Fakatahatahaʻi ʻa e Kakai mei he Lea Kotoa Pē

¹ ʻOku fakahoko ʻa e Folofola ʻa e ʻOtuá! Ko e kakai “mei he ngaahi lea kehekehe ʻo e ngaahi puleʻanga” ʻoku nau tali ʻa e lotu moʻoní. (Sak. 8:23) ʻOku anga-fēfē hono tokoniʻi ʻe he Kau Fakamoʻoni ʻa Sihová ʻa e faʻahinga tāutaha ʻi he ‘ngaahi matakali, ngaahi faʻahinga, mo e ngaahi lea’ kotoa pē ke nau hoko ki ha tuʻunga maʻa ʻi he ʻao ʻo Sihová, fakataha mo e ʻamanaki ki he hao moʻui ʻi he “mamahi lahi”?​—Fkh. 7:​9, 14.

² Tali ʻa e Kautaha ʻa e ʻOtuá: Kuo fokotuʻutuʻu ʻe he Kulupu Pulé ke ʻai ʻa e ʻū tohi faka-Tohitapú ke ala maʻu ia ʻi he lea nai ʻe 380 koeʻuhi ke lava ai ʻe he kakai ʻi he māmaní kotoa ʻo mahinoʻi lelei ʻa e mahuʻinga ʻo e ongoongo leleí. Ko hono teuteuʻi mo hono pulusi ʻa e ʻū tohí ʻi he ngaahi lea lahi, ko ha ngāue lahi fakaʻulia ia. ʻOku kau ki ai hono fakatahatahaʻi ʻa e ngaahi timi ʻo e kau liliu lea taau mo hono ʻoange kia kinautolu ʻa e tokoni ʻoku nau fiemaʻú ke liliu ʻaki ʻetau ʻū tohí ki he ngaahi lea kotoa ko ení, pea pehē ki hono paaki mo hono fakaheka vaka ʻa e nāunaú. Kae kehe, ko e ngafa tefitó, ʻoku fakahoko ia ʻe he kau malanga tāutaha ʻo e Puleʻangá, ʻa ia ʻoku nau ʻoatu ʻa e pōpoaki fakahaofi moʻui ʻa e Tohitapú ki he kakaí.

³ Ko Hono Tali ʻa e Polé: ʻOku maʻu he taimí ni ʻa e ngaahi kakai lea muli tokolahi ʻaupito ʻi he ngaahi feituʻu lahi. Ke aʻu ki he kakaí ni mo e ongoongo leleí, ʻoku feinga ʻa e tokolahi ʻo e kau sevāniti ʻa e ʻOtuá ke ako ʻa e ngaahi lea ʻoku lahi ʻi honau feituʻú hangē ko e lea faka-Siainá, faka-Niueé, faka-Haʻamoá mo e faka-Tongá. ʻOku ako ʻe he niʻihi kehe ʻa e Lea Fakaʻilongá. ʻI he feituʻu ngāue ʻo e vaʻa ʻi Nuʻu Silá ʻoku ʻi ai ʻa e ngaahi fakatahaʻanga ʻe 18 mo e kulupu ʻe 5 ʻoku nau malanga ʻi he lea ʻe 8 kehe ia mei he lea faka-Pilitāniá. Ko e kakai ʻe niʻihi kuo teʻeki ai ʻaupito te nau fanongo ʻia Sihova pe ʻiloʻi ha meʻa fekauʻaki mo e Tohitapú ʻoku nau tali ʻa e moʻoni ʻo e Folofola ʻa e ʻOtuá.​—Loma 15:21.

⁴ ʻE lava ke tau fakafitefitaʻa ke toe kakato ange ʻi hono talaki ʻa e ongoongo leleí ki he kakai ʻi hotau feituʻú ʻa ia ʻoku nau mei ha fonua kehé? (Kol. 1:​25) ʻOku fokotuʻutuʻu maau ʻe ha ngaahi fakatahaʻanga ʻa e ngāue fakamalanga ʻi he feituʻu muli fakalotofonuá. ʻOku ʻuluaki ako feʻunga ʻa e leá ʻe he kau malangá ke ʻoatu ai ha lea kamata faingofua hangē ko e: “Mālō e lelei. Ko ha ongoongo lelei eni maʻau. [Tuʻuaki leva ha tuleki pe polosiua ʻoku ala maʻu ʻi he lea ko iá.] Nofo ā.” ʻOku tāpuakiʻi moʻoni ʻe Sihova ʻa e fanga kiʻi kamata iiki peheé!

⁵ Ko e pōpoaki ʻo e Puleʻangá ʻoku fakamānako ia ki he kakai ʻo e ʻātakai mo e lea kotoa pē. Tau puke ʻa e faingamālié ke vahevahe atu ia kia kinautolu.