Ongoongo Lelei ʻi he Lea ʻe 500
ʻI HE lotolotonga ʻo ha tau fakalotofonua ʻi Luanitā, naʻe hola ai ha kiʻi kulupu liliu lea mei honau ʻapí, kae liʻaki ʻenau ngaʻotoʻotá. Kae kehe, naʻe malava ke nau ʻave ʻenau komipiuta toʻotoʻó, ʻo nau ō mo ia ki he ngaahi kemi hūfangá. Ko e hā hono ʻuhingá? Koeʻuhi ke nau lava ai ʻo hokohoko atu hono liliu ʻa e ʻū tohi makatuʻunga he Tohi Tapú ki he lea Kiniauanitā.
Ko ha finemui ʻi ʻĒsia Tonga Hahake ʻokú ne taipe ʻi heʻene komipiutá ʻo aʻu ki he tuʻapoó, ʻo fekuki mo e ongoongosia, vela ʻa e ʻeá pea mo e toutou mate ʻa e ʻuhilá ʻa ia naʻe uesia ai ʻene liliú. Ko e hā ʻene taumuʻá? Ke ʻosi ki muʻa he taimi pulusí.
Ko e kau liliu lea ko ení ko ha konga kinautolu ʻo ha fuʻu kau ngāue pole nai ʻe toko 2,300 ʻoku nau ngāue ʻi he feituʻu laka hake ʻi he 190 takatakai he māmaní. ʻOku nau ʻi he vahaʻa ʻo e taʻu 20 ki he meimei taʻu 90 pea ʻoku nau ngāue mālohi taʻesiokita koeʻuhi ke lava ʻa e kakaí ʻo maʻu ʻa e fakafiemālie mei he pōpoaki ʻa e Tohi Tapú ʻi he lea ʻe 500.—Fakahā 7:9.
Aʻu ki ha Kakai Lea Kehekehe
ʻI he ngaahi taʻu ki mui ní, ko e ngāue liliu ʻa e Kau Fakamoʻoni ʻa Sihová kuo tupulaki ia ki ha tuʻunga taʻehanotatau. Ko e fakatātaá, ʻi he 1985, naʻe pulusi taimi taha ai ʻa e Taua Leʻo ʻi he lea ʻe 23—ko ha fuʻu lavameʻa ia ʻi he taimi ko iá. ʻI he ʻahó ni, ko e Taua Leʻo ʻoku ala maʻu ia ʻi he lea ʻe 176, pea ko e pulusingá kotoa ʻoku pulusi taimi taha ia ke lava ʻe he kau lautohi takatakai he māmaní ʻo ako ʻa e fakamatala tatau ʻi he taimi tatau.
ʻI he lea nai ʻe 50, ko e Taua Leʻo ʻa e tohi pē taha ʻoku pulusi tuʻumaʻú. Ko e hā hono ʻuhingá? Ko e ngaahi kautaha faipulusi fakakomēsialé ʻoku ʻikai te nau loko fakaʻaiʻai ʻa hono pulusi ʻa e ʻū tohí ʻi he lea fakalotofonuá. Ka ko e Kau Fakamoʻoni ʻa Sihova takatakai he māmaní ʻoku nau tokoni tauʻatāina ke vahevahe tatau ʻenau ngaahi meʻá kae lava ai ʻa e Folofola ʻa e ʻOtuá mo e ʻū tohi makatuʻunga he Tohi Tapú ʻo ala maʻu ʻi ha feituʻu pē ʻoku ʻi ai ʻa e fiemaʻú.—2 Kolinito 8:14.
ʻOku fakamahuʻingaʻi lahi ʻe he kakaí ʻa e pōpoaki ʻo e Tohi Tapú ʻi heʻenau leá tonu. Ko e fakatātaá, ko e ʻū tohi Fakatohitapú kuo pulusi ia ki muí ni ʻi he lea Misikitó, ʻa ia ʻoku leaʻaki ʻe he kakai nai ʻe toko 200,000 ʻi Nikalākuā. Ko e fefine ʻe taha naʻá ne kole ʻa e Ko ʻEku Tohi ʻo e Ngaahi Talanoa Faka-Tohitapúa ʻi he lea faka-Misikitó, pea naʻe ʻi ai ha faifekau ʻo e feituʻú ʻi he taimi naʻe ʻoange aí. ʻI heʻene sio ki he tohi fakaʻofoʻofá, naʻe fiemaʻu ia ʻe he faifekaú maʻana. Naʻe fakafisi ʻa e fefiné ke ʻoange ki ai, ʻo aʻu ki hono tuʻuaki ange ʻe he faifekaú ʻa e piini kofi kilo ʻe 20 ke fakafetongi ʻaki ʻa e tohí!
Lolotonga ʻa e hongofuluʻi taʻu kuo maliu atú, ko e ʻū tohi makatuʻunga he Tohi Tapú kuo liliu ia ki he lea tuʻufonua laka hake he 12 ʻi Mekisikou, ʻo kau ai ʻa e lea faka-Meiá, Nahuatalí mo e Sotisilí. Siʻi hifo ʻi he taʻu ʻe hongofulu, ko e fakatahaʻanga lea tuʻufonua mo lea tuhutuhu ʻa e Kau Fakamoʻoni ʻa Sihová naʻe tupulaki ia ʻi he fonua ko iá mei he 72 ki he 1,200 tupu. Ko e Kau Fakamoʻoni ʻa Sihová ʻoku nau tō nai ʻa e pōpoaki ʻo e Tohi Tapú ʻi he loto ʻo e kakaí, ka ʻoku nau tuku ia ki he ʻOtuá ke Ne ʻai ke tupu ʻa e tenga ʻo e moʻoní.—1 Kolinito 3:5-7.
Liliu Tohi Tapu ʻi Onopooni ʻi he Lea ʻe 80
ʻI he ngaahi taʻu ki mui ní, kuo ngāue mālohi ai ʻa e Kau Fakamoʻoni ʻa Sihová ke faʻu kakato pe ko ha konga, ʻa e New World Translation of the Holy Scriptures ʻi he lea ʻe 80. Ko e hā hono olá? Naʻe pehē ʻe ha Fakamoʻoni ʻe taha ʻi ʻAfilika Tonga ʻo kau ki he Tohi Tapu faka-Suaná: “Ko ha meʻangāue fakaʻofoʻofa moʻoni eni. ʻE fakalahi ai ʻeku mahinoʻi ʻa e Folofola ʻa e ʻOtuá. Ko e lea ʻoku ngāueʻaki aí ʻoku faingofua ke lau pea ʻoku fakafiefia.” Naʻe tohi ʻe ha tokotaha lautohi he lea faka-Songá mei Mosemipīki: “Naʻa mo e kotoa ʻo e ʻū tohi kehe makatuʻunga he Tohi Tapú, ko e ʻikai ha Tohi Tapú naʻe hangē ia ha mana mo e fatulisi kae ʻikai ha ʻuha! Kae kehe, naʻe tō mai e ʻuhá ʻi hono tukuange ʻa e New World Translation ʻi he lea faka-Songá.”
ʻI ha founga fakaofo, ko e faʻahinga naʻa nau liliu mo tufaki ʻa e ongoongo lelei ʻi he Tohi Tapú ʻoku nau fakahoko ha kikite ʻi he kuonga muʻá. Ko Sīsū Kalaisi tonu naʻá ne pehē: “ʻE ʻoua ke fanongonongo ki mamani katoa ʻa e ongoongolelei ko eni ʻo e puleʻanga, ke ai ha fakamatala ki he ngāhi kakai kotoa pe, pea toki hoko ʻa e ngataʻanga.”—Mātiu 24:14.
[Fakamatala ʻi lalo]
a Pulusi ʻe he Kau Fakamoʻoni ʻa Sihová.
[Saati ʻi he peesi 15]
(For fully formatted text, see publication)
NEW WORLD TRANSLATION
Ala maʻu kakato pe ko ha konga
1950 1*
1970 7*
1990 13*
2000 36*
2010 80*
NGAAHI TOHI KEHE
1950 88*
1960 125*
1970 165*
1980 190*
1990 200*
2010 500*
LAHI ʻO E LEÁ
[Fakatātā ʻi he peesi 15]
Ko e kau ngāue pole ʻe toko 2,300 nai ʻoku nau liliu ʻa e ʻū tohi Fakatohitapú ki he lea ʻe 500
PĒNINI
SOLOVĒNIA
ʻITIOPEA
PILITĀNIA