea ʻe lava ke taki atu heni ki honau fakamoʻuí. Ka, ʻe “fefe haʻanau fanongo ʻoka ʻikai ha taha ke malanga?” ko e fehuʻi ia ʻa e ʻapositolo ko Paulá. (Loma 10:14, 15) Ko e moʻoni ʻe anga-fēfē? Ko e hā ʻoku ʻikai ai te ke fakapapauʻi ke fai ʻa e meʻa kotoa pē ʻokú ke malavá ke fakahoko ai hoʻo ngāue fakafaifekaú?
20 Ko e toe founga ʻe taha ʻe lava ai ke ke tokoniʻi ʻa e kakaí ke nau mahinoʻi ʻa e mahuʻinga ʻo e ngaahi taimi faingataʻa ko ení mo e ngaahi nunuʻa ʻo e ngaahi fili ʻoku nau faí ko hono fakaleleiʻi ʻa hoʻo malava fakafaiakó. Ko e founga ʻoku lava ke ke fai ai ení ʻe lāulea ki ai ʻi he kupu hoko maí.
[Fakamatala ʻi lalo]
a Kuo liliu ʻa e hingoá.
ʻE Fēfē Haʻo Tali?
• Ko e hā e fatongia ʻoku maʻu ʻe he kau Kalisitiané ki he faʻahinga ʻo e tangatá?
• ʻOku totonu ke fēfē ʻetau fekuki mo e ngaahi fakafaingataʻaʻiaʻanga ki heʻetau ngāue fakamalangá?
• ʻE lava fēfē ke tau fakahoko ʻa e ngāue fakafaifekau kuo tau talí?
[Fakatātā ʻi he peesi 5]
ʻOku fiemaʻu ʻa e loto-toʻa ke malanga ai ʻi he fehangahangai mo e fakafepakí
[Fakatātā ʻi he peesi 7]
Ko e hā ʻe lava ke ke fai kapau ʻokú ke malanga ʻi he ngaahi feituʻu ʻoku tātātaha ai ke maʻu ha kakai ʻi ʻapí?