Ako mei he Folofola ʻa e ʻOtuá

Ko e Hā e Taumuʻa ʻa e ʻOtuá ki he Māmaní?

ʻOku langaʻi hake ʻi he kupu ko ení ʻa e ngaahi fehuʻi kuó ke ʻeke nai pea fakahaaʻi ai ʻa e feituʻu ʻe lava ke ke lau ai ʻa e ngaahi talí ʻi hoʻo Tohi Tapú. ʻE fiefia ʻa e Kau Fakamoʻoni ʻa Sihová ke fetalanoaʻaki mo koe ki he ngaahi tali ko ení.

1. Ko e hā e taumuʻa ʻa e ʻOtuá ki he māmaní?

Ko e māmaní ʻa e ʻapi ʻo e tangatá. Hili hono fakatupu ʻa e kau ʻāngeló ke nau nofo ʻi hēvaní, naʻe ngaohi ʻe he ʻOtuá ʻa e tangatá ke fiefia ʻi he māmaní. (Siope 38:4, 7) Ko ia ai, naʻe tuku ʻe Sihova ʻa e ʻuluaki tangatá ʻi ha palataisi fakaʻofoʻofa naʻe ui ko ʻĪteni pea ʻoange kiate ia mo ʻene fānau ʻi he kahaʻú ʻa e ʻamanaki ke fiefia he moʻui taʻehanongataʻanga ʻi he māmaní.—Senesi 2:15-17; lau ʻa e Sāme 115:16.

Ko e ngoue ʻo ʻĪtení naʻá ne kāpui ha kiʻi konga siʻi pē ʻo e māmaní. Ko e ʻuluaki ongo meʻa fakaetangatá, ʻa ʻĀtama mo ʻIvi, naʻe pau ke na maʻu fānau. ʻI he fakaʻaʻau ke tokolahi ange ʻa e fāmili ʻo e tangatá, naʻe pau ke nau ngoueʻi ʻa e māmaní pea ngaohi ia ko ha palataisi. (Senesi 1:28) Heʻikai ʻaupito ke fakaʻauha ʻa e māmaní.—Lau ʻa e Sāme 104:5.

2. Ko e hā ʻoku ʻikai palataisi ai he taimí ni ʻa e māmaní?

Naʻe talangataʻa ʻa ʻĀtama mo ʻIvi ki he ʻOtuá, ko ia naʻe kapusi ai kinaua mei ʻĪteni. Naʻe mole ʻa e palataisí, pea kuo ʻikai lavameʻa ha tangata ʻi hano fakafoki mai ia. ʻOku pehē ʻe he Tohi Tapú: “Ko e fonua [‘māmaní,’ NW] e kuo ne tuku ki he nima ʻo e angahala.”—Siope 9:24; lau ʻa e Senesi 3:23, 24.

Ka kuo ʻikai ngalo ʻia Sihova ʻa ʻene muʻaki taumuʻa ki he faʻahinga ʻo e tangatá, pea heʻikai taʻelavameʻa ʻa e ʻOtuá. (Aisea 45:18) Te ne toe fakafoki ʻa e matakali ʻo e faʻahinga ʻo e tangatá ki he tuʻunga naʻá ne ʻuhinga ke nau ʻi aí.—Lau ʻa e Sāme 37:11.

3. ʻE anga-fēfē hono toe fakafoki mai ʻe he ʻOtuá ʻa e melinó ki he māmaní?

Ke maʻu ʻe he faʻahinga ʻo e tangatá ʻa e melinó, kuo pau ke ʻuluaki toʻo ʻe he ʻOtuá ʻa e kakai fulikivanú. ʻI he tau ʻo ʻĀmaketoné, ʻe fakaʻauha ai ʻe he kau ʻāngelo ʻa e ʻOtuá ʻa e faʻahinga kotoa ʻoku fakafepaki ki he ʻOtuá. ʻE tuku pōpula ai ʻa Sētane ʻi he taʻu ʻe 1,000, ka ko e kakai ʻoku ʻofa ki he ʻOtuá te nau hao ke fiefia ʻi ha fokotuʻutuʻu foʻou ʻi he māmaní.—Lau ʻa e Fakahā 16:14, 16; 20:1-3; 21:3, 4.

4. ʻE ngata ʻafē ʻa e faingataʻá?

Lolotonga ʻa e taʻu ʻe 1,000, ʻe pule mai ai ʻa Sīsū mei hēvani ki he māmaní pea fakafoki ia ki ha palataisi. Pehē foki, te ne kaniseli ʻa e angahala ʻa e faʻahinga ʻoku ʻofa ki he ʻOtuá. Ko ia ʻe fakangata ai ʻe Sīsū ʻa e puké, hoholo ke motuʻá, mo e maté.—Lau ʻa e Aisea 11:9; 25:8; 33:24; 35:1.

ʻE fakaʻauha ʻafē ʻe he ʻOtuá ʻa e kovi ʻi he māmaní? Naʻe ʻomai ʻe Sīsū ha “fakaʻilonga” ke fakahaaʻi ʻaki ʻa e taimi ʻoku ofi ai ʻa e ngataʻangá. Ko e ngaahi tuʻunga lolotonga ʻi he māmaní ʻoku fakamanamanaʻi ai ʻa e hao moʻui ʻa e tangatá pea fakahaaʻi ai ʻoku tau lolotonga moʻui ʻi he “faka ʻosi ʻo e kuonga.”—Lau ʻa e Mātiu 24:3, 7-14, 21, 22; 2 Timote 3:1-5.

5. Ko hai ʻe nofo ʻi he Palataisi he kahaʻú?

Naʻe fakahinohino ʻe Sīsū hono kau muimuí ke nau ngaohi ākonga pea ke akoʻi kinautolu ki he ngaahi founga ʻofa ʻa e ʻOtuá. (Mātiu 28:19, 20) ʻI māmani lahi, ʻoku teuʻi ai ʻe Sihova ʻa e kakai ʻe laui miliona ki he moʻui ʻi ha fokotuʻutuʻu foʻou ʻi he māmaní. (Sefanaia 2:3) ʻI he ngaahi Fale Fakatahaʻanga ʻo e Kau Fakamoʻoni ʻa Sihová, ʻoku ako ai ʻa e kakaí ki he founga ke hoko ai ko e ngaahi husepāniti mo e tamai lelei ange mo e founga ke hoko ai ko e ngaahi uaifi mo e faʻē lelei ange. Ko e fānaú mo e mātuʻá ʻoku nau ako fakataha fekauʻaki mo e makatuʻunga ke tui ai ki ha kahaʻu lelei ange.—Lau ʻa e Maika 4:1-4.

ʻI he Fale Fakatahaʻangá, te ke fetaulaki ai mo e kakai ʻoku ʻofa ki he ʻOtuá pea loto ke ako ke fakahōifuaʻi ia.—Lau ʻa e Hepelu 10:24, 25.

Ki ha fakamatala lahi ange, sio ki he vahe 3 ʻo e tohi ko eni, Ko e hā ʻOku Akoʻi Moʻoni ʻe he Tohi Tapú?, ko e pulusi ʻe he Kau Fakamoʻoni ʻa Sihová.