Founga ʻe Lava Ke Tau Tokoni Ai ke Feau ʻa e Ngaahi Fiemaʻu ʻa e Niʻihi Kehé
“NAʻE mapuna hake ha fakamālohi ʻi he hili hono fai ha fili, ʻo ʻai ai ʻa e Kau Fakamoʻoni ʻa Sihova ʻe laui afe ke hola mei honau ngaahi ʻapí,” ko e lau ia ʻa François, ko ha mātuʻa ʻi ha fonua langalanga hake. “Naʻe fakaʻaʻau ke siʻisiʻi ʻa e meʻakaí mo e faitoʻó, pea ko e meʻa naʻe toé naʻe mamafa ʻaupito. Naʻe tāpuni ʻa e ngaahi pangikeé, pea ko e ngaahi mīsini toho paʻangá naʻe ʻikai ke ʻi ai ha meʻa ai pe ʻikai toe ngāue.”
Ko e fanga tokoua mei he ʻōfisi vaʻá, naʻa nau kamata ke ʻave vave ʻa e paʻanga mo e ngaahi tokoni fakavavevave ki he Kau Fakamoʻoni ʻa ia naʻa nau hola ʻo fakatahataha ʻi he ngaahi Fale Fakatahaʻanga takatakai ʻi he fonuá. Ko e ngaahi kulupu fakafepakí naʻa nau taʻofi ʻa e ngaahi halá, ka koeʻuhí naʻe ʻilo ʻe he ongo faʻahí fakatouʻosi ko e Kau Fakamoʻoní ʻoku nau hanganaki tuʻuʻatā fakaʻaufuli, naʻe faʻa fakaʻatā ai ʻa e ngaahi meʻalele ʻa e vaʻá ke ʻalu.
“ʻI he fononga atu ki he taha ʻo e Fale Fakatahaʻangá, naʻe fanaʻi ʻe he kau sinaipá ʻemau meʻalelé,” ko e lau ia ʻa François. “Kae kehe, naʻe fakalaka pē ʻa e ngaahi foʻi mahafú ʻia kimautolu. ʻI he sio ki he lele mai ha sōtia kia kimautolu, ʻokú ne toʻo ha meʻafana, naʻa mau taʻofi kikī ʻa e meʻalelé ʻo tafoki, ʻo oma ki he vaʻá. Naʻa mau fakamālō kia Sihova ʻi heʻemau hao moʻuí. ʻI he ʻaho hono hokó, ko e fanga tokoua ʻe toko 130 ʻi he Fale Fakatahaʻanga ko iá naʻa nau hao. Naʻe haʻu ʻa e niʻihi ki he ʻōfisi vaʻá, ʻa ia naʻa mau tokangaʻi fakalaumālie mo fakamatelie ai kinautolu kae ʻoua ke ʻosi atu ʻa e fakatamakí.”
“Naʻe maʻu ki mui ʻe he ʻōfisi vaʻá ʻa e ngaahi tohi mei he fanga tokoua mei he feituʻu kehekehe ʻi he fonuá ʻo fakahaaʻi ʻenau houngaʻia lahi,” ko e lau ia ʻa François. “Ko e hokosia ʻa e anga hono tokoniʻi kinautolu ʻe honau fanga tokoua mei he ngaahi feituʻu kehekehé, naʻe tupulaki ai ʻenau tuipau kia Sihová.”
ʻI he fehangahangai mo e ngaahi fakatamaki fakanatula mo fakatupunga ʻe he tangatá, ʻoku ʻikai ke tau tala ange ki he fanga tokoua mo e fanga tuofāfine masivá ke nau ‘māfana mo mākona.’ (Sēm. 2:15, 16) Ka, ʻoku tau feinga ke tokonaki ʻenau ngaahi fiemaʻu fakamatelié. ʻI he tuʻunga meimei tatau, hili hono maʻu ʻa e fakatokanga fekauʻaki mo ha teu hoko ha honge ʻi he ʻuluaki senitulí, “naʻe fakapapauʻi ʻe he kau ākongá, ko e tokotaha taki taha ʻo fakatatau ki he meʻa te ne malavá, ke ne fai ha tokoni ki he fanga tokoua ʻoku nofo ʻi Siuteá.”—Ngā. 11:28-30.
ʻI he tuʻunga ko e kau sevāniti ʻa Sihová, ʻoku tau vēkeveke ke tokoniʻi ʻa e faʻahinga masivá ʻi ha founga fakamatelie. Kae kehe, ʻoku toe ʻi ai ha fiemaʻu fakalaumālie ki he kakaí. (Māt. 5:3) Ke tokoniʻi kinautolu ke lāuʻilo fekauʻaki mo e fiemaʻu ko iá pea fai ha meʻa ke fakalato iá, naʻe fekauʻi ʻe Sīsū hono kau muimuí ke ngaohi ākonga. (Māt. 28:19, 20) Ko kitautolu tāutaha ʻoku tau foaki atu ʻa e lahi hotau taimí, iví mo e ngaahi koloá ke fakahokoʻaki ʻa e fekau ko iá. ʻI he tuʻunga ko ha kautahá, ʻoku tau ngāueʻaki ʻa e niʻihi ʻo e paʻanga ʻoku foakí ke tokonaki ʻa e tokoni fakamatelie, ka ʻoku ngāueʻaki tefito ʻa e ngaahi tokoní ke pouaki ʻa e ngaahi meʻa ʻo e Puleʻangá mo fakamafola ʻa e ongoongo leleí. ʻOku tau fakahāhā ai ʻetau ʻofa ki he ʻOtuá pea ki hotau ngaahi kaungāʻapí.—Māt. 22:37-39.
Ko e faʻahinga ʻoku nau poupouʻi ʻa e ngāue ʻi māmani lahi ʻa e Kau Fakamoʻoni ʻa Sihová ʻe lava ke nau fakapapauʻi ko ʻenau ngaahi tokoní ʻoku ngāueʻaki ʻi he founga totonu pea ʻi he lelei tahá. ʻOku malava ke ke tokoni ke ʻoatu ʻa e fakafiemālie ki ho fanga tokoua ʻoku fusimoʻomó? ʻOkú ke holi ke poupouʻi ʻa e ngāue ngaohi-ākongá? Kapau ko ia, “ʻoua te ke taʻofi ha lelei meiate kinautolu ʻoku ʻonautolu ia, ʻosi ʻoku mafai ʻe ho nima ke fai.”—Pal. 3:27.