Ko Hai ʻOku Lava Ke Ne ʻIlo ki he Kahaʻú?
“Ko au koe Otua . . . , Ke fakaha ae ikuaga mei he kamataaga, bea mei he gaahi kuoga i mua ae gaahi mea oku heeki ke fai.”—Aisea 46:9, 10, PM.
ʻI HE ngaahi taimi taʻemanonga ko ení, ʻoku ako ai ʻe he kau faiʻanalaiso fakapolitikalé, fakapaʻangá, mo e fakasōsialé ʻa e hisitōliá mo e ngaahi ākenga ʻi onopōní ʻi ha feinga ke tomuʻa tala ʻa e kahaʻú. Ko e niʻihi kehe, ʻi heʻenau feinga vavale ke ʻiloʻi ʻa e meʻa ʻoku tuku tauhi ʻi he kahaʻú maʻanautolu fakafoʻituituí, ʻoku nau hanga ai ki he vavalo makatuʻunga he fetuʻú pe ngaahi meʻa fakafaimaná ki ha ngaahi tali. Ko e kakai ko iá ʻoku nau faʻa loto-mamahi ʻi he ngaahi olá. ʻOku mātuʻaki taʻemalava ke ʻiloʻi ʻa e meʻa ʻe hoko ki he māmani ko ení, ko hotau ngaahi fāmilí, pea mo kitautolu tāutaha? ʻI heʻene peheé, ʻe lava moʻoni ke tomuʻa ʻiloʻi ʻe ha taha ʻa e kahaʻú?
ʻI heʻene lea ki he palōfita ko ʻAiseá, naʻe hiki ʻi ʻolungá, naʻe fakamatalaʻi ai ʻe he ʻOtua Māfimafi-Aoniu ko Sihová ʻa ʻene malava tonu ke tomuʻa tala ʻa e kahaʻú. Fakafou ʻia ʻAisea, naʻe tomuʻa tala ai ʻe he ʻOtuá ʻa e fakatauʻatāinaʻi ʻo e kau ʻIsilelí he kuonga muʻá mei he nofo pōpula ʻi Pāpiloné pea mo ʻenau foki ke toe langa ʻa Selusalema mo e temipalé. Naʻe tonu mātē fēfē ʻa e kikite ko ení? ʻI he taʻu nai ʻe 200 ki muʻa, naʻe fakahaaʻi totonu ai ʻe ʻAisea ʻa e tokotaha ikuna ʻo Pāpilone ʻi he kahaʻú, ko Kōlesi. ʻIkai ko ia pē, naʻe fakamatalaʻi totonu ʻe ʻAisea ʻa e palani ʻa Kōlesí—ʻa ia ko hono afeʻi ʻa e Vaitafe ʻIufaletesí, ʻa ia naʻá ne maluʻi ʻa e koló. Naʻe aʻu ʻo ne tomuʻa tala ʻe ʻiloʻi ʻe Kōlesi ʻoku tuku ava ʻi he taʻetokanga ʻa e ongo fuʻu matapā konga ua ʻi he koló, ʻo tokoni ia ki he ikuna faingofua ʻa Kōlesí.—Aisea 44:24–45:7.
ʻI hono fakahoa ki he ʻOtuá, ʻoku ʻikai ha mālohi ʻo e tangatá ke sio ai ki he kahaʻú. “ʻOua te ke polepole ha meʻa te ke fai ʻapongipongi,” ko e tohi ia ʻa e tuʻi poto ko Solomoné, “he ʻoku ʻikai te ke ʻilo pe ko e ha ʻe fanauʻi ʻe he ʻaho.” (Palovepi 27:1) ʻOku kei moʻoni ʻa e fakamatala ko iá. ʻOku ʻikai ha tangata ʻe lava ke ne tomuʻa tala naʻa mo hono kahaʻú tonu. Ko e hā ʻokú ne ʻai ke kehe ʻa e ʻOtuá? ʻOkú ne mahinoʻi fakaʻaufuli ʻa e meʻa kotoa pē kuó ne fakatupú, ʻo kau ai ʻa e natula mo e hehema ʻa e tangatá. ʻI heʻene fili ke fai peheé, ʻoku lava ke tomuʻa tala tonu mātē ʻe he ʻOtuá ʻa e founga ʻe ngāue ai ʻa e faʻahinga tāutaha mo e ngaahi puleʻanga kotoa. ʻIkai ko ia pē, ʻokú ne maʻu ʻa e malava taʻefakangatangata ke puleʻi ʻa e ikuʻanga ʻo e ngaahi meʻá. ʻI heʻene tomuʻa tala ʻe hoko ha meʻa fakafou heʻene kau palōfitá, ʻokú ne hoko ai ko e tokotaha “ʻoku ne ʻai ke tuʻu ʻa e lea ʻa ʻene sevaniti, mo fakaai ʻa e faleʻi ʻa ʻene kau talafekau.” (Aisea 44:26) Ko e ʻOtua pē ko Sihová ʻe lava moʻoni ke ne fai ʻa e fakamatala ko iá.
Naʻe moʻui ʻa ʻAisea ʻo laka hake he taʻu ʻe 700 ki muʻa ʻia Sīsū ko e Mīsaiá. Neongo ia, naʻá ne kikite fekauʻaki mo e haʻu ʻa e Mīsaiá. Kae kehe, tautefito ki he senituli hono 18 ʻo faai mai ai, ko e kau fakaanga ʻo e Tohi Tapú kuo nau fakafepakiʻi ʻa e alafalalaʻanga ʻa e tohi Aiseá. Kuo nau taukaveʻi ko e ngaahi kikite ʻa ʻAiseá naʻe ʻikai moʻoni ke tala ia ki muʻa ka naʻe toki hiki ia hili ʻene hokó, ko ha faʻu-tohi ki mui naʻá ne toki lēkooti pē ʻa e meʻa kuo ʻosi hokó. ʻOku moʻoni ia? ʻI he 1947 naʻe ʻiloʻi ai ha tatau ʻo e tohi Aiseá, fakataha mo e ngaahi takainga tohi motuʻa kehe, ʻi ha ʻana ofi ki he Tahi Maté. Naʻe fakapapauʻi ʻe he kau mataotaó ko e tataú ni naʻe hiki ia ʻo laka hake he taʻu ʻe teau ki muʻa ʻi hono ʻaloʻi ʻa e Mīsaia ne tomuʻa talá, pe Kalaisí. ʻIo, naʻe fakaeʻa ʻe he Tohi Tapú ʻa e kahaʻú!
Ko ʻAisea mo e kau hiki Tohi Tapu kehé naʻe ʻikai lava ke nau tomuʻa tala ha ngaahi meʻa ʻo fakatefito ʻataʻatā pē ʻi honau poto ʻonautolú. ʻI hono kehé, naʻa nau ‘lea mei he ʻOtuá ʻi he takina kinautolu ʻe he Laumalie Maʻoniʻoní.’ (2 Pita 1:21) ʻI he ngaahi kupu hoko maí, te tau tokangataha ai ki he ngaahi fakaikiiki ʻo e moʻui ʻa Sīsuú ʻa ia ne tomuʻa tala fakafou ʻia ʻAisea. Pea te tau toki lāulea leva ki he ngaahi meʻa ne tomuʻa tala ʻe Sīsū mo ʻene kau ākongá ki hotau ʻahó pea ki he kahaʻú.