ʻOkú Ke Tuipau Kuó Ke Maʻu ʻa e Moʻoní? Ko e Hā Hono ʻUhingá?

1. Ko e hā kuo fai ʻe he kau taki lotu Katoliká mo e Palotisaní lolotonga ʻa e ngaahi taimi taú?

ʻOKU fiemaʻu ʻe he ʻOtuá ʻa e kau Kalisitiané ke nau ʻalu ki he taú pea tāmateʻi ʻa e kakai mei he ngaahi fonua kehé? ʻI he taʻu ʻe 100 kuohilí, ko e tokolahi kuo nau ui kinautolu ko e kau Kalisitiané kuo nau fetāmateʻaki ʻi he taú. Kuo tāmateʻi ʻe he kau Katoliká ʻa e kau Katolika, pea kuo tāmateʻi ʻe he kau Palotisaní ʻa e kau Palotisani. Kuo aʻu ʻo tāpuakiʻi ʻe he kau taki lotu Katoliká mo e Palotisaní ʻa e kau taú mo e ngaahi meʻataú. Lolotonga ʻa e Tau II ʻa Māmaní, ko e anga-fakamamahi ko eni ʻi he lotolotonga ʻo e kakai ʻoku nau ui kinautolu ko e kau Kalisitiané kuo toutou hoko.

2, 3. Ko e hā naʻe fai ʻe he Kau Fakamoʻoni ʻa Sihová ʻi he lolotonga ʻa e tau ua ʻa māmaní pea mo e ngaahi tau kehe hili iá? Ko e hā hono ʻuhingá?

² Ko e hā naʻe fai ʻe he Kau Fakamoʻoni ʻa Sihová ʻi he lolotonga ʻa e Tau II ʻa Māmaní? Naʻa nau hanganaki tuʻu-ʻatā. Naʻe ʻikai ke nau kau ʻi he tau ko ia ʻi he vahaʻa ʻo e ngaahi puleʻangá. Ko e hā hono ʻuhingá? Koeʻuhí naʻa nau loto ke talangofua ki he ngaahi akonaki ʻa Sīsuú pea faʻifaʻitaki ki he founga ʻene ʻofa ki he niʻihi kehé. Naʻe pehē ʻe Sīsū: “ʻI he meʻá ni ʻe ʻilo ai ʻe he faʻahinga kotoa ko kimoutolú ko ʻeku kau ākonga, ʻo kapau ʻoku mou maʻu ʻa e ʻofá ʻi homou lotolotongá.” (Sione 13:35) Naʻe toe manatuʻi ʻe he Kau Fakamoʻoní ʻa e ngaahi tefitoʻi moʻoni mei he ngaahi lea ʻa Paula ki he kau Kolinitoó pea ngāueʻaki ʻa e ngaahi tefitoʻi moʻoni ko ení ʻi honau tuʻungá tonu.—Lau ʻa e 2 Kolinitō 10:3, 4.

³ ʻOku ngāueʻaki ʻe he kau Kalisitiane moʻoní ʻa e Tohi Tapú ko ha tataki ki he meʻa ʻoku tonú mo e meʻa ʻoku halá, ko ia ʻoku ʻikai fakaʻatā kinautolu ʻe honau konisēnisí ke ʻalu ki he taú pe ako tau. Koeʻuhí ʻoku feinga ʻa e Kau Fakamoʻoni ʻa Sihová ke moʻui ʻi he tuʻunga ko e kau Kalisitiane moʻoni, ko e laui afe ʻo kinautolu kuo fakatangaʻi. Ko e kei siʻi mo e taʻumotuʻa, tangata mo e fefine, kuo nau faingataʻaʻia ʻi he pilīsoné mo e ngaahi kemi ngāue fakamamahí. ʻI he he tau ua ʻa māmaní ʻi he taimi naʻe pule ai ʻa e kau Nasí ʻi Siamané naʻe aʻu ʻo tāmateʻi ʻa e niʻihi. Lolotonga ʻa e kotoa ʻo e fakatanga ʻi ʻIulopé, naʻe ʻikai ʻaupito ngalo ʻi he Kau Fakamoʻoni ʻa Sihová honau fatongia ke malangaʻi ʻa e ongoongo lelei ʻo e Puleʻanga ʻo Sihová. Naʻa nau hanganaki malanga ʻi he taimi pē naʻe ala lava aí, naʻa mo e taimi ʻo e tuku pilīsoné mo e ʻi he ngaahi kemi fakamamahí pea mo e taimi naʻe fakaheeʻi ai kinautolú.a ʻI he ngaahi taʻu ki mui ai, ʻi he 1994, naʻe ʻikai kau ʻa e Kau Fakamoʻoní ʻi he tāmate fakatokolahi ʻi Luanitaá. Naʻa nau toe nofoʻaki tuʻu-ʻatā foki ʻi he tau naʻe fakamavahevaheʻi ai ʻa ʻIukosilāvia ki muʻá.

4. ʻI he taimi ʻoku sio ai ʻa e kakaí ki he tuʻu-ʻatā ʻa e Kau Fakamoʻoni ʻa Sihová, ko e hā ʻoku nau faʻa leaʻakí?

⁴ Koeʻuhí kuo tuʻu-ʻatā ʻa e Kau Fakamoʻoni ʻa Sihová lolotonga ʻa e ngaahi taimi taú, ko e kakai tokolahi takatakai ʻi he māmaní ʻoku nau pehē ko e Kau Fakamoʻoní ʻoku nau ʻofa moʻoni ki he ʻOtuá mo honau kaungāʻapí pea ko e kau Kalisitiane moʻoni kinautolu. Ko e hā ʻa e ngaahi ʻuhinga kehe ʻe niʻihi ʻoku tui ai ʻa e kakaí ko e Kau Fakamoʻoni ʻa Sihová ko e kau Kalisitiane moʻoni?

KO E NGĀUE FAKAEAKO LAHI TAHA ʻI HE HISITŌLIÁ

5. Ko e hā ʻa e liliu naʻe pau ke feʻunuʻaki ki ai ʻa e kau ākonga ʻa Sīsuú?

⁵ Naʻe ʻai ʻe Sīsū ke mahino ki he niʻihi kehé ko e malangaʻi ʻo e ongoongo lelei ʻo e Puleʻanga ʻo e ʻOtuá ʻa e ngāue mahuʻinga taha ʻi he māmaní. Hili pē ʻene kamataʻi ʻene ngāue fakafaifekaú, naʻá ne fili ʻene kau ākonga ʻe toko 12 ke kamataʻi ʻa e ngāue fakamalanga ko eni ʻa ia ʻe fakahoko ki mui ange ʻi he kotoa ʻo e māmaní. Hili iá, naʻe akoʻi ʻe Sīsū ʻa e kau ākonga ʻe toko 70 kehe. (Luke 6:13; 10:1) Naʻe akoʻi ʻe Sīsū ʻene kau ākongá ki he founga ke faiako aí. Naʻá ne ʻuluaki fakahinohinoʻi kinautolu ke akoʻi ʻa e kau Siu kehé, ka naʻá ne tala ange ki mui ai ke nau kamata malangaʻi ʻa e ongoongo leleí ki he kakai ʻo e ngaahi puleʻanga kehé. Ki he kau ākonga Siú, ko e malanga ki he kakai naʻe ʻikai ko e kau Siú ko ha liliu lahi ia!—Ngā. 1:8.

6. Ko e hā naʻá ne tokoniʻi ʻa Pita ke mahinoʻi ʻoku ʻikai ongoʻi ʻe he ʻOtuá ʻoku lelei ange ha matakali ʻe taha ʻi he taha?

⁶ Ko e fuofua tokotaha ʻikai ko ha Siu taʻekamu ke hoko ko ha Kalisitiané ko Koliniusi. Ko e ʻapositolo ko Pitá naʻe fekauʻi ʻe Sihova ke malanga kia Koliniusi ʻi hono ʻapí. Naʻe mahinoʻi leva ʻe Pita ʻoku ʻikai ongoʻi ʻe he ʻOtuá ʻoku lelei ange ha matakali ʻe taha ʻi he taha. Ko e finangalo ia ʻo Sihová ke fanongo ʻa e kakai mei he ngaahi puleʻangá ki he moʻoní pea tali ia. Ko ia naʻe fekauʻi ʻe Pita ke papitaiso ʻa Koliniusi mo hono fāmilí. (Ngā. 10:9-48) Mei he ʻaho ko iá ʻo faai mai, naʻe malanga ʻa Pita mo e toenga ʻo e kau ākonga ʻa Sīsuú ki he kakai ʻo e ngaahi puleʻangá kotoa.

7, 8. Ko e hā kuo fai ʻe he Kau Fakamoʻoni ʻa Sihová ke tokoni ki he kakaí ke nau fanongo ki he ongoongo leleí? (Sio ki he ʻuluaki fakatātā ʻi he kupú ni.)

⁷ ʻI hotau ʻahó ni, ko e faʻahinga ʻoku nau takimuʻa ʻi he kautaha ʻa Sihová ʻoku nau poupouʻi faivelenga mo fokotuʻutuʻu ʻa e ngāue fakamalangá mo hono akoʻi ʻa e ongoongo leleí takatakai ʻi he māmaní. ʻOku meimei toko valu miliona he taimí ni ʻa e Kau Fakamoʻoni ʻa Sihova ʻi māmani lahí. ʻOku nau malanga faivelenga ʻi he ngaahi lea ʻe 600 tupu, pea ʻoku hokohoko atu ke tupu ʻa e fika ko ení. ʻOku nau malanga mei he fale ki he fale pea ʻi he halá. ʻI heʻenau faifakamoʻoní, ʻoku nau ngāueʻaki ʻi he taimi ʻe niʻihi ʻa e ngaahi tēpile mo e ngaahi meʻa tuʻuaki-tohi fakavaʻe ke fakaʻaliʻali ai ʻa e ʻū tohí ʻi he ngaahi lea lahi. ʻE lava ke fakatokangaʻi ʻe he kakaí ʻa e Kau Fakamoʻoni ʻa Sihová koeʻuhí ko kinautolu pē ʻoku nau malanga ʻi he ngaahi founga kotoa ko ení.

⁸ Kuo akoʻi ʻe he kautaha ʻa Sihová ʻa e fanga tokoua mo e fanga tuofāfine ʻe toko 2,900 tupu ke nau liliu ʻa e Tohi Tapú mo e ʻū tohi Fakatohitapú. Ko e ʻū tohi ko ení ʻoku aʻu ʻo liliu ia ki he ngaahi lea ʻoku ʻikai loko ʻiloa. Ko e fakatātaá, ko e Kau Fakamoʻoni ʻa Sihova ʻi Sipeiní ʻoku nau liliu he taimí ni ʻa e ʻū tohi Fakatohitapú ki he lea faka-Katalaní. ʻIkai fuʻu fuoloa mei ai, naʻe kamata ʻa e kakai tokolahi ange ke ngāueʻaki ʻa e lea faka-Katalaní ʻi he ngaahi kolo ʻo Valencia mo Alicante, ʻi he ʻOtu Motu Balearic pea pehē foki ki he fonua ko ʻEnitolá. ʻI he ʻahó ni ʻoku laui miliona ʻa e kakai ʻoku nau lea faka-Katalani. Koeʻuhi ko e ngāue liliu lea kuo fai ʻe he Kau Fakamoʻoni ʻa Sihová, ʻoku maʻu ʻe he kakai lea faka-Katalaní ʻa e ʻū tohi mo e ngaahi fakataha ʻi he lea ʻoku aʻu ki honau lotó.

9, 10. Ko e hā ʻa e ngaahi fakatātā ʻoku fakamoʻoniʻi ai ʻoku loto ʻa e kautaha ʻa Sihová ke ako ʻe he kakai kotoa ʻa e moʻoní?

⁹ Ko e ngāue ko eni ʻo hono liliu ʻa e ʻū tohi Fakatohitapú mo hono akoʻi ʻa e kakaí ʻi heʻenau leá tonu ʻoku fakahoko ʻi māmani lahi. Ko e fakatātaá, ʻi Mekisikou ko e tokolahi taha ʻo e kakaí ʻoku nau lea faka-Sipeini, ka ko e tokolahi ʻoku nau tupu hake ʻo lea ʻi ha lea kehe ʻi ʻapi. Ko e taha ʻi he ngaahi lea ko ení ko e lea faka-Meiá. Ko e timi liliu lea faka-Meiá naʻe vaheʻi ke nau nofo ʻi he feituʻu ʻo e fonuá ʻa ia ʻoku leaʻaki ai ʻa e lea faka-Meiá. Koeʻuhí ʻe lava ke fanongo mo leaʻaki ai ʻe he kau liliu leá ʻa e lea faka-Meiá ʻi he ʻaho kotoa, ko e ʻū tohí ʻoku liliu ia ʻi ha founga ʻe malavangofua ke mahinoʻi ʻe he kakai lea faka-Meiá. Ko e fakatātā ʻe taha ko Nepolo. ʻI he fonua ko iá, ko e lea kehekehe ʻe 120 nai ʻoku leaʻaki aí. Ko e tokolahi ʻo Nepoló ʻoku laka hake ʻi he 29 miliona. Laka hake ʻi he kakai ʻe toko 10 miliona ʻi ai ʻoku nau lea faka-Nepolo ko ʻenau ʻuluaki leá ia, mo e tokolahi kehe ʻoku nau lea faka-Nepolo ko ʻenau lea fika uá ia. ʻOku liliu ʻe hotau fanga tokouá ʻa e ʻū tohi Fakatohitapú ki he lea faka-Nepoló.

¹⁰ Ko e ngāue liliu lea kuo fakahoko ʻi he ʻaho ní ʻi he ngaahi lea lahi ʻoku fakamoʻoniʻi ai ʻoku fakahoko fakamātoato ʻe he kautaha ʻa Sihová honau fatongia ke malangaʻi ʻa e ongoongo leleí ʻi māmani lahi. Kuo tufaki ʻe he Kau Fakamoʻoni ʻa Sihová ʻa e ngaahi tuleki, ngaahi polosiua, mo e ngaahi makasini ʻe laui miliona ka ʻoku ʻikai ke nau fakatau ʻa e ʻū tohi ko ení. ʻI hono kehé, ʻoku poupouʻi ʻe he Kau Fakamoʻoní ʻa e ngāue ko ení ʻaki ʻenau ngaahi tokoni loto-fiefoakí. ʻOku nau muimui ʻi he fakahinohino ʻa Sīsū: “Kuo mou maʻu taʻetotongi, foaki taʻetotongi.”—Māt. 10:8.

11, 12. Koeʻuhi ʻoku tau malanga mo faiako takatakai ʻi he māmaní, ko e hā ʻoku leaʻaki ʻe he kakai tokolahi?

¹¹ ʻOku mātuʻaki tuipau ʻa e Kau Fakamoʻoni ʻa Sihová ʻoku nau maʻu ʻa e moʻoní ʻo nau fai ai ʻa e ngaahi feilaulau fakafoʻituitui lahi koeʻuhí ke malanga ki he kakai ʻo e ngaahi fonua mo e ngaahi anga fakafonua kotoa pē. Kuo fakafaingofuaʻi ʻe he Kau Fakamoʻoni tokolahi ʻenau moʻuí, ako ha lea kehe, pea feʻunuʻaki ki ha anga fakafonua kehe. Koeʻuhí ʻoku tau malanga mo faiako takatakai ʻi he māmaní, ko e kakai tokolahi ʻoku nau pehē ko e Kau Fakamoʻoni ʻa Sihová ko e kau muimui moʻoni ia ʻo Sīsū Kalaisí.

¹² ʻOku fai ʻe he Kau Fakamoʻoní ʻa e kotoa ʻo e meʻá ni koeʻuhí ʻoku nau tuipau kuo nau maʻu ʻa e moʻoní. Ka ko e hā naʻá ne fakatuipauʻi moʻoni hotau fanga tokoua mo e fanga tuofāfiné kuo nau maʻu ʻa e moʻoní?—Lau ʻa e Loma 14:17, 18.

ʻUHINGA ʻOKU NAU TUIPAU AI KUO NAU MAʻU ʻA E MOʻONÍ

13. ʻOku anga-fēfē hono tauhi ʻe he Kau Fakamoʻoní ʻenau kautahá ke maʻá?

¹³ ʻOku ʻomai ʻe hotau fanga tokouá mo e fanga tuofāfiné ʻa e ngaahi ʻuhinga kehekehe ki heʻenau tuipau kuo nau maʻu ʻa e moʻoní. Naʻe pehē ʻe ha tokoua ʻe taha kuó ne tauhi kia Sihova ʻi ha taimi fuoloa: “Kuo fai ʻa e feinga kotoa pē ke tauhi ke maʻa fakaeʻulungaanga mo taʻeʻuliʻi ʻa e kautaha ʻa Sihová, ʻo tatau ai pē pe ko hai kuo akonakiʻí.” ʻOku anga-fēfē tauhi ʻe he kakai ʻa Sihová ʻa e tuʻunga māʻolunga ko ení? Ko e tokotaha taki taha ʻo kinautolu ʻokú ne fai hono lelei tahá ke talangofua ki he meʻa ʻoku leaʻaki ʻe he ʻOtuá ʻi he Tohi Tapú pea faʻifaʻitaki kia Sīsū mo ʻene kau ākongá. Ko ha kiʻi tokosiʻi pē ʻo e Kau Fakamoʻoní kuo nau fakafisi ke muimui ki he ngaahi tuʻunga ʻa e ʻOtuá ki he tonú mo e halá pea pau ke tuʻusi kinautolu, ʻa ia, ko hono toʻo mei he fakatahaʻangá. Ko e tokolahi taha ʻo e Kau Fakamoʻoni ʻa Sihová ʻoku nau moʻui ʻi ha founga ʻoku maʻa ʻi he ʻao ʻo Sihová. Ko e tokolahi naʻa nau fai ʻi he kuohilí ʻa e ngaahi meʻa naʻe ʻikai fakahōifua ki he ʻOtuá kuo nau liliu pea muimui he taimí ni ʻi he ngaahi tuʻunga ʻa e ʻOtuá.—Lau ʻa e 1 Kolinitō 6:9-11.

14. Ko e hā ʻa e ngaahi liliu kuo fai ʻe he kakai tokolahi hili hono toʻo kinautolu mei he fakatahaʻangá? Ko e hā ʻa e olá?

¹⁴ ʻOku tataki ʻe he Tohi Tapú ʻa e kau Kalisitiané ke toʻo mei he fakatahaʻangá ʻa e faʻahinga ʻoku nau fakafisi ke talangofua ki he ʻOtuá. Ko e meʻa fakafiefiá, kuo ongoʻi fakatomala moʻoni ʻa e laui afe ki mui ai koeʻuhí ko ʻenau ngaahi tōʻongá pea nau foki mai. (Lau ʻa e 2 Kolinitō 2:6-8.) Koeʻuhí ʻoku ngāueʻaki maʻu pē ʻe he Kau Fakamoʻoní ʻa e Tohi Tapú ko ha tataki ki heʻenau tōʻongá, ʻoku tauhi ai ʻa e fakatahaʻangá ke maʻa. ʻOku fakapapauʻi heni kia kinautolu ko ʻenau kautahá ʻoku hōifua ki ai ʻa e ʻOtuá. Neongo ʻoku fakaʻatā ʻe he ngaahi lotu lahi honau kau mēmipá ke fai ha meʻa pē ʻoku nau loto ki ai, ko e Kau Fakamoʻoní ʻoku nau moʻui ʻo fehoanaki mo e ngaahi tuʻunga ʻa Sihová. Kuo fakatuipauʻi heni ʻa e kakai tokolahi ko e Kau Fakamoʻoni ʻa Sihová ʻoku nau maʻu ʻa e moʻoní.

15. Ko e hā ʻokú ne fakatuipauʻi ha tokoua ʻe taha kuó ne maʻu ʻa e moʻoní?

¹⁵ Ko e hā ʻoku tui ai ʻa e Kau Fakamoʻoni ʻe niʻihi kuo nau maʻu ʻa e moʻoní? Ko e tokoua ʻe taha ʻa ia ʻoku taʻu 54 kuó ne tauhi kia Sihova mei heʻene kei talavoú. ʻOkú ne pehē ko ʻene tuí ʻoku makatuʻunga ʻi he moʻoniʻi meʻa mahuʻinga ʻe tolu pe pou: (1) ʻoku ʻi ai ʻa e ʻOtuá, (2) ko e Tohi Tapú ko e haʻu mei he ʻOtuá, pea (3) ko e Kau Fakamoʻoni pē ʻa Sihová ʻoku nau fai ʻa e finangalo ʻo e ʻOtuá ʻi he māmaní he ʻahó ni. ʻOkú ne pehē: “ʻI heʻeku ako ko eni ʻi he faai mai e ngaahi taʻú, kuó u feinga maʻu pē ke sivisiviʻi ʻa e ngaahi pou ko iá pea ʻeke hifo kiate au pe kuo nau ʻi ha makatuʻunga fefeka. Ko e fakamoʻoni taki taha ʻo kinautolú kuo tupulaki ʻaupito ʻi he faai mai e ngaahi taʻú, ʻo fakaivimālohiʻi ai ʻeku tuí pea fakalolotoʻi ʻeku tuipau ʻoku tau maʻu moʻoni ʻa e moʻoní.”

16. Ko e hā ʻoku tuipau ai ha tuofefine ʻe taha kuó ne maʻu ʻa e moʻoní?

¹⁶ Ko ha tuofefine ʻosi mali ʻoku ngāue ʻi he ʻuluʻi ʻapitanga ʻi māmani lahi ʻo e Kau Fakamoʻoni ʻa Sihová ʻi Niu ʻIoké naʻá ne lave ki he meʻa naʻá ne fakatuipauʻi ia kuó ne maʻu ʻa e moʻoní. ʻOkú ne pehē ko e kautaha pē ʻa Sihová ʻoku nau tala ki he niʻihi kehé fekauʻaki mo e huafa ʻo Sihová, ʻa ia ʻoku ʻi he Tohi Tapú ʻo tuʻo 7,000 nai. ʻOku toe fakalototoʻaʻi ia ʻe he konga Tohi Tapu ʻi he 2 Kalonikali 16:9, ʻa ia ʻoku pehē: “He ko e ongo foʻi fofonga ʻo e ʻEiki ʻoku feleleaki ʻi mamani katoa, ke taukapoʻi ʻa e kakai ʻoku haohaoa loto kiate ia.” ʻOkú ne pehē: “Kuo fakahaaʻi mai kiate au ʻe he moʻoní ʻa e founga ke maʻu ai ha loto-haohaoa pe loto-kakato kae lava ʻe Sihova ʻo fakahaaʻi tauʻatāina mai hono mālohí kiate au. Ko hoku vahaʻangatae mo Sihová ʻoku mahuʻinga taha kiate aú. Pea ʻoku ou houngaʻia ʻi he ngafa ʻo Sīsū ʻi hono tokonaki mai ʻa e ʻilo makehe ki he ʻOtuá ʻa ia ʻokú ne tokoniʻi aú.”

17. Ko e hā ʻoku tuipau ki ai ha tokoua ʻa ia ko ha tokotaha fakaʻikaiʻi-ʻOtua ki muʻa, pea ko e hā hono ʻuhingá?

¹⁷ Ko ha tokoua ʻa ia ko ha tokotaha fakaʻikaiʻi-ʻOtua ki muʻa naʻá ne pehē: “ʻOku fakatuipauʻi au ʻe he fakatupú ʻoku loto ʻa e ʻOtuá ke maʻu ʻe he faʻahinga ʻo e tangatá ʻa e moʻuí pea ko ia ai heʻikai te ne fakaʻatā ʻa e faingataʻá ke hokohoko atu ʻo taʻengata. Pehē foki, ʻi he fakaʻaʻau atu ʻa e māmaní ke anga-taʻefakaʻotua angé, ko e kakai ʻa Sihová ʻoku nau fakalakalaka ʻi he tui, faivelenga mo e ʻofa. Ko e laumālie pē ʻo Sihová ʻe lava ke ne fai ʻa e mana ko ení ʻi onopooni.”—Lau ʻa e 1 Pita 4:1-4.

18. Ko e hā ʻoku tui ai ha ongo tokoua kuó na maʻu ʻa e moʻoní? ʻOku anga-fēfē hoʻo ongoʻi fekauʻaki mo iá?

¹⁸ Ko ha tokoua ʻe taha kuó ne ʻi he moʻoní ʻi ha taimi fuoloa ʻokú ne ʻomai ʻa e ngaahi ʻuhinga ki heʻene tui kuó ne maʻu ʻa e moʻoní: “Ko ʻeku ako ʻi he faai mai ʻa e ngaahi taʻú kuó ne fakatuipauʻi au ko e Kau Fakamoʻoní kuo nau fai ʻa e ngaahi feinga fakamātoato ke foki ki he faʻifaʻitakiʻanga ʻa e lotu faka-Kalisitiane ʻi he ʻuluaki senitulí. Kuó u siotonu ki he fāʻūtaha ʻi māmani lahi ʻa e Kau Fakamoʻoni ʻa Sihová ʻi heʻeku folau holo ʻi he māmaní. Ko e moʻoni mei he Tohi Tapú kuó ne ʻomai kiate au ʻa e fiemālie mo e fiefia.” Naʻe pehē ʻe ha tokoua ʻoku taʻu 60 tupu ko e Kau Fakamoʻoni ʻa Sihová ʻoku nau tui moʻoni kia Sīsū. Naʻá ne fakamatala: “Kuo tau ako fakalelei ʻa e moʻui mo e ngāue fakafaifekau ʻa Sīsuú pea houngaʻia ʻi heʻene faʻifaʻitakiʻangá. Kuo tau fai ʻa e ngaahi feʻunuʻaki ʻi heʻetau tōʻonga moʻuí ke ʻunuʻunu ofi ange ki he ʻOtuá fakafou ʻia Sīsū Kalaisi. Kuo tau ʻiloʻi ʻa e feilaulau huhuʻi ʻa Kalaisí ko e makatuʻunga ia ki he fakamoʻuí. Pea ʻoku tau ʻiloʻi naʻe fokotuʻu hake ia mei he maté. Kuo tau maʻu ʻa e fakamoʻoni siotonu falalaʻanga ki he ngaahi moʻoniʻi meʻa ko iá.”—Lau ʻa e 1 Kolinitō 15:3-8.

TALA KI HE NIʻIHI KEHÉ ʻA E MOʻONÍ

19, 20. (a) Ko e hā ʻa e fatongia naʻe lave ki ai ʻa Paula ʻi heʻene tohi ki he fakatahaʻanga ʻi Lomá? (e) Ko e hā ʻoku fiemaʻu ke fai ʻe he kotoa ʻo e kau sevāniti ʻa Sihová?

¹⁹ ʻOku ʻofa moʻoni ʻa e kau Kalisitiane moʻoní ki he kakaí. Ko e ʻuhinga ia kuo pau ai ke tau tala ki he niʻihi kehé ʻa e moʻoni kuo tau akó. Naʻe tala ʻe Paula ki he fakatahaʻanga ʻi Lomá ko e kau muimui moʻoni ʻo Sīsuú ʻoku nau maʻu ʻa e fatongia ke malangá. Naʻá ne tohi: “Kapau ʻokú ke talaki fakahāhā ʻa e ‘pōpoaki ko iá ʻi ho ngutú tonu,’ ʻa e pehē ko ia ko Sīsū ʻa e ʻEikí, peá ke ngāueʻi ʻa e tui ʻi ho lotó naʻe fokotuʻu hake ia ʻe he ʻOtuá mei he maté, ʻe fakahaofi koe. He ko e lotó ʻoku fai ʻaki ʻe ha taha ʻa hono ngāueʻi ʻo e tuí ke maʻu ai ʻa e māʻoniʻoní, ka ko e ngutú ʻoku fai ʻaki ʻe ha taha ʻa e talaki fakahāhaá ke maʻu ai ʻa e fakamoʻuí.”—Loma 10:9, 10.

²⁰ ʻOku tuipau ʻa e Kau Fakamoʻoni ʻa Sihová kuo nau maʻu ʻa e moʻoní pea ʻiloʻi ko ha monū ia ke akoʻi ʻa e niʻihi kehé fekauʻaki mo e ongoongo lelei ʻo e Puleʻanga ʻo e ʻOtuá. Ko ia ʻai ko hoʻo taumuʻá ia ke ʻikai ngata pē hono akoʻi ʻa e niʻihi kehé fekauʻaki mo e Tohi Tapú kae toe fakahaaʻi foki kia kinautolu ʻaki hoʻo founga moʻuí ʻokú ke tuipau kuó ke maʻu ʻa e moʻoní.