ʻIkai ʻAupito Fuʻu Tōmui ke Tauhi ki he ʻOtuá
ʻI Málaga, ʻi he fakatonga ʻo Sipeiní, ko ha faʻē mo haʻane tama, ʻokú na fakatou hingoa ko Ana, naʻá na papitaiso ai ʻi Tīsema 19, 2009. Naʻá na kau ʻi he lotolotonga ʻo e kakai ʻe toko 2,352 naʻa nau fou ʻi he sitepu ko iá ʻi Sipeini he lolotonga ʻo e 2009. Ka naʻe ʻi ai ha meʻa makehe fekauʻaki mo e faʻē ko ení mo ʻene tamá—ko hona taʻumotuʻá. Naʻe taʻu 107 ʻa e taha pea taʻu 83 ʻa e taha!
Ko e hā naʻá ne taki atu kinaua ki he papitaiso ʻi he fakahāhā ʻo ʻena fakatapui kia Sihová? ʻI he 1970 tupu siʻí, naʻe faʻa fakaafeʻi ai ʻe ha kaungāʻapi ʻa Ana—ko e tamá—ke ne maʻu ʻa e Ako Tohi ʻa e Fakatahaʻangá ʻa ia naʻe fai ʻi ha ʻapi ʻo ha Fakamoʻoni. Naʻe maʻu ia ʻe Ana ʻi he taimi ki he taimi. Kae kehe, koeʻuhi ko ʻene ngāue paʻangá, naʻe ʻikai ke toe fakalakalaka ange ʻa Ana.
ʻI he taʻu nai ʻe hongofulu ki mui ai, ko e niʻihi ʻo e fānau ʻa Ana naʻe kamata ke nau ako Tohi Tapu pea naʻa nau hoko ʻi ha taimi ko e kau sevāniti ʻa Sihova. Ko e taha ʻo kinautolu, ko Mari Carmen, naʻe faifai pē ʻo ne toe fakaake ʻa e ʻofa ʻa ʻene faʻeé ki he moʻoni Fakatohitapú pea tokoniʻi ia ke ne tali ha ako Tohi Tapu. Ko e kui-fefine leva ʻa Mari Carmen, ʻa Ana lahi, naʻá ne toe fakahāhā ʻa e mahuʻingaʻia ʻi he Tohi Tapú. Naʻe faifai atu pē, ʻo fou ʻa e toko hongofulu ʻo e fāmili ko ení ʻi he sitepu ko e papitaisó.
ʻI he ʻaho ʻo ʻena papitaisó, ko e ongo Ana, ʻa e faʻeé mo ʻene tamá, naʻá na fiefia lahi ʻaupito. “Kuo failelei ʻaupito mai ʻa Sihova kiate au, ʻi hono fakaʻatā ke u hoko ʻo ʻiloʻi iá,” ko e lau ia ʻa e taʻu 107 ko Ana. “Ki muʻa ke hoko mai ʻa e Palataisí,” ko e tānaki mai ia ʻa ʻene tamá, “ʻoku ou loto ke tauhi kia Sihova, fai ʻa hono finangaló pea malangaʻi ʻa e ongoongo leleí ʻi he lahi taha ʻo ʻeku malavá.”
Ko e meʻa ʻokú ne ʻomai ʻa e fiefia makehe ki he ongo uitou ko ení ko hono maʻu ʻa e ngaahi fakatahá. “ʻOku ʻikai te na tō mei ha fakataha ʻe taha,” ko e lau ia ʻa e taha ʻo e kau mātuʻa ʻi heʻena fakatahaʻangá. “ʻOkú na mateuteu maʻu pē ke tali ʻi he Ako Taua Leʻo.”
Ko ʻena faʻifaʻitakiʻanga faitōnungá ʻoku fakamanatu mai ai ha uitou ko ʻAna ʻa ia ‘naʻe ʻikai tō ia mei he Temipalé, ka ne tauhi ki he ʻOtuá ʻaki ʻa e ʻaukai mo e lotu ʻi he po mo e ʻaho.’ Naʻe iku ʻa e meʻá ni ki heʻene maʻu ʻa e monū ʻo e sio ki he kiʻi tamasiʻi ko Sīsuú. (Luke 2:36-38) ʻI hono taʻu 84, naʻe ʻikai ʻaupito fuʻu motuʻa ʻa ʻAna ke tauhi kia Sihova, pea ʻoku pehē pē mo e ongo Ana ʻe toko ua he ʻaho ní.
ʻOku ʻi ai hao ngaahi kāinga ʻoku nau loto-lelei ke fanongo ki he pōpoaki mei he Tohi Tapú? Pe kuó ke fetaulaki mo ha tokotaha mahuʻingaʻia taʻumotuʻa ʻokú ne loto-lelei ke fanongo kiate koe ʻi hoʻo ʻaʻahi ki hono ʻapí? Ko e faʻahinga peheé ʻe lava ke nau hoko ʻo hangē ko e ongo Ana ʻi he meʻa ko eni naʻe hokosiá, he ʻoku ʻikai ʻaupito fuʻu tōmui ke kamata tauhi ki he ʻOtua moʻoní, ʻa Sihova.
[Fakamatala ʻi he peesi 25]
“Kuo failelei ʻaupito mai ʻa Sihova kiate au”
[Fakamatala ʻi he peesi 25]
“Ki muʻa ke hoko mai ʻa e Palataisí, ʻoku ou loto ke tauhi kia Sihova”