“Fakafepaki ʻOku Fiemaʻu ke Fakaʻapaʻapaʻi”
LOLOTONGA hono taimi fakatupu ʻauha ʻi hono tuʻunga ko e ʻulu ʻo Siamané, naʻe maʻu ai ʻe ʻAtolofi Hitilā ʻa e tohi ʻe laui mano. ʻI he 1945, hili hono maʻu ʻe he kau Lūsiá ʻa e vahefonua takatakai ʻi Pēliní, naʻe ʻave ai ʻa e lahi ʻo e ngaahi tohí ni ki Mosikou ʻo tuku tauhi ai. Ko e faihisitōlia ko Henrik Eberle kuó ne sivisiviʻi ʻa e laui afe ʻo e ngaahi tohi ko iá ʻi he tauhiʻanga tohi ʻi Mosikoú koeʻuhi ke vakaiʻi pe ko hai naʻe faitohi kia Hitilaá pea ko e hā hono ʻuhingá. Naʻe pulusi ʻe Eberle ʻene ngaahi fakamulitukú ʻi he tohi naʻe fakakaveinga ko e Briefe an Hitler (Ngaahi Tohi kia Hitilā).
“Ko e kau faiakó mo e kau akó, kau tāupoʻoú mo e kau pātelé, ko e kau taʻemaʻungāué mo e kau tangata pisinisi māʻolungá, kau ʻamelalí mo e kau sōtia Nasi māʻulaló—naʻa nau faitohi kotoa kia Hitilā,” ko e lau ia ʻa Dr. Eberle. “Naʻe fakalāngilangiʻi ia ʻe he niʻihi ko e Mīsaia kuo toe ʻaloʻi mai; ko e niʻihi naʻa nau vakai kiate ia ko e uho tonu ʻo e fulikivanú.” Naʻe maʻu ʻe Hitilā ha ngaahi tohi fakafepaki mei he kau ʻofisiale ʻo e siasí fekauʻaki mo e ngaahi fakamālohi ne fakahoko ʻe he kau Sōsialisi Fakafonuá, pe kau Nasí? Ne ʻi ai ha tohi pehē ʻe niʻihi, ka naʻe siʻi pea tātātaha.
Kae kehe, ʻi he ngaahi tauhiʻanga tohi ʻi Mosikoú, ne maʻu ai ʻe Eberle ha faile naʻe ʻi ai ha ngaahi tohi lahi naʻe ʻave kia Hitilā ʻe he Kau Fakamoʻoni ʻa Sihova mei he ngaahi feituʻu kehekehe ʻo Siamané, ʻi he fakafepaki ki he tōʻonga ʻa e kau Nasí. Ko hono moʻoní, ko e Kau Fakamoʻoni mei he fonua nai ʻe 50 naʻa nau ʻave kia Hitilā ʻa e ngaahi tohi mo e ngaahi mākoni ʻe 20,000 nai ʻo fakafepakiʻi ʻa hono ngaohikoviʻi ʻo e Kau Fakamoʻoni ʻa Sihová. Naʻe puke ʻa e Kau Fakamoʻoni ʻe laui afe, pea ko e lauingeau naʻe fakapoongi pe mate hili hono ngaohikovia ʻe he kau Nasí. ʻOku fakamulituku ʻaki ʻe Dr. Eberle: “ʻI he vakai atu ki he laui miliona ʻo e kau maʻukovia ʻe he pule faka-Nasí, ko e tokolahi ko eni [ʻo e kau Fakamoʻoni maʻukoviá] ʻoku hā tokosiʻi. Ka neongo ia ʻoku fakamoʻoni ia ki ha ngāue fakafepaki fakatahataha mo ʻikai toe afe ʻoku fiemaʻu ke fakaʻapaʻapaʻi.”