Ko e Hā ʻa e Taumuʻa ʻa e ʻOtuá ki he Māmaní?

1. Ko e hā naʻe fakatupu ai ʻe he ʻOtuá ʻa e māmaní?

Naʻe foaki mai ʻe Sihova ʻa e māmaní ki he kakai tangatá mo e kakai fefiné. Ko hotau ʻapí ia. Ko ia ai, ko e ʻuluaki ongo meʻa fakaetangatá, ʻa ʻĀtama mo ʻIvi, naʻe ʻikai ke fakatupu kinauá ke na fakakakai ʻa hēvani​—naʻe ʻosi fakatupu ʻe he ʻOtuá ia ʻa e kau ʻāngelo ke nau nofo ʻi hēvani. (Siope 38:4, 7) Kae kehe, naʻe ʻave ʻe he ʻOtuá ʻa e ʻuluaki tangatá ʻo tuku ʻi ha palataisi fakaʻofoʻofa naʻe ui ko e ngoue ʻo ʻĪtení. (Sēnesi 2:15-17) Naʻe ʻoange ʻe Sihova kiate ia pea mo ʻene fānau ʻi he kahaʻú ʻa e ʻamanaki ko e moʻui fiefia taʻehanongataʻanga ʻi he māmaní.​—Lau ʻa e Saame 37:29; 115:16.

ʻI he kamatá, ko e ngoue ʻo ʻĪtení pē naʻe palataisí. Naʻe fiemaʻu ki he ʻuluaki ongo meʻa fakaetangatá ke na fakafonu ʻa e māmaní ʻaki ʻena fānaú. ʻI he ʻalu ʻa e taimí, naʻe pau ai ke na pule ki he foʻi kolopé fakakātoa​—ʻo ʻai ia ko ha palataisi. (Sēnesi 1:28) ʻE ʻikai ʻaupito ke fakaʻauha ʻa e māmaní. ʻE hoko maʻu ai pē ia ko e ʻapi ʻo e faʻahinga ʻo e tangatá.​—Lau ʻa e Saame 104:5.

Sio ʻi he vitiō Ko e Hā Naʻe Fakatupu Ai ʻe he ʻOtuá ʻa e Māmaní?

2. Ko e hā ʻoku ʻikai ko ha palataisi ai ʻa e māmaní he taimi ní?

Naʻe talangataʻa ʻa ʻĀtama mo ʻIvi ki he ʻOtuá, ko ia naʻe hanga ai ʻe Sihova ʻo tuku kinaua ki tuʻa mei he ngoué. Naʻe mole ʻa e palataisí, pea kuo ʻikai ha tangata kuó ne lavameʻa ʻi hano toe fakafoki mai ia. ʻOku pehē ʻe he Tohi Tapú: “Kuo tuku atu ʻa e māmaní ki he fulikivanú.”​—Siope 9:24.​—Lau ʻa e Sēnesi 3:23, 24.

Kuo siʻaki ʻe Sihova ʻene muʻaki taumuʻa ki he faʻahinga ʻo e tangatá? ʻIkai! ʻOku māfimafi-aoniu ia. ʻOku ʻikai malava ke ne taʻelavameʻa. (ʻAisea 45:18) Te ne toe fakafoki ʻa e matakali ʻo e tangatá ki he tuʻunga naʻá ne taumuʻa ki aí.​—Lau ʻa e Saame 37:11, 34.

3. ʻE anga-fēfē hono toe fakafoki mai ʻa e Palataisí?

ʻE toe fakafoki mai ʻa e palataisí ki he māmaní he lolotonga ʻa e pule ʻa Sīsū ko e Tuʻi ʻa e ʻOtuá. ʻI ha tau ʻoku ui ko ʻĀmaketone, ʻe taki ai ʻe Sīsū ʻa e kau ʻāngelo ʻa e ʻOtuá pea fakaʻauha ʻa e faʻahinga kotoa ʻoku nau fakafepaki ki he ʻOtuá. Hili iá ʻe tuku pilīsone ʻe Sīsū ʻa Sētane ʻi he taʻu ʻe 1,000. ʻE hao atu ʻa e kakai ʻa e ʻOtuá ʻi he fakaʻauhá koeʻuhí ʻe tataki mo maluʻi kinautolu ʻe Sīsū. Te nau fiefia ʻi he moʻui taʻengata ʻi he Palataisi he māmaní.​—Lau ʻa e Fakahā 20:1-3; 21:3, 4.

4. ʻE ngata ʻafē ʻa e faingataʻá?

ʻE ʻomi ʻafē ʻe he ʻOtuá ha ngataʻanga ki he kovi ʻi he māmaní? Naʻe ʻomai ʻe Sīsū ha “fakaʻilonga” ke fakahaaʻi ʻa e taimi ʻe ofi mai ai ʻa e ngataʻangá. Ko e ngaahi tuʻunga lolotonga ʻo e māmaní ʻokú ne fakamanamanaʻi ʻa e hao ʻa e tangatá mo fakahaaʻi mai ʻoku tau lolotonga moʻui ʻi he “fakaʻosiʻosi ʻo e fokotuʻutuʻu lolotongá.”​—Lau ʻa e Mātiu 24:3, 7-14, 21, 22.

ʻI he lolotonga ʻa e pule taʻu ʻe 1,000 ʻa Sīsū mei hēvani ki he māmaní, te ne fakangata ai ʻa e faingataʻa kotoa pē. (ʻAisea 9:6, 7; 11:9) Tuku kehe ʻene ngāue ko e Tuʻí, ʻe ngāue ʻa Sīsū ko e Taulaʻeiki Lahi pea te ne kaniseli ʻa e ngaahi angahala ʻa e faʻahinga ʻoku ʻofa ki he ʻOtuá. Ko ia, fakafou ʻia Sīsū, ʻe toʻo ʻosi ai ʻe he ʻOtuá ʻa e mahamahakí, hoholo ke motuʻá, mo e maté.​—Lau ʻa e ʻAisea 25:8; 33:24.

5. Ko hai ʻe nofo ʻi he Palataisi he kahaʻú?

Ko e kakai ʻoku talangofua ki he ʻOtuá te nau nofo ʻi he Palataisí. (1 Sione 2:17) Naʻe fekauʻi atu ʻe Sīsū hono kau muimuí ke nau kumi ki he kakai anga-vaivaí pea akoʻi kinautolu ki he founga ke hoko ai ʻo fakahōifua ki he ʻOtuá. ʻI he ʻahó ni, ʻoku teuʻi ai ʻe Sihova ʻa e kakai ʻe laui miliona ki he moʻui ʻi he Palataisi he kahaʻú ʻi he māmaní. (Sēfanaia 2:3) ʻI he ngaahi Fale Fakatahaʻanga ʻo e Kau Fakamoʻoni ʻa Sihová, ʻoku ako ai ʻa e kakaí ke nau hoko ko e ngaahi husepāniti mo e ngaahi tamai lelei ange pea hoko ko e ngaahi uaifi mo e ngaahi faʻē lelei ange. ʻOku lotu mo ako fakataha ʻa e fānaú mo e ngaahi mātuʻá ki he founga ke maʻu ʻaonga ai mei he ongoongo leleí.​—Lau ʻa e Maika 4:1-4.