Fehuʻi mei he Kau Lautohí
Ko e hā ʻoku fakaeʻa mai ʻe he Tohi Tapú fekauʻaki mo e malava ʻa Sihova ke tomuʻa tala ʻa e kahaʻú?
ʻOku fakahaaʻi mahino mai ʻe he Tohi Tapú ko Sihova ʻoku lava ke ne tomuʻa tala ʻa e kahaʻú. (ʻAi. 45:21) ʻOku ʻikai ke tala fakaikiiki mai ai ʻa e founga pe ko e taimi ʻokú ne fai pehē aí pe naʻa mo e lahi ʻo e meʻa ʻokú ne fili ke ʻiloʻí. Ko ia heʻikai ke tau fuʻu fakamatematē fekauʻaki mo e meʻa ko iá. Kae kehe, fakakaukau ki ha moʻoniʻi meʻa ʻe niʻihi.
ʻOku ʻikai ha fakangatangata ʻo Sihova tuku kehe ʻa e meʻa ʻokú ne fokotuʻu maʻaná. Koeʻuhi ko hono poto taʻefakangatangatá, ʻoku lava ke ne tomuʻa tala ha faʻahinga meʻa pē ʻokú ne loto ki ai. (Loma 11:33) Koeʻuhi ʻokú ne maʻu ʻa e mapuleʻi-kita haohaoa, ʻoku lava foki ke ne fili ke ʻoua ʻe ʻiloʻi ʻa e meʻa ʻe hokó.—Fakafehoanaki mo e ʻAisea 42:14.
ʻOku fakatupunga ʻe Sihova ʻa hono finangaló ke fakahoko. ʻOku fekauʻaki fēfē ʻa e moʻoniʻi meʻa ko iá mo ʻene malava ke tomuʻa tala ʻa e kahaʻú? ʻOku pehē ʻi he ʻAisea 46:10: “ʻOku ou tomuʻa tala mei he kamataʻangá ʻa e meʻa ʻe hokó, pea mei he kuonga muʻá ʻa e ngaahi meʻa kuo teʻeki ke faí. ʻOku ou pehē, ‘Ko ʻeku tuʻutuʻuní ʻe tuʻu, pea te u fai ha meʻa pē ʻoku ou loto ki ai.’”
Ko ia ko e ʻuhinga ʻe taha ʻoku lava ke tomuʻa tala ai ʻe Sihova ʻa e kahaʻú he ʻokú ne maʻu ʻa e mālohi ke ʻai ʻa e ngaahi meʻá ke hoko. ʻOku ʻikai fiemaʻu ia ke ne feinga ke ʻiloʻi ʻa e meʻa ʻe hoko ʻi he kahaʻú ʻo hangē ko e taimi ʻoku tau faʻa hiki fakalaka ai ʻo sio ʻi he konga fakamuimui ʻo ha faiva ke ʻiloʻi ʻa e ikuʻangá. ʻI hono kehé, ʻe lava ke fili ʻe Sihova ha meʻa ke hoko ʻi ha taimi pau pea fakatupunga leva ia ke hoko ʻi he aʻu ki he taimi ko iá.—ʻEki. 9:5, 6; Māt. 24:36; Ngā. 17:31.
ʻI he ʻuhingá ni, ʻoku ngāueʻaki ʻe he Tohi Tapú ʻa e ngaahi foʻi lea hangē ko e “teuteu,” “faʻu” mo e “fokotuʻu ha taumuʻa” ke fakamatalaʻi ʻa e meʻa ʻoku fai ʻe Sihova ʻi he fekauʻaki mo e ngaahi meʻa ʻe niʻihi ʻe hoko ʻi he kahaʻú. (2 Tuʻi 19:25; fkm. ʻi lalo; ʻAi. 46:11) Ko e ngaahi foʻi lea ko ení ʻoku liliu ia mei he muʻaki lea ʻoku felāveʻi mo e foʻi lea ʻoku ʻuhinga ko e “tufunga-ʻumeá.” (Sel. 18:4) Hangē pē ko e lava ʻe ha tufunga-ʻumea pōtoʻi ʻo fakafuo ha konga ʻumea ki ha foʻi vaasi fakaʻofoʻofa, ʻoku lava ʻe Sihova ʻo fakafuo pe puleʻi ʻa e ngaahi meʻá ke fakahoko hono finangaló.—ʻEf. 1:11.
ʻOku fakaʻapaʻapaʻi ʻe Sihova ʻa e meʻaʻofa ko e tauʻatāina ke filí. ʻOku ʻikai ke ne tomuʻa fakatufakangaʻi ʻa e moʻui ʻa e tokotaha taki taha; pea ʻoku ʻikai ke ne fakatupunga ʻa e kakai loto-totonú ke nau fai ha meʻa ʻe taki atu ki honau fakaʻauhá. ʻOkú ne fakaʻatā ʻa e tokotaha kotoa ke fili ʻa e ʻalunga pē ʻanautolu, pea ʻokú ne ekinaki ke nau fili ʻa e ʻalunga totonú.
Fakakaukau ki ha fakatātā ʻe ua. Ko e ʻuluakí ʻoku fekauʻaki mo e kakai ʻo Ninivé. Naʻe tomuʻa tala ʻe Sihova ʻe liua ʻa e koló koeʻuhí ko ʻene fulikivanú. Ka ʻi he fakatomala ʻa e kakaí, ko Sihova “naʻá ne toe fakakaukauʻi ʻa e fakatamaki naʻá ne folofola te ne ʻomi kiate kinautolú, pea naʻe ʻikai te ne ʻomi ia.” (Siona 3:1-10) Naʻe liliu ʻe Sihova ʻene fakakaukau fekauʻaki mo e meʻa naʻá ne tomuʻa talá he naʻe ngāueʻaki ʻe he kau Ninivé ʻenau tauʻatāina ke filí ke tali loto-fakatomala ʻa e pōpoaki fakaefakatokanga naʻe ʻoatu ʻe Sihova kiate kinautolú.
Ko e fakatātā hono uá ko e kikite fekauʻaki mo ha tokotaha ikuna ko Kōlesi, te ne tuku ange ʻa e kau Siú mei he nofo pōpulá pea tuʻutuʻuni ke toe langa ʻa e temipale ʻo Sihová. (ʻAi. 44:26–45:4) Naʻe fakahoko ʻe Tuʻi Kōlesi ʻo Pēsiá ʻa e kikite ko iá. (ʻĒsela 1:1-4) Kae kehe, naʻe ʻikai lotu ʻa Kōlesi ki he ʻOtua moʻoní. Naʻe ngāueʻaki ʻe Sihova ʻa Kōlesi ke fakahoko ʻa e kikité ʻo ʻikai ke kaunoa ʻi he tauʻatāina ʻa Kōlesi ke fili pe ko hai ʻe lotu ki aí.—Pal. 21:1.
Ko e moʻoni, ʻoku ʻikai ko e ngaahi moʻoniʻi meʻa kotoa eni ʻoku kaunga ki hono ngāueʻaki ʻe Sihova ʻa e tomuʻa ʻafioʻí. Ko hono moʻoní, ʻoku ʻikai ha tangata ʻe lava ke ne mahinoʻi kakato ʻa e ngaahi founga ʻa Sihová. (ʻAi. 55:8, 9) Neongo ia, ko e meʻa kuo fakaeʻa ʻe Sihová ʻoku fakaivimālohiʻi ai ʻetau tui ʻokú ne fai maʻu pē ʻa e meʻa totonú—kau ai ʻa e taimi ʻokú ne tomuʻa tala ai ʻa e kahaʻú.