“Ko e Ngaue Lahi”

KO E taimi eni ki ha fakataha mātuʻaki mahuʻinga ʻi Selusalema. Naʻe fakatahatahaʻi mai ʻe Tuʻi Tēvita ʻa e kotoa ʻene kau pilinisí, kau ngāue ʻi he lotoʻā ʻo e tuʻí mo e kau tangata toʻá. Naʻa nau fiefia ke fanongo ki ha fanongonongo makehe. Kuo vaheʻi ʻe Sihova ʻa e foha ʻo Tēvita ko Solomoné ke ne langa ha fuʻu fale naʻe fakatapui ki he lotu ki he ʻOtua moʻoní. Naʻe maʻu ʻe he tuʻi taʻumotuʻa ko eni ʻo ʻIsilelí ʻa e palani ki he langá fakafou ʻi hano fakamānavaʻi pea ʻoange ia kia Solomone. “Ko e ngaue lahi,” ko e lea ia ʻa Tēvitá, “he talaʻehai ko e palasi maʻae tangata, ka maʻa Sihova Elohimi.”—1 Kal. 28:1, 2, 6, 11, 12; 29:1.

ʻOku ʻeke leva ʻe Tēvita ʻa e fehuʻi ko ení: “Pea ko hai ʻoku loto lelei he ʻaho ni ke ʻatu ʻene meaʻofa kia Sihova?” (1 Kal. 29:5) Kapau naʻá ke ʻi ai, ʻe fēfē haʻo tali? ʻE ueʻi ai koe ke ke poupouʻi ʻa e ngāue lahi ko ení? Naʻe ngāue leva ʻa e kau ʻIsilelí. Ko e moʻoni, naʻe “fiefia ʻa e kakai ʻenau fai lotolelei, he naʻa nau ʻatu fie ʻatu kia Sihova ʻaki honau loto kotoa.”—1 Kal. 29:9.

ʻI he ngaahi senituli ki mui aí, naʻe fokotuʻu ʻe Sihova ha meʻa naʻe lahi ange ia ʻi he temipalé. Naʻá ne fokotuʻu ʻa e fuʻu temipale fakalaumālie, ʻa ia ko e fokotuʻutuʻu maʻá e faʻahinga ʻo e tangatá ke nau ʻunuʻunu kiate ia ʻi he lotu ʻo makatuʻunga ʻi he feilaulau ʻa Sīsuú. (Hep. 9:11, 12) ʻOku anga-fēfē hono tokoniʻi ʻe Sihova ʻa e kakaí ke nau hoko ʻo fakalelei mo ia ʻi he ʻaho ní? Fakafou ʻi heʻetau ngāue ngaohi-ākongá. (Māt. 28: 19, 20) Ko e ola ʻo e ngāue ko ení ʻoku fakahoko ai ha ngaahi ako Tohi Tapu ʻe laui miliona, papitaiso ai ʻa e kau ākonga ʻe laui afe pea fokotuʻu mo e ngaahi fakatahaʻanga foʻou ʻe lauingeau ʻi he taʻu taki taha.

ʻOku hoko ʻa e tupu ko ení ʻo fiemaʻu ai ke pulusi ʻa e ʻū tohi Fakatohitapu lahi ange, langa mo tauhi ʻo e ngaahi Fale Fakatahaʻangá pea fiemaʻu mo e ngaahi feituʻu faiʻanga ʻasemipilī mo e fakataha-lahi. ʻIkai ʻokú ke tui ko ʻetau ngāue ki hono talaki ʻa e ongoongo leleí ko e ngāue lahi mo fakafiefiá?—Māt. 24:14.

Ko ʻetau ʻofa ki he ʻOtuá mo e kaungāʻapí pea pehē ki he fakavavevave ʻo e ngāue malangaʻi ʻo e Puleʻangá, ʻokú ne ueʻi ai ʻa e kakai ʻa e ʻOtuá ke nau “loto lelei . . . ke ʻatu ʻene meaʻofa kia Sihova” ʻaki ʻenau fai ha tokoni loto-fiefoaki. He meʻa fakafiefia ē ke ‘fakaʻapaʻapa kia Sihova ʻaki [ʻetau] koloá’ pea sio ki he anga hono ngāueʻaki faitōnunga mo fakapotopoto ʻa e ngaahi koloa ko ení ke fai ʻa e ngāue lahi taha ʻi he hisitōlia ʻa e faʻahinga ʻo e tangatá!—Pal. 3:9.

Founga ʻOku Fili Ai ʻa e Niʻihi ke Tokoni ki he Ngāue ʻi Māmani Lahí

Ko e tokolahi he ʻahó ni ʻoku nau “tuku mavahe ha meʻa,” pe vaheʻi ha paʻanga pea lī ia ʻi he ngaahi puha tokoni ʻa e fakatahaʻangá kuo leipolo ko e “Ngāue ʻi Māmani Lahí.” (1 Kol. 16:2) ʻI he māhina taki taha, ʻoku ʻoatu ai ʻe he ngaahi fakatahaʻangá ʻa e ngaahi tokoni ko ení ki he ʻōfisi ʻo e Kau Fakamoʻoni ʻa Sihova ʻa ia ʻokú ne tokangaʻi ʻa honau fonuá. ʻOku toe malava ke ke ʻave hangatonu ha ngaahi tokoni ki ha kautaha fakalao ʻoku ngāueʻaki ʻe he Kau Fakamoʻoni ʻa Sihová ʻi ho fonuá. Ke ʻiloʻi ʻa e hingoa ʻo e kautaha fakalao tefito ʻoku ngāueʻaki ʻe he Kau Fakamoʻoni ʻa Sihova ʻi ho fonuá, kātaki fetuʻutaki ki he ʻōfisi vaʻá. Ko e tuʻasila ʻo e ʻōfisi vaʻá ʻe lava ke maʻu ia ʻi he www.jw.org. Ko e faʻahinga tokoni eni ʻe lava ke ke ʻave fakahangatonú:

TOKONI FAKAHANGATONU

Ngaahi tokoni ʻoku ʻoatu fakafou fakaʻilekitulōnika ʻi he pangikeé, kaati kulētití pe fakafou ʻi he telefoní. ʻI he ngaahi vaʻa ʻe niʻihi ʻoku toe malava eni ʻo ngāueʻaki ʻa e jw.org pe ʻi ha Uepisaiti kuo ʻosi fili.
Ngaahi tokoni paʻanga, siueli, pe meʻa fakafoʻituitui mahuʻinga kehe. Kau ai ha tohi ʻoku fakahaaʻi ai ʻa e paʻanga pe ngaahi meʻa ko ha tokoni fakahangatonu.

TOKONI ʻOKU MAKATUʻUNGA

Ngaahi tokoni paʻanga ʻoku ʻi ai hono makatuʻunga ʻa ia ʻe lava ke fakafoki ki he tokotaha-foakí kapau te ne fiemaʻu ia.
Kau ai ha tohi ʻoku fakahaaʻi ai ko e tokoní ʻoku ʻi ai hono makatuʻunga.

PALANI TOKONI ʻOFA

Tānaki atu ki he ngaahi meʻaʻofa paʻangá mo e ngaahi tokoni ʻofá, ʻoku ʻi ai ʻa e ngaahi founga kehe ʻo e tokoní ke ʻaonga ki he ngāue ʻo e Puleʻangá ʻi māmani lahi. ʻOku lisi kinautolu ʻi lalo. Tatau ai pē pe ko e hā ʻa e founga pe ngaahi founga te ke saiʻia ke ngāueʻakí, kātaki ʻuluaki fetuʻutaki ki he ʻōfisi vaʻa ʻokú ne tokangaʻi ho fonuá ke sio pe ko e ngaahi founga fē ʻe ala ngāueʻaki ʻi he fonuá. Koeʻuhi ko e ngaahi fiemaʻu fakalaó mo e ngaahi lao tukuhaú ʻoku kehekehe, ʻoku mahuʻinga ke ke kumi faleʻi ki he kau faleʻi tukuhau mo e kau faleʻi fakalao tāú ki muʻa ke ke fili ʻa e founga lelei taha ke tokoni aí.

Maluʻi: Ko ha tokoni ʻoku fai, ʻaki hono fakahaaʻi ʻa e kautaha ʻoku ngāueʻaki ʻe he Kau Fakamoʻoni ʻa Sihová ko e tokotaha ia ʻoku tohi-tuku ki ai ʻa e maluʻi moʻui pe ko ha vāhenga mālōlō.

ʻAkauni Pangikē: Ko e ngaahi ʻakauni pangikeé, ngaahi setifikeiti tipōsiti, pe ngaahi ʻakauni vāhenga mālōlō fakafoʻituitui kuo fokotuʻu ko ha talāsiti pe ʻai ke ala totongi ʻi he taimi maté ki ha kautaha ʻoku ngāueʻaki ʻe he Kau Fakamoʻoni ʻa Sihová ʻo fakatatau mo e ngaahi fiemaʻu ʻa e pangikē fakalotofonuá.

ʻInasi mo e Pōnite: Ko e ngaahi ʻinasi mo e ngaahi pōnite kuo foaki ki he kautaha ʻoku ngāueʻaki ʻe he Kau Fakamoʻoni ʻa Sihová ko ha meʻaʻofa fakahangatonu pe fakafou ʻi ha tohi aleapau ke ʻoatu ʻi he maté.

Kelekele: Ko ha kelekele ʻoku ala fakatau ʻoku foaki ki he kautaha ʻoku ngāueʻaki ʻe he Kau Fakamoʻoni ʻa Sihová, ʻaki hano ʻai ko ha meʻaʻofa fakahangatonu, pe konga ʻapi ʻoku nofoʻi, ʻi hano tauhi ha kelekele ʻo e tokotaha-foakí, ʻa ia ʻe lava ke hokohoko atu ʻene nofo aí ʻi heʻene kei moʻuí.

Meʻaʻofa Totongi Fakataʻu: Ko ha paʻanga pe ko ha ngaahi maluʻi ʻoku foaki ki ha kautaha ʻoku ngāueʻaki ʻe he Kau Fakamoʻoni ʻa Sihová ʻi he malumalu ʻo ha fokotuʻutuʻu ʻa ia ʻoku maʻu ai ʻe he tokotaha-foakí, pe tokotaha kuo fakamafaiʻi ʻe he tokotaha-foakí, ha totongi pau fakataʻu ʻi he taʻu taki taha ʻo ʻene moʻuí. ʻOku maʻu ʻe he tokotaha-foakí ha toʻo tukuhau vāhenga ʻi he taʻu ʻa ia naʻe fokotuʻu ai ʻa e meʻaʻofa totongi fakataʻú.

Tohi-Tuku mo e Talāsiti: Ko e koloá pe paʻangá ʻe lava ke tohi-tuku ia ki he kautaha ʻoku ngāueʻaki ʻe he Kau Fakamoʻoni ʻa Sihová fakafou ʻi ha tohi-tuku kuo fai fakalao pe tohi-tuku ki ai ha aleapau ʻo ha talāsiti. Ko e fokotuʻutuʻu ko ení ʻe tokonaki mai nai ai ha ngaahi lelei pau ki he tukuhaú.

Hangē ko ia ʻoku fakahuʻunga ki ai ʻa e fakalea “palani tokoni ʻofa,” ko e faʻahinga tokoni ko ení ʻoku faʻa fiemaʻu ki ai ha palani ʻi he tafaʻaki ʻa e tokotaha-foakí. Ke tokoni ki he niʻihi tāutaha ʻoku nau holi ke maʻu ʻaonga mei he ngāue ʻi māmani lahi ʻa e Kau Fakamoʻoni ʻa Sihová fakafou ʻi ha founga ʻo e foaki tokoni ʻofá, kuo teuteu ai ha polosiua ʻoku fakakaveinga ko e Charitable Planning to Benefit Kingdom Service Worldwide. ʻOku ala maʻu ʻa e polosiuá ʻi he faka-Pilitāniá mo e faka-Sipeiní, pea naʻe hiki ia ke tokonaki mai ai ʻa e fakamatala ki ha ngaahi founga kehekehe ʻe lava ke faiʻaki ʻa e ngaahi foakí ʻi he taimí ni pe ʻamui ange, ʻo hangē ko ia ko e fakafou ʻi ha meʻaʻofa ʻi he maté. Ko e fakamatala ʻi he polosiua ko ení heʻikai lava ke ngāueʻaki kakato ia ʻi ho tuʻungá koeʻuhi ko e tukuhaú pe ngaahi lao kehe ʻi ho fonuá. ʻI hono ngāueʻaki ʻa e ngaahi founga ʻo e foaki ʻofa peheé, kuo malava ai ʻa e tokolahi ke tokoni ki hono poupouʻi ʻetau ngaahi ngāue fakalotú mo e ngāue ʻofa ʻi māmani lahí pea fakalahi ʻenau ngaahi maʻu ʻaonga ʻi he tukuhaú. Kapau ʻoku ala maʻu ʻi ho fonuá, ʻe lava ke maʻu ʻa e polosiuá ʻaki hano kole ha tatau mei he sekelitali ʻo e fakatahaʻanga fakalotofonuá.

Ki ha fakamatala lahi ange, fili ʻa e link “Make a Donation to Our Worldwide Work” ʻi lalo ʻi he peesi tefitó ʻo e jw.org, pe fetuʻutaki ki he ʻōfisi vaʻá.